ভারতকী উপ রাস্ত্রপতি, শ্রী ভেঙ্কয়া নাইদুনা ঙসি ‘য়েন্নবা অমদি নুংশিনবা’ হায়বা ভারতকী নুংগী ওইবা ৱাখল্লোনগী পরিংদা লৈবাকসিগীদমক, মালেমসিগীদমক অমদি মীওইবা খুন্নাই পুম্বগীদমক পুন্না হিংমিন্নবা অমসুং পুন্না শুমিন্নবা হায়বা ভারতকী চাউরবা নাৎকী চৎনবী অসিবু ঙাক শেন্নবা অমদি য়োকখৎনবগীদমক আপিল তৌখ্রে‍।

মৈসুর লৈবাক্কী ২৫শুবা নিংথৌরেল শ্রী জয়া চমারাজা ৱাদিয়ারগী চহী চাম্মশুবগী কুমওন থৌরম পাঙথোকপগী লোইশিনবগী থৌরমদা ভর্চুএল ওইনা ৱা ঙাঙলদুনা উপ রাস্ত্রপতিনা ঐখোয়গী পুৱারীবু শেম্বীরমবা নিংথৌরেল জয়া চমারাজা ৱাদিয়ারগুম্বা অফাওবা লৈঙাকপশিং অমদি মীয়াম্না ইকায়খুম্নবা মীওইশিংগী ৱাখল, লৌশিং, মরৈবাক নিংবা অমসুং মীৎয়েংবু লৌশিন্নবা ৱাফম থমখি‍।

শ্রী জয়া চমারাজা ৱাদিয়ারবু মতিক চাবা লৈঙাকপা অমনি হায়রদুনা উপ রাস্ত্রপতিনা হায়খি, “মহাক্না নিংখা তমদ্রিঙৈ মমাঙগী ভারত্তা খ্বাইদগী মপাঙ্গল কনবা, মরোমদোম লেপচবা ঙমবা অমসুং খুমাঙ চাওশিনবা লৈবাকশিংগী মরক্তা অমা শেমগৎলম্মী”‍।

শ্রী নাইদুনা নিংথৌরেল অদুবু মথম্মোইদা মীয়ামগীদমক খনবা মতম পুম্নমক্তা মীয়ামগা তোৎন-তিন্নদুনা লৈনিংবা অমদি মীয়ামগী য়াইফনবা হোৎনদুনতা লৈবা অশেংবা মীয়ামগী লৈঙাকপা অমনি হায়না হায়খি‍।

খঙজিনবা য়াবা ৱাফমদি শ্রী ৱাদিয়ারনা মৈসুর স্তেততা কন্সতিতুএন্ত এসেমব্লী শেমদুনা অমদি শ্রী কে.সি. রেদ্দীনা মুখ্য মন্ত্রী ওইবা মরক্কী ওইবা মীয়াম্না পাম্নবা লৈঙাক অমা শেমদুনা দাইত্ব লৈবা লৈঙাক অমা লিংখৎলম্মী‍।

নিংথৌরেল অসিনা ভারতনা মপাঙ্গল কনবা দিমোক্রেসী অমগী মায়কৈদা মাও ওনশিল্লকপদা লমজিংলমবা অমদি লৈবাকসিগী অপুনবগী শক্তম পুরকপদা চাউনা থৌদাং য়ারমবা মীওইনি হায়না শিংথারদুনা উপ রাস্ত্রপতিনা মহাকপু থাইনগী ৱাখল্লোন অমসুং অনৌবা মতমগী ৱাখল্লোন অনি চপ চানা পুনশিন্নরবা মীওইনি হায়খি‍।

নিংতম্লবা মতুংদা ‘ইনস্ত্রুমেন্ত ওফ এসেসন’ য়াখিবা খ্বাইদগী অহানবা স্তেত মৈসুরনি হায়না পল্লদুনা শ্রী নাইদুনা হায়খিবদা শ্রী জয়া চমারাজা ৱাদিয়ার কোক্কী অমদুং থম্মোইগী ওইবা মতিক ময়াই চেনবা মীশক্নি অমদি মসিনা মহাকবু লৈবাক অসিগী খ্বাইদগী ৱাংবা লুচিংবা অমদি মীয়াম্না খ্বাইদগী পাম্নবা লৈঙাকপা ওইহনখি‍।

“হীরম কয়াদা, চানক্যনা অর্থ সাস্ত্রদা তাক্লমবা ফিদম্নিংঙাই ওইবা নিংথৌ অমগী মতিক ময়াইশিং, মঙোন্দা য়াওখি,” হায়না মহাক্না হায়খি‍।

