ভারতকী উপ-রাস্ত্রপতি শ্রী এম. বেঙ্কয়া নাইদুনা ঙসি য়ুম্থংনবদা লৈবাকশিং য়াওনা অতোপ্পা লৈবাকশিংনা ভারতকী নুংগী হীরমশিংগী মতাংদা ৱা ঙাংদনবা হায়খ্রে অমসুং জম্মু অমসুং কশ্মিরদগী আর্তিকল ৩৭০ লৌথোকখিবা অসি লৈবাক অসিগী অপুনবা, তেক্ত-কায়দনবা অমসুং অমত্তা ওইনবগীনি হায়খি।

পঞ্জাব য়ুনিবর্সিতীনা শীন্দুনা পাঙথোকখিবা মমাংদা এক্সতর্নেল এফিয়ার্স মন্ত্রী ওইরম্বী সুশ্মা স্বরাজ নীংশিংবগী অহানবা ৱা ঙাংবগী থৌরমদা উপ-রাস্ত্রপতিনা ভারত অসি পার্লীয়ামেন্তরী দিমোক্রেসীনি অমসুং পার্নিয়ামেন্ততা খন্নরবা অমসুং মেম্বর মশিং য়াম্বনা য়ানরবা তুংদা আর্তিকল ৩৭০ লৌথোকপগী ৱারেপ লৌখিবনি হায়খি।

শ্রী নাইদুনা অতোপ্পা লৈবাকশিংনা মশাগী হীরমদা হেন্না থ ৱাই চংদুনা অতোপ্পা লৈবাক্কী হীরমশিংদা খুৎ থিংজল্লক্তবনা হেন্না ফগনি হায়খি।

শ্রীমতি সুশ্মা স্বরাজনা লৈখিদবগী মমাংদা আর্তিকল ৩৭০গী মতাংদা খনলম্বা ৱাখল্লোন কয়া পল্লদুনা মহাক্না এক্সতর্নেল এফিয়ার্স মন্ত্রী অমা ওইনা ভারতকী মতমদুদা লৈবা ফিভমগী মতাংদা নীংথিনা অমসুং ইং-তপ্পা মওংদা ফোঙদোক্লমখি হায়না উপ-রাস্ত্রপতিনা হায়খি। অমসুং মসিগা লোয়ননা লৈবাক অসিনা লেপ্লিবা মতাংগী হীরমদসু য়াম্না কন্না মীয়ামদা খঙহনখি।

সুশ্মা স্বরাজগী মফমদা মতিক চাবা ইকাই খুম্নবা উৎলদুনা মহাকপু ভারতকী নুপী অশেংবা অমনি হায়খি। মহাক অসি মতিক চাবা লৈঙাক্লোই অমনি অমসুং মহাক্না পায়রম্বা ফম খুদিংদা অফবা খুদম কয়া থম্লমদুনা লাকখি।

শ্রী নাইদুনা নহা ওইরিবা রাজনিতী তৌবা মীওইশিংনা মহাক্কী মতৌ তমজৌ হায়না হায়রদুনা শ্রীমতি সুশ্মাজী অসি পুকচেল চাউবা মীওইবা অমনি অমসুং মহাক্না মরুপশিংনা, মহাকপু শৌগৎপা মীওইশিং অমসুং মীয়াম্না হায়জরকপা খুদিংদা তেংবাংদুনা লাকখি হায়না হায়খি। “মহাক্না লোক সভাদা ৭লক অমসুং এসেমব্লীদা ৩লক ভোৎ কাখিবা অসি মহাকপু মীয়াম্না পাম্বগী খুদম অমনি” হায়না মহাক্না মখা তাখি।

মহাক্কী মতিক মগুনশিংবু পল্লদুনা মহাক্কী লৌশিং, ইচম চম্বা অমসুং থবক অমদা অথুবা মতমদা ৱারোয়শিন পুরকখিবা অসি মহাক্না এক্সতর্নেল এফিয়ার্স মন্ত্রী ওইরিঙৈদা সোসিএল মীদিয়াদা পাক শন্না হায়নখ্রিবনি। উপ-রাস্ত্রপতিনা মহাক অসি মীয়াম্না য়াম্না নুংশিখিবা অমসুং হৌখিবা মতম খরা অসিদা মমিং খ্বাইদগী চৎপা ভারতকী ফোরেন মন্ত্রী ওইরম্মিবনি হায়না হায়খি।

উপ-রাস্ত্রপতিনা হায়খিবদা শ্রীমতি সুশ্মা স্বারাজ অসি ৱা ঙাংবা য়াম্না হৈবী মীওই অমনি অমসুং মহাক্না ইং ১৯৯৬কী লোক সভাগী দিবেত্তা ‘ভারতিয়’বু ময়েক শেংনা তাকখিবা অদুবু পল্লদুনা মীয়ামদা নৌহৌননা নীংশিনহনখি। মহাক্কী লোল চুম্বা, চানবা ৱাহৈ খনবা ঙম্বা অমসুং ৱাখল শেংবা অসিনা মহাকপু মমিং চৎপা ৱাঙাংলোয় অমা ওইহল্লিবনি।

উপ-রাস্ত্রপতিনা মহাক অসি লৈবাক নীংবা মীওই অমনি অমসুং মহাক্কী ৱাখল্লোনশিং অসি হকথেংননা ফোঙদোকপা ঙম্বী মীওই অমনি হায়খি।

শ্রীমতি সুশ্মা স্বরাজবু ভারতকী নাৎ অমসুং চৎনবীগী খুদম অমনি হায়রদুনা উপ-রাস্ত্রপতিনা মহাক অসি মতমগা চান্নবা ৱাখল্লোন অমসুং নাৎকী ফজবা কয়াগী অপুনবনি হায়না হায়খি। সুশ্মা স্বরাজ অসি ইমুং-মনুংগী মীওইগা চপ মান্নৈ অমসুং রক্সা-বন্ধনগী নুমিৎশিংদা মহাক্কী খুদাংদা রাখি পুনবীখিবা কয়াগী মরমদা উপ-রাস্ত্রপতিনা মীয়ামদা হায়খি। “ঐখোয়গী নক্নবা মরীশিং অসি নিংশিংলুবদা নুমিৎ খরনিগী মমাংদা পাঙথোকখিবা কুমহৈ অসিদা ঐহাক থৱাই নুংঙাইখিদে” হায়না উপ-রাস্ত্রপতিনা হায়খি।

পাঞ্জাব য়ুনিবর্সিতী এলম্নি এসোসিএসন অমসুং লোগী বিভাগনা শ্রীমতি সুশ্মা স্বরাজপু নীংশিংবা ওইনা চহি খুদিংগী ৱা ঙাংবগী থৌরম পাঙথোক্নবা ৱারেপ লৌখিবা অসিবু থাগৎপা ফোঙদোক্লদুনা উপ-রাস্ত্রপতিনা অসিগুম্বা থৌরম অসিনা মহাকপু নীংশিংবতা নত্তনা নহা ওইরিবা মীওইশিংদা ইথিল কয়া পীদুনা ফাউরবা নুপা নুপী কয়াগী মতৌ তমজবদসু তেংবাংগনি হায়খি।

পাঞ্জাব য়ুনিবর্সিতীগী ভাইস চান্সেল্লর, শ্রীমতি সুশ্মা স্বরাজগী মচানুপী মিস বন্সুরি স্বরাজসু থৌরম অদুদা শরুক য়াখি।

মখাদা পীরিবা অসি ৱা ঙাংখিবগী অকুপ্পা ৱারোলনিঃ

ঙসি ঐখোয়না লৈখিদ্রবী শ্রীমতি সুশ্মা স্বরাজতা ইকাই খুম্নবা উৎনবা পুল্লিবা অসিদা মহাক অসি লৈখিদ্রে হায়বসি ঐহাক্না থাজদবা ফাওরি। মহাক অসি রক্সা বন্ধন খুদিংগী ঐহাক্কী য়ুমদা লাক্তুনা ঐগী খুথাংদা রাখি পুনখিবী ঐহাক্কী নুংশিরবা ইচলনি। ঐখোয়গী লৈনরম্বা নক্নবা মরী নীংশিংলুবদা নুমিৎ খরনিগী মমাংদা পাঙথোকখিবা কুমহৈদা ঐহাক য়াম্না থৱাই নুংঙাইখিদে।

সুশ্মাজী অসি ঐখোয়গী ইমুং মনুংগা চপ মান্নৈ। ঐখোয়না দিল্লীদা লৈরিঙৈদা মঙোন্দগী পাউতাক লৌই। মহাক অসি য়াম্না ফবা মীওই অমনি অমসুং মহাক্না মঙোন্দা হায়জরকপা খুদিংমক নীংথিনা তেংবাংবীখি। মহাক অসি মরুপশিংদা, মহাকপু শৌগৎপা মীওইশিংদা অমসুং মীয়াম পুম্বদা অসুম্না লোইনা লোইনৈ।

সুশ্মাজীগী লৌশিং, ইচম চম্বা অমসুং থবক অমদা অথুবা মতমদা ৱারোয়শিন পুরকখিবা অসি মহাক্না এক্সতর্নেল এফিয়ার্স মন্ত্রী ওইরিঙৈদা সোসিএল মীদিয়াদা পাক শন্না হায়নখ্রিবনি। লৈবাক অসিগী মিলিয়ন কয়াগী মীয়াম্না মহাকপু নুংশিখি অমসুং হৌখিবা মতম খরা অসিদা মমিং খ্বাইদগী চৎপা ভারতকী ফোরেন মন্ত্রী ওইরম্মিবনি।

সুশ্মা স্বরাজকুম্বা মায় পাকপা লুচিংবা পুথোকখিবা পাঞ্জাব য়ুনিবর্সিতী অসিগী ঐহাক্না ভাইস চান্সেল্লর ওইনা থৌ পুরম্বা অসি য়াম্না তান চান্নবা থৌদোক অমনি। মহাক্কুম্বী অফবা ছাত্রিগুম্বশিং অসিগী মরমদগী মহৈ তম্ফমশঙ অসি অফাউবা ওইরিবনি। সুশ্মাজীগী লোন্দা অমসুং ৱাহৈ- ৱাতা অসি ঐখোয় পুম্নমক্না থাগৎনরি। মহাক্কী লোল চুম্বা, চানবা ৱাহৈ খনবা ঙম্বা অমসুং ৱাখল শেংবা অসিনা মহাকপু মমিং চৎপা ৱাঙাংলোয় অমা ওইহল্লিবনি। মহাক্না পাঞ্জবা য়ুনিবর্সিতীগী ৱা ঙাংবগী চাংদম্নবশিংদগী ৱা ঙাংবগী থৌওং কয়া তমখি হায়না কনাগুম্বনা ঐঙোন্দা হায়রকখ্রে। অমসুং থৌরমশিং অদুদা মহাক্না মতম পুম্বদা মকোক ওইখি হায়নসু হায়রকখ্রে। মহাক্না য়ুনিবর্সিতী অসিদগী তম্লকপা মহৈশিং অসি লৈবাক্কী অমসুং মালেমগী থাক্তা শিজিন্নখি। মহাক্না লৈবাক অমসুং ইন্সতিত্যুসন অসিবু মতম পুম্বদা ফাউহল্লগনি।

মহাক্না চহি নৌরিঙৈদগী হৌনা মতিক চাবা লুচিংবা ওইরকখি অমসুং মশাগী চহি ২৫শুবা মতমদা হরয়ানাগী কেবিনেৎ মন্ত্রী ওইখি। মহাক্কী পুন্সিদা অহানবা ওইবা থবক কয়া অমা পাঙথোকপা ঙমখি – মহাক্কী পার্তীগী অহানবা জেনেরেল সেক্রেতরী নুপী অমসুং দিল্লীগী অহানবা নুপী মুখ্য মন্ত্রী।

লোক সভাদা ৭লক অমসুং এসেমব্লীদা ৩লক ভোৎ কাখিবা অসি মহাকপু মীয়াম্না পাম্বগী খুদম অমনি। মহাক অসি লৈবাক নীংবা মীওই অমনি অমসুং মহাক্কী ৱাখল্লোনশিং অসি হকথেংননা ফোঙদোকপা ঙম্বী মীওই অমনি। মহাক্না ইং ১৯৯৬কী লোক সভাগী দিবেত্তা ‘ভারতিয়’বু ময়েক শেংনা তাকখিবা অদু হৌজিক ফাওবা মীয়াম্না নীংশিংনরি। মহাক অসি তসেংনা ৱা ঙাংবা য়াম্না হৈবা মীওই অমনি অমসুং মহাক্না ৱা ঙাংবা মতমদা মীওই কয়ানা থৱাই য়াওনা তানরিবনি।

সুশ্মাজীগী হিন্দি অসিসু মীয়াম্না য়াম্না পাম্ননা তারম্মি। মহাক্কী ৱাহৈ খনবা অসি য়াম্না শেংই। মহাক্না ৱা ঙাংবদা মীয়াম্না মন্ত্রা শোনবা তাবগুম্না তানৈ। মহাক্না সংস্কৃত য়াম্না পামজরম্মি অমসুং ৱাশক লৌবসু সংস্কৃত্তা লৌই। হরয়ানাদগী ওইবনা হরয়ানবি হিন্দিসু হৈ-শিংনা ঙাঙই। অদুবু মহাক্না করতাকদা ভোৎ লেপ্পা মতমদা কনর লোন ময়েক শেংনা ঙাংখিবা অদুনা মহাকপু লোম খুদিংদা হৈবা ওইহল্লিবনি। মহাক্কী ভারতকী লোলশিংবু পামজবগী মওং অসি ঐখোয়না তমজনিংঙাইনি। লোল অমত্তা তাথবা নত্তে মরমদি মখোয়না ঐখোয়গী নাৎ অমসুং বেল্যুশিং মশক খঙহল্লি। মহাক্কী লোল নুংশিবা, রাজনিতীদা লৈবা ৱাখল্লোন অমসুং পারলিয়ামেন্ততা থাজবা অদুনা মহাকপু আউৎস্তেন্দিং পারলিয়ামেন্তরিয়ান হায়না ইকাই খুম্নরিবনি। 

সুশ্মাজী অসি ভারতকী নাৎ অমসুং চৎনবীগী খুদম অমনি। মহাক অসি মতমগা চান্নবা ৱাখল্লোন অমসুং নাৎকী ফজবা কয়াগী অপুনবনি। মহাক্না অহল লমনশিং অমসুং মথক থোংবশিংদা য়াম্না ইকাই খুম্ননা চৎখি। 

মহাক অসি ভারতকী রাজনিতী তৌবশিংগী মরক্তা মীয়াম্না খ্বাইদগী নুংশিখি অমসুং মহাক্না মীওই খুদিংবু নুংশি-চাননা লোয়নখি। মহাকপু হীরম খুদিংদা মীয়াম্না পাম্নরিবসি মহাক্কী মওং মতৌ কয়া অদুগী মরম্ননি।

সুশ্মাজী অসি মতিক চাবা লৈঙাক্লোই অমনি অমসুং মহাক্না পায়রম্বা ফম খুদিংদা খুদম ওইনা নিংশিংলগনি। খুদম ওইনা পল্লবদা, মহাক্না ইনফোর্মেসন অমসুং ব্রোদকাস্তিং মন্ত্রী ওইরিঙৈদা মতম কুইনদগী পন্দূনা লাক্লবা ফিলমগী সেক্তরগী হায়জববু য়াবীদুনা ইন্দস্ত্রীগী থাক্ত শক খঙখ্রিবনি।

ঙসি ঐহাক্না মহাক্কী মফমদা ইকাই খুম্নবা উৎপা অসিদা ঐহাক্না নহা ওইরিবা রাজনিতী তৌবা মীওইশিংনা মহাকপু মতৌ তমজনিংঙাই ওইবা মীওই অমা ওইনা খনবতা নত্তনা মহাক্কী মতৌ তমসি হায়না ঐহাক্না হায়রি।

পাঞ্জাব য়ুনিবর্সিতীগী এলুম্নসসু ওইরম্বা সুশ্মাজীবু অল্মা মেতর ওইহল্লি অমসুং লৈবাক অসিবু চাউখৎহন্নবগীদমক্তা মহাক্না হোৎনখিবা কয়া অদুনা লৈবাক অসিবু চাউথোকচবা ফাওহল্লি। পাঞ্জাব য়ুনিবর্সিতী এলম্নি এসোসিএসন অমসুং লোগী বিভাগনা শ্রীমতি সুশ্মা স্বরাজপু নীংশিংবা ওইনা চহি খুদিংগী ৱা ঙাংবগী থৌরম পাঙথোক্নবা ৱারেপ লৌখিবা অসিবু ঐহাক্না থাগৎপা ফোঙদোক্লি। অসিগুম্বা থৌরম অসিনা মহাকপু নীংশিংবতা নত্তনা নহা ওইরিবা মীওইশিংদা ইথিল কয়া পীদুনা ফাউরবা নুপা নুপী কয়াগী মতৌ তমজবদসু তেংবাংগনি হায়বসি মীয়াম্না কাওবিগনু। সুশ্মাজীনা শৌগৎলম্বা বেল্যু অমসুং ৱাখল্লোন অসিনা মতম পুম্বদা মীয়াম্বু ইথিল পীগনি।

থাগৎচরি !

*********