খুরুমজরি।

অদোম পুম্নমক্কা ৱারী শান্নবা অসিদা মনুং হঞ্জিনবা ই-পাওশিংসু হেন্না পাক-চাওথোকই, অদুগা অচুম্বা মায়কৈদা চংশিল্লিবরা হায়বসু খংবা ঙম্মি!

লেপ্তনা উন্নবা, ৱা খন্নবা অসি মথৌ তাবসু ওই, মরমদি কোরোনাগী মতম অসি হৌখিবগা লোয়ন-লোয়ননা অনৌবা-অনৌবা ফীভমশিংসু থোকহল্লক্লি!

হোসপিতালদা শাফু পীশিনবা, ঐখোয়গী হকশেলগী থবক তৌরিবশিংদা শাফু পীশিনবা, নুতিগী তৌনরম্বা থবকশিং লেপ্তনা পাংথোকপা ঙম্লক্তবসিনা নুতিগী থেংনরিবা অনৌবা লান্থেংশিং পুদুনা লাক্লি। রাজ্য খুদিংমক্না মাগী-মাগী ঙমজবা থাক্তা লায়চৎ অসি লান্থেংনরিবা অসি উবদা অপেনবা ফাওই অদুগা কেন্দ্র সরকার ওইরো নত্রগা রাজ্য সরকার লেপ্পা লৈতনা তীম অমা ওইনা থবক তৌরি হায়বসি খংই অমদি মসিগী তীমগী ৱাখলোলন অসিনা রিজল্ত অসি ফংহনবদা মাই পাকহল্লি।  অসুক চাওরবা খুদোংথিবা অসিদা ঐখোয়না ময়াম পুন্না থবক তৌমিন্নদুনা লান্থেংনরিবা অসি য়াম্না অচৌবা ৱাফম অমনি। ইকাই খুম্নজরিবা মুখ্য মন্ত্রীজী খুদিংমকপু ঙসি এক্তিব ওইবা কেসশিং অসি চাদা ৮০ ওইরিবা অসি ঙসি উন্নরিবা রাজ্য ১০ অসিদনি। মরম অসিনা কোরোনাগী মোয়োক্তা লান্থেংনরিবা অসিদা রাজ্যশিং অসিগী থৌদাং লৈহল্লি। ঙসি লৈবাক অসিদা এক্তিব কেস অসি লাক্ষ ৬তগী হেনখিবা অসিদা অয়াম্বা কেসশিংদি মসিগী রাজ্যশিং অসিদনি! মরম অসিনা হায়রিবা রাজ্য তরা অসিগা পুন্না ফম্মিন্নদুনা নৈনমিন্নবা, খন্নমিন্নবা অসি মথৌ তাবরা হায়না খল্লি।  অদুগা মখোয়না পাংথোক্লিবা খ্বাইদগী অফবা থবকশিং অদুদা মখোয়না করম-করম্বা মখলগী থৌরাংশিং পায়খৎলি। মসি ময়াম্না খংই মরমদি মীওই খুদিংমক্না মাগী-মাগী ওইবা মওংদা হোৎনরি অমসুং ঙসিগী খন্ন-নৈনবা অসিদগী ঐখোয়না অমনা-অমগী খংহৌ-উহৌশিং অদুদগীসু কয়া অমা তম্বা, খংবা ঙম্লগনি। করিগুম্বা ঐখোয় পুন্না রাজ্য তরা অসিদা কোরোনা অসিবু মাইথিহনবা ঙম্লবদি লৈবাক অসিসু মাই পাকপা ঙম্লগনি হায়বা মসিগী ৱাখল্লোন অসি কদায়দগীনো অমা লাকহল্লি। 

মরূপশিং, তেস্ত তৌবগী মশিং অসি নুমিৎ খুদিংগী হেনগৎলক্তুনা লাক্ষ ৭ য়ৌখ্রে অমদি লেপ্তনসু হেনগৎলক্লি। লায়চৎ অসি মশক খংদোকপা অমদি থিংবদা মতেং ওইরি হায়বগী ফল অসি ঙসি ঐখোয়না খংনরে।  মালেমগা য়েংনরুবদা ঐখোয়গীসিদা এভরেজ ফেতেলিতীগী চাং অসি হান্নদগীসু হৌনা য়াম্না হন্থখি, নুংঙাইরিবা ৱাফমদি মসি লেপ্তনা হন্থরক্লি হায়বসিনি! এক্তিব কেসশিংগী চাদা ওইবা চাং অসি হন্থরক্লে, ফগৎপগী চাং অসি লেপ্পা লৈতনা হেনগৎলক্লি, ফগৎলক্লিবা অসিনা ঐখোয়না হোৎনরিবশিং অসি নিংথিনা মথৌ পাংলি হায়বনি! খ্বাইদগী মরুওইবা ৱাফমদি মসিদগী মীশিংগী মরক্তা থাজবা হেনগৎহল্লক্লি, মশাগী থাজবা হেনগৎলক্লি অমসুং অকিবশিংসু খরা হন্থরক্লি। অমদি তেস্ত তৌবা অসি হেনগৎহল্লবদি ঐখোয়গী মায় পাকপা অসিসু হেন্না হেনগৎহনগনি! অদুগা নুংঙাইবগী ৱাখল অমা লাক্কনি মদুদি ঐখোয়না শিবগী চাং অসি হন্থহন্নবগী থম্লিবা পান্দম অদুদগী খরা হেন্না হোৎনরবদি, অচৌবা ফোকসতা হোৎনরবদি পান্দম অদুসু ফংবা ঙমগনি। হৌজিক ঐখোয় করি তৌগদগে, মতৌ করম্না চংশিনগদগে হায়বসিগী মতাংদসু হেন্না ময়েক শেংনা ঐখোয়দসু খংহল্লক্লি অমসুং গ্রাউন্দ লেভেল অমদসু মীশিংগী ৱাখলদা খংহনখ্রে, করি তৌগদবনো ইনাও, করম্না তৌগদবনো, করম্বা মতমদা তৌগদবনো হায়বসি হিন্দুস্তানগী নাগরিক খুদিংমক্তা য়ৌহনবা ঙম্লি!

হৌজিক য়েংবিয়ু, তেস্তিংগী চাং হন্থবা রাজ্যশিংদা পোজিতিবকী চাং অসি  য়াম্মি, মফমদুদা তেস্তিং তৌবগী চাং অসি হেনগৎহনবগী মথৌ তাই হায়বসি খংলক্লি! মরুওইনা বিহার, গুজরাত, য়ু.পি., নোংচুপ বঙ্গাল অমসুং তেলঙ্গনাদা তেস্তিং অসি হেনগৎহন্নবা মরুওইবা পাৱর অসি পীরবা মতুংদা ঐখোয়গী ৱারী শান্নবা অসিদা থোরক্লি!