শ্রী জয়া চমারাজাবু ওন্ত্রপ্রিনিউরসিপ মপুং ফানা শৌগৎপা মীশক্নি হায়রদুনা, শ্রী নাইদুনা হায়খিবদা মহাক্না লৈবাকসিদা সাইন্স অমসুং তেক্নোলোজী চাওখৎহন্নবা অমদি সাইন্তিফিক তেম্পর শেমগৎনবা লেপ্পা লৈতনা হোৎনরমখি‍।

মৈসুরগী ২৫শুবা নিংথৌরেল অসি মহাক্না বেঙ্গলুরুদা হিন্দুস্তান এয়রক্রাফ লিমিতেদ (মতুং তারকপদা ঐচ.এ.এল. ওইরকখিবা), মৈসুরদা সেন্ত্রেল ফুদ তেক্নোলোজিকেল রিছর্চ ইনস্তিত্যুৎ, বেঙ্গলোরদা নেসনেল ত্যুবরকুলোসিস ইনস্তিত্যুৎ অমসুং মৈসুরদা ওল ইন্দিয়া ইনস্তিত্যুৎ ওফ স্পীচ এন্দ হিয়রিংনচিংবা লিংখৎপদা শৌগৎখিবা অমদি পুক্নীং থৌগৎখিবগীদমক মীয়াম্না ইকায়খুম্নখি‍।

নিংথৌরেল অসিনা ইন্দিয়ন ইনস্তিত্যুৎ ওফ সাইন্সেস বেঙ্গলোরদা ইনস্তিত্যুৎ অসি চলাইনবা অমদি মথৌ তারকপা মতমদা চাউথোক্নবগীদমক্তা ফন্দ অমসুং স্কোলারসিপ পীবগী মাগী ইমুংগী চৎনবী অদুসু ঙাক্তুনা চৎলম্মী‍।

উপ রাস্ত্রপতিনা শ্রী ৱাদিয়ারবু হীরম কয়াদা খঙহৈরবা লাইপোক অমসুং মপুন্সি চুপ্পা তমবা লেপখিদবা মমীং লৈরবা ফিলোসোফর, ঈশৈ নোংমাই শন্দোক্লমবা, লৈঙাক্লোনদা ৱাখল থাদবা অমদি লায়রববু মতেং পাংবা মীশক অমনি হায়না হায়খি‍।

মহাক্না আর্ত, লিতরেচর অমসুং নাৎকী লমদা পাংলমবা মপা লৈতবা মতেংশিংনা মরম ওইরগা মহাকপু ‘দক্ষিনা ভোজা’ হায়না খঙনরম্মী‍।

শ্রী জয়া চমারাজাগী সংস্কৃৎ লোনদা খঙ-হৈবা অমদি ৱা ঙাঙবগী থোইদোক হেন্দোকপা মহৈবু থাক ৱাংনা থাঙ্গৎলদুনা, ‘জয়া চমারাজা গ্রন্থ মালা’না কনাড়া লোন অমসুং লোয়নসিল্লোনবু চাউনা মপুং ফাহল্লি হায়না শ্রী নাইদুনা হায়খি‍।

অসিগুম্লবা য়াইফরবা থৌরম অসিদা ঐখোয়না মতম নাইদ্রবা ভারতকী ৱাখল্লোনশিং, ইনাক খুল্লবা নাৎকী লনশিং অমসুং দিমোক্রেসীগী ৱাখল্লোনগা লোয়ননা মীয়ামদা য়ুম্ফম ওইবা লৈঙাক্লোনবু হরাও তয়ামবা ফোঙদোক্কদবনি হায়না উপ রাস্ত্রপতিনা মীপুম খুদিংমক্তা আপিল তৌখি‍।

ঙাঙখিবা ৱাফমদুগী মপুং ফাবা ৱারোল মখাদা পীরি –

মৈসুর লৈবাক্কী ২৫শুবা নিংথৌরেল, শ্রী জয়া চমারাজা ৱাদিয়ারগী চহী চাম্ম শুবা কুমওন থৌরম লোইশিনবগী থৌরমসিদা অদোম ময়ামগা পুনবা ফংবগীদমক্তা ঐ নুংঙাইবা ফাওই‍।

