ভারতকী উপ-রাস্ত্রপতি শ্রী এম. বেঙ্কয়া নইদুনা ইমালোল নিংথিনা খংবগী কান্নবা কয়াগী মতাংদা হায়খ্রে অমসুং মীয়াম্না অতোপ্পা লোলশিংশু তমদুনা মদুগী পাক চাউরবা খেন্ননা লৈবশিং অমসুং বেল্যু সীস্তেম্বু নিংথিনা খংবা ঙম্নবা হোৎননবা হায়খ্রে। অতোপ্পা লোল তম্বনা অতোপ্পা খুদোংচাবা কয়া পীবতা নত্তনা মীওইবা খুন্নাই পুন্সিনবদা তেংবাংগনি হায়না মহাক্না মখা তানা হায়খি।

ঙসি য়ু.এস.এ.গী সান-ফ্রান্সিস্কোদা শিল্লিবা “মালেমগী তেলেগু কলচরেল ফেস্ত” তা ওনলাইন্দা শরুক য়ারিবা মীওইশিংদা শ্রী নাইদুনা ৱা ঙাংখিবদা লোল অসি করিগুম্বা অমা ফোংদোকপা ঙম্নবা খুৎলায় অমখক্তা নত্তে হায়খি। লোল হায়বসি মতম কয়াদগী চৎনদুনা লাক্লবা নাৎ অমসুং বেল্যু সীস্তেম অমগী ৱাহন্থোক পীবনি অমসুং মসিনা মসিগী নাৎকী চৎনবি কয়া অমগী শম্লপ্পা ৱারোল পীবা ঙম্মি। লোল অসি অমগা অমগা পাউ ফাওনবা কয়া অমগী শাংলবা মতমগী মনুংদা ওইরকপা মহৈ অমনি হায়না মহাক্না পনখি। 

উপ-রাস্ত্রপতিনা চাউখৎলকপা খুদিংমক মীয়ামদুগী লোলদা পুৱারী, সোসিএল, শেন্মিৎলোন অমসুং ফিজিকেল ওইবা হীরমশিংগী ফিভমশিং ফোংদোকই হায়না হায়খি। শ্রী নাইদুনা লোল অমনা খ্বাইদগী তঙাইফদবা ৱাহং “ নহাক কনানো?” হায়বসিগী পাউখুম পীরি হায়খি অমসুং মসিনা তাকপদি মীওই অমা হায়বসি নহাক্কী নাৎ অমসুং বেল্যু সীস্তেমগী ৱাহন্থোক অমনি। “লোল হায়বসি মীওইবা অমগী মশক তাকপগী হৌরকফম অমনি অমসুং মসি য়াম্না মরু ওই”, হায়না মহাক্না মখা তানা হায়খি।

লোল মান্নবনা অমত্তা ওইবা চাউখৎপা পুরকই হায়না শ্রী নাইদুনা হায়রদুনা মীয়াম্না য়ারিবমখৈ লোল কয়া অমা তমদুনা খেন্নবা নাৎ কয়া অমা খংনবা হোৎননবা হায়খি। মীওইবগী ৱাখল খনবগী মওং অমসুং মিৎয়েং শেমদোকপা ঙম্নবা নাৎ অমসুং লোল অমগা অমগা পীনবা অমসুং লৌনবা মীয়ামদা হায়খি।

শ্রী নাইদুনা মতম পুম্বদা ‘এম.’ মরি, হায়বদি মাদর, মাদরলেন্দ, মাদর তং অমসুং মেন্তর (ওজা/গুরু), অসি নিংশিংদুনা অমসুং ইকাই খুম্ননা লৈনবা হায়খি।

উপ-রাস্ত্রপতিনা অসুম্না হায়খি, “ধর্ম অসি নুংঙাইনা লৈবগী লম্বিনি। নাৎ হায়বসিনা পান্দম অদু ফংনবা পুন্সি মহিংগী লমজিংবনি। লোল, নাৎ অমগী নুংদা য়াওবা পোৎশক অমা ওইনা, হায়বসিনা মীওই অমগী পুন্সিগী মওং শেম্বগী মরু ওইবা থৌদাং লৌই, মসিগী মতুং ইন্না, লম্বোয়বশিং অমসুং ৱাখল খনবশিংনা অচুম্বা ৱাহৈ অমসুং লোল শিজিন্ননবা হায়রম্লিবনি। মরম অদুনাঐহাক্না হায়রি, নহাক অসি নহাক্কী লোলনি অমসুং নহাক্কী লোল অসি নহাক্নি”।

****