ঙসি উপ-রাস্ত্রপতি এম ভেনকিয়া নাইদুনা হান্নগী য়ুনিয়ন মিনিস্তর এস.জাইপাল রেদ্দিগী মফমদা ইকায়খুম্নবা উৎখ্রে অমসুং মহাক্না হায়খি মহাক্কী ৱা ঙাংবা হৈবা, ইচম-চম্বা অমসুং পুকচেল শেংবা অমসুং অচুম্বা ৱাখল্লোনশিং থাজবা অদু মতম চুপ্পদা নিংশিংদুনা লৈহৌরগনি।

জাইপাল রেদ্দিনা ইবা ইংলিসকী লাইরিক “তেন আইদোলোজিস-গ্রেদ এসিমিত্রি বিত্বিন এগ্রিয়ান্নিজম এন্দ ইন্দস্ত্রিএলিজম”দগী তেলুগুদা হন্দোকপা লাইরিক ‘পাদি বাবজালালু’ ওনলাইনদা ফোঙবদা উপ-রাস্ত্রপতিনা হায়খি লৈখিদ্রবা লুচিংবা অসি রাজনিতিগী লমদা মশক নাইবা অতাংবা রাজনিতিৱালা অমনি।

উপ-রাস্ত্রপতিনা হায়খি মশাগী ৱাখল্লোন অমসুং মগুন শন্তাইনবা তৌদনা চহি কয়া রাজনিতিগী পুন্সিদা লৈরম্বা অতাংবা রাজনিতিগী মীওই অমনি । মখোয় অনি অন্ধ্র প্রদেস এশেমব্লিগী বেঞ্জ অমতদা ফম্মিন্নরকখি অমসুং মখোয় অনিমক নেসনেল পার্তিশিংগী ৱাঙাংলোয়শিং ওইখি , মখোয় অনি অচেৎপা মরী লৈনখি। মখোয় অনি দল অমসুং ৱাখল্লোনশিং তোঙাল্লবসু মখোয়গী মরুপ-মপাং ওইবগী মরী কৈদৌঙৈদা অপনবা অমতা থেংনদে।

জাইপাল রেদ্দিগী মীয়ামগী খনবা অকনবা ফিলোসোফিকেল ওইবা মিৎয়েংশিং পল্লদুনা উপ-রাস্ত্রপতিনা হায়খি মহাক সাহিত্য, ফিলোসোফি অমসুং লৈবাক কয়াগী ইকোনোমিক থিওরিশিং কুপ্না লৈনবা মীওই অমনি অমসুং থিজিনবা অদুগী ফংলবা অদু রাজনিতিদা শীজিন্নখি। মহাক্না থৌদোক কয়া কুপ্না নৈনখি অমসুং এশেমব্লি নৎত্রগা সংসদতা ঙাংদ্রিঙৈ মমাংদা মদু মরম চানা য়েংশিনখি। মরম অসিনা মহাক ঐখোয়গী মতমদা খ্বাইদগী ফবা সংসদকী মেম্বর অমনি হায়না খঙনখি।

গনতন্ত্র, কেপিতেলিজম, ইনভাইরোনমেন্ত অমসুং গ্লোবেলাইজেসন য়াওনা হিরম কয়া নৈনরিবা লাইরিক অদুগী মতাংদা ৱা ঙাংবদা শ্রী নাইদুনা হায়খি মরৈবাক নুংশিবা অমসুং লৈবাক্কী খনবদা শ্রী রেদ্দি মশক নাইবা অমনি। নিংশিংবা থোক্ত্রিঙৈ মতমদগী হৌদুনা ভারতকী কলচরগী অপুনবা শক্তম শাগৎপদা লৈবাক অসিগী তোমথিন ঙাল্লিবা লম্মিৎ-তুমিৎনা কবিশিং অমসুং ফিলোসোফরশিংদা ইথিল পীখিবা অদু লাইরিক অসিদা জাইপাল রেদ্দিনা ফোঙদোকলি। বেদগী মতমগী হৌরগা হৌজিক ফাওবা , ভারত অসি মতম পুম্নমক্তা কলচর অমা খক লৈবা লৈবাক অমা ওইনা লৌনরি।

মহাক্কী নুংশিরবা মরুপকা লনাই ওইনা লৈনবা মরীশিং নিংশিংলদুনা শ্রী নাইদুনা হায়খি, জাইপালনা লাইরিক অসি ইংলিসতা ইবা মতমদা মহাক্না ঐগা উনখি অমসুং লাইরিক অদু ঐঙোন্দা পীরকখি। অদুবু ঐখোয়না ঙসি লাইরিক অসি ঐখোয়গী ইমালোন তেলুগুদা ফোঙবা মতমদা মহাক ঐখোয়গী ইরক্ত লৈতবা অসিদা ঐঙোন্দা অৱাবা ফাওহল্লে।

ভর্চুএল ওইনা পাংথোকপা লাইরিক ফোঙবা থৌরম অদুদা সুপ্রিম কোর্তকী হান্নগী জজ জজতিস বি.সুদরসন রেদ্দি, আর.বি.আইগী হান্নগী গভর্নর ৱাই.ভি রেদ্দি, সি.পি.আই(এম)গী জেনেরেল সেক্রেতরি সিতারম য়েচুরি, লৈখি্রবা জাইপাল রেদ্দিগী লোইনবী শীমতি লক্সমি অমসুং লাইরিক অদু তেলুগুদা হন্দোকপা কে. বাসকারাম শরুক য়াখি।

**********