মপাঙ্গল কনবা অমদি মরোমদোম লেপচবা ঙমবা লৈবাক অমা শেমগৎলমবা মমীং লৈরবা মতিক চারবা লৈঙাকপা অমা নীংশিনবগী চপ চারবা তাঞ্জা অমনি‍। মৈসুর নিংখা তমদ্রিঙৈ ভারতকী খ্বাইদগী খুমাঙ চাওশিনবা লৈবাকশিংগী মনুংদা অমা ওইরম্মী‍।

শ্রী জয়া চমারাজা ৱাদিয়ারদা কোক্কী অমসুং থম্মোয়গী মতিক লৈরমবনা মহাকপু লৈবাকসিগী খ্বাইদগী ৱাংবা লুচিংবা অমদি খ্বাইদগী পাম্নবা লৈঙাকপা অমা ওইরম্মী‍। মহাকপু মহাক্কী মীৎয়েং, কান্নরবা ৱাখল্লোন অমসুং পুকচেল চাউবগীদমক ময়াম্না ইকায়খুম্নরম্মী ‍।

মহাক মতম পুম্নমক্তা মীয়ামগা তোৎন-তিন্নদুনা লৈবা পামবা অমদি মীয়ামগী য়াইফনবগীদমক্তা হোৎনখিবা অশেংবা মীয়ামগী লৈঙাকপা অমা ওইরম্মী‍।

মরৈবাক্কীদমক চপ য়ুংনা লেপ্পা মীশক অমা ওইনা মহাক্না মৈসুরগী মতিক মঙাল চাউবা মহাক্কী মপা মপুনা থম্বীরমবা ফজরবা লীক্লমবু মাঙদা পুদুনা চৎলম্মী‍।

নীং তম্লবা মতুংদা ‘ইনস্ত্রুমেন্ত ওফ এসেসন’ য়াখিবা অহানবা অচৌবা স্তেত মৈসুরনা ওইখি‍। মৈসুরনা অপুনবা ভারতকী শরুক অমা ওইরকখিবগী হোংলকখিবা থৌওং অদু নিংথৌরেল অসিগী মীৎয়েংনা মরম ওইরগা থোইদোকপা অয়েৎ অপন লৈখিদে‍।

পুক্নীংদা মীয়ামগীদমক খঞ্জবা নিংথৌরেল অসিনা কনস্তিতুএন্ত এসেমব্লী লিংখত্তুনা শ্রী কে. সি. রেদ্দীনা মুখ্য মন্ত্রী ওইবা মরক্কী ওইবা মীয়াম্না পাম্নবা লৈঙাক অমা লিংখত্তুনা স্তেত অসিদা দাইত্ব লৈবা লৈঙাক অমা শেম্লমখি‍।

নিংথৌরেল অসি ভারতকী খুন্থোক্লোনগী লিরবা চৎনবীগী ৱাখল্লোন অমসুং নোংচুপ লমদমগী অনৌবা ৱাখল্লোন অনি চপ চানা তিল্লবা মীশক অমা ওইখি‍।

মহাক্নী মীয়ামগী লৈঙাক্কী মশক মওং মমুৎ তানা খঙলম্মী‍।

মীয়ামবু মখোয় মশানা লৈঙাকচনবা মপাঙ্গল কলহনগদবনি হায়না মাগী পুক্নীংদা ফাওখি‍।

হীরম কয়াদা, মঙোন্দা চানক্যনা অর্থ সাস্ত্রদা তাক্লমবা ফিদম্নিংঙাই ওইবা নিংথৌ অমগী মতিক ময়াইশিং য়াওখি‍।

শ্রী জয়া চমারাজা ৱাদিয়ার অসি ভারতনা মপাঙ্গল কনবা দিমোক্রেসী অমগী মায়কৈদা মাও ওনশিল্লকপদা লমজিংলমবা অমদি লৈবাকসিগী অপুনবগী শক্তম পুরকপদা চাউনা থৌদাং য়ারমবা মীওইনি‍। কনস্তিতুএন্ত এসেমব্লীগী ৱাফমশিং লায়না য়াথোকপা অমদি ভারতকী সংবিধান লৌশিনখিবা অসিনা মহাক্কী লৈবাক্কী ওইবা মীৎয়েং অদু তাক্লি‍।

ঐগী নুংশিরবা ইচিন ইনাউশিং,

মহাক্কী লৈঙাক মতমদা অমদি নিং তম্লবা মতুংদা, শ্রী জয়া চমারাজানা মৈসুরদা চাওখৎপা পুরক্নবগীদমক চোকথবা নাইদনা হোৎনরম্মী‍।