মরূপশিং, হৌজিক ফাওবদা কোরোনাগী মায়োক্তা কন্তেনমেন্ত, কন্তেক্ত, ত্রেসিং অমসুং সর্বেলেন্স অসি য়াম্না কান্নবা খুৎলাইনি হায়বসি ঐখোয়না খংলে! হৌজিক লৈবাক মীয়াম্নসু ৱাফম অসি খংনরক্লি, ময়াম্না মপুং ফানা মতেংসু পাংলি। মসিগী ৱাখল লৈবা অসিগীদমক্তা ঐখোয়না হোৎনখিবশিংগী অফবা রিজল্তকী মায়কৈরোমদা ঐখোয় চংশিল্লি। হোম ক্বারেন্তিনগী থৌরাং অসি মসিগী মরম অসিদগী অসুক নিংথিজবা মওংদা চৎনহনবা ঙম্লি। করিগুম্বা হৌরকপগী পুং ৭২গী মনুংদা কেসশিং অসি মশক খংদোকপা ঙম্লবদি লায়চৎ অসি অদুক্কী মতিক য়াম্না খোংজেল তপথখিগনি হায়না হৌজিক অখং-অহৈশিংনা হায়রি। মরম অসিনা ময়াম পুম্নমক্তা ঐহাক্না হায়জরি মদুদি খুৎ হাম্বগী ৱাফম ওইরো, গজ অনি থাপ্না লৈনবগী ৱাফম ওইরো, মাস্ক উপ্পগী ৱাফম ওইরো, মফম অমদা হেক্তা লোক-তিন শিত্তোকপগী হায়জবা ৱাফম ওইরো, মসি খুদিংমক অসিদা সরকারশিংদা অমদি সরকারগী থৌরাংশিংদসু অমসুং কোরোনা লান্থেংনরিবশিংগী মরক্তসু মীয়ামদসু অনৌবা লাইশোন অমা মতম পুম্নমক্তা য়ৌহনগদবনি মদুদি পুং ৭২গী মনুংদা পোজিতিব ওইরবশিংগী মনাক নকপদা লৈবশিং পুম্নমক তেস্ত তৌগদবনি, ত্রেসিং তৌগদনি, মখোয়গীদমক্তা মথৌ তাবশিং অদু থৌরাং তৌগদবনি। মসিগী পুং ৭২গী ফোর্মুলা অসিদা লুম্না লৌরবদি মসিদা অতৈ-অতৈ পোৎশিং অদুসু পুং ৭২গী মনুংদা তৌগদবনি হায়বসি লুম্না লৌগদবনি হায়বসি অদোম্না খংবিয়ু। ঙসি তেস্তিংগী নেতৱর্ক অসিদা নত্তনা আরোগ্য সেতু এপসু ঐখোয়গীদা লৈরে। আরোগ্য সেতুগী মতেংদগী ঐখোয়গী তীম অমনা চাং নাইনা এনালাইসিস তৌরবদি করম্বা মফমদগী ৱাকৎ অসি লাক্লিবনো হায়বসি য়াম্না লাইনা য়ৌবা ঙমগনি। হরিয়ানাগী জিলা খরদা, উত্তর প্রদেশকী জিলা খরদা অমসুং দিল্লীদা অসিগুম্বা য়াম্না ৱানিংঙাই ওইবা হিরম অমা ওইখিবা অরুবা  তানফম অমা লাকখিবা অদু ঐখোয়না উনরে। সরকারনসু দিল্লীদা লাওথোকখিদুনা অচৌবা খুদোংথিবা অমা ওইরক্লগনি ঐহাক্না রিভিয়ু মিতিং অমা তৌগনি অমসদি গৃহ মন্ত্রী অমিত শাহজীনা লুচিংবা তীম অমা শেমখি অমসু ৱাফমশিং পুম্নমক নৌনা পুখৎখি। জিলা মঙাদসু অমসুং সহর মঙাদসু দিল্লীদসু পাম্নখিবা অদুগুম য়াম্না অচৌবা রিজল্ত ফংবা ঙম্লি। অসু য়াম্না লুবা শক্তম অমা ওইনা উবা অদুবু সিস্তেমেতিক ওইবা মওংদা ঐখোয়না মমাংলোমদা চংশিল্লবদি পোৎশিং অসি চয়োল অমদগী নুমিৎ ১০নিফাওবা ঐঙোল্লোমদা ওনশিল্লকপা য়াই অমসুং মসি ঐখোয়না খংনা-উনরবনি অমসুং মসিগী লাল্লোংগীসু পোইন্ত অসি মসি ওইখি, কন্তেনমেন্ত জোনশিং অসি মপুং ওইনা তোঙান্না থমগদবনি, মথৌ তাবদা মাইক্রো কন্তেনমেন্তকীসু তকশিনগদবনি, চাদা চামা স্ক্রীনিং তৌবা, রিক্সো-ওতো থৌবশিং অমসুং য়ুমদা থবক তৌবা মীওইশিং অমসুং চাং ৱাংনা খুদোংথিনিঙাই ওইবা মীওইশিংবু মপুং ফানা স্ক্রীনিং তৌগদবনি। ঙসি হোৎনরিবশিং অসিগী মহৈশিং ঐখোয়গী মাংদা লৈরে! হোসপিতালদা অফবা মেনেজমেন্ত তৌবা, আই.সি.য়ু.গী ফমুংশিংগী মশিং হেনগৎহনবনচিংবশিং অসি লৈহন্নবা হোৎনবশিং অসিনা মতেং য়াম্না পাংলি!

মরূপশিং, খ্বাইদগী হেন্না ফহল্লিবা অসি অদোম পুম্নমক্কী খংলক-উরকপা অদুনি! অদোমগী রাজ্যশিংগী গ্রাউন্দ রিএলিতী অদু লেপ্তনা য়েংশিন্দুনা ফংলকখিবা ফলশিং অদুদগী মায় পাক্নবগী লম্বি অদু ওইরি! ঙসি ঐখোয়না পাংথোকপা ঙম্লিবশিং অসি অদোমগী খংলক-উরকশিংনা মসিদা মতেং য়াম্না ওইরি। মসিগী খংলক-উরকপা অসিগা পাঙ্গলদগী লৈবাক অসিগী লান্থেং অসি মায় পাকপা ঙমগনি অমসুং অনৌবা অমা হৌদোকপা ঙমগনি হায়বসি ঐহাক্না থাজৈ! অদোমগী করিগুম্বা ৱাফম লৈরবদি, পাওতাক পীনিংবা লৈরগদি হান্নগী মতৌগুম মতম পুম্নমক্তা অদোমগীদমক্তা লৈজরি! অদোম্না শোইদনা হায়বিয়ু অমসুং লৈরিবা সরকারগী ওফিসিএলশিং খুদিংমকসু ঙসি য়াওখি হায়বগী থাজবা পীজরি।

অদোম্না পনবিখিবা ৱাফমশিং, কনাগুম্বা অমগীমক্তা খন্নবা হায়খিবশিং অদুগীদমক্তা তীম্না মপুং ফানা য়াম্না থুনা মদু মমাংলোমদা চংশিলহনগনি, অদুবু ঐখোয়না খংই মদুদি মতম অসি, সাৱন, ভাদো অমসুং দিৱালীফাওবদা ওইরবসু লায়না খরগী অমদি লায়নাশিংনা মফম অমা ওইরে, মসিগীদমক্তা ঐখোয়না চেকশিনগদবনি, তৌইগুম্বশুং ঐহাক্না থাজৈ মদুদি শিবগী চাং অসি চাদা ১গী চাংদা হন্থহল্লিবা, ফগৎলকপগী চাং অসি থুনা য়াংনা হেনগৎলক্লিবা, কন্তেক তৌরুবা মীশিং পুম্নমক পুং ৭২গী মনুংদা য়ৌশিনবা মখোয়গীদমক্তা থৌরাং তৌবিবা অসিগী লাইশোনশিং অসিদা খজিক্তং মাই ওনশিল্লবদি ঐখোয়গী রাজ্য ১০ অসিদা, চাদা ৮২ শিহনখ্রবা  চাদা ৮০গী পোজিতিব কেসশিং লৈরিবা রাজ্য ১০সিদা ঐখোয় রাজ্য ১০ অসিনা ফীভম অসি ওন্থোকপা ঙমগনি। ঐখোয় রাজ্য ১০না পুন্না ভারত অসি মায় পাকহনবা ঙমগনি অমসুং থবক অসি পাংথোকপা ঙমগনি হায়বসি ঐহাক্না থাজৈ। ঐহাক্না অমুক হন্না, অদোম্না মতম কয়া অমা কাইথোকপিদুনা, মতমগী অৱাৎপা লৈরগসু য়াম্না নিংথিজনা অদোমগী ৱাফম পুম্বা থম্বিখ্রে।

 অদোম পুম্নমকপু হন্না-হন্না থাগৎচরি।

******