কেন্দ্রগী অৱাং নোংপোক লমদম চাউখৎ থৌরাং মন্ত্রালয়গী রাজ্য (ইন্দিপেন্দেন্ত চার্জ)গী মন্ত্রী, এম.ও.এস. প.এম.ও., পার্সনেল পব্লিক গ্রিভান্সেস, পেন্সন এতোমিক ইনর্জী অমসুং স্পেস, দা. জিতেন্দ্র সিংহনা লী অমসুং ৱাগী তেক্নোলোজী সেন্তর (সি.বি.তি.সি.)বু ভোকেসনেল ত্রেনিং অমসুং স্কিল দেবেলপমেন্ত সেন্তরশিং ৱাগী সেক্তরগীদমক লিংখত্তুনা মপুং ফানা মথৌ তৌহন্নবা, ব্রান্দিং, পেকেজিং অমসুং ভারত অমসুং মপান লৈবাকশিংদা মার্কেতিং তৌহন্নবগীদমক পুক্নিং চিংশিনখ্রে। দোনর মন্ত্রালয়গী য়েংশিন মীফমদা থৌরম মপু ওইরদুনা মন্ত্রীনা হায়খি মদুদি সি.বি.তি.সি.না নেসনেল বেম্বু মিসনগা খুৎশম্নরগা হীরম অসিগী মতাংদা অৱাং নোংপোক লমদমদা ৱাগী পোত্থোক চাউখৎনবগীদমক থবক পায়খৎলগনি। দা জিতেন্দ্র সিংহনা হায়খি মদুদি স্কিল সেন্তরশিংনা ৱাগী ইন্দস্ত্রী অসি অনৌবা স্তার্ত অপশিংগা লোইননা খোংজেল য়াঙখৎহল্লগনি অমসুং মসিনা হিংবগী লম্বী পীরগনি।

কেন্দ্র সরকারনা শাবা লোইরবা পোত্থোকশিং পুশিনলকপদা অথিংবা থম্বা অমসুং শেমদোক্ত্রিবা ৱাগী পোৎলমশিং পুশিনলকপগী দ্যুতীদা চাদা ২৫ হেনগৎহনখিবগী ৱারেপ অসিবু তরাম্না ওক্লদুনা মন্ত্রীনা হায়খি, খোংথাং অসিনা ধুপ শাবা য়াওনা লমদম অশোমগী ৱাগী ইন্দস্ত্রীদা চাউনা মতেং পাংলগনি।

দা. জিতেন্দ্রনা হায়খি, ৱাগী সেক্তর অসি ভারতকী ইকোলোজিকেল, হীদাক লাংথক, চে অমসুং শেমগৎ শাগৎপগী সেক্তরগী মরুওইবা য়ূম্বী অমা ওইরগনি। কেন্দ্রগী লৌউ-শিংউ মন্ত্রীনা হাউসিং অমসুং অর্বান এফিয়র্স মন্ত্রীদা অৱাং নোংপোক লমদমদা পায়খৎপা হাউসিং প্রোজেক্তশিংদা ৱাগী পোত্থোকশিং হেনগৎনবা পাক চাউনা থৌরাংশিং পায়খৎনবগীদমক থাখিবা চিথীগী মরোলসু মহাক্কী মফমদা তমখি।

দা. জিতেন্দ্র সিংহনা হায়খি, লল্লোন ইতীক তৌবদা মরুওইনা শীজিন্নবা ৱাগী মখল ১০সু মশক খঙদোক্লে অমসুং রাজ্যশিংনা হায়রিবা অনৌবা মখলশিং অসিবু পাক শন্না থানবগীদমক খোংথাং লৌখৎনরগনি। মসিগী মথক্তা, অরুনাচল প্রদেশ, সিক্কিম অমসুং মিজোরম অসি ধুপ শাবদা শীজিন্নরিবা মোসো হায়বা ৱা মখল অসি পাক শন্না থাবদা চান্নবা লম অমনি। মহাক্না নোর্থ ইস্তর্ন দিবেলপমেন্ত ফাইনান্স কোর্পোরেসন লিমিতেদ, নেদফিদা অতোপ্পা স্তেকহোল্দরশিংগা খুৎশম্নদুনা ৱাগী মরমদা মকুপ তানা থিজিন্নবা অমসুং প্রোজেক্ত প্রোফাইলশিং ঙন্না খঙদোক্নবা খঙহনখি।

দা. জিতেন্দ্র সিংহনা হায়খি মদুদি ৱাগী সেক্তর অসিনা ভারতকী কোবিদ লোইরবা মতুংগী শেন্মিৎলোন্দা মরুওইবা মচাক অমা ওইরগনি অমসুং অৱাং নোংপোক লমদমদা আত্মনির্ভর ভারতকী মরুওইবা য়ুম্বী অমা ওইরগনি। হায়রিবা সেক্তর অসিদা লৈরম্লিবা থাজরুদবা শক্তি অসিবু পল্লদুনা অমসুং হৌখিবা চহী ৭০ রোম অসিদা নাথৈদুনা থম্লম্লিবসিবু পল্লদুনা মহাক্না হায়খি, হৌজিক্কী লৈঙাক অসিনা অৱাং নোংপোক লমদমদা লৈরিবা ৱাগী রিসোর্স খুদিংমকগী শক্তি চাদা ৪০ লৌথোকপা ঙম্নবা হোৎনবগী পাঙ্গল লৈ হায়না ফোংদোকখি।

মন্ত্রী অসিনা হায়খি মদুদি মোদী লৈঙাক অসিনা ৱাগী পোত্থোক্কী মরুওইবা খঙলকপগী চাং অসি মসিনা চহী  চাম্মা হেন্না লিরবা ফোরেস্ত এক্ত শেমদোক্তুনা ফোরেস্ত এক্ত অসিদগী য়ুমদা থাজবা ৱাশিংবু লৌথোক্তুনা ৱা থাজদুনা পুন্সি লম্বী অমা শেম্বা য়াহল্লিবা অসিনা তাক্লে।

দোনর মন্ত্রালয়গী সেক্রেতরী, দা. ইন্দ্রজিৎ সিংহনা, স্পিসিএল সেক্রেতরী শ্রী ইনেবার পান্দে, সেক্রেতরী এন.ই.সি. শ্রী মোসেস কে চলাই, এদিসনেল সেক্রেতরী, লৌউ-শিংউ অমসুং লৌমীশিংগী য়াইফথৌরাং মন্ত্রালয়, দা. অল্কা ভার্গব অমসুং সি.বি.তি.সি.গী এম.দি. শ্রী সাইলেন্দ্র চৌধরি অমসুং অতোপ্পা বিভাগ অসিগী মকোক থোংবা ওফিসিএলশিংসু মীফম অসিদা ভিদিও কনফরেন্সকী খুথাংদা শরুক য়াখি।

********