সেল্লেবেস হন্থহন্দুনা মহৈরোয়শিংগী পোৎলুম হন্থহনবগীদমক ঙসি ভারতকী উপ-রাস্ত্রপতি এম. ভেনকিয়া নাইদুনা অনৌবা ইজুকেসন পোলিসি থাগৎখ্রে।

ভিদিও কনফরেন্সকী খুৎথাংদা অহানবা রাজালক্সমি পারথাসরাথি মেমোরিএল লেকচর পীবদা উপ-রাস্ত্রপতিনা হায়খি  মহৈরোয়শিং শাজেল অমসুং শান্নবদা চপ মান্ননা শরুক য়ানবা পুক্নিং থৌগৎকদবনি। চহি নৌরিঙৈদগী হোনা য়োগা অসি স্কুল করিকুলমগী শরুক অমা ওইহনগদবনি অমসুং মহৈরোয়শিংনা শান্নবুং অমসুং ক্লাসরুমশিং চপ মান্নবা মতম শীজিন্নগদবনি।

মহাক্না হায়খি য়োগা অসি পুক্নিং অমসুং হকচাংগী শাজেল অমনি অমসুং য়োগাগী লাইনিং লৈতে। মসি কলা অমসুং সাইন্স অমনি।

উপ-রাস্ত্রপতিনা হায়খি, অনৌবা ইজুকেসন পোলিসি-২০২০ অসিনা মহৈরোয়শিং চাউখৎহন্নবা পান্দম থম্লি অমসুং মসিনা মহৈরোয়শিংদা য়ুম্ফম ওইরি অমসুং ভারত অসি লৌশিং লৈবা খুন্নাই অমা ওন্থোক্নবা পান্দম থম্লি।

অনৌবা ইজুকেসন পোলিসি-২০২০দা মমালোন মরুওইনা লৌবা অসিদা হরাওবা ফোংদোক্লদুনা শ্রী নাইদুনা হায়খি ভারতকী ইনাকখুল্লবা লোনশিং কনবা অমসুং য়োকখৎপা মরুওই। ঐনা হঞ্জিন হঞ্জিন হায়রি মদুদি লোন অমতদা অথিংবা থম্লোইদবনি অমসুং লোন অমতদা অপনবা পীরোইদবনি।

মহাক্না হায়খি মহৈরোয়শিংদা লৈবাক্কী ৱাখল্লোন, লৈবাক অসি কমদৌনা শেম্লকখি হায়বা মহৈরোয়শিংদা তম্বীগদবনি। মীওই করোর ১৩০ লৈবা লৈবাক অমদা খুদিংমক সরকার মথন্তনা পাংথোকপা ঙম্লোই অমসুং লনাই কাংবু শরুক য়াবা দরকার ওই। লনাই কাংবু অমসুং এন.জি.ওশিং পান্দম লৈগদবনি অমসুং অচুম্বা ৱাখল্লোন্না লমজিংগদবনি।

মহাক্না হায়খি ওজাশিং মরুপ অমা ওইগদবনি অমসুং মখোয়গী লমচৎ-শাজৎশিং অদু তমজনফম অমা ওইগদবনি। মহৈরোয়শিংনা ভারতকী রাজ্য খুদিংমক্কী পুৱারি খঙগদবনি অমসুং কমদৌনা ভারত মাতানা লৈবাক্কী ওইবা অপুনবা শক্তম অমা শেমগৎপগে হায়বা খঙগদবনি।

মহাক্না হায়খি খেন্নবশিংনা অপুনবা শক্তম অমা শাগৎপা অসি ঐখোয়গী চাউরবা লৈবাক ভারতকী য়ুম্ফমনি। ভর্চুএল ক্লাসশিং পাংথোক্লিবা অসি মতম খরগী ওইনা শীনবনি অমসুং ওজা অমগী মহুৎশিনবা য়ারোই অমসুং ভর্চুএল ওইনা লাইরিক তম্বনা কাদা ফম্লগা লাইরিক তম্বগী মহাও অদু ফংহনবা ঙম্লোই।

উপ-রাস্ত্রপতিনা হায়খি কোবিদ-১৯ লাইচৎনা থোকহল্লিবা নিংহন্নবা অসি মতম খরগীনি অমসুং হান্নগী ফিবম অদু হল্লক্কনি। লৈবাক অসি অহোংবা পুরক্নবা মী খুদিংমক মশাগী মথৌ পাংথোক্কদবনি।মালেম শীনবা থুংনা ভারতমচা কয়া মরুওইবা ফম কয়া পায়রি। নহারোলশিং মখোয়গী মমাংদা খুদোংচাবা কয়া মরাংকাইনা লৈরে। মসি ফংনবা মখোয়না চহি নৌরিঙৈদগী চুনবা লৌশিং তানশিনবা দরকার ওই।

মহাক্না হায়খি, রামায়ন্না ঐখোয়দা পুন্সিগী লম্বী অমা তাকপীরি। রাম লাৎনবা খক নত্তনা মহাক্কী মগুনশিং অমসুং ঐখোয়গী পুন্সিদা পীরিবা গুনশিং লাৎনবা ঐখোয়না রামায়ন দরকার ওই।

মহাক্না হায়খি দোক্তর মীয়াম্না ৱাই.জি.পি হায়না খঙনবা দোক্তর রাজালক্সমি পারথাসরাথি মাইথোং য়াম্বা মীওই অমনি । পদ্ম সেসাদ্রি বালা ভাবনগী স্কুলশিং লিংখৎনবা মহাক্না কৎথোকপগা লোয়ননা থবক কয়া পাংথোকখি। মতম অমদা মালেমগী ওজা ওইনা খঙনরম্বা ভারতকী তুংগী ফিবম দোক্তর রাজালক্সমি পারথাসরাথিগুম্বা মীওইনা পাংথোকপা থবকশিংগী মখা পোল্লি অমসুং মসিনা লাইরি-লাইসু তম্বা য়াওনা হিরম কয়াদা লৈবাক অসিগী মিংচৎ অমুক ফংবা ঙম্লে।

পদ্ম সেসাদ্রি বালা ভাবনগী স্কুলশিংনা ভারতকী ৱাখল্লোনশিং হিঙ্গৎহনবা অমসুং য়োকখৎনবা পায়খৎলিবা থবকশিং অমসুং মহৈরোয়শিংদা মখোয়গী সভেত্যাগী গুনশিং খঙহনবা অমসুং ভারতকী অমসুং মালেমগী খ্বাইদগী ফবশিং তম্বীবা অসিদা উপ-রাস্ত্রপতিনা হরাওবা ফোংদোকখি।

থৌরম অদুদা পদ্ম সেসাদ্রি বালা ভাবন গ্রুপ ওফ স্কুলসকী দিন অমসুং দিরেক্তর শীমতি সিলা রাজেন্দ্রা, পরেন্ত-তিচর এসোসিএসনগী প্রসিদেন্ত পি.বি বালাজি অমসুং অতৈ কয়া শরুক য়াখি।

মখাগী অসি মপুংফাবা ৱারোলনি-

 “বালা ভাবন ইজুকেসনেল ত্রস্তগী চেয়রপর্সন, পদ্ম সেসাদ্রি বালা ভাবন গ্রুপ ওফ স্কুলসকী দিন অমসুং দিরেক্তর শীমতি সিলা রাজেন্দ্রা, ত্রসতিশিং, প্রিন্সিপালশিং, ওজাসিং, মহৈরোয়শিং, দোক্তর ৱাই জি পিগী ইমুং-মনুংশিং ,হকচাং ফনা লৈনবা ঐনা ময়ামদা য়াইফ-পাউজেল পীজরি।

দোক্তর রাজালক্সমি পারথাসরাথি লৈখিবদগী অহানবা কুমওনদা মহাক্কী মফমদা ঐগী ইকায়খুম্নবা উৎচরি। মীয়াম্না ৱাই.জি.পি হায়না খঙনবা মহাক মাইথোং য়াম্বা মীওই অমনি- লাইরিক-লাইসুগী মীওইনি, মশক নাইরবা পাউমী অমনি, আর্ত ক্রিতক, ওজা অমসুং পন্দিৎ অমনি।

