কেন্দ্রগী দিবেলপমেন্ত ওফ নোর্থ ইস্তর্ন রীজন (দি.ও.এন.ই.আর.)গী রাজ্য (ইন্দিপেন্দেন্ত চার্জ) মন্ত্রী, এম.ও.এস. পি.এম.ও., পব্লিক গ্রাইবেন্স, পেন্সন, এতোমিক ইনর্জী অমসুং স্পেস্কী মন্ত্রী দাঃ জিতেন্দ্র সিংহনা অখন্নবা ওইনা দিস্ত্রিক্ত কল্লেক্তরশিং অমসুং সিবিল সর্বেন্তশিংনা মপুং ওইনা কোবিদ লায়চৎকী মনুংদা পাংথোক্লিবা থৌদাংশিং অসিদা থাগৎপা ফোংদোকখ্রে।

আই.আই.পি.এ.না ভিদিও কনফরেন্সিংগী খুত্থাংদা শিনবা এদবান্সদ প্রোফেস্নেল প্রোগ্রাম ইন পব্লিক এদ্মিনিস্ত্রেসন (এ.পি.পি.পি.এ.)গী ৪৬শুবা সেসন হৌদোকপগী থৌরমদা দাঃ জিতেন্দ্র সিংহনা হায়খিবদা ভারতনা কোরোনাগা লান্থেংনবদা মায় পাকপা ঙম্লিবসি প্রধান মন্ত্রীনা য়াম্না ঙন্না লোকদাউন লাউথোকখিবা অদুননি হায়খি। মতম চানা পাংথোকখিবা নিংথিবা লৈঙাকপগী থৌওংশিং অসিনা ভারতপু মালেমগী মীশিং য়ামদবা লৈবাকশিংদা থোকখিবা খুদোংচাদবশিংগা মান্নবা থোক্কদবদগী কনবা ঙমখিবনি অমসুং লৈবাক অসিগী মীশিং য়াম্বা অমসুং লমগী পাক চাওবগী হীরমশিং অসিনা থোকহনবা য়াবা খুদোংচাদবা কয়া অসি ভারতকী লৈঙাক্লোইশিংনা হৈ-শিংনা থেংনখি হায়নশু মহাক্না মখা তানা হায়খি।

দাঃ জিতেন্দ্র সিংহনা হায়খিবদা মতমগী মতুং ইন্না অহোঙবা পুরকপগী মতুং ইন্না আইরন কর্তেন অসি হৌজিক্তি লৈত্রে অমসুং সিবিল সর্বেন্সতশিং অসিনা মখোয়গা মীয়ামগগী মরক্তা লৈরিবা অহাংবা অসি মেনশিনবদা তেংবাংলে অমসুং মীয়ামগী য়াইফ য়ুম্বালদা য়ুম্ফম ওইবা ময়েক শেংবা লৈঙাকপগী থৌওং পীবা ঙম্লে হায়খি। দিস্ত্রিক্ত কল্লেক্তরশিংনা মীয়ামগী ৱাকৎশিং অসি মখোয় মখোয়গী য়ুম্থোংসিংদা তানবা হায়বগী পান্দমদা মীয়ামগী দরবার শিন্দুনা হোৎনরি হায়না মহাক্না মখা তানা হায়খি।

দাঃ জিতেন্দ্র সিংহনা নৌহৌননা নিংশিংখিবদা হৌখিবা চহী ৫দগী ৬ ফাওবগী মনুংদা প্রধান মন্ত্রী শ্রী নরেন্দ্র মোদীনা শেমদোকপগী থৌওং কয়াগী পরিং অমা পাংথোকখ্রে হায়খি। মে ২০১৪দগী তোঙানবা মওংগী ওইবা ৱারেপ কয়া লৌখিবা অদুবু পল্লদুনা মতম কুইনদগী চৎনদুনা লাক্লবা গেজেতেদ ওফিসার অমনা চে-চাং এতেস্তেদ তৌবগী থৌওং তোক্তুনা মশা মশানা ওইনা এতেস্তেদ তৌজহনবা, লাৱর রং সেলেক্সন তৌবদা ইন্তর্বিয়ুগী থৌওং য়াওহন্দবা, মতম হেল্লবা কাংলোন/আইন ১৫০০ হেনবমুক চৎনদ্রে লাউথোকপা, আই.এ.এস. ওফিসারশিংনা মখোয়গী থবক হৌরকপদা কেন্দ্র সরকারগী এসিস্তেন্ত সেক্রেতরী ওইনা থা অহুম থবক তৌহনবা, প্রিবেন্সন ওফ করপসন এক্ততা অহোঙবা পুরকপা অমসুং মীওই ৯৮% য়াওহনবগী পি.এম.গী দি.এ.আর.পি.জি. নিংথিনা থবক তৌবগী মনা পীবগী অনৌবা মওং হৌদোকপনচিংবা কয়া অসি তসেংনা তোঙানবা মতৌ অমনি হায়খি। নিংথিনা থবক তৌবগী মনাবু মীওই অমগী প্রোফাইলদগী ফ্লেগশিপ প্রোগ্রামলোমদা পুখিবা অসি তসেংনা পুৱারী ওইবা মওং অমনি হায়না হায়খি।

মরু ওইবা ইন্দিকেতর ৪৯দা য়ুম্ফম ওইবা অফবা তৌনিংবা জিলা ১১৫গী হীরমগী মতাংদা ৱা ঙাংলদুনা দাঃ জিতেন্দ্র সিংহনা সাইন্তিফিক ওইবা মওংদা শেম্বা থবক-থৌরমশিংদা য়ুম্ফম ওইদুনা অফবা তৌনিংবা জিলাশিং অসিনা হায়রিবা মরু ওইবা ইন্দিকেতরশিং অসিদা মিৎয়েং চংগদবনি অমসুং পীরিবা ইন্দিকেতরশিং অসিগী মতুং ইন্না লৈবাক অসিগী ওইনা খ্বাইদগী নিংথিনা থবক পাংথোকপা রাজ্য অমসুং জিলাগী ওইনা লৈরিবা মখোয়গী থাকশিং অসি হেন্না ফগৎহন্নবা হোৎনগদবনি হায়খি। মহাক্না অসমগী অফবা তৌনিংবা জিলা, গোলপারা অমসুং ধুব্রিনা অয়ুশমান ভারতকী থবকশিংবু মথং শিৎনা ১০০% অমসুং ৮৫% চাংদা য়ৌহনবা ঙম্বগীদমক থাগৎপা ফোংদোক্লি। মসিগী অহেনবা ওইনা গোলপারা জিলানা থা তরুক্কী মনুংদা ভারত পুম্বগী অফবা তৌনিংবা জিলা ১৫০গী পরিংদা ৬৮শুবা থাক্তা লৈরম্বদগী ১৬শুবা থাক্তা লৈবা ঙমখিবা অদুসু পনখি।

থৌরম অদুগী মনুং চনবা ওইনা ইন্দিয়ন ইন্সতিত্যুৎ ওফ পব্লিক এদ্মিনিস্ত্রেসন (আই.আই.পি.এ.)গী হেন্না ফবা ৱেবসাইৎ অমা অমসুং মাই আই.পি.পি.এ. মোবাইল এপ অমসুং আই.আই.পি.এ.গী দিজিতেল বর্জন অমসু পুথোকখি। মসিগী মথক্তা লোক প্রশাশনগী খ্বাইদগী ইহান হানবা হিন্দিগী চেফোং অমসুং খ্বাইদগী ইহান হানবা নগরলোক চেফোংগী দিজিতেল বর্জন অমসু কেন্দ্রগী মন্ত্রী দাঃ জিতেন্দ্র সিংহ য়াওবা থৌরম অদুদা পুথোকখি।

দি.ও.পি.তি.গী সেক্রেতরী দাঃ সি. চন্দ্রামাওলি; আই.আই.পি.এ.গী ভাইস প্রসিদেন্ত শ্রী শেখর দত্তা; আই.আই.পি.এ.গী দাইরেক্তর শ্রী এস.এন. ত্রিপাথি; প্রোগ্রাম দিয়ারেক্তর দাঃ চারু মলহোত্রা অমসুং অতোপ্পা সিনিয়র ওফিসিএলশিং অমসুং আই.আই.পি.এ.গী ফেকলতীশিংনা থৌরম অদুদা শরুক য়াখি। দাঃ মোহন তানেজানা থৌরম অদুগী মীয়ামদা থাগৎ ৱারোল পীখি।