অৱাং নোংপোক লমদম চাউখৎ থৌরাং মন্ত্রালয়গী রাজ্যগী থৌপুরিবা কেন্দ্রগী মন্ত্রী (ইন্দিপেন্দেন্ত চার্জ), এম.ও.এস. পি.এম.ও., পার্সনেল, পব্লিক গ্রিভান্সেস, পেন্সন, এতোমিক ইনর্জী অমসুং স্পেস, দা. জিতেন্দ্র সিংহনা ঙসি হায়খ্রে মদুদি ভারত অমসুং এসিন লৈবাকশিংনা কোবিদ মতুংদা মালেমগী শেন্মিৎলোন শেমগৎনবা হোৎনবা মতমদা মরুওইবা থৌদাং লৌগনি। মহাক্না হায়খি মদুদি অৱাংবা থাক অমা ফংনবা হোৎনবা মতমদা চঙবা লিংজেল, থৌনা অমসুং ফিরেপ মান্নবনা তুংগী লম্বী হায়বদু মখোয়দা লৈ। ভারত এসিন ৱিমিন্স বিজিনেস ফোরম অমসুং এফ.এল.ও. মুম্বাই চেপ্তর অমসুং এফ.আই.সি.সি.আই.না পাঙথোকপা এসিন লৈবাকশিংদগী ওন্ত্রপ্রিনরশিংগা লোইননা ঙমখৈ লান্না শানবা ৱারীগী মীফমদা দা. জিতেন্দ্রনা হায়খি মদুদি ভারত অমসুং এসিন লৈবাকশিংগী মরক্তা নকশিন্নবা করবার অমসুং নাৎকী ওইবা নক্নবা মরী লৈফবনা লমদম অসিনা কোরোনা লোইখ্রবা মতুংদা শেন্মিৎলোন শাগৎনবা হোৎনবদা অচৌবা থৌদাং অমা লৌগনি।

মন্ত্রীনা হায়খি মদুদি অৱাং নোংপোক লমদম্না এসিন লৈবাকশিংগা লল্লোন ইতীক অমসুং করবারগী মরী শাগৎনবা হোৎনবদা খা নোংপোক এসিয়ান লৈবাকশিংগী শেন্মিৎলোন চাউখৎনবা থোঙ ওইবনা মরুওইবা থৌদাং লৌগনি। মহাক্না হায়খি, প্রধান মন্ত্রী শ্রী নরেন্দ্র মোদীনা "লুক ইস্ত" পোলিসীদগী "এক্ত ইস্ত" ওন্থোক্তুনা লৈবাক অনীগী মরক্তা লৈবাক তেংবাংশিং অৱাংবা থাক্তা থাংগৎনবা হোৎনখ্রে।

লম্বী থোং ফাউনবগী সমশ্যাগী মতাংদা পল্লদুনা দা. জিতেন্দ্র সিংহনা হায়খি, হৌখিবা চহী তরুক অসিদা কংফাল লম্বী, রেল অমসুং নোংথক্কী লম্বীদা অহোংবা চাউখৎপা কয়া অমা পুরকখ্রে, মসিনা লমদম অসোমদা পোৎচৈ পুথোক-পুশিন তৌবা অমসুং মী চত্থোক-চৎশিন য়াহনবদা নত্তনা লৈবাক শীনবা থুংনা ফাউনবা য়াহনলে। মহাক্না নিংশিংখি মদুদি প্রধান মন্ত্রী শ্রী নরেন্দ্র মোদীগী লুচিং মখাদা খুৎয়েক পীনখিবা ইন্দো-বঙ্গলাদেশকী এঙ্কলেব একচেঞ্জ তৌনবগী ত্রিতীনা লল্লোন ইতীক তৌবদা, চত্থোক-চৎশিন তৌবদা হান্না অৱাবা লৈরম্বদু হৌজিক্তি কোমহল্লে। মহাক্না হায়খি, অথুবদা ঐখোয়না ত্রিপুরাদগী বঙ্গলাদেশ ফাওবগী ত্রেন চেলহন্দুনা অমসুং সমুদ্রগী লম্বী শেমগত্তুনা লমদম অসিদা চাউখৎপগী খোঙজেলদা অনৌবা লমাই অমা হাংদোক্লগনি। মহাক্না ভারত সরকারনা লেপ্পা লৈতনা লল্লোন ইতীক, করবার অমসুং চত্থোক-চৎশিনগী মল্মল হোংবা লম্বী অমা ওইনা কংফালদা লৈবা ঈশিংগী লম্বী (ব্রহমপুত্রদগীনা বে ওব বেঙ্গাল ফাওবা)দা সমুদ্রগা শম্নহন্দুনা অতোপ্পা লৈবাক য়ৌবা য়ানবা লেপতনা হোৎনরিবসিবুসু পনখি। মহাক্না হায়খি মদুদি মসিনা ঙমখৈ লান্না তৌবা করবারদা মরুওইনা ঐখোয়গী য়ুম্থংনবা লৈবাকশিংদা হেক থোকপগা য়ৌবা ঙমহন্দুনা মপাঙ্গল পীরগনি।

