কেন্দ্রগী ফাইনান্স অমসুং কোর্পোরেত এফোয়র্সকী মন্ত্রী শ্রীমতী নির্মলা সিতারমন্না কোবিদ-১০না পীরিবা চৈথেং অসিনা মরম ওইদুনা ইন্দস্ত্রীনা লোন অমুক হন্না শাগৎলকপদা মথৌ তাবাশিংদা সরকারনা আর.বি.আই.গা পুন্না থবক তৌমিন্নরি হায়না ঙসি ফোংদোকখ্রে। ফেদরেসন ওফ ইন্দিয়ন চেম্বর্স ওফ কম্মর্স  এন্দ ইন্দস্ত্রী(এফ.আই.সি.সি.আই.)গী নেস্নেল একজিক্যুতিব কমিতী মীতিং(এন.ই.সি.এম.)দা ৱা ঙাংবা মতমদা শ্রীমতী সিতারমন্না হায়খি, “পান্দম অসি অমুক হন্না শাগৎলকপদনি। শেল-থুমগী মন্ত্রালয়না আর.বি.আই.গা মসিগী মতাংদা নিংথিজনা থবক তৌরি। প্রিন্সিপল অসিদা অমুক হন্না শাগৎপগী মথৌ তাবগী ৱাখল্লোন অসিদা নিংথিজনা লৌখৎখ্রে।”

সরকার অসিনা লাওথোকখিবা নৌনা শেমগৎপগী থৌরাংশিংগী মতাংদা শন্দোক্না তাক্লদুনা শ্রীমতী সিতারমন্না হায়খি, “লাওথোকখিবা অমসুং পায়খৎখিবা খোংথাং খুদিংমক অসি স্তেকহোলদরশিংগা  মপুং ফানা খন্নরবা মতুংদা লৌখৎখি অমসুং সরকারগী মনুংদগী করিগুম্বা  খোংথাং অমফাওবা মায়থিররোই হায়বসি লেপথোক্নবা মরমদি ঐখোয়না মথৌ তারিবা খম্ব্রাংননা হোংদোকখিবা অমত্তা তৌখিদে। ঐখোয়না খোংথাংশিং অসি শোইদনা মখা য়ৌনা ফংহন্নবা মসিগী খোংথাংশিং অসি লৌখৎখিবনি।”

সরকরনা লাওথোকখিবা ইমর্জেন্সী ক্রেদিৎ স্কীমগী মখাদা এম.এস.এম.ই.না লোন লৌবদা মায়োক্নরিবা খুদোংচাদবশিংগী মতাংদা এফ.আই.সি.সি.আই.গী মীহুৎশিংনা পুখৎলকখিবা ৱাফমশিংগা মরি লৈননা ৱাফম ফোংদোক্লদুনা শ্রীমতী সিতারমন্না হায়খি, “ইমর্জেন্সী ক্রেদিৎকী ফেসিলিতীগী মখাদা লৈবা এম.এস.এম.ই.দা ক্রেদিৎ পীবদা বেঙ্কনা য়াদবা য়ারোই। করিগুম্বা য়ারক্তবা তারবদি মদুগী মতাংদা শোইদনা রিপোর্ত তৌগদবনি। মদুদা ঐহাক্না য়েংশিনগনি।”

ইন্দস্ত্রীনা ক্রেদিতকী মথৌ তাবশিং অসি হেনগৎলক্লিবা অসি য়েংশিন্নবা দিভেলপমেন্ত ফাইনান্স ইন্তিত্যুসন অমা শেম্নবা এফ.আই.সি.সি.আই.না পুখৎলকপা ৱাফমদা ফাইনান্স মন্ত্রীনা হায়খি, “দিভেলপমেন্ত ফাইনান্স ইন্তিত্যুসনগী মতাংদা থবক চত্থরি। মসিগী মওং অসি করি ওইরক্কদগে হায়বদু মতম খরগী মনুংদা খংলগনি।”

লল্লোন-ইতিক তৌনখিবগী মতাংদা পীথোক-পীশিন তৌনবগী মথৌ তাবগী মতাংদা প্রপ-প্রপ তকশিল্লক্তুনা শ্রীমতি সিতারমন্না হায়খি, “পীথোক-পীশিন তৌনবগী থৌরাং অসি ঐখোয়না মার্কেৎশিং হাংদোকখ্রবা লৈবাকশিংদা হঙ্গৎখ্রে। ঐখোয়গী লল্লোন-ইতিক্কী মতাংদা য়াশিন্নবগী ৱারী-ৱাতাই শান্নবদা অমগা-অমগা পীথোক-পীশিন তৌবা হায়বসি য়াম্না মরুওইবা বিন্দু অমনি।”

হেল্থকেয়র অমসুং অতৈ পোৎলমশিংগী মমলদা জি.এস.তি. হন্থনবগী মতাংদা জি.এস.তি. কাউন্সিলনা থবক পায়খৎনবা ৱারেপ লৌরে হায়না ফাইনান্স মন্ত্রীনা হায়খি।

হোসপিতেলিতীগী সেক্তরদা মোরেতোরিয়ম অসি পাকথোক-চাওথোক্নবা নত্রগা অমুক হন্না শেমগৎনবগী দিমান্দ তৌনবা আর.বি.আই.গা লোয়ননা থবক তৌমিন্নরি হায়না শ্রীমতি সিতারমন্না হায়খি।  “হোসপিতেলিতীগী সেক্তরদা মোরেতোরিয়ম অসি পাকথোক-চাওথোক্নবা নত্রগা অমুক হন্না শেমগৎনবগী মথৌ তাব অসি ঐহাক্না চপ চানা খংই।  মহাক্না হায়খি, “মসিগী মতাংদা ঐখোয়না আর.বি.আই.গা লোয়ননা থবক তৌমিন্নরি।”

এফ.আই.সি.সি.আই.গী অধ্যক্ষ দা. সঙ্গিতা রেদ্দীনা ফীভম অসি য়েংশিনবদা সরকারনা পায়খৎলিবা মপুং ফাবা থবক-থৌওং অসিবু থাগৎখি। দা. রেদ্দীনা হায়খি, “রিকোভরীগী অশংবা ময়োনশিং অসি য়েংলি, লল্লোন-ইতিকশিং থবক পাংথোকহন্নবগী পেরামিতরশিং অসি অদুম্মক ফগৎহন্নবা সরকারনা লেপ্তনা তেংবাং পীবগী মথৌ তাগনি। মার্কেৎকী দিমান্দ তৌরকপা অসি মপাঙ্গল কনখৎহন্নবা অমসুং দিমান্দ অসি হেনগৎহন্নবগীদমক্তা তেংবাং অসি মরু ওইনা মথৌ তাই।

এফ.আই.সি.সি.আই.গী মকোকথোংবা উপ-অধ্যক্ষ শ্রী উদয় শঙ্করনা থাগৎ ৱাহৈ থমখি অমসুং ইন্দস্ত্রীনা মায়োক্নগদৌরিবা শিংনবশিং অসি হন্থহন্নবা চেম্বরনা সরকারগা লোয়ননা থবক তৌগনি।

*****