ইন্দিয়ন এয়র ফোর্সকী অহানবা রাফেল এয়রক্রাফ মঙা অম্বালাদা লৈবা এয়র ফোর্স স্তেসন্দা থুংখ্রে। এয়রক্রাফশিং অদু ২০২০গী জুলাই ২৭গী অয়ুক্তগী ফ্রান্সকী মেরিগনেক্তা লৈবা দাসোল্দ এভিএসন ফেকসিলিদগী পাইরকখিবনি অমসুং য়ু.এ.ইদা লৈবা অল ধাফ্রা এয়রবেজদা হান্না থৌরাং তৌখিবগী মতুংন্না লেপ্লবা মতুংদা ঙসি নুমিৎয়ুংবা মতুংদা ভারত্তা থুংলখিবনি।

এয়রক্রাফ পুরকপা অদু তাঙ্কক অনি থোক্নবা থৌরাং তৌখি অমসুং ইন্দিয়ন এয়র ফোর্সকী পাইলোতশিংনা পাইরকখি। এয়রক্রাফ অদুনা ফ্রান্সতগী ভারত ফাওবা চাউরাক্না কিলোমিতর ৫৮০০ রোম লাপ্না পুং ৭.৩০ রোম চঙনা পাইরকখি। পাইরিঙৈদা ফ্রেঞ্জ এয়র ফোর্সকী তেঙ্করনা মথক্তা থাও হানখি। কিলোমিতর ২৭০০ শাংবা অনিসুবা তাঙ্কক্কী ফ্লাইত মনুংদা ইন্দিয়ন এয়র ফোর্সকী তেঙ্করশিংনা মথক্তা থাও হানখি। মতম চানা এয়রক্রাফ ফংহন্নবা ফ্রেঞ্জ সরকার অমসুং ফ্রান্সকী ইন্দস্ত্রিনা মতেং পাংখিবা অদুগীদমক ইন্দিয়ন এয়র ফোর্সনা থাগৎখি। ফ্রেঞ্জ এয়র ফোর্সকী তেঙ্করনা ফ্লাইত মনুংদা মতেং পাংলকখিবা অদুনা মতম কুইনা চঙবা ফ্লাইত অসি অকক্নবা মতমগী মনুংদা মাইপাক্না পাইবা ঙমখিবনি।

২০১৯গী সেপ্তেম্বর ১০দা অমুক শেমগৎখিবা “গোল্দন এরোজ” হায়না খঙনবা ১৭ ইসক্বাদ্রোন্দা এয়রক্রাফ অসি হাপচিনগনি। ইসক্বাদ্রোন অসি ১৯৫১গী ওক্তোবর ১দা অম্বালাদা লৈবা এয়র ফোর্স স্তেসন্দা লিংখৎখিবনি। ১৭ ইসক্বাদ্রোন্না অহানবা থবক কয়া পাংথোকখ্রে; ১৯৫৫দা মসিদা অহানবা জেত ফাইত্তর দে হাবিলেন্দ ভামপয়ার হাপচিনখি। ১৯৫৭গী অগস্ততা, ইসক্বাদ্রোন অসি অহানবা ওইনা য়াম্না য়াংবা ৱিং ফাইন্তর অমা, হোকর হন্তর ওন্থোকখি।  

চৎনবীগী মতুংইন্না ১৭ ইসক্বাদ্রোন্দা রাফেল এয়রক্রাফ হাপচিনবগী থৌরম ২০২০গী অগস্তগী ময়াইদা পাংথোক্কনি। থৌরম অদুগী অকুপ্পা মরোলশিং মতমগী মতুংইন্না খঙহল্লক্কনি।

*****