হকশেল অমসুং য়াইফ-য়ুম্বাল মন্ত্রালয়

দা. হর্শ ভর্ধন্না ইন্দিয়ন রেদ ক্রোস্তা থলাসেমিয়া স্কৃনিং অমসুং কাউন্সেল্লিং সেন্তর হাংদোকখ্রে

Posted On: 18 AUG 2020 5:58PM by PIB Imphal

কেন্দ্রগী হকশেল অমসুং য়াইফ- য়ুম্বাল মন্ত্রী দা. হর্শ ভর্ধন্না ইন্দিয়ন রেদ ক্রোস সোসাইতীগী নেসনেল হেদক্বার্তর (আই.আর.সি.এস.এন.ঐচ.ক্যু.) ব্লদ বেঙ্কতা ঙসি থলাসেমিয়া স্কৃনিং অমসুং কাউন্সেলিং সেন্তর অমা হাংদোকখ্রে।

সেন্তর অসিবু হৌদোকপদা নুংঙাইবা ফোংদোক্লদুনা দা. হর্শ ভর্ধন্না ইন্দিয়ন রেদ ক্রোস সোসাইতীনা হোৎনরিবশিং অসিবু থাগৎপা ফোংদোকখি। অসিগুম্বা খোংথাং অসিনা "ঐখোয়বু শাধারন মীয়ামদা লাইনা অসিবু ঙাকথোক্নবা পরা পীবা ঙম্লগনি" হায়খি।

কেন্দ্রগী হকশেল মন্ত্রীনা হায়খি মদুদি মালেমদা থলাসেমিয়া অনাবা মীওই মিল্লিয়ন ২৭০রোম লৈ। ভারতনা থলাসেমিয়া নাবা অঙাং মশীং খ্বাইদগী য়াম্না লৈ, লাখ ১দগী ১.৫ ফাওবা লৈবগী মনুংদা অঙাং ১০,০০০দগী ১৫,০০০ রোমদি থলাসেমিয়াগা লোইননা চহী খুদিংগী পোকই। অসিগুম্বা অঙাংশিং অসিবু কন্নবগী অমত্তা ঙাইরবা উপাইদি বোন মেরো ত্রান্সপ্লান্ত তৌবনি। অদুমওইনমক বোন মেরো ত্রান্সপ্লান্ত তৌবা হায়বসি অরুবা অমনি অমসুং অঙাং খুদিংমক্কী মপা-মমানা হেক্তমক শেল পুথোকপা ঙম্বা নত্তে। মরম অসিনা, লাইয়েংবগী পথাপ অসি হঞ্জিন হঞ্জিন্না ঈ কাপ্পনি, মসিগী মতুংদা আইরনগী চাং হেন্না য়াওরিবদু লৌথোক্নবগীদমক চাং নাইনা আইরন কেলেসন থেরাপী তৌবনি, মসিনা মরম ওইদুনা ঈ তোইনা কাপ্পা তঙাইফদ্রিবনি।

দা. হর্শ ভর্ধন্না হায়খি মদুদি আই.আর.সি.এস.কী অনৌবা খোংথাং অসিনা নারবা মীওইশিংদা মতীক চানা লাইয়েং চত্থবীদুনা শাফবা পুন্সি অমা হিংহনবা ঙম্লগনি অমসুং কেরিয়র স্কৃনিং, জেনেতিক কাউন্সিলিং অমসুং প্রিনাতাল দাইগ্নোসিস তৌদুনা হেমোগ্লোবিনোপেথিগা লোইননা অঙাং পোকপা হন্থহনগনি। মহাক্না হায়খি, "থৌরাং অসিনা মতীক চানা প্লান তৌরবা স্কৃনিং প্রোগ্রাম, ঈ পাউ পীবীবা, অমসুং ভাপ তাহন্নবগী থবক লৌখত্তুনা অমসুং হেমোগ্লোবিনোপেথিগা লোইননা অঙাং পোকপা হন্থহল্লগনি অমসুং মসিনা পোকপদগী হৌনা অশোইবা লৈদুনা হকশেলগী অরুবা লাইওংশিংবু মতম চানা থিংহৌবা ঙম্লগনি। অসিগুম্বা চাউখৎনিংঙাই ওইবা থৌরাংশিং অসিগা লোইননা, ঐখোয়না প্রধান মন্ত্রীনা ২০২২ ফাওবদা মংজরিবা অনৌবা ভারতকী মংলান অসিসু মংফাওনবা ঙমহল্লগনি।"

থলাসেমিয়া অমসুং সিক্কল সেল দিজিজগুম্বা হেমোগ্লোবিনোপেথিগী লাইনাশিং অসি রেদ ব্লদ সেলদা য়াওদুনা লাকপা অশোইবা অমনি অমসুং হায়রিবসি থিংহৌবা ঙমগনি। অসিগুম্বা লাইনাশিং অসি মতম কুইনা নাদুনা লৈ, পুন্সিদা নাম্মা শোইহল্লি, অমসুং করিগুম্বা মতাং খরদনা শিবফাওবা য়াওই অমসুং মসিনা মরম ওইদুনা ৱাখল হকচাং অমসুং ইমুংদা শেলথুমগী ওইবা অৱাবা কয়া পী। ভারত্তা থলাসেমিয়া মেজর অমসুং থলাসেমিয়া ইন্তর্মেদিয়া (তি.আই.)না লাইনা অসিগী অচৌবা পোৎলুম অমা ওইরি। হায়রিবা অনীমকসি পুন্সি চুপ্পা ঈ কাপতুনা অমসুং চাং নাইনা আইরন কেলেসন তৌদুনা লাইয়েং চত্থৈ। হায়রিবা থলাসেমিয়াশিংগী সিন্দ্রোম অসি মমা-মপা অনীমক্তগী এবনোর্মেল (বিতা) থলাসেমিয়া জিন নত্ত্রগা মমা-মুপা অমদগী এবনোর্মেল বিতা থলাসেমিয়া জিন অমসুং অতোপ্পা মপা নত্ত্রগা মমাদগী এবনোর্মেল ভেরিএন্ত হেমোগ্লোবিন জিনদগী য়াওরক্তুনা থোকহল্লি।

শ্রী আর.কে. জৈন, সেক্রেতরী জেনরেল, আই.আর.সি.এস. অমসুং আই.আর.সি.এস.কী মীহুৎশিং, থলাসেমিক্স ইন্দিয়া অমসুং হকশেল মন্ত্রালয়দগী মীহুৎশিংনা হৌদোকপগী থৌরম অদুদা শরুক য়াখি।

*******



(Release ID: 1646764) Visitor Counter : 82