ভারতকী উপ-রাস্ত্রপতি শ্রী এম. বেঙ্কয়া নাইদুনা ঙসি ‘নিৎ ইন্দিয়া’গী কেম্পেন পাক-শন্না পাঙথোক্তুনা অকনবা, ৱাখল মান্নবা ভারত ওইহন্দুনা য়েক্নবগী ফত্ত্রবা থৌশিল কয়াদগী ঙাকথোকপা ঙম্নবা হোৎনরসি হায়খ্রে।

ভারত থাদোকউ ইহৌ হৌখিবগী চহি ৭৮শুবা কুমওনগী থৌরমদা শ্রী নাইদুনা ফেসবুক আর্তিকল অমদা ভারত্তা অমত্তা ওইবগী অপুনবা ৱাখল্লোন লৈত্রিঙৈদা মীরমদগী লাকপা মীওইশিংনা লান্দারকখিবা অমসুং মখোয়গী মখা পোলহন্দুনা থমখিবগী থৌদোক কয়া অমগী পরিংগী মতাংদা হায়খি। মসিগী শাংলবা অনিশুবা চহি চাগী মতম অসিদা লৈবাক অসিগী হান্না লৈজরম্বা নাৎ অমসুং ইনাকখুনবা লৈবাক ওইরম্বা কয়াবু নমথবীদুনা শেন্মিৎলোন অমসুং নাত্তা নমথবীবা কয়া অমা থোকখি।

মীয়াম্না য়াম্না কন্না হোৎনদুনা ইং ১৯৪৭তা নিং-তম্বা ফংখিবা অসিনা মসিগী মমাংগী চহি ২০০দগী ওইরকখিবা মীতোপ্না লৈঙাক্লম্বগী থৌওং লোইশিনখিবতা নত্তে, তৌবতবু ভারতনা অমত্তা ওইবগী ৱাখল্লোন লৈতবদগী অতোপ্পা মীরমগী মীওইশিংনা কয়ারক হন্না লান্দারকখিবা, ললোনবশিংনা খুদোং চাবা লৌখিবা কয়ানা মমহন্দুনা লৈরবা চহি ১০০০গী মতম অদুবু লোইশিনখিবনি হায়খি।

শ্রী নাইদুনা হায়খি, “অমগা অমগা নুংশি-চানদবা অমসুং অমত্তা ওইবগী ৱাখল চেলহৌদবা অদুনা মতম শাংনা মীখা পোন্দুনা লৈখিবনি। ময়াম অসিদগী তমজদুনা ভারত মচাশিংনা খঙদগবদি মশা-মশাগী চৎনবী ইন্দুনা চৎপগা লোয়ননা ভারত মচা অমা ওইবগী ৱাখল্লোনশিংসু তানদুনা চৎমিন্নগদবনি। অতোপ্পনা ঐখোয়সু তোঙান্না লৈনবা ভারত অমনি খনলবদি হেন্না খুদোংথিবা নংগনি। অকনবা, ৱাখল মান্নবা ভারত অমা ওইবনা য়েক্নবগী ফত্ত্রবা থৌশিল কয়াদগী ঙাকথোকপা ঙমগনি”।

শ্রী নাইদুনা নিৎ ইন্দিয়ানা মীয়াম পুম্ববু মান্নবা মিৎয়েংবা অমসুং মান্নবা খুদোংচাবা পীবা ইহৌ অমা ওইহনবগী তঙাই ফদবা লৈরে মরমদি ৱাখল মান্নদবনা কৈদৌনুংদা ভারত মচাশিংগী মতিকপু শিজিন্নদুনা চাউখৎপা পুরকপা ঙম্লোই হায়বদা মিৎয়েং চংখি।

ইং ১০০০দগী হৌদুনা মীরমগী মীওইশিংনা ভারতপু খুদুম চন্দুনা ঐখোয়গী লৈজরম্বা লন-থুম কয়া মুনখিবগী থৌওংশিংনা শোকহনখিবা কয়া পল্লদুনা শ্রী নাইদুনা হায়খিবদা সোম্নাথ লায়শঙ থুগায়খ্রবা তুংদা অমুক্কা হন্না শাগৎপদা শাংলবা চহি ৯৫০ চংখিবা অমসুং অয়োধ্যা লায়শঙ শাগৎপদা চহি ৫০০ চংখিদুনা হন্দক্তা থা অসিগী ৫দা ভুমী পুজা পাঙথোকখিবা অদুগী মতাংদা হায়খি।

শক্নাইরবা ইকোনোমিস্ত মিস উৎসা পত্নায়ক্কী রিসর্চকী থবক্তা য়ুম্ফম ওইদুনা শ্রীনাইদুনা হায়খিবদা ব্রিতিশনা ইং ১৭৬৫-১৯৩৮ ফাওবগী মনুংদা ভারতকী য়ু.এস. দোল্লার ত্রিলিয়ন ৪৫গী মরল-মথুম মুনবীদুনা মওং কয়াদা মাঙহনখ্রে অমসুং হায়রিবা শেনফম অসি ইং ২০১৮দা ওইখিবা য়ু.কে.গী জি.দি.পি.গী শরুক ১৭কা মান্নৈ হায়খি। মসিগী থৌওং অসিনা ভারতপু মীরমদা পোত্থোক পীবা অমা ওইরম্বদগী লায়রবা লৈবাক অমা ওইহনখ্রিবনি হায়না হায়খি।

মহাত্মা গান্ধীনা ইং ১৯৪২গী ওগস্ত ৮দা “তৌরো নত্ত্রগা শিরো” হায়না লাউখিবা খোল্লাওনা খৎন-চৈনবা য়াওদবা ইহৌগী লোল অমা ওইখিবা অদুনা ব্রিতিশপু মকোক ঙাওহন্দুনা চহি ৫গী মতুংদা ভারত থাদোকহনখ্রিবনি হায়না শ্রী নাইদুনা হায়খি। ভারতনা নিং-তম্বা ফংখিবা অসি দাদাভাই নাওরোজি, ফেরোজ শাহ মেহতা, মতিক মগুন লৈবা লৈবাক নিংবা লুচিংবা লাল-বাল-পাল অমসুং শাথিবা য়াওল্লোই শহীদ ভগৎ সিংহ, চন্দ্রসেখর অজাদ অমসুং মীরমগী তেংবাং লৌদুনা ব্রিতিশপু তান্থোক্নবা হোৎনখিবা সুভাস চন্দ্র বোসনচিংবা লুচিংবা কয়া অসিগী তোঙান তোঙানবা থৌওং কয়া অসিগী মরমদগীনি হায়না মহাক্না হায়খি। শ্রী নাইদুনা মখা তানা হায়খিবদা ময়াম অসিগী মরক্তগী ভারতকী নিং-তম ইহৌ অসিদা মোরেল অমসুং অপুনবগী থৌওং ওলহনখিবদি ইং ১৯১৫দা ভারত্তা অমুক হল্লকখিবা মহাত্মা গান্ধীননি হায়খি।

ইং ২০২২দা ভারতকী নিং তম্বগী চহি ৭৫গী থৌরম পাঙথোক্কদৌরিবা অসি পল্লদুনা শ্রী নাইদুনা মীয়াম খুদিংনা লায়রবা, লাইরিক হৈতবা, মান্নদবা মিৎয়েং য়েংবা, জেন্দর দিস্ক্রিমিনেসন, শেঞ্জা-থুমজা অমসুং খুন্নাইগী মনুংদা ফত্তবা কয়া লৈদুনা মহাত্মা গান্ধী অমসুং অফবা তৌনিংবা ভারত মচা কয়াগী অনৌবা ভারতকী মঙলান অসি ফংনবা হোৎনবদা অয়েৎপা পীরিবা কয়া অসু মুত্থৎলসি হায়না হায়খি।

****