অৱাং নোংপোক লমদমগী নুপী খুনাই অমসুং নুপীগী সেল্ফ হেল্প গ্রুপশিংনা মাইকৈ খুদিংদা চাউখৎনবগীদমক লৌরিবা থৌদাংশিং অসিবু পল্লদুনা দা. জিতেন্দ্র সিংহনা হায়খি মদুদি মসিনা নুপীশিংবু মনিং তম্বা পীবা অমসুং শক্তি পীবা হায়বদু ওইরে। মহাক্না হায়খি, লাইচৎকী মতমদা ফাওবা, অৱাং নোংপোক লমদমগী নুপীশিংনা সেনিতাইজর অমসুং ফজরবা মাস্ক কয়া মশীং য়াম্না পুথোকপদা মকোক থংখি। মহাক্না হায়খি, লাইচৎ অসিগা লান্থেংনবদা নুপীশিংনা মাংজিল থাখি অমসুং অৱাং নোংপোক লমদম্বু কোরোনা থেংনবদা খুদম অমা ওইহনবা ঙমখি।

মহাক্কী ৱারোইশিন ওইনা পীরদুনা, দা. জিতেন্দ্র সিংহনা কোবিদকী মতুংদা শেন্মিৎলোন শাগৎনবা হোৎনবদা ৱানা মরুওইবা থৌদাং অমা লৌগনি হায়না থাজবা ফোংদোকখি অমসুং ইন্দিয়া এসিন লৈবাকশিংনা অপুনবা ওইনা হোৎনমিন্নদুনা পুন্সিগী হীরম খুদিংদা অচৌবা থৌদাং য়ানবা হোৎনগনি হায়খি। মসিগী মতাং অসিদা মহাক্না চহী ১০০ হেল্লবা ভারতকী ফোরেস্ত এক্ত মোদী লৈঙাক্না ২০১৭দা শেমদোকখিববু নিংশিংলদুনা মসিগী মপান্না য়ুমদা থাজবা ৱাশিং অসি মসি লোক্লগা চাকথাক ওইজরিবশিংগী খুদোংচাবা অমা পীনবগীদমক  মসিদগী লৌথোক্লে।

অৱাং নোংপোক লমদমদা লৈরিবা তুরিজমগী শক্তিবু পুল্লদুনা মন্ত্রীনা হায়খি, মালেমগী তুরিস্তকী ওইবা মফমশিংনা কোরোনানা লাকহৎখ্রবা মতমদা অৱাং নোংপোক লমদম্না কোরোনা অমত্তা লৈত্রে হায়না লৌবগা লোইননা মালেমগী তুরিস্তশিংগী মফম অমা ওইরক্কনি।

দা. জিতেন্দ্র সিংহনা ইন্দিয়া-এসিন জোইন্ত বিজিনেস কোলাবোরেসন ফোর ৱিমিনসু থৌরম অদুদা হৌদোকখি। মন্ত্রীনা তুংকোইনা চৎনবা য়াবা চাউখৎলোন অমগীদমক গ্রী সর্তিফিকেৎসু পীখি।

ফিলিপিন্সতগী পাসিতা য়ুৱান, এসিন চেয়র, ম্যান্মারদগী মা খিনেজো, মলেসিয়াদগী নদিরা য়ুসুফ, ভিনিতা বিমবেৎ, ইন্দিয়া চেয়র, ইন্দিয়া এসিন ৱিমিন্স বিজিনেস ফোরম, জাহনবী ফুকান, নেসনেল প্রসিদেন্ত, এফ.এল.ও. অমসুং জয়শ্রী দা ভর্মামোং অমসুং অতোপ্পা কয়ানা ৱেবিনার অদুদা শরুক য়াখি।

*****