মহাক ওন্ত্রপ্রিনিউরসিপ মপুং ফানা শৌগৎপা মীওইনি  অমদি তুংদা হিন্দুস্তা এরোনোতিক্স ওইরকখিবা হিন্দুস্তান এয়রক্রাফ কৌবা কম্পেনি অমনা ১৯৪০দা বেঙ্গলুরুদা ইন্দস্ত্রিএল ফেসিলিতী অমা লিংখৎপদা মহাক্না ইচঙ থৌনা পুক্নীং থৌগৎখি‍।

মহাক্কী পুকচেল চাউরবা থৌওংশিংগী মনুংদা, মহাক্না সেন্ত্রেল ফুদ তেক্নোলোজিকেল ইনস্তিত্যুৎ (সি.এফ.তি.আর.আই.) থবক হৌহন্নবগীদমক নীংথিরবা চেলুবমবাগী য়ুমজাও অদু লৈঙাক্তা খুদোল তমখি‍। বেঙ্গলুরুদা নেসনেল ত্যুবরকুলোসিস ইনস্তিত্যুৎ অমসুং মৈসুরদা ওল ইন্দিয়া ইনস্তিত্যুৎ ওফ স্পীচ এন্দ হিয়রিং লিংখৎপদা মহাক্না চাউনা মতেং পাংখি‍।

লৈবাকসিদা সাইন্স অমসুং তেক্নোলোজী চাওখৎনবা অমদি সাইন্তিফিক তেম্পর শেমগৎনবা হোৎনবদা নিংথৌরেল অসিনা ইন্দিয়ন ইনস্তিত্যুৎ ওফ সাইন্সেস বেঙ্গলোরদা ইনস্তিত্যুৎ অসি চলাইনবা অমদি মথৌ তারকপা মতমদা চাউথোক্নবগীদমক্তা ফন্দ অমসুং স্কোলারসিপ পীবগী মাগী ইমুংগী চৎনবী অদুসু ঙাক্তুনা চৎলম্মী‍।

শ্রী জয়া চমারাজা অসি মমীং লৈরবা ফিলোসোফর, ঈশৈ নোংমাই শন্দোকপা, পোলিতিকেল থিঙ্কর অমসুং লায়রবশিংদা মতেং পাংবা পুকচেল চাউরবা মীশক অমসু ওইরম্মী‍।

নহা ওইরিবা নিংথৌ মচা অসিগী মতাংদা মমীং লৈরবা কনাড়া অইবা অমসুং ৱাখল খনবা দি.ভি. গুন্দাপ্পানা নোংমা অসুম্না হায়খি, “ইকায়খুম্নরবা মহাক্কী মফমদা নহা ওইরিবা ভারতকী মীওই অমদা চেনগদবা মীনুংশি, অরিবা লনগী মরমদা খঙহৈবা, ময়েক অমসুং কলাদা কত্থোকপা, মীওই মপোক্কী থাক ৱাংবা ৱাখল্লোনশিংগীদমক খনবা, কনস্তিত্যুসনেল লৈঙাক অমগী ফিদম্নিংঙাই ওইবা মশক অমসুং চৎন-কাংলোনশিংগী মতাংদা নীংথিনা খঙবা অমসুং মীয়ামগীদমক ৱাখল নীংথিনা খনবগী মমী তাবা ঐখোয়না উবা ফংখি‍।”

হৈথোই শিংথোইবা মহৈরোয় অমা ওইনা মচাইবুংঙো চমারাজা মপুন্সি চুপ্পা তমশিনবা লেপখিদে‍। মহাক্না চহী নিফু হেল্লক্লবা মতমদফাওবা য়ুনিভর্সিতী দিগ্রী ফংখিবা অসিনা মহাক্কী ৱাখল লৌশিংগীদমক ইখৌ লাংবা অদুবু উৎলি‍।

মহাক মমীং লৈরবা ম্যুজিকোলোজিস্ত অমদি নোংচুপ লমগী অমসুং কর্নাতিক ম্যুজিক্কী লমদা খঙ-হৈরবা মীশক অমনি অমদি ভারতকী ফিলোসোফীগী মকোক থোংবা ৱাখল্লোনবুসু খঙলম্মী‍।

মহাক সংস্কৃত লোনগী স্কোলার অমা ওইরম্মী‍। মহাক্না সংস্কৃত পামজরম্বা অসি শুপ্নতগী তমবখক্তগী নত্তে‍। মহাক লোনসিদা লুপখি অমদি থাক ৱাংনা খঙখি‍।

