হয়েং জুলাই ২১গী অয়ুক পুং ১১দা ভর্চুএল ওইনা য়ুনিয়ন ঐচ.আর.দি মিনিস্তর রামেস পোখ্রিয়াল ‘নিসান্ক’না মানোদরপন হৌদোক্লগনি । থৌরম অদুদা হয়ার ইজুকেসন দিপার্তমেন্তগী সেক্রেতরি অমিৎ খারে; স্কুল ইজুকেসন অমসুং লিতেরেসিগী সেক্রেতরি শ্রীমতি অনিতা কারৱাল অমসুং মিনিস্ত্রিগী অৱাংবা থাক্কী ওফিসিএলশিং শরুক য়াগনি ।

ভিদিও ত্বিৎ অমদা পোখ্রিয়ালনা হায়খি কোবিদ লাইচৎ মনুংদা মহৈরোয়শিং লাইরিক মখা তম্নবা অমসুং পুক্নিং-ৱাখল ফনা থম্নবা মিৎয়েং চঙবা দরকার ওই হায়না মিনিস্ত্রিনা খল্লে । কোবিদ লাইচৎ অমসুং মতুংদা মহৈরোয়শিং পুক্নিং-ৱাখল অমসুং হকচাংগী ফিবম ফনা লৈবদা মতেং পাংনবা তোঙান-তোঙানবা থবকশিং য়াওবা ‘মানোদরপন’ কৌবা থৌরাং অমা মিনিস্ত্রিনা পায়খৎলকপনি ।

মিনিস্তরনা হায়খি কোবিদ-১৯ লাইচৎ মতুংদা ভারতকী শেন-থুম অমুক হিঙ্গৎলক্নবা মতেং পাংনবা ২০২০গী মে ১২দা প্রধান মন্ত্রী নরেন্দ্র মোদীনা অত্মানির্ভর ভারত অভিয়ান হৌদোকখি । অফবা অমসুং কান্নবা মীওই পুথোকপা হেনগৎহন্নবা অমসুং ইজুকেসন সেক্তরদা অওনবা পুরক্নবা অত্মানির্ভর ভারত অভিয়ানগী মনুংদা ‘মানোদরপন’গী থবক অসি হাপচিনবনি ।

মশা-মউ ফবা অমসুং লাংতক্নবা লৈতবা পুন্সি অমা লৈহন্নবা থবক অসিদা শরুক য়ানবা লৈবাক শীনবা থুংনা লৈরিবা মহৈরোয়শিং, ওজাশিং অমসুং মমা-মপাশিংদা পোখ্রিয়ালনা হায়জখি ।

লাইভ ওইনা য়েংনবা চংবীয়ু : http://webcast.gov.in/mhrd