ਵੱਖੋ–ਵੱਖਰੇ ਜ਼ੋਨਾਂ ਦੇ ਰੇਲਵੇਜ਼ ਨਾਲ ਸਬੰਧਿਤ 83 ਮਹਿਲਾ ਸਬ–ਇੰਸਪੈਕਟਰ ਕੈਡਿਟਾਂ (ਬੈਚ ਨੰਬਰ 9ਏ) ਦੀ ਪਾਸਿੰਗ ਆਊਟ ਪਰੇਡ ਅੱਜ ਭਾਵ 10 ਅਗਸਤ, 2020 ਨੂੰ ਰੇਲਵੇ ਪ੍ਰੋਟੈਕਸ਼ਨ ਫ਼ੋਰਸ (ਆਰਪੀਐੱਫ਼ – RPF) ਟ੍ਰੇਨਿੰਗ ਸੈਂਟਰ, ਮੌਲਾ–ਅਲੀ ’ਚ ਹੋਈ।

ਜੱਜਾਂ ਨੇ ਸੁਸ਼੍ਰੀ ਚੰਚਲ ਸੇਖਾਵਤ ਨੂੰ ‘ਬੈਸਟ ਕੈਡੇਟ’ ਤੇ ‘ਬੈਸਟ ਇਨ ਇਨਡੋਰ’ ਅਤੇ ਸੁਸ਼੍ਰੀ ਸਮ੍ਰਿਤੀ ਬਿਸਵਾਸ ਨੂੰ ਗਤੀਵਿਧੀਆਂ ਵਿੱਚ ‘ਬੈਸਟ ਇਨ ਆਊਟਡੋਰ’ ਐਲਾਨਿਆ ਗਿਆ। ਇਸ ਪਰੇਡ ਦੀ ਕਮਾਂਡ ਸੁਸ਼੍ਰੀ ਚੰਚਲ ਸੇਖਾਵਤ ਨੇ ਸੰਭਾਲੀ।

ਇਸ ਮੌਕੇ ਬੋਲਦਿਆਂ ਸ੍ਰੀ ਗਜਾਨਨ ਮਾਲਿਯਾ ਨੇ ਮਹਿਲਾ ਸਬ–ਇੰਸਪੈਕਟਰਾਂ ਨੂੰ ਨਸੀਹਤ ਕੀਤੀ ਕਿ ਉਹ ਰੇਲਵੇ ਦੀ ਸੰਪਤੀ ਤੇ ਰੇਲ ਯਾਤਰੀਆਂ ਦੀ ਸੁਰੱਖਿਆ ਲਈ ਪੂਰੀ ਲਗਨ ਨਾਲ ਕੰਮ ਕਰਨ ਅਤੇ ਆਪਣੀਆਂ ਡਿਊਟੀਆਂ ਨਿਭਾਉਣ। ਸਮਾਜ ਦੇ ਅਸੁਰੱਖਿਅਤ ਵਰਗ, ਮਹਿਲਾਵਾਂ ਤੇ ਬੱਚਿਆਂ ਦਾ ਖ਼ਿਆਲ ਰੱਖਣ ਉੱਤੇ ਖ਼ਾਸ ਧਿਆਨ ਕੇਂਦ੍ਰਿਤ ਕੀਤਾ ਜਾਣਾ ਚਾਹੀਦਾ ਹੈ ਕਿਉਂਕਿ ਮਹਿਲਾਵਾਂ ਤੇ ਬੱਚਿਆਂ ਦੀ ਤਸਕਰੀ ਵਧਦੀ ਜਾ ਰਹੀ ਹੈ। ਉਨ੍ਹਾਂ ਨੌਜਵਾਨ ਕੈਡੇਟਾਂ ਲਈ ਇੱਕ ਰੌਸ਼ਨ ਭਵਿੱਖ ਦੀ ਸ਼ੁਭ–ਕਾਮਨਾ ਕੀਤੀ ਤੇ ਮਹਿਲਾ ਸਬ–ਇੰਸਪੈਕਟਰ ਕੈਡਿਟਾਂ ਨੂੰ ਉਨ੍ਹਾਂ ਦੀ ਸ਼ਾਨਦਾਰ ਕਾਰਗੁਜ਼ਾਰੀ ਲਈ ਮੁਬਾਰਕਬਾਦ ਵੀ ਦਿੱਤੀ ਤੇ ਇਹੋ ਇੱਛਾ ਪ੍ਰਗਟਾਈ ਕਿ ਉਹ ਪੂਰੀ ਪੇਸ਼ੇਵਰਾਨਾ ਪਹੁੰਚ ਤੇ ਦਯਾ–ਭਾਵਨਾ ਨਾਲ ਆਪਣੀਆਂ ਡਿਊਟੀਆਂ ਨਿਭਾਉਣਗੇ।

ਇਹ ਸਬ–ਇੰਸਪੈਕਟਰ ਕੈਡਿਟਾਂ ਨੇ 9 ਮਹੀਨਿਆਂ ਤੱਕ ਇਨਡੋਰ ਤੇ ਆਊਟਡੋਰ ਸਖ਼ਤ ਟ੍ਰੇਨਿੰਗ ਲਈ ਹੈ ਕਿਉਂਕਿ ਅੰਤਿਮ ਪ੍ਰੀਖਿਆ ਪਾਸ ਕਰਨ ਤੋਂ ਬਾਅਦ ਉਨ੍ਹਾਂ ਨੂੰ ਰੇਲਵੇਜ਼ ਵਿੱਚ ਕਈ ਤਰ੍ਹਾਂ ਦੀਆਂ ਚੁਣੌਤੀਆਂ ਦਾ ਸਾਹਮਣਾ ਕਰਨਾ ਪੈਂਦਾ ਹੈ, ਅੱਜ ਉਨ੍ਹਾਂ ਇਸ ਰੰਗ–ਬਿਰੰਗੀ ਅਸਾਧਾਰਣ ਪਰੇਡ ਵਿੱਚ ਭਾਗ ਲਿਆ ਤੇ ਸਹੁੰ ਚੁੱਕਣ ਤੋਂ ਬਾਅਦ ਉਹ ਰੇਲਵੇ ਪ੍ਰੋਟੈਕਸ਼ਨ ਫ਼ੋਰਸ ਦੀਆਂ ਮੈਂਬਰ ਬਣ ਗਈਆਂ ਹਨ।

ਇਸ ਪਰੇਡ ਦੌਰਾਨ ਸਮਾਜਿਕ ਦੂਰੀ ਤੇ ਕੋਵਿਡ–19 ਨਾਲ ਸਬੰਧਿਤ ਸਾਰੀਆਂ ਰਸਮੀ ਸਾਵਧਾਨੀਆਂ ਦਾ ਪੂਰਾ ਖ਼ਿਆਲ ਰੱਖਿਆ ਗਿਆ।

*****

ਡੀਜੀਐੱਨ/ਐੱਮਕੇਵੀ