হীরম কয়াদা লাইপোক্কুম খঙ হৈরবা শ্রী জয়া চমারাজা অসি মশক নাইবা অইবা অমদি ৱাঙাঙলোয় অমসু ওইরম্মী‍।

মহাক্কী ‘জয়া চমারাজা গ্রন্থ রত্ন মালা’ সেরিজনা কনাড়া লোন অমসুং লোয়নসিল্লোনবু হেন্না মতিং লৈহল্লম্মী।

মহাক্কী মনুং থিৎপা ৱারোলশিংগীদমক শ্রী জয়া চমারাজাবু মালেমগী মফম কয়াদা মীয়াম্না পাম্নখি অমদি মহাক্না ঙাঙখিবা ৱাশিং মহাক্না খনগৎপা হীরমশিং অসি অয়ামবা মতমদা ভারতকী কলা, থাক ৱাংবা ৱাখল্লোন্নচিংবদা মীৎয়েং থমখি‍।

মহাক্না কলা, লোয়নসিল্লোন অমসুং নাৎকী মতাংদা মপা লৈতনা পাংখিবা মতেংশিংগীদমক মাবু নুংশিনা ‘দক্ষিনা ভোজা’ হায়না খঙনখি‍। মাগী মফমদা শ্রদ্ধাঞ্জলি কৎলদুনা লন্দনদা ফোঙবা পাউ-চে অমনা মহাকপু ভারতকী নাৎ শন্দোকপা ভোলুন্তরী ৱান-মেন মিসন অমনি হায়না মশক তাকখি‍।

ঐগী নুংশিরবা ইচিন ইনাউশিং,

ঙসি ঐখোয়না লৈঙাকপা অসিগী পুন্সি অমসুং থৌদাশিং নীংশিংদুনা পাঙথোক্লিবা অসিদা ঐখোয়গী পুৱারীবু শেম্বীরমবা নিংথৌরেল জয়া চমারাজা ৱাদিয়ারগুম্বা অফাওবা লৈঙাকপশিং অমদি মীয়াম্না ইকায়খুম্নবা মীওইশিংগী ৱাখল, লৌশিং, মরৈবাক নিংবা অমসুং মীৎয়েং অমদি খোঞ্জেলসু লৌশিল্লি‍।

ঐখোয়না মতম নাইদ্রবা ভারতকী ৱাখল্লোন, ইনাক খুল্লবা নাৎকী লন অমসুং ঐখোয়না ফংজহৌরিবা মমল য়াম্লবা ইকায় খুম্ননিংঙাই ওইরবা মীৎয়েংবু নুংঙাইবা ফোঙদোক্লি‍।

ঐখোয়না মীয়ামগী লৈঙাক্কী অমসুং মীয়ামদা য়ুম্ফম ওইবা অফবা লৈঙাক্লোনগী ৱাখল্লোনবু তরাউ তয়ামবা ফোঙদোক্লি‍।

ঐখোয়না খেন্নবশিংগী মরক্তা অপুনবগী শক্তম, ইং চিকপা অমসুং নুংশি চান্নবগী ৱাখল্লোনবু হরাও তয়ামবা ফোঙদোক্লি‍।

থৌরম অসিদা ঐখোয়না মরুওইনা ইরৈবাক অসিগী মশক নাইরবা মপারীশিংগী মরক্তদগী অমনা থম্বীরমবা মুৎপা নাইররোইদবা মমী অদুবু নীংশিংলি‍।

অসিগুম্লবা য়াইফরবা থৌরমসিদা ঐনা মমীং লৈরবা মহারাজা চমারাজা ৱাদিয়ারগী মফমদা ইকায়খুম্নবগা লোয়ননা নোল্লুক্না শ্রদ্ধাঞ্জলি কৎচরি‍।

শ্রী জয়া চমারাজাগুম্বা মপূক্নীং লোঙদবা মীশক অমদা ঐখোয়না কৎচবা য়াবা খ্বাইদগী চাউবা শ্রদ্ধাঞ্জলিদি লৈবাকসিগীদমক, মালেমসিগীদমক অমদি মীওইবা খুন্নাই অপুনবগীদমক ভারতকী নাৎকী চৎনবী ওইরিবা পুন্না হিংমিন্নবা অমদি পুন্না শুমিন্নবা হায়বা ৱাখল্লোন অসিবু ঙাক শেন্দুনা থমবা অমদি য়োকখৎপা অসিনা ওইগনি‍।

অদোমবু থাগৎচরি‍!

জয় হিন্দ!

*****