জি.২০গী প্রসেদেন্সী পাংথোক্লিবা সাউদি অরাবিয়ানা য়ুম্বু ওইদুনা ঙসি জি.২০ দিজিতেল ইকোনোমী মিনিস্তরশিংগী বর্চুএলগী মীফম অমা পাংথোকখ্রে। মসিগী মীফম অসিদা ভারতকী  ইলেক্ত্রোনিক্স অমসুং ইনফোর্মেসন তেক্নোলোজীগী মন্ত্রী শ্রী রবি শঙ্কর প্রসাদ ভারতকী মহুৎ শিনখি। কোবিদ-১৯গী লায়চৎ অসিগী মরকসিদা শ্রী প্রসাদনা নিংহন্নবা লৈতনা হল্লকপা ঙম্বা মালেমগী ওইবা সপ্লাই চেন অমা শেম্বগী তঙাই ফদবগী মরমদা পনখি অমসুং মসিগা লোয়ননা ভারতপু মালেমগী সপ্লাই চেনগা নক্না মরী লৈনবা শেল থাদবগী মফম অমা ওইহনবগী প্রধান মন্ত্রী শ্রী নরেন্দ্র মোদীগী মংলান অসিগী মরমদশু মহাক্না মীফম অসিদা পনখি।

শ্রী প্রসাদনা মালেমগী মীওইশিংনা পুল্লিবা মীফম অসিদা ভারতনা প্রধান মন্ত্রী শ্রী নরেন্দ্র মোদীগী লুচিং মখাদা মতৌ করম্না মালেমগী অতোপ্পা লৈবাকশিংদগী হেন্না কোবিদ-১৯ নিংথিনা শেন্নখিবগে হায়বদুগী মতাংদা ৱাফম থমখি। প্রধান মন্ত্রীনা লৈবাক পুম্বদা অঙনবা মতমদা লোকদাউন থম্নবা থৌনা ফরবা ৱারেপ লৌখিবা অদুনা লায়না অসি শন্দোকপদা তপথহনবতা নত্তনা তুংদা লাক্কদৌরিবা খুদোংচাদবশিং খুদিংমকশু থেংননবা শেম শাবদা য়াম্না তেংবাংখি হায়না মহাক্না হায়খি।

কেন্দ্রগী মন্ত্রীনা ভারতনা দিজিতেলগী হীরমদা অনৌবা থৌওং কয়া পুথোক্তুনা কোবিদ-১৯গা লেন্থেংনবদা তেংবাংখিবশিং অদুগী মরমদশু মীয়ামদা খংহনখি। আরোগ্য সেতু মোবাইল এপ, ক্বারেন্তাইন তৌদুনা লৈবা অনাবশিংবু য়েংশিন্নবা জিও ফেন্সিংগী পথাপ অমসুং কোবিদ-১৯ সাবধান বল্ক মেসেজিংগী পথাপকী মরমদশু মীফমসিদা মহাক্না পনখি। ইরাং অসিগী মনুংদা শেন্মিৎলোনগী হীরমদা শোত্থরবা খুন্নাইগী মীওই কাংলুপ কয়াদা তেংবাং পীবদা দিজিতেল তেক্নোলোজীনা মতৌ করম্না তেংবাংখিবগে হায়বগী মতাংদশু মহাক্না মীফমসিদা ফোংদোকখি। দাইরেক্ত বেনেফিৎ ত্রান্সফর অমসুং দিজিতেল পেমেন্তকুম্বা ভারতকী ওইবা দিজিতেলগী অনৌবা থৌওংশিং অসিনা লোকদাউন মনুংদা খুন্নাইগী খ্বাইদগী শোত্থরবা মীওইশিংদা তোঙান তোঙানবা শেলগী তেংবাং পীখিবগী মতাংদশু মহাক্না মীয়ামদা পাউদমখি।

হেলথকেয়র অমসুং মহৈ-মশিং তম্বিবগী লমদা মীয়াম পুম্বা ওইনা চাউখৎপা পুরক্নবা আর্তিফিসিএল ইন্তেল্লিজেন্সকুম্বা হৌজিক্কী মতমদা মাংজিল থারক্লিবা তেক্নোলোজী শিজিন্ননবা ভারতনা অচেৎপা খোংফম থম্লিবা অসিগী মতাংদশু মহাক্না মীয়ামদা পাউদম্লদুনা শ্রী প্রসাদনা খুন্নাই অমবু শেমদোকপা ঙম্বা থাজনিংঙাই ওইরবা আর্তিফিসিএল ইন্তেল্লিজেন্সকী পথাপ অমা শেম্বগী তঙাই ফদবশিংগী মতাংদশু মহাক্না ৱাফম কয়া ফোংদোকখি।

মন্ত্রীনা য়াম্না মরু ওইনা দেতাগা মরী লৈনবা হীরমশিং অমসুং লৈবাক অমগী অফবা ওইনবা দেতা প্রাইবেসী ঙাক শেনবগী অমসুং মখোয়গী মীয়ামগী তেক্ত কায়দনা লৈবগী হকশিংগী মতাংদা মিৎয়েং চংখি। ভারতনা মীওই অমগী মশাগী দেতা প্রাইবেসীগী হীরমশিং অমসুং দেতাশিং অসিবু অনৌবা থবক পাংথোকপদা শিজিন্নবগীদমক্তা ফংহনবগা মরী লৈনবা দেতা ঙাকথোক্তুনা থম্নবা অচৌবা আইন অমা শেমগদৌরি হায়না হায়খি। হীরমশিং অসিগী মতাংদা য়েংলদুনা লৈবাক কয়া অমদা লৈরিবা দিজিতেল প্লেৎফোর্মশিং অসি থাজনিংঙাই ওইবা, তেক্ত কায়দবা অমসুং অশোয় অঙাম য়াওদবা ওইগদবনি হায়না মহাক্না মখা তানা হায়খি। মসিগা লোয়ননা মালেমগী মফম অমা হেক্তদা লৈরিবা দিজিতেল প্লেৎফোর্মশিং অসি ঙাক-শেনবা, প্রাইবেসী অমসুং মীয়ামগী তেক্ত কায়দবগী হীরমশিং য়াওবা লৈবাক অমগী অফবা ওইনবা হীরমশিংগী মতাংদা য়াম্না থুনা থবক পাংথোকপা ঙম্বা অমসুংথাজনিংঙাই ওইগদবনি হায়বসি ঐখোয়না খংবগী মতম ওইরে হায়না জি.২০ লৈবাকশিংগী মন্ত্রীশিংদা মহাক্না হায়খি।

***