নেস্নেল কোওপরেতিপ দিবলপমেন্ত কোরপোরেসন(এন সি দি সি)না পুথোকপা সাহাকার কুপত্যুব এন.সি.দি.সি চেন্নেল ঙসি এগ্রিকলচর অমসুং ফার্মরস ৱেলফিয়ারগী য়ুনিয়ন মিনিস্তর নরেন্দ্র সিংহ তোমারনা হাংদোকখ্রে। থৌরম অদুদা মিনিস্তর তোমারনা হায়খি প্রধান মন্ত্রী নরেন্দ্র মোদীনা পাম্লিবা অত্মানির্ভর ভারত থবক ওইনা পাংথোক্নবা এগ্রিকলচর অমসুং ফার্মরস ৱেলফিয়ার মিনিস্ত্রিনা মাংজিল থাদুনা থবকশিং পায়খৎলে। প্রধান মন্ত্রীগী মঙলানশিং মঙফাউন্নবা হোৎনবদা লৈবাক অসিগী কোওপরেতিপশিংনা মরুওইবা থৌদাং অমা লৌরি। ‘কোওপরেতিপ অমা শেম্বা অমসুং রেজিস্তার তৌবা’ হিরম অসিগী মতাংদা এন.সি.দি.সিনা হিন্দি অমসুং রাজ্যশিংগী লোনশিংদা পুথোকপা ভিদিও রাজ্য ১৮গী ওইনা মিনিস্তরনা ফোঙখি।

মিনিস্তরনা হায়খি, হন্দক কেন্দ্র সরকারনা লাউথোকখিবা অত্মানির্ভর ভারতনা অকক্নবা শেন-থুমগী পেকেজ পীদুনা লৌউ-শিংউগী লমদা মতেং পাংলে। মালেমদা ভারতনা চীঞ্জাক পুথোকফম ফেক্তরি ওইনবা পান্দমদা লৈবাক অমা কৈথেল অমা লৈহন্নবা থবকশিং পায়খৎপা হৌরে। অহোংবা কয়া পুরক্তুনা লৌউ-শিংউ, হোর্তিকলচর অমসুং মসিগা চৎমিন্নরবা থবকশিং, ভেলু চেনশিং অমসুং ঙা অমসুং শা-ষনগী পোৎথোকশিং পুথোক-পুনশিন তৌবা, হিদাক কান্নবা পাম্বীশিং, খোই লোইবা অমসুং ওপরেসন গ্রিনগী থবকশিং মপাঙ্গল কনখৎহন্নবা থবকশিং পায়খৎলে। লৌউ-শিংউগী খুদোংচাবা ফিবম শেমগৎনবা আইনশিং শেমদোক্লে।

এন.সি.দি.সিগী থবকশিং থাগৎলদুনা মিনিস্তরনা হায়খি, কোওপরেতিপশিংদা নহারোলশিং শরুক য়াহনবা য়াম্না মরুওই। কোওপরেতিপকী ইহৌ কনখৎহন্নবা অনৌবা কোওপরেতিপশিং শেম্বা অসি তঙাইফদবনি। রাজ্য ১৮গী তোঙান-তোঙানবা লোনশিংগী লমজিং লমতাক্নবা ভিদিওশিং অসিনা এফ.পি.ও ১০,০০০ শেম্নবা অমসুং ফগৎহন্নবা সরকারগী থবকশিং মপাঙ্গল কনখৎহল্লগনি। কোওপরেতিপকী মওংদা এফ.পি.ওশিং শেম্বদা এন.সি.দি.সিনা মরুওইবা থৌদাং অমা লৌরি। মতমগী মতুংইন্না, এন.সি.দি.সি সাহাকার কুপত্যুব চেন্নেলগী ভিদিওশিংদা অহেনবা রাজ্যশিং হাপচিনগনি।

এগ্রিকলচর অমসুং ফার্মরস ৱেলফিয়ার মিনিস্ত্রিগী মখাদা লৈবা এপেক্স লেবেলগী ইন্সতিতুৎ অমা ওইরিবা এন.সি.দি.সিনা কোওপরেতিপশিংদা লুপা করোর ১,৫৪,০০০গী শেনফম মতেং পীখ্রে। ১৯৬৩দা শুপ্নগী লুপা করোর ২.৬৩ য়েন্থোকপা হৌখিবা এন.সি.দি.সিনা ২০১৯-২০দা লুপা করোর ২৮,০০০ য়েন্থোকখি। হৌখিবা চহি ৬দা এন.সি.দি.সি মমাংদা অমুক্তা ওইখিদ্রিবা মওংদা খুমাঙচাউশিল্লে। ১৯৬৩দগী পীরকখিবা অপুনবা শেন্থংগী চাদা ৮৩ হৌখিবা চহি ৬ খক্তদা মসিনা পীখি।  

ভারত্তা চহি কয়াগী মমাংদগী কোওপরেতিপশিং লৈরক্লে অমসুং মখোয়না মাইপাক্না লৌমীশিংগী ফিবম অমসুং শেন-থুমগী ফিবম ফগৎহল্লে। কোওপরেতিপশিং অসিদা লুপ লাখ ৮.৫০ অমসুং মেম্বর মিল্লিয়ন ২৯০ হেন্না লৈরি। মখোয়না মখোয়গী মেম্বরশিংগী শেন্থোক হেনগৎহনবদা মতেং পাংলি অমসুং খুঙ্গংগী ফিবম ফগৎহল্লি। লৌউ-শিংউ অমসুং মসিগী চৎমিন্নরিবা থবকশিংদা খুদোংচাদবশিং হন্থহন্নবা অমসুং ওৎপী-নৈবীবদগী ঙাকথোক্নবা কোওপরেতিপশিংনা লৌমীশিংদা থৌনা পীরি।

****