ভারতকী উপ-রাস্ত্রপতি শ্রী এম. বেঙ্কয়া নাইদুনা ঙসি সুপ্রীম কোর্ত্তগী হৌদুনা লাৱর কোর্ত ফাওবদা পন্দুনা লৈবা কেস মশিং য়ামখৎলকপদা নুংঙাইতবা ফোঙদোকখ্রে অমসুং হীরম অসিগী মতাংদা পল্লদুনা সরকার অমসুং জুদিসিএরীনা কেসশিং অসি অথুবা মতমদা লোয়শিন্নবা হায়খ্রে।

আন্ধ্র য়ুনিবর্সিতীগী দাঃ বি.আর. অম্বেদকর কোলেজ ওফ লোগী চহি ৭৫শুবা মপোক কুমওনগী প্লেতিনম জুবিলীগী  থৌরমদা বর্চুএলগী খুত্থাংদা ৱা ঙাংখিবদা মহাক্না ৱায়েল পীবদা থুহনবা অমসুং শেল য়াম্না চংহন্দবগী মতাংদা পনখি। কেস কয়া অমবু মতম শাংনা য়ৈথোকপগী মতাংদা পল্লদুনা মহাক্না হায়খিবদা ৱায়েল ফংবা অসি হৌজিক শেল য়াম্না চঙবা ওইরক্লি অমসুং মমিং লৈরবা পাউরৌ “ৱায়েল পীদবা অসি ৱায়েল থেংথহনবনি”গা মরী লৈননা ৱাফম কয়া অসি থমখি।

উপ-রাস্ত্রপতিনা হায়খিবদা পব্লিক ইন্তরেস্ত লিতিগেসন (পি.আই.এল.) অসি কনাগুম্বা মীওই অমগী মশাগী ওইবা, শেল-থুমগা মরী লৈনবা অমসুং রাজনিতীগা ওইবা কান্ননবা থৌওং ওইহল্লোইদবনি হায়খি। মসিনা করীগুম্বা মীয়াম পুম্বগী কান্ননবা ওইরগদি অকায়বা লৈতে হায়না মহাক্না হায়খি।

লোগী মহৈরোয়শিংনা খোঞ্জেল লৈতবা মীওইশিংগী খোঞ্জেল ওইয়ু অমসুং মখোয়দা লৈরিবা আইনগী লৌশিং অসিনা তোখায় তারবা মীওইশিংগী কান্ননবা শিজিন্নৌ হায়রদুনা মহাক্না হায়খিবদা লায়রবা মীওিশিংগী লীগেল এদকী থৌওং শোয়দনা শিজিন্নৌ হায়খি। মহাক্না নৌনা হৌগৎলক্লিবা উকিল ওইগদৌরিবা মহৈরোয়শিংদা প্রোফেস্নেল অমসুং ইথিকেল ওইবগী মতৌ চেল্লু অমসুং মথৌ পাঙথোকপা মতমদা অকিবা লৈগনু হায়খি। “নমহৎপীবগী থৌওং কয়া অসি থেংনরিবমখৈ মায়োক্নৌ অমসুং মসিগীদমক্তা তৌফম থোকপা খুদিংমক তৌগদবনি” হায়না মহাক্না মখা তাখি। 

আইন শেম্বা মতমদা ৱাখল চাউথোকপগী তঙাই ফদবগী মতাংদা পল্লদুনা উপ-রাস্ত্রপতিনা আইন অসি অচম্বা অমসুং অরায়বা ওইগদবনি হায়খি। হায়রিবশিং অসিদা মিৎয়েং চংবতা নত্তনা আইনগী ৱাহন্থোক অসিনা মখোয়বু ইনোৎ হাপহনগদবনি হায়খি। “আইনগী ৱাখল্লোন অমসুং তৌফম থোকপা করিনো হায়বা নীংথিনা খঙগদবনি” হায়না মহাক্না মখা তানা হায়খি।

উকিলশিং অসিনা খুন্নাই অমবু শেমদোকপা ঙম্বগী মতিক লৈ হায়বা ৱাফম পল্লদুনা উপ-রাস্ত্রপতিনা খুন্নাই অসি মতমগী মতুং ইন্না অহোংবা নায় অমসুং মসিগা মান্নবা মগুন অসি আইনগীসু চেল্লি হায়না হায়খি। “ৱায়েল পীবা, অচান-মীরায় নাইদবা, মান্নবা মিৎয়েং য়েংবা, মীনুংশি লৈবা অমসুং মীওইবা খুন্নাইগী ৱাখল চেনবগী মিৎয়েংগী মতুং ইন্না ঐখোয়না আইন অসি নীংথিনা য়েংশিন্দুনা মসিগী অফ-ফত্তা তাথোক তাশিন তৌগদবনি অমসুং মসিবু লেপ্তনা অফবগীদমক্তা শেমদোক্কদবনি” হায়না মহাক্না মখা তাখি।

শ্রী নাইদুনা হায়খিবা চাউখৎলক্লিবা খুন্নাইদা কান্নবা পীবা ঙমদ্রবা আইন্দি মুত্থত্তুনা মসিগী মহুৎ শিনবা মতমগা চান্নবা আইন শেমগদবনি হায়খি।

ঐখোয়গী জস্তিস সীস্তেম অসি শেমদোক্নবা পুম্নমক্না হোৎনমিন্নসি হায়রদুনা উপ-রাস্ত্রপতিনা য়াম্না মরু ওইবা অচম্বা মীয়ামগীদমক্তা ঐখোয়গী লীগেল ইনফ্রাস্ত্রকচর অমসুং অচুম্বা ৱায়েল ফংবগী থৌওংশিংদা শেমদোকপগী তঙাই ফদবগী মতাংদা পনখি। অচম্বা মীয়ামদা চৎনবা য়াদবা আইন অমসুং কাঙলোন কয়া অমা লৈবা অসিগী মতাংদা নুংঙাইতবা ফোঙদোক্লদুনা মহাক্না লীগেলগী হাইয়রকী চাউথোকহনবগী মতাংদা পনখি।

অনৌবা এজুকেসন পোলিসীগী মতাংদা পন্দুনা মহাক্না বেসিক প্রাইমরী অমসুং অপ্পর প্রাইমরী এজুকেসন অসি মমালোলদা তম্বীবগী তঙাই ফদবগী মতাংদা ৱাফম থমখি। “ঐহাক্না খোঙথাং অমসুং থাংজিন্দুনা হায়রি মদুদি ঐখোয়না ঐখোয়গী পুন্সি অমসুং পথাপশিংদা ইমালোল অসি য়ারিবমখৈ শিজিন্ননবা হোৎনগদবনি। এজুকেসন্দা, লৈঙাকপদা নত্ত্রগা ৱায়েল পীবগী হীরমশিংদা মীয়াম্না মখোয়গী ৱাখল নীংথিনা ৱা ঙাংদুনা, ইদুনা ফোঙদোকপা অমসুং য়েৎনবা ঙম্নবা ইমালোল শিজিন্নবা ঙমগদবনি” হায়না মহাক্না  হায়খি।

“অরিবা রামরাজ্যগী মপুং ওইবা ৱাখল্লোন্দি শাংদোকপা অমসুং অতাংবা থৌওংগী খুত্থাং চত্থদনা মীয়ামদা অচুম্বা অমসুং অথুবা ৱায়েল ফংবা গনতন্ত্রগী মওং অমনি” হায়না গান্ধীজিনা হায়রিবা ৱাফম পল্লদুনা উপ-রাস্ত্রপতিনা হায়খি, “ রামরাজ্যগী য়ুম্বীদি অচুম্বা অমসুং অফবা ৱায়েলনি অমসুং মসি ফংনবা ঐখোয়গী জুদিসিএরী য়াওনা গনতন্ত্রগী মওং চেনবা লৈঙাক অসি মপাঙ্গল লৈহন্নবা হোৎনবা অসিনি”।

মহাক্না নহা ওইরিবা মহৈরোয়শিংদা লীগেল প্রোফেসন অসিবু মিসন অমা ওইনা লৌনবা অমসুং কনা লৈজদ্রবা মীওইশিংবু মতেং পাংনবা মতম পুম্বদা শেম শাদুনা লৈনবা হায়খি।

মহৈরোয়শিংনা মতম শাংনা লৌশিং তান্দুনা লৈদুনা ঐখোয়গী গনতন্ত্রগী পথাপকী তোঙানবা কয়া ভাব তাবা ঙম্নবা অমসুং মসিগী ইন্সতিত্যুসন অমসুং মসিগী থৌওংশিংগী মথৌ তৌবগী মওং নীংথিনা খঙবা ঙম্নবা হোৎনদুনা লৈহন্নিংবগী ৱাফম থম্লদুনা শ্রী নাইদুনা লীগেলগী হীরমদা অফবা ওইবা অমসুং খুন্নাইগী মীওইশিংদা অচান মীরায় নাইদবা পোলিসী শেম্বগী তঙাই ফদবা লৈ হায়খি।

কোলেজ অসিবু হৌদোক্লম্বা দাঃ সি.আর. রেদ্দীবু ইকায় খুম্নবা উৎলদুনা মহাক্না নহা ওইরিঙৈদা কোলেজ অসিদা মহৈরোয় ওইরিঙৈগী মতম নিংশিংলদুনা মসিনা মহাক্কী মশাগী অমসুং রাজনিতীগী পুন্সিগী অকনবা য়ুম্বী শেমখি হায়না হায়খি।

আন্ধ্র প্রদেশ হাই কোর্তকী জজ জস্তিস তি. রজনি অমসুং জস্তিস বত্তু দেবানান্দ; আন্ধ্র য়ুনিবর্সিতীগী ভাইস চান্সেল্লর প্রোফঃ পি.ভি.জি.দি. প্রসাদা রেদ্দী; দাঃ বি.আর. অম্বেদকর কোলেজ ওফ লোগী প্রিন্সিপাল প্রোফঃ এস. সুমিত্রা; আন্ধ্র য়ুনিবর্সিতীগী ফেকলতী ওফ লোগী দীন প্রোফঃ দি.এস. প্রকাসা রাও; দাঃ বি.আর. অম্বেদকর কোলেজ ওফ লোগী ফাউন্দর প্রিন্সিপাল প্রোফঃ কে. গুপ্তেস্বর অমসুং কতার লৈবাক্কী এত্তোর্নী জেনেরেল ওফিস্কী স্পিসিএল এদবাইজর দাঃ পি.এস. রাওসু থৌরম অদুদা শরুক য়াখি।

মখাদা পীরিবা অসি মহাক্কী ৱা ঙাংখিবগী অপুনবা ৱাহৈশিংনিঃ

আন্ধ্র য়ুনিবর্সিতীগী দাঃ বি.আর. অম্বেদকর কোলেজ ওফ লোগী ৭৬শুবা কুমওনগী প্লেতিনম জুবিলীগী নুংঙাইরবা থৌরম অসিদা শরুক য়াবা ফংবা অসি ঐহাক্কী লাইবক ফবনি। ঐহাকসু মসিগী শেংলবা মহৈ তম্ফমশঙ অসিগী  চাউথোকচনিংঙাই ওইরবা এলম্নস অমা ওই হায়বদা ঐঙোন্দা নুংঙাইবা ফাওই।

মতম অমদা মদ্রাজকী শরুক অমা ওইরম্বা লৈবাক অসিগী শরুক অসিদা লোগী কোলেজ অমা লৈবগী তঙাই ফদবা লৈবগী মতুং ইন্না ইং ১৯৪৫দা লো কোলেজ অসি আন্ধ্র য়ুনিবর্সিতীগী মখাদা লিংখৎখিবনি।

ঙসিগী নুংঙাইরবা প্লেতিনম জুবিলীগী থৌরম অসিদা বিজনরী অফাউবা অমা ওইরম্বা অমসুং মহাক্কী তুং কোয়না উবা ঙম্বা মতিক্কী মরম ওইদুনা মীয়াম্না ইকায়খুম্নরিবা মসিগী ইন্সতিত্যুসন অসি লিংখৎপদা তেংবাংখিবা আন্ধ্র য়ুনিবর্সিতীগী ফাউন্দর চান্সেল্লর দাঃ সি.আর. রেদ্দীবু নিংশিংফম থোকই। দাঃ কত্তামাঞ্চী রামালিঙ্গা রেদ্দীনা মদ্রাজকী চীফ জস্তিস সার লাইওনেল লীচ, মদ্রাজকী মতমদুগী এদবোকেৎ জেনেরেল শ্রী পি.ভি. রাজামন্নার, উকিল ওইরম্বা শ্রী ভি. গোবিন্দরাজাচারি অমসুং অতোপ্পা মীওই খরগা তান্নরবা তুংদা মসিগী কোলেজ অসি লিংখৎখিবনি।

কোলেজ অসিনা মসিগী মশক থোকপা লম্বী অসি ইং ১৯৪৫দগী হৌখি অমসুং মদ্রাজ হাই কোর্তকী অফাউবা জজ শ্রী রাজামন্নারনা শঙ্গাখি। মতম অদুগী লোগী বিভাগ ওইরম্বা কোলেজ অসি অহানবদা মচিলাপত্নমদা লৈরম্মি অমসুং ইং ১৯৪৯দা হৌজিক্না ভিশাখাপত্নম হায়না খংনরিবা ৱালতাইরদা হোংদোকখি। প্রোফঃ এস. বেঙ্কতারমন্না লো বিভাগকী অহানবা মকোক অমসুং লোগী প্রোফেসসর ওইখি। আন্ধ্র য়ুনিবর্সিতীগী আরৎস, কম্মর্স অমসুং লোগী কাংলুপ্তগী তোঙানবা অমা ওইদুনা দাঃ বি.আর. অম্বেদকর কোলেজ ওফ লো হায়না কোন্না মিংথোনখি। মসিগী কোলেজ অসিনা সেমিস্তর সীস্তেমবু বার কাউন্সিল ওফ  ইন্দিয়ানা মসিগী মতাংদা হৌদোরক্ত্রিঙৈগী মমাংদা অহানবা ওইনা ইং ১৯৭৫দা  হৌদোকখি। মসিগী কোলেজ অসি মতম কুইরবগী মমাংদগী পোস্ত গ্রেজুএসন্দা ইন্তর্নেস্নেল লো অসিবু স্পেসিএলাইজ তৌবগী হীরম ওইবা য়াহনখিবা ইন্সতিত্যুসন খরগী মনুংদা অমনি।

দাঃ সি.আর. রেদ্দী অসি লোগী হীরমদা একাদমিক অমসুং স্কোলার ওইনা মহৈ তম্বদা থাজবা থম্বা মীওই অমনি। মহাক্না ইন্সতিত্যুসন অসিদা লো তম্ববু চাংয়েংনবা অমসুং ইন্তর্দিসিপ্লিনরী ওইবা মওং অমা ওইহন্নিনবগী মিৎয়েং থমখি অমসুং মসিনা মরম ওইদুনা মতুং তারকপদা লোগী মশক থোকপা মীওই অমসুং ওজা কয়া অমস শেমখি।

অসিগুম্বা শক্নাইরবা মীওই অসিগী মফমদা ঐহাক্না ঙসি ইকায় খুম্নবা উৎলি।

তসেংনা হায়রবদা ঐহাক্না ঐহাক্কী পুন্সিগী মশক থোকপা অমসুং নিংশিংনিংঙাই ওইরবা  মহৈরোয় ওইরিঙৈগী মতম কয়া ভিশাখপত্নমদা মহৈরোয়গী লুচিংবা অমসুং জয় আন্ধ্র ইহৌগী মমিং চৎপা মীওই অমা ওইনা লেনখি। মমিং চৎলবা ইমর্জেন্সীগী মতমদা ঐহাকপু ফাদুনা অহানবদা ভিশাখাপত্নমদা থমখি অমসুং কোন্নদি হায়দ্রবাদকী মুর্শিদবাদ জেলদা থমখি। ঐহাক্না চহি অমা মখায়গী মতম জেলদা লৈখি। ঐহাক্না তৌখিবা অশোয়বা হায়ববু ঐহাক্না শ্রী জয়প্রকাশ নরায়নবু ভিশাখপত্নমদা মীয়ামগী মীফম অমদা ৱা ঙাংনবা কৌখিবা অদুনি অমসুং সরকারনা মসিনা মরম ওইদুনা মতমদুগী ওপোজিসনগী মীওই কয়া অমগা লোয়ননা ঐহাকপু জেলদা থমখি।

ঐহাক্না কোলেজ অসিদা তম্বা ফংখিবা অসি লায়বক ফবনি খল্লি। ঐহাক্না কোলেজ অসিদা তম্বা মতমদা ঐহাক্কী ইশাগী পুন্সি অমসুং রাজনিতীগী পুন্সিগী অচেৎপা মরু হুনখি। ঐহাক্না ফজরবা ভিশাখাপত্নম শহর অমসুং মসিগী মীওইশিংগা লৈনখিবা মরীবু মতম পুম্বদা নীংশিংলি। লো কোলেজ অসিদা ঐহাকপু হীরম কয়াদা তাকপী তম্বীরকখিবা ঐহাক্কী ওজাশিং – শ্রী বি.এস. মুরতীগারু, শ্রী গোপ্লাকৃষ্ণন সাস্ত্রী গারু, শ্রী গুপ্তেস্বরগারু, শ্রী লক্সমনা রাও গারু, শ্রী রামাচন্দ্র রাও গারু, শ্রী অপ্পালানাইদুগারু, শ্রী সন্তোস গারু, শ্রী জগনমোহনগারু, শ্রী পদমানভমগারু অমসুং শ্রী কৃষ্ণ মুরতীগারুগী মফমদা ফেসবুক পোস্ত অমদা ইকাই খুম্বা উৎখ্রবনি।

কোলেজ অসিনা হেক হৌরকপদগী হৌনা মসিগী ফেকলতীদা মমিং লৈরবা জ্যুরিস্ত অমসুং লীগেল ল্যুমিনেরি কয়া য়াওদুনা লাকখি হায়বসি য়াম্না পুক্নিং থৌগৎনিংঙাইনি।

কোলেজ অসিনা মসিগী মহৈরোয়শিংবু এল.এল.এম. অমসুং পি.ঐচ.দি.গী থাক্তা অৱাংবা থাক্কী মহৈ-মশিং অমসুং রিসর্চকী থৌওং কয়াগীদমক্ত শেম শানবা অমসুং তুংদা বারগী হীরমদা মশক থোকপা পুন্সি অমা শেম্নবা মহৈ মশিং তম্বীবগী থাক হেনগৎহন্দুনা মতম পুম্বদা লাক্লিবসিদা ঐহাক্না য়াম্না হরাওবা ফাওই।

প্লেতিনম জুবিলী অসি ইন্সতিত্যুসন অমগী ওইনা য়াম্না চাউথোকচনিংঙাইনি। মসিনা মায় পাকপা কয়াগী মশিং থিবা খক্তা নত্তনা লাক্কদৌরিবা মতমগী থৌরাং য়াৎপসুনি। থৌরম অসিগা মরী লৈননা ঐহাক্না মীয়াম পুম্বদা য়াইফ পাউজেল পীরি।

ঐহাক্কী নুংশিরবা ইচিল ইনাওশিং,

ভারতকী খ্বাইদগী মমিং চৎপা অমসুং ভারতকী সংবিধানগী আর্কিতেক্তসু ওইরিবা দাঃ ভিমরাও রামজি অমবেদকরগী মমিং লৌদুনা কোলেজ অসিগী মমিং থোল্লিবসি য়াম্না চান্নৈ।

দাঃ অম্বেদকর অসি বিজনরী স্তেৎসমেন, ফিলোসোফর, শক্নাইরবা মীওই, মমিং চৎপা জ্যুরিস্ত, ইকোনোমিস্ত, অইবা, খুন্নাই শেমদোকপা অমসুং অফবা মীওইবা অমা ওইবগী মগুন চেনবা শক্লোন য়াম্বা মীওই অমনি। লৈবাক অসিগী সংবিধান শেম্বদা তেংবাংখিবা অমসুং লৈবাক্কী অরুবা মতমদা লুচিং থৌদাং লৌরম্বা শক্নাইরবা লুচিংবা অসি লৈবাক অসিনা মতম পুম্বদা ইকাই খুম্নগনি।

দাঃ অম্বেদকরনা কাওরোইদবা খোঙফম অমা থনম্লে অমসুং মহাক্কী ৱাখল্লোন অসি মতম পুম্বগা অদুমক চানদুনা লাক্লি। মহাক অসি নমহৎপীরবা মীওইশিংগীদি তসেংবা মেসিয়া অমনি অমসুং কাস্ত খায়দোকপা মুত্থত্তুনা মীওই পুম্ববু মান্নবা থাক্তা পুরক্নবা মহাক্না পুন্সি চুপ্পদা হোৎনখি।

মহাক্না জেন্দর ইক্বেলিতী অমসুং এজুকেসনগী খুত্থাংদা নুপীশিংবু নিং-খা তম্বদা অচেৎপা থাজবা থমদুনা লাকখি। মহাক্না হায়রম্মি, “পোলিতিকেল দিমোক্রেসি অসি মসিগী মখোঙদা সোসিএল দিমোক্রেসি লৈত্রবদি কুইনা চৎলোয়। সোসিএল দিমোক্রেসী কদাইবু কৌবগে? মসিনা হায়বদি লিবর্তী, ইক্বেলিতী অমসুং ফ্রেতর্নিতীবু পুন্সিগী ৱাখল্লোন্নি হায়না লৌবা পুন্সি মহিং অদুবুনি”।

লোগী মহৈরোয় অমা ওইনা ঐহাক্না নখোয় পুম্নমক্তা দাঃ অম্বেদকরগী পুন্সি অমসুং থবকশিং অসি মমুৎ তানা খঙহন্নিঙই অমসুং মসিদগী ইথিল লৌদুনা নহাক্কী অঙম্বা থাক্তা লৈবাক্কী সেবা তৌহন্নিঙই।

ঐহাক্কী নহা ওইরিবা মরুপশিং,

নখোয়দি প্রীমিয়র এজুকেস্নেল ইন্সতিত্যুসনগী পোর্তেলশিংগী খুত্থাংদা মহৈ তম্বা ফংলিবা অসি য়াম্না লায়বক ফরবনি। দাঃ অম্বেদকরগী লীগেসিগী তুং ইনবা উকিল অমা ওইনা নখোয় পুম্নমক্না সংবিধানবু ঙাম শেন্দুনা থম্নবা মতম পুম্বদা হোৎনগদবনি। শক্নাইরবা লীগেল ল্যুমিনেরী ময়াম অমনা ঐখোয়গী দিমোক্রেতিক ওইবা লৈবাক অসি ওইহন্নবা মরু হুনখিবনি। ঐখোয়গী নিং-তম ইহৌগী শক্নাইরবা লুচিংবশিং, মিং ওইনা পল্লবদা মহাত্মা গান্ধীদগী বাল গঙ্গাধর তিলক্তগী সি. রাজাগোপালাচারিদগী লালা লাজপৎ রাই অমসুং তাঙ্গুত্রি প্রকাসম পন্তুলু অসি উকিল ঙাক্তনি।

খৎনা চৈনবা তৌদনা নীংথিনা ৱারী শাবা অমসুং অখাঙ কনবা অফবা উকিল অমগী মগুন চেনবা থৌওংশিংগী খুত্থাংদা ঐখোয়না নিংতম্বা, মীওইবগী তঙাই ফদবা হক অমসুং দিমোক্রেসী তানবগী মতমগী মতুং ইন্না চাউখৎপা পুরকপা থৌদাং কয়াগা লোয়ননা ঐখোয়গী উকিলশিংগী লুচিং মখাদা নিং-তম ইহৌ হৌখি হায়না ঐহাক্না মতম পুম্বদা খল্লি। অমসুং ঐখোয়গী উকিলশিংনা লৈবাক অসিগী সংবিধান শেম্বদা লৌখিবা থৌদাং কয়া অমসু ঐহাক্না খঙই।

হয়েংগী উকিল অমসুং জ্যুরিস্ত অমা ওইনা নখোয়দসু লৈবাক অসিবু শেমদোক্নবা চপ মান্নবা থৌদাং লৈ।

ঐহাক ইশামকসু লোগী মহৈরোয় অমা ওইনা লৈবাক শেমগৎপদা লীগেল এজুকেসনগী মরু ওইবশিংগী মতাংদা নৈননিংই। লোগী কাংলোন্না ঙাক্তুনা চৎপা খুন্নাই অমসুং লৈবাক অমা ওইনা ঐখোয় পুম্নমক্না লোদা মিৎয়েং চংবতা নত্তনা লোগী থৌদাংগী মরমদসু মিৎয়েং চংগদবনি।

আইন অমা শেম্বা মতমদা ৱাখল চাউথোক্কদবনি। মসি অচম্বা অমসুং অরায়বা ওইগদবনি। ৱাখল পিকশিনবা মতমদা লান্না ৱাহন্থোক পীবা অমসুং শিজিন্নবগী থৌওং কয়া থোক্লক্কনি অমসুং য়ারিবমখৈ মসি ঐখোয়না তৌরোয়দবনি।

নহা ওইরিবা মীওই কয়া অমনা লো কোর্সতা য়াওদুনা উকিল কয়া অমা ওইনরবসু হৌজিক মসিগী অৱাৎপা য়াম্না লৈরি। ঐখোয়না হীরম অসিগী মরমদা খন্থদুনা মতিক চাবা থবক পায়খৎকদবনি। অমসুং ঐখোয়না চপ মান্ননা নীংশিংগদবদি মশিংদগী গুন্দা হেন্না মিৎয়েং চংগদবনি হায়বসি কাওরোয়দবনি। জুদিসিএরীনসু হীরম অসিদা মিৎয়েং চংফম থোকই হায়না ঐহাক্না খল্লি।

চহি কয়া অসিদা ভারতনা ভি.আর. কৃষ্ণ আইয়র, নানি পালখিবালা, ফালি এস. নরিমান, সোলি সোরাবজী, হরিশ সাল্বে, পি.বি. গজেন্দ্রগদকর, কোকা সুব্বা রাও, কে.এস. হেগদে অমসুং হন্স রাজ খুরানাগুম্বা ইমর্জেন্সীগী মনুংদা ফাওবা মীয়ামগী হক ঙাক শেন্নবা হোৎনবদা তুং হনখিদবা মমিং লৈবা জ্যুরিস্ত কয়া পুথোকখ্রে।

উকিলশিংনা খুন্নাই অমবু শেমদোকপা ঙম্বগী মতিক লৈ। খুন্নাই অমা চাউখৎলকপগী মতুং ইন্না লোসু চাউখৎপা নাইগদবনি। ৱায়েল পীবা, অচান-মীরায় নাইদবা, মান্নবা মিৎইয়েং য়েংবা, মীনুংসি লৈবা অমসুং মীওইবা খুন্নাইগী ৱাখল চেনবগী মিৎয়েংগী মতুং ইন্না ঐখোয়না আইন অসি নীংথিনা য়েংশিন্দুনা মসিগী অফ-ফত্তা তাথোক তাশিন তৌগদবনি অমসুং মসিবু লেপ্তনা অফবগীদমক্তা শেমদোক্কদবনি। চাউখৎলক্লিবা খুন্নাইদা কান্নবা পীবা ঙমদ্রবা আইন্দি মুত্থত্তুনা মসিগী মহুৎ শিনবা মতমগা চান্নবা আইন শেমগদবনি হায়খি।

মসিগা মান্নবা ইথিলগা লোয়ননা ঐখোয়না ঐখোয়গী ৱায়েল পীবগী পথাপ অসিসু শেমদোকপগী থবকসু লেপ্তনা পাঙথোক্কদবনি। মরু ওইবা অচম্বা মীয়ামগীদমক্তা ঐখোয়গী লীগেল ইনফ্রাস্ত্রকচর অমসুং অচুম্বা ৱায়েল ফংবগী থৌওংশিংদা লেপ্তনা শেমদোকপগী তঙাই ফদবা লৈ। অচম্বা মীয়ামদা চৎনবা য়াদবা আইন অমসুং কাঙলোন কয়া অমা হৌজিক লৈরি। মসিগী মতাং অসিদা লীগেলগী মরমদা মীয়াম্বু হেন্না খঙহনবা অমসুং আইনশিং অসিবু অচম্বা অমসুং অরায়বা ওইহনবগী তঙাই ফদবা লাক্লি। সরকারনা মতমগা চান্নদ্রবা আইন কয়া অমা মুত্থৎখিবগী সরকারবু থাগৎপা ফোঙদোক্লি।

মীয়ামদা অচুম্বা ৱায়েল পীবা খক্তনা অরোয়বা নত্তে। মখোয়না লোল্লিবা লোন্দা লীগেলগী পথাপ্তা শিজিন্নরিবা ৱাহৈ-ৱাতা কয়াশিং অসি নীংথিনা খঙহনবগী মথৌ য়াম্না তাই।

অচুম্বা ৱাইয়েল পীবা অসি থুহনবা অমসুং শেল চংহন্দবগী তঙাই ফদবা অমসু লৈরি। লীগেলগী হীরমদা থবক তৌবা মীওইশিং অসিনা মসিগী মতাংদা পুন্না থবক তৌবা তাই।

ঐহাক্কী নহা ওইরিবা মরুপশিং,

ইকাই খুম্ননিংঙাই ওইরবা য়ুনিবর্সিতীগী মহৈরোয় অমা ওইনা নখোয়না মতম পুম্বদা খুন্নাই অমসুং লৈবাক অসিদা মতৌ করম্না তেংবাংসিগে হায়না খনগদবনি। নখোয়না লীগেল প্রোফেসন অসিবু মিসন অমা ওইনা লৌগদবনি অমসুং কনা লৈজদ্রবা মীওইশিংবু মতেং পাংনবা মতম পুম্বদা শেম শাদুনা লৈগদবনি। খোঞ্জেল লৈতবা মীওইশিংগী খোঞ্জেল ওইয়ু। মখোয়গী পুন্সিবু শাফবা অমসুং নুংঙাইবা ওইহন্নবা নখোয়গী লৌশিং শিজিন্নগদবনি।

ঙসিগী থৌরম অসিদা শরুক য়ারিবা মহৈরোয় খুদিংনা লায়রবশিংগীদমক্তা লীগেল এদকী থৌওং পাংথোক্কনি হায়না লেপহন্ননিঙই। হয়েং ওইরক্কদবা উকিল অমা ওইনা মতম পুম্বতা অতোপ্পনা হায়বা তাগদবনি। প্রোফেস্নেল অমসুং ইথিকেল ওইবগী মগুন অসি তমশিল্লু অমসুং নখোয়গী থবক পাঙথোকপগী মতম য়ৌরকপদা কিগনু। নমহৎপীবগী থৌওং কয়া অসি থেংনরিবমখৈ মায়োক্নৌ অমসুং মসিগীদমক্তা তৌফম থোকপা খুদিংমক তৌগদবনি।

ভারতকী সংবিধান অসি য়েৎনিংঙাই লৈতবা মালেমগী খ্বাইদগী ফবশিংগী মনুংদা অমনি। মসিনা মীওইবগী বেল্যু অসি খ্বাইদগী ৱাংনা ময়ায়দা থম্মি অমসুং মসিগী মনুংদা জস্তিস, লিবর্তী অমসুং ইকেলিতী অসিনা কোর্নরস্তোন ওইনা থম্মি। জেন্দরদা থাক মান্নদবা মিৎয়েং য়েংবা, অমনা অমবু তাথী তাওই তৌবা, কম্ম্যুনেল ওইবা অমসুং কাস্তকী চৎনবীবু খুন্নাই অসিদগী মুত্থৎপগী পান্দম থমদুনা মীয়াম খুদিংদা আইনগী মতুং ইন্না মান্ননা অমসুং তেক্ত কাইদনা থম্নবা হোৎনরি। অমসুং “সংবিধান অসি উকিল অমগী চে অমখক্তা নত্তে, মসি পুন্সিগী গারিনি অমসুং চহিগী ইথিল অসিনা মতম পুম্বদা মসিদা ইথিল পীগনি” হায়না হায়রমখিবা মীওই অদু অম্বেদকরনি।

নুংশিরবা নহারোলশিং, মতম পুম্বদা মহৈ, লৌশিং তমদুনা লৈয়ু। ঐখোয়গী গনতন্ত্রগী পথাপকী তোঙানবা কয়া ভাব তাবা ঙম্নবা অমসুং মসিগী ইন্সতিত্যুসন অমসুং মসিগী থৌওংশিংগী মথৌ তৌবগী মওং নীংথিনা খঙবা ঙম্নবা হোৎনদুনা লৈহন্নিংই অমসুং লীগেলগী হীরমদা অফবা ওইবা অমসুং খুন্নাইগী মীওইশিংদা অচান মীরায় নাইদবা পোলিসী শেম্বগী তঙাই ফদবা লৈ। মীয়াম্না শরুক য়াদনা গনতন্ত্রা অমত্তা মায় পাকপা ঙম্লোই। নশাসু খঙনবা হোৎনৌ অমসুং অতোপ্পবুসু খঙহল্লু। লৈবাক অসিনা পীরিবা খুদোংচাবা কয়া অসিবু লৌবা ঙম্বা মীওই কয়া লৈবাক অসিনা শেম্বদা তেংবাংউ।

হয়েংগী উকিল অমা ওইনা নখোয় পুম্নমক্না খুন্নাইদা অফবা থৌওং অমা পুরক্তুনা অনৌবা ভারত অমা শেম্নবা লুচিংগনি হায়না ঐহাক্না থাজবা থম্মি।

ঐহাক্কী ৱারোল লোইশিন্দ্রঙৈগী মমাংদা ঐহাক্না “ঐহাক্না ৱাখলদা নীংজরিবা রাম অসি তসেংনমক পৃথিবী অসিদা লৈরমদ্রবসু, অরিবা রামরাজ্যগী মপুং ওইবা ৱাখল্লোন্দি শাংদোকপা অমসুং অতাঙবা থৌওংগী খুত্থাঙ চত্থদনা মীয়ামদা অচুম্বা অমসুং অথুবা ৱায়েল ফংবা গনতন্ত্রগী মওং অমনি। রামরাজ্যগী মখাদা হুই ফাওবা অচুম্বা ৱায়েল ফঙই হায়নরিবনি” হায়না গান্ধীজিনা হায়রম্বা ৱাফম অসি পন্নিংই। রামরাজ্যগী য়ুম্বীদি অচুম্বা অমসুং অফবা ৱায়েলনি অমসুং মসি ফংনবা ঐখোয়গী জুদিসিএরী য়াওনা গনতন্ত্রগী মওং চেনবা লৈঙাক অসি মপাঙ্গল লৈহন্নবা হোৎনবা অসিনি।

পুৱারী ওইরগদবা থৌরম অমা হয়েংদি ঐখোয়না অয়োধ্যাদা উবা ফংলগনি। ঐখোয়গী মশক নাইবা নাৎকা ঐখোয়গা অমত্তা ওইহনবা থৌরম অমা। ঐখোয়না ভাব হেক তাবদগী খঙলক্লবা অমসুং চহি লিশিং কয়াগী মমাংদা ইরম্বা মতম নাইদ্রবা ইপিক, রামায়নগা ঐখোয়গা অমত্তা ওইহনবগী থৌরম অমা।

মসি তসেংনা য়াম্না নুংঙাইবা পুংফম অমা ওইরগনি মরমদি ঐখোয়গী হৌখ্রবা মতমগী য়াইফরবা মতম অদু অমুক্কা হন্না হিঙ্গৎহন্দুনা ঐখোয়না লুনা লৌজরিবা বেল্যুশিং অসিবু লাৎপগী মতম লাক্লবনি।

রাম হায়বসি ভারতকী নাৎকী মহুৎ শিনবা অমনি। মহাক অসি মতিক চাবা নিংথৌ অমসুং মীওইবা অমনি। মীওইবা অমনা হেক খঞ্জবা ঙম্বা অফবা মগুন খুদিংমক মঙোন্দা লোয়না চেল্লিবনি।

ওগস্ত ৫, ২০২০গী নুমিৎ অসিগী হায়রিবা নুংঙাইরবা থৌরম অসিদা মীয়াম পুম্বনা পাম্বগী মতুং ইন্না রামগী অরিবা লায়শঙ অসি অয়োধ্যাদা নৌনা অমুক শাবা হৌরগনি অমসুং মসিনা রমায়ন্না মালেমদা পীরিবা অফবা পাউজেল কয়া অসি নৌহৌননা অমুক শন্দোকপা ঙম্লগনি।

ঐহাক্না নখোয় পুম্নমক্তা অমুক্কা হন্না আন্ধ্র য়ুনিবর্সিতীগী দাঃ বি.আর. অম্বেদকরগী ৭৬শুবা মপোক কুমওন অসিদা য়াইফ পাউজেল পীরি অমসুং মসিগী ইন্সতিত্যুসন অসিনা মতিক লৈবা অমসুং লমচৎ-শাজৎ ফজবা উকিল কয়া লেপ্তনা শেমদুনা লাক্কদৌরিবা মতমশিংদা অনৌবা থাক্কী মায় পাকপা কয়া ফংবা ওইরসনু।

নখোয়না তুংদা পাঙথোকপা থবক খুদিংদা মায় পাকপা ওইয়ু।

থাগৎচরি।

জয় হিন্দ।

*******