কেন্দ্রগী কম্মর্স অমসুং ইন্দস্ত্রী মন্ত্রী শ্রী পিয়ুশ গোয়লনা মহাক্কী মন্ত্রালয়না ভারত্তা মশিং য়াম্না শাবা য়াবা ইলেক্ত্রোনিক্সকী পোত্থোকশিং, মিং ওইনা পল্লবদা তেলিবিজন সেৎশিং, ক্লোজ সর্কিত তি.ভি.শিং, এয়র কন্দিস্নরশিং, য়েংশিন্দুনা মপান লমদা মশিং য়াম্না থাদোকপা য়াবা পোত্থোকশিং মশক খংদোক্লি হায়খি। ইলেক্ত্রোনিক্স এন্দ কম্প্যুতর সোফৎৱেয়র এক্সপোর্ত প্রোমোসন কাউন্সিলগী মীহুৎশিংগা ঙসি ভিদিও কনফরেনশিংগী খুত্থাংদা ৱারী শাবদা হায়রিবা পোত্থোকশিং অসিগী মতাংদা পাউতাক কয়া পীরক্তুনা মসিদা চাংয়েংনবা লৈহন্নবা পোলিসী শেম্বগী মতাংদা মন্ত্রীনা ইন্দস্ত্রীশিংদা হায়খি। অসিগুম্বা পোত্থোকশিং অসি লমদমসিদা শাদুনা মপান লমদা থাদোক্নবা কন্দক্তিব ইকোসীস্তেম অমা শেম্বদা সরকারনা তেংবাংগনি হায়না মখা তানা হায়খি।

ইলেক্ত্রোনিক্স হার্দৱেয়র সেক্তরশিংনা অনৌবা থৌওং অমসুং পোত্থোক শাবগী হীরমদা চৎপা, আর. এন্দ দি. পাংথোকপা, লমদমশিদা মখোয়গী মশিং অমসুং মপান লমদা পোত্থোক য়োনবা হেনগৎহনবগী মতাংদা পল্লদুনা সরকারগী মতেং য়াওদনা মরোমদোম লেপচবা ঙম্বা অমসুং শাহৌ লৌরিবা হায়রিবা ইন্দস্ত্রীশিংনা মখোয়গী মশক তাকচবা ঙমলে হায়না মন্ত্রীনা হায়খি। মসিগী মতাংদা সোল্যুসন পীবা ঙম্বা অমসুং মপান লমদা থাদোকপা ঙম্বগী অচেৎপা খোংফমদা লৈরিবা আই.তি., আই.তি.ই.এস. অমসুং বি.পি.ও. সেক্তরশিংগী ফজরবা খুদমশিংশু মন্ত্রীনা পীখি। এক্সপোর্ত ফ্রোম ইন্দিয়া স্কিম (এম.ই.আই.এস.)গুম্বা খক্তদগী ফংবা কান্নবশিংখক্তদা মখা পোনবা অসিনা মখোয়গী মরক্তা চাংয়েংনবগী ফিভম অমা ওইহল্লকপা ৱাগনি মরমদি অসিগুম্বা স্কিম অসিদি অকক্নবা মতম খরখক্তগিনি অমসুং মপান লমদা পোত্থোকশিং থাদোকপদা চাংদম্নবা লৈরকপা অসিদি মখোয়গী তৌবা ঙম্বা মতিক্তগী লাক্কদবনি হায়খি। মহাক্না নেস্নেল মীসন ওন ক্বান্তম তেক্নোলোজীজ এন্দ এপ্লিকেসন (এন.এম.-ক্যু.তি.এ.) হায়রিবা কম্প্যুতিং, কম্ম্যুনিকেসন, সেন্সিং, কেমিস্ত্রী, ক্রিপ্তোগ্রাফী, ইমেজিং অমসুং মেকানিক্সকী অরুবা হীরমশিংগী ৱারোইশিন পুরকপদা শিজিন্নরিবা অসি থবক ওইনা পাংথোক্নবগীদমক ইন্দস্ত্রীশিং অমসুং সরকারনা পুন্দুনা অমত্তা ওইনা থবক তৌমিন্নবগী তঙাইফদবগী মতাংদা হায়খি।

লৈবাক অসিগী মপান লমদা থাদোক্লিবা সোফৎৱেয়র অমসুং সর্বিসশিংগী অচুম্বা অমসুং মগুন লৈবা দেতাশিং তঙাই ফদনা লৈবগী মতাংদা পল্লদুনা মসিগী হীরম অসিগী মতাংদা মন্ত্রালয়না আর.বি.আই.গা পাউ ফাওনরি হায়খি। ইন্দস্ত্রী অসিনা হৌখিবা চহী খরা অসিদা লমদমসিগী ওইবা পোত্থোক কয়া পুথোকপদা হেনগৎলক্লিবা অমসুং প্রধান মন্ত্রীগী আত্মানির্ভর ভারতকী খোল্লাও ইন্দুনা পোত্থোক পুথোক্লকপা হেনগৎলক্কনি হায়বগী থাজবা থম্লদুনা মহাক্না ইলেক্ত্রোনিক্স অমসুং কম্প্যুতর সোফৎৱেয়র সেক্তর অসিদা অঙম্বা মতেং পাংগনি হায়বগী থাজবা পীখি। প্রধান মন্ত্রীগী আত্মানির্ভর ভারতকী মংলান অসি মংফাওনহন্নবগীদমক্তা সরকার অমসুং ইন্দস্ত্রী অসিগী মরক্তা থাজনবা লৈবগী তঙাই ফদবশিংগী মরমদা পল্লদুনা মন্ত্রীনা মখোয় অসি অমত্তা ওইনা পুন্দুনা ললোন ইতিক্কী মরমদা মশিং থিনিংঙাই লৈতনা লৈরিবা খুদোংচাবশিং অসি লৌমিন্নসি হায়খি “মসিগী সরকার অসিনা ইন্দস্ত্রীশিংনা মখোয়গী চান্নবা ইকোসীস্তেম শেম্বা ঙম্নবা থবক তৌরি অমসুং অনৌবা ফিভম শেমগৎপদা নত্তনা আত্মিনির্ভর ভারতকী মরু ওইবা পান্দম ওইরিবা ভারতকী পোত্থোকশিংবু মালেমগী থাক্তা লৈবা পোত্থোক ওইহন্দুনা ইন্দস্ত্রীশিংনা মখোয়গী তুংগী লম্বী য়াৎচগদবনