ইন্তর্নেস্নেল ইনর্জী এজেন্সী (আই.ই.এ.) অমসুং পেত্রোলিয়ম অমসুং নেচরেল গ্যাসনা পুন্দুনা ঙসি “মালেমগী হোঙলক্লিবা গ্যাস মার্কেৎকী ফিভম অসিদা ভারত্তা গ্যাস্তা য়ুম্ফম ওইবা শেন্মিৎলোন শেম্বা”গী ৱেবিনার অমা পাংথোকখ্রে। পেত্রোলিয়ম অমসুং নেচরেল গ্যাসকী কেন্দ্রগী মন্ত্রী শ্রী ধমেন্দ্র প্রধান অমসুং আই.ই.এ.গী একজেক্যুতিব দাইরেক্তর দাঃ ফেথ বিরোল য়াওনা হৌদোকখিবা ৱর্কশোপ অদুদা গ্যাস সেক্তরগী ওইবা মালেমগী অখং-অহৈশিং অমসুং ভারতকী ইনর্জী ইকোসীস্তেমগী স্তেকহোলদর কয়াবু মফম অমত্তদা পুরকখি।

শ্রী প্রধান্না থৌরম হৌদোকপা ওইনা কোবিদ-১৯না খুদোংচাদবা কয়া অমা থোকহল্লবশু সরকারনা পোলিসী অমসুং থবক কয়া লেপ্তনা চত্থরিবা অমসুং পাইপলাইনি ইনফ্রাস্ত্রকচরগী হীরমদা খোংজেল য়াংনা চাউখৎপা পুরক্লিবা অসিনা মরম ওইদুনা এসিয়াগী ওইনা গ্যাসকী দিমান্দশিং অসি ফংহনবা ঙম্বা শাহৌ অমা ওইরক্নবা শেম শাদুনা লৈখ্রে হায়খি। গ্যাস্তা য়ুম্ফম ওইবা শেন্মিৎলোন ওইহন্নবা হোৎনবা ওইনা য়ুমদা শিজিন্নবা গ্যাস পুথোকপদা খুমাং চাউখৎহনবা, গ্যাসকী ইনফ্রাস্ত্রকচরশিং পাক চাউনা শেমগৎপগা লোয়ননা গ্যাস্কী ইনফ্রাস্ত্রকচরশিং মরাং কায়না ফংহন্দুনা গ্যাস্কী মার্কেৎ শেমগৎপদা মিৎয়েং চংলি হায়না মহাক্না হায়খি। গ্যাস লাইনা ফংবা মার্কেৎ অমা শেগৎপগী মতাংদা সরকারনা লৈবাক অসিদা গ্যাস য়োনবা অমসুং মমল লেপ্পগী নিং খা তম্বগী থৌরাং অমা নিংথিনা চত্থরি হায়না মন্ত্রীনা হায়খি। সরকারনা শৌগৎপা প্রধান মন্ত্রী উর্জা গঙ্গা (পি.এম.য়ু.জি.) অমসুং ইন্দ্রধনুশ নোর্থ ইস্তর্ন গ্যাস গ্রিদ প্রোজেক্তকী শেল পীথরিবশিং অসিগা লোয়ননা লৈবাক অসিগী নোংপোকথংবা অমসুং অৱাং-নোংপোক থংবা মফমশিংদা লৈবা অনৌবা কৈথেলশিংদা গ্যাস গ্রিদশিংশু পাক চাউথোকহল্লি। সিতী গ্যাস প্রোজেক্তনা কোনবা মফমশিংশু জিওগ্রাফিকেল মফম (জি.এ.) ২৩২গী জিলা ৪০০দা হেনগৎলে অমসুং মসিনা লৈবাক্কী পাক চাউবা ৫৩% অমসুং লৈবাক অসিগী মীশিং ৭০% কোনবা ঙম্বগী মতিক লৈ। হায়রিবা খোংথাংশিং অসিনা প্রধান মন্ত্রীনা পাম্লিবা লৈবাক অসিদা গ্যাস্তা য়ুম্ফম ওইবা শেন্মিৎলোন অমা পুরকপগী মংলান অদুবু শৌগৎলি হায়না মন্ত্রীনা হায়খি।

গ্যাসকী কৈথেলদা চাংদম্নবা লৈবা ললোন ইতিক্কী ফিভম অমা পুরকপা ঙম্নবা তেংবাংবগী পান্দম অমগা লোয়ননা লৈবাক শিনবা থুংনা অহোংবা মমলদা গ্যাস ফংহনবা হেনগৎহন্নবা গ্যাস পাইপলাইন তারিফকী মওংশু অফবা মওংদা শেমদোক্নবা অমসুং গ্যাস্কী ইনফ্রাস্ত্রকচরশিংদা শেল থাদহন্নিংবগী ইথিল ফাওনবা থৌরাং কন্না চত্থরি হায়না মন্ত্রীনা হায়খি। হৌজিক লৈরিবা জোনশিংগী ওইবা গ্যাস পাইপলাইনগী তারিফ অসিনা লাপ্না লৈবা গ্যাস পীনবা লৈবা মফমশিং অসিদগী নেচরেল গ্যাস অসি পুরক্নবা পাইপলাইন কয়া অমা শিজিন্নবগী তারিফ অমুক হাপচিন্দুনা হেনগৎহল্লি। মসিনা গ্যাস ফংফমশিং অসিদগী লাপ্না লৈবা মফমশিংদা লৈবা মীওইশিংনা গ্যাস লৈবগী মমলদা খেৎনবা কয়া অমা লৈহল্লি অমসুং মসিনা মরম ওইদুনা লাপ্না লৈবা অমসুং মনুং চংশিন্না লৈবা মফমশিংদা অনৌবা গ্যাসকী কৈথেল শেমগৎপদা অয়েৎপা কয়া অমা পীরি।

শ্রী প্রধান্না লাপ্না অমসুং মনুং হঞ্জিনবা মফমশিংদা লৈবা গ্যাস শিজিন্নবা মীওইশিংগী মরক্তা মান্নবা থাক অমা শেম্নবগীদমক্তা হৌজিক লৈরিবা জোনশিংগী ওইবা তারিফকী মওং অসি কন্না য়েংশিন্দুনা মীয়াম্না য়াবা অমসুং চাংদম্নবা য়ানবা কন্না হোৎনরি হায়খি। অনৌবা তারিফকী মওং অসিনা লৈবাক শিনবা থুংনা নুংঙাইবা মওংদা নেচরেল গ্যাস মতিক চানা ফংহন্নবগীদমক মপুং ওইবা গ্যাস গ্রিদতা শেল থাদহন্নিংবগী ইথিল ফাওহন্দুনা অমত্তা ওইবা গ্যাস্কী কৈথেল অমা শেম্বদা তেংবাংগনি। অনৌবা তারিফ অসিনা গ্যাসতা য়ুম্ফম ওইবা ইন্দস্ত্রীশিংদা  কান্নবা পীদুনা লৈবাক শিনবা থুংবদা অহোংবা মমলদা গ্যাস ফংহনবদা য়াম্না মতেং পাংগনি। মখা তানা, চমহল্লবা তারিফকী মওং অসিনা গ্যাস ইন্দস্ত্রীশিংদা মসিগী খুদোংচাবা লৌহন্দুনা মার্কেৎ মেকানিজমদা য়ুম্ফম ওইবা গ্যাস ত্রেদ এক্সচেঞ্জ প্লেৎফোর্মগী খুত্থাংদগী গ্যাস লৈহন্নবশু পুক্নিং থৌগৎকনি। ইন্দস্ত্রীশিংগী ওইবা মান্নবা থাক্তা পুরক্লবা ফিভম অসিনা মখোয়গী ইনপুৎ কোস্ত হন্থহনবা অমসুং মালেমগী ওইবা প্রদক্সন চেন্দা চাংয়েংনবা হেনগৎপদশু খুমাং চাউশিলহনগনি। অফবা মওংদা শেমদোক্লবা অনৌবা তারিফকী মওং অসিনা ইন্দস্ত্রীশিংদা খক্তা নত্তনা পাক চাউবা সি.জি.দি. প্রোজেক্তশিং চাউখৎহনবা অমসুং মীয়ামদা পি.এন.জি./সি.এন.জি. সর্বিসশিং ফংহনবদশু খুমাং চাউশিলহনগনি।

দাঃ বিরোলনা ৱা ঙাংখিবদা মহাক্না মীয়ামদা তুং কোয়বগী ওইনা ইনর্জী ফংনবা পাম্বৈ পীবা অমসুং ইনর্জী ফংহনবগীদমক ভারত সরকারবু থাগৎখি অমসুং মালেমগী ইনর্জীগী থবক তৌরিবশিংগী ওইনসু ভারত অসি ময়ায় তাংবলদা লৈরগনি হায়নশু হায়খি। ইং ২০৩০ ফাওবগী মনুংদা ভারতকী ইনর্জী মিক্সকী ওইনা নেচরেল গ্যাস্কী শরুক অসি ৬%দগী ১৫%দা  হেনগৎহন্নবগীদমক্তা মার্কেৎ শেমদোকপা, ইনফ্রাস্ত্রকচরশিং ফগৎহনবা অমসুং কেপাসিতী বিলদিং তৌবগী খুত্থাংদা ফংনবা চাউরবা পান্দম অমা থম্লি হায়নশু হায়খি।

ভারতনা মার্চ ২০১৭তগী আই.ই.এ.গী খুৎশম্নমিন্নবা লৈবাক অমা হেক ওইরকপদগী ভারত অমসুং আই.ই.এ.না ওইল সেক্যুরিতী, ইনর্জী ফগৎহনবা, স্তেতিস্তিক্স অমসুং তেক্নোলোজীগী হীরমদা খুৎশম্নদুনা লাক্লি। মসিনা গ্যাস্তা য়ুম্ফম ওইবা ইকোনোমীগী ওইবা হীরমগী মতাংদা আই.ই.এ. অমসুং পেত্রোলিয়ম অমসুং নেচরেল গ্যাস মন্ত্রালয়গা খুৎশম্নদুনা তৌমিন্নবা থবকশিংগী মনুংদা পাংথোকপা অহানবা ৱর্কশোপনি। মসিগী খুৎশম্নবা অসিগী মহৈদি জনুৱারি ২০২০দা আই.ই.এ.না ভারতকী ইনর্জীগী পোলিসীশিংবু মনুং হুৎনা য়েংশিন্দুনা আই.ই.এ.না ভারতকী ইনর্জী মিক্সতা গ্যাস্কী শরুক হেনগৎহন্নবা পাংথোকখিবা ভারত সরকারগী থবকশিংবু থাগৎখিবা অমসুং সরকার অসিনা নিংথিনা মথৌ তৌবা ইনর্জী মার্কেত খুমাং চাউশিলহনবগী পান্দম্বু শৌগত্তুনা অফবা ৱাফম কয়া হায়খিবদা মরী লৈহনবা য়াই।

ভারত অমসুং আই.ই.এ.গা নেচরেল গ্যাস সেক্তরদা খুৎশম্নদুনা চৎলিবা অসিনা নেচরেল গ্যাস ইনফ্রাস্ত্রকচর, মসিবু মওং চুমহনবা অমসুং ভারতকী ইনর্জী মিক্সতা নেচরেল গ্যাস্কী শরুক হেনগৎহন্নবা ভারতকী লৈবাক্কী ওইনা পাংথোকপা খোংথাংশিংবু  তেংবাংদুনা গ্যাস হব ওইহনবা অমসুং ভারতকী ইনর্জীগী সেক্যুরিতীশিংবু মপাঙ্গল কলহনবগী চানবা লৌশিং অমসুং অখংবশিং খংমিন্নবা হেনগৎহনবদা চাউখৎপা পুরকপগী পান্দম থম্মি।

*******