য়ুনিয়ন পব্লিক সর্বিস কমিসন(য়ু পি এস সি)গী নৌনা চেয়রমেন হাপ্লবা প্রোফেসার(দোক্তর)প্রদীপ জোসিনা ঙসি শকখঙ-মাইখঙনবা ওইনবা দিবলপমেন্ত ওফ নোর্থ ইস্তর্ন রিজন(দোনর)গী রাজ্য মন্ত্রী(মনিংতম্বা), প্রধান মন্ত্রী ওফিস, পর্সোনেল, পব্লিক গ্রিভান্সেস, পেন্সন্স, এতোমিক ইনর্জি অমসুং স্পেসকী রাজ্য মন্ত্রী দোক্তর জিতেন্দ্র সিংহগা উনখ্রে।

ইরাই নুমিৎতা কমিসন অসিগী মকোক ওইনা মহাক্না ওফিস পায়রবা মতুংদা জোসিনা মিনিস্তর উনবা মসিনা অহানবনি।

প্রোফেসার জোসি মমিং লৈরবা একাদেমিসিয়ান অমনি, মহাক নেসনেল ইন্সিতিতুৎ ওফ ইজুকেসনেল প্লান্নিং এন্দ এদমিনিস্ত্রেসনগী দিরেক্তর, ছতিসগর পব্লিক সর্বিস কমিসনগী চেয়রমেন অমসুং মৈধ্য প্রদেস পব্লিক সর্বিস কমিসনগী চেয়রমেন ওইনা ফম পুরমখি। মমিং লৈরবা একাদেমিসিয়ান অমসুং রিছর্স তৌবা মীওই অমা ওইনা, ১৯৮১দা কানপুর য়ুনিভর্সিতিদগী কমর্সতা মহাক্কী পি.ঐচ.দি দিগ্রি ফংলবা মতুংদা মহাক্না তোঙানবা তোঙানবা য়ুনিভর্সিতিশিং অমসুং নেসনেল ইন্সতিতুৎশিংদা চহি ২৮ হেন্না তাকপী-তম্বীবগী থবক পাংথোক্লমখি।

য়ু.পি.এস.সিগী চেয়রমেন ওইনা মাইপাক্না থৌ পুনবা মঙোন্দা য়াইফ-পাউজেল পীরদুনা, দোক্তর জিতেন্দ্রনা হায়খি, প্রোফেসার জোসিগী লাইরিক-লাইশু হৈবা অমসুং অখঙ-অহৈ ওইবগী ৱাখল্লোন অসিনা কমিসন অসিগী থবকশিংদা ফজনা শীজিন্নগনি হায়বগী থাজবা থম্লি।

*******