কেন্দ্রগী হকশেল অমসুং য়াইফ-য়ুম্বাল মন্ত্রী দা. হর্শ বর্ধন্না ঙসি দিল্লীগী এ.আই.আই.এম.এস.তা ভোলুন্তরী ব্লদ দোনেসনগী কেম্পেন অমা হৌদোকখ্রে। এইমস্না নীংখা তমখিবা নুমিৎ অসিদা শীনবা কেম্প অসিবু লৈবাক অসিগী মরৈবাক অমসুং মজাতি কন্নবগীদমক হোৎনবদা থৱাই থাখ্রবা লান্মীশিং অমসুং কোবিদ ৱারিয়রশিংদা কত্থোক্লি। ইমুং অনীখক মখোয়না অথোইবা মীথুংলেন ওইনা কৌখৎচখি – অমনা থৱাই থাখ্রবা লান্মী অমসুং অমনা এইমসকী কোবিদ ৱারিয়রগী ইমুং অমনি।

দা. হর্শ বর্ধন্না ঈ দান তৌবগী কেম্পেন অদু রিবোন কক্তুনা অমসুং দা. রন্দীপ গুলেরা, দিরেক্তর এইমস অমসুং অতোপ্পা মকোক থোংবা দোক্তরশিংগা লোইননা মৈ চুখৎমিন্নদুনা হৌদোকখি। কেন্দ্রগী হকশেল মন্ত্রীনা ঈ দান তৌখিবা মীওইশিংগা ৱারী ৱাতাই শানখি অমসুং মখোয়বু ঈ দান তৌবগী থৌরম অদুদা শরুক য়াদুনা কত্থোকপীখিবগীদমক সর্তিফিকেৎ অমমম পীখি। মহাক্না দোক্তর অমসুং হেলথ কেয়র ৱার্করশিংবু মখোয় মশামক চোংথোক্তুনা ঈ দান তৌদুনা অনাবশিংগী পুন্সি কন্নবগীদমক নীংখা তমখিবা নুমিত্তা পুক্নিং চিংশিনখি। দা. হর্শ বর্ধন্না কেম্প অদুদা ফেস সিল্দ, মাস্ক, গ্লব অসিনচিংবশিং য়াওনা চেকশিল থৌরাং কয়া লৌখৎপা উবদা অপেনবা ফোংদোকখি।

এইমসনা লৌখৎলিবা থৌরাংশিং অসিবু থাগৎপা ফোংদোক্লদুনা দা. হর্শ বর্ধন্না হায়খি, "ঐখোয়গী নীংখা তমখিবা নুমিৎকী ৭৩ শুবা নুমিৎ অসিদা শীল্লিবা ঈ দান তৌবগী কেম্প অসি কোবিদ থেংনবদা লৈখিদ্রবা কোৎ অঙৌবা লীৎপশিং অমসুং কার্গিলদা মথ্বাই কৎখ্রবশিংদা কত্থোকচরি। ঐখোয়না দোক্তর, নর্শ নত্ত্রগা পরামেদিকেল স্তাফশিং য়াওনা লাইচৎ অসিদগী পুন্সি কল্লিবা মীওইশিং পুম্নমক্না পীরিবা কত্থোকপগী থবকশিং অসি নিংশিনগদবনি।" থৌরম অসিবু মপুং ফাহন্নবগীদমক এইমস্তা ফ্রন্তলাইন হেলথ ৱার্কর ওইরম্বা লৈখিদ্রবা কোবিদ ৱারিয়র শ্রী হরিলালগীগী ইমুং অমসুং কার্গিলদা লৈখিদ্রবা অথৌবা লেন্স নাইক রজবীর সিংহগী ইমুং মনুংদা মখোয়না কত্থোকখিবা কয়াদুগীদমক ইকাই খুম্নবা উৎখি।

ভোলুন্তরী ব্লদ দোনেসনগী কান্নবশিংবু পল্লদুনা দা. হর্শ বর্ধন্না হায়খি, "কোবিদ-১৯ লাইচৎ, লোকদাউন্না মরম ওইদুনা পীরিবা অথিংবশিং অমসুং হোস্পিতালগী ফিবম্না পীরিবা নুংঙাইতশিং অসি য়েংলুরগা মশানা চোংথোকচরক্তুনা ঈ দান তৌবগী চাং অসি কা হেন্না নেম্লে। ঈ হায়বসিদি খুদক্কী ওইবা সর্জরী, থালাসেমিয়াগুম্বা ঈগী ওইবা লাইনাশিং, ব্লদ কেন্সর অমসুং লম্বীগী ওইবা খুদোংথীবশিং অমসুং ত্রোমাগী কেসশিংদা তঙাই ফদনা চঙলি। অদুমওইনমক মীওইবা খুনাই অসিবু সেবা তৌবগী খ্বাইদগী অথোইবা থবক্তি ঈ দান তৌবনি।" মহাক্না ভারত মচা পুম্নমক্না ঐখোয়গী লান্মীশিংনা কত্থোকখিবশিং অসিবু ঐখোয়গী নোংমগী থবকশিংদা করিগুম্বা খরা তৌদুনা ইকাই খুম্নবা উৎকদবনি।

ভারতনা কোবিদ-১৯গা লান্থেংনরিবসিদা দা. হর্শ বর্ধন্না হায়খি, " ভারতকী লেপ্পা লৈতনা হেনগৎলক্লিবা নাবা ফবগী চাং অমসুং কেস ফেতালিতী রেৎ হন্থরকপনা কোবিদ-১৯ লাকশিন্নবগী থৌরাংশিং অসি প্রধান মন্ত্রীগী মখাদা রাজ্য অমসুং য়ু.তি.শিংনা ঙাক্না চৎলি হায়বসি ময়েক লানা উৎলে। ঐখোয়না ঐখোয়গী তেস্ত তৌবগী ফেসিলিতীশিংসু মতীক চানা হেনগৎহল্লে, মসিনা লৈবাক শীনবা থুংনা তেস্তিং লেব ১৪৫০ লৈবগা লোইননা ঙসিদি লাখ ৮.৪ হেনখ্রে। ঐহাক্কী থমোইদা কোবিদ-১৯ লাইয়েংবা অমসুং ভেক্সিন পুথোকপগী হীরমদা সাইন্তিফিক ওইবা মওংদা খুমাং চাউশিল্লক্লিবসিদা থাজবা থম্মি অমসুং অথুবদা ভারতনা কোবিদ-১৯গা থেংনরিবা লানফম অসি শোইদনা মায় পাক্কনি হায়বসি ঐগী থাজবনি।"

তোঙান-তোঙানবা ফেকলতি অমসুং ভোলুন্তরী ব্লদ দোনরশিংনা থৌরম অদুদা শরুক য়াখি।

*****