পদ্ম সেসাদ্রি বালা ভাবন গ্রুপ ওফ স্কুলসগুম্বা ইন্সিতিতুৎ অমা লিংখৎনবা মহাক্না কয়া য়াম্না কৎথোকখিবগে হায়না ঐনা ৱাখলদা শাগৎলি। মতম অমদা মালেমগী ওজা ওইনা খঙনরম্বা ভারতকী তুংগী ফিবম দোক্তর রাজালক্সমি পারথাসরাথিগুম্বা মীওইনা পাংথোকপা থবকশিংগী মখা পোল্লি অমসুং মসিনা লাইরিক-লাইসু তম্বা য়াওনা হিরম কয়াদা লৈবাক অসিগী মিংচৎ অমুক ফংবা ঙম্লে।

পদ্ম সেসাদ্রি বালা ভাবন গ্রুপ ওফ স্কুলস অসি ভারতকী ওইবা ৱাখল্লোনশিং হিঙ্গৎনবা অমসুং য়োকখৎনবা অমসুং মহৈরোয়শিংদা মগুন লৈবা লাইরিক তম্বীনবা লিংখৎখিবনি হায়বা খঙবদা ঐ হরাওই। 

ঐখোয়গী অরিবা গুনশিংনা ঐখোয়দা ‘শরুক য়ামিন্নবা’ অমসুং ‘বাসুধাইবা-কুতুমবাকাম’ তম্বীরি। হিতোপাদেসনা হায়রি-

বিদ্যা দদাতি ৱিনয়ম্ ৱিনয়াদ্যাতি পাত্রতাম্।

পাত্রত্বাদ্ধনমাপ্রোতি ধনাদ্ধর্মম ততঃ সুখম্।।

নালান্দা, তক্ষসিলা, বিক্রমসিলা, পুসপাগিরিগুম্বা মমিং লৈরবা মহৈলোয়শঙশিং লৈদুনা মমাংঙৈগী ভারত লৌশিংগী পুক্কৈ অমা ওইরমখি। ঐখোয়গী মহৈরোয়শিংনা মখোয়গী সভেত্যাগী গুনশিং অদু খঙগদবনি অমসুং ভারত অমসুং মালেমগী খ্বাইদগী ফবশিং পুন্না তমগদবনি।

ওজাশিং উনবদা ‘শ্রী গুরুবয়ো নমাহ’ হায়না কৌনবা মহাক্কী স্কুলগী মহৈরোয়শিংদা দোক্তর ৱাই. জি.পিনা তাকখি হায়বা খঙবদা ঐ হরাওই। থবক অসিনা মালেমগী অতোপ্পশিংগা লাম্বা তৌনবা য়াদ্রবা ঐখোয়গী চহি চা কয়া কুইরবা গুরু-সিস্যা পরম্পারাদা মহাক্না অচেৎপা থাজবা থম্লি হায়বা উৎলে।

চৎনবীশিং ইকায়খুম্বা, কৎথোকপা ,মরৈবাক নুংশিবা অমসুং চম্না হিংবা গুন কয়া য়াওরবা রামায়ন অমসুং মহাভারতকী ৱারি কয়া মহাক্না মহৈরোয়শিংদা তম্বীখি হায়বা ঐ খঙলে।ভারতকী চহি কয়া কুইরবা লাইনিংগী চৎনবীশিংগা হৌজিক্কি মতম অসিগা লৈনরিবা মরী অদু হৌজিক্কী মালেম অসিদা মহাক্না খঙহনখি।

নুংশিরবা মরুপশিং,

নুমিৎ খরনিগী মমাংদা অনৌবা ইজুকেসন পোলিসি লাউথোক্লে হায়বা ময়াম্না খঙলে। মসি মহৈরোয়শিং শেমগৎনবা মিৎয়েং শানবা থৌশিল অমনি। মসিনা লৌশিং পীনবা অমসুং মহৈরোয়শিংনা পামজবা শেমগৎনবা হিরম কয়াগী সবজেক কয়া থোক্না তম্বীনবা পান্দম থম্লি।

মসি মহৈরোয়শিংদা য়ুম্ফম ওইবা অমনি অমসুং ভারত অসি লৌশিংগী খুন্নাই অমা ওন্থোক্নবা পান্দম থম্লি। মসিদা ভারতকী হৌরকপা অমসুং চাউথোকপা অনিমক থোং মান্না য়াওরি অমসুং মালেম শীনবা থুংনা চৎনরিবা খ্বাইদগী ফবা ৱাখল্লোনশিং অমসুং থবকশিং তাকপী-তম্বীগনি।

অনৌবা থৌশিল অসিদা স্কুলশিংদা মমালোনশিংদা তাকপীবা অসি মরুওইনা লৌবা অসি ঐ হরাওই। মসি ভারতকী ইনাকখুল্লবা লোনশিং কন্নবা অমসুং য়োকখৎনবা মরুওইবা অমনি। ঐনা হঞ্জিন হঞ্জিন হায়রি মদুদি লোন অমতদা অথিংবা থম্লোইদবনি অমসুং লোন অমতদা অপনবা পীরোইদবনি।

মহাত্মা গান্ধীনা স্কুল তম্বা অসি ফজরবা উ অমনি অমসুং লাইরিক তম্বা অসি থিওরি অমসুং প্রাকতিকেল অনিমক্কী অপুনবদা মিৎয়েং চঙগদনি হায়না ফোঙদোকখি। লৈবাক্কী ৱাখল্লোনশিং, লৈবাক অসি কমদৌনা শেম্লকখি অমসুং থবক খুদিংমক লৈবাক্কী য়াইফনবা থবকশিংগী মখা পোনগদবনি হায়বা মহৈরোয়শিংনা তমগদবনি।

লাইরিক তাকপী-তম্বীবগী থাক ৱাংখৎহনবা অমসুং ওজাশিং শীনফম অসিদা মতিক চাবা হেনগৎহনবা দরকার ওইরে। ওজাশিংনা মরুপ অমা ওইনা তম্বীগদবনি অমসুং মখোয়গী লমচৎ-শাজৎশিং অদু তমজনফম ওইগদবনি।

লাইরিক তম্লিবা অসি শুপ্নগী থবক ফংনবা খক নত্তে অমসুং লাইরিক তম্বগী পান্দমদি মীওই অমা মঙাল ফংহনবা অমসুং থৌনা লৈহনবনি। লাইরিক তম্বনা লমচৎ-শাজৎ শেমগৎকদবনি, থৌনা লৈগদবনি অমসুং অফবা থবক পাংথোকপা ঙম্বগী মগুন চেনগদবনি। অৱাংবা থাক্কী মহৈ তম্বা মতমদা কোর্সশিংগী মগুন হেনগৎহন্নবা অমসুং তাকপী-তম্বীবগী থবকশিং ফগৎহন্নবা খন্নবা দরকার ওইরে।

অনৌবা ইজুকেসন পোলিসি অসিনা সেল্লেবস হন্থহন্নবা হোৎনবদা ঐ হরাওই। মহৈরোয়শিংগী পোৎলুম হন্থহনবা দরকার ওইরে। মহৈরোয়শিং শান্নবুং অমসুং ক্লাসরুমদা মতম চপ মান্ননা থবক তৌগদবনি। স্কুলশিং অমসুং কোলেজশিংনা মখোয়গী সেল্লেবসশিংদা লৈকোল শেমগৎপগুম্বা থবকশিং য়াওহনগদবনি।

শান্নবা অমসুং শাজেল মরুওইনা লৌনবা মহৈরোশিং পুক্নিং থৌগৎকদবনি। চহি নৌরিঙৈদগী হৌনা য়োগা অসি স্কুল করিকুলমগী শরুক অমা ওইহনগদবনি। ভারতকী কলা অমসুং কলচর খঙগদবনি অমসুং থাগৎপা হৈগদবনি। স্কুল ইজুকেসনগী মরুওইবা শরুকশিংদা অনৌবা ইজুকেসন পোলোসি অসিনা মিৎয়েং চঙবদা ঐ হরাওই অমসুং ভারতকী তুংগী ফিবম স্কুলশিংদা পায়খৎলিবা থবকশিং অসিনা শেমগনি হায়না ঐনা চেৎনা থাজবা থম্লি।

লাইরিক তম্বা অসি মাইকৈ কয়া লোঙগদবনি অমসুং মাইকৈ অমা খক ওইরোইদবনি। ওজাশিং অমসুং মহৈরোয়শিংগী মরক্ত মতেং পাংনগদবনি। মহৌশা অসি ঐখোয়গী অহানবা ওজানি হায়বা মহৈরোয়শিংনা খঙগদবনি অমসুং লৈবাকমচা তানা ফোঙদোক্নবা কলচর অসি গারি অমনি। মহৈরোয়শিংনা ভারতকী রাজ্য খুদিংমক্কী পুৱারি খঙগদবনি অমসুং কমদৌনা ভারত মাতানা লৈবাক্কী ওইবা অপুনবা শক্তম অমা শেমগৎপগে হায়বা খঙগদবনি।

ভারত মাতা অপুনবা ৱাখল্লোন অমদা “ইন্ন থাই” থাজখিবা মমিং লৈরবা কবি সুব্রামিনিয়া ভারতিগী শৈরেং মতেক অমা ঐনা ফোঙদোক্লি: “মুপ্পাথু কোরি মুগামুদায়াল উয়ির, মোইমপুরা ওনরুদায়াল ইভাল সেপ্পু মোহি পাধিনেত্তু উদায়াল, ইনরি, সিন্ধনাই ওনরুদায়াল”

মসিগী ফজরবা শৈরেং মতেক অসিদা ঐখোয়গী চাউরবা লৈবাক ভারতকী য়ুম্ফম ওইরিবা খেন্নবশিংগী অপুনবা শক্তমগী ফজবা অদু উৎলি।

লাইবক থিবদি, কোবিদ-১৯ লাইচৎনা হিরম কয়াদা ঐখোয়দা অপনবা পীরে। মহৌশাগী লাইরিক তাকপী-তম্বীবগী থবকশিং অকাইবা থোকহল্লে অমসুং স্কুল কয়া ভর্চুএল ক্লাসশিং পাংথোক্লে। অদুবু, মসিগী মতম খরগী ওইনা পায়খৎলিবা থবক অসিনা অশেংবা ওজা অমগী মহুৎশিনবা ঙম্লোই অমসুং ভর্চুএল ক্লাসতা লাইরিক তম্বা অসিনা কাদা ফম্লগা লাইরিক তম্বগী মহাও অদু ফংহনবা ঙম্লোই।

ভারতকী খুন্নাইদা ওজাশিং য়াম্না মরুওই। মীওইবগী খ্বাইদগী ৱাংবা চৎনবীশিংদা, ওজাশিং অসি ঈশ্বরনি হায়না লৌনরি। হায়রিবা ৱাখল্লোনশিং অসিগা চুশিন্ননবা , ওজাশিংনা মখোয়গী মরুওইবা থৌদাংশিং খঙগদবনি অমসুং মসি লৈবাক্কী ওইনা খল্লগা থবক ওইনা পাংথোক্কদবনি।

সাধু-কবি থিরুভাল্লুবারগী লাইরক তম্বগী কান্নবগী মতাংদা ফোঙদোকপা মহাক্কী শৈরেং মতেক অসি ফোঙদোক্লগা ঐ লোইশিঞ্জগে, মহাক্না হায়খি:

কারকা কাসাদারা কারপাবাই

কাত্রাপিন নিরকা আধারকু থাগা

মী অমনা মহাক্না তম্নিংবা তমজসনু, অমসুং মহাক্কী থবকশিং অদু মহাক্না তম্লিবা অদুগী মহৈ ওইজসনু।

পদ্মা সেসাদ্রি বালা ভাবন গ্রুপতগী হৌখিবা মহৈরোয়শিং মসিগী স্কুল অসিগী মিংচৎ পুরক্কনি অমসুং মখোয়গী অফবা থবকশিংনা খুন্নাইগী অফবা মীওইশিং ওইগনি হায়না ঐনা থাজবা থম্লি।

অফবা থবক পাংথোক্নবা মহাক্কী পান্দমগী মখাদা ৱাই.জি.পিনা লৈবাক্কী অফবা থবক পাংথোকলমখি।

অদোম থাগৎচরি অমসুং জয় হিন্দ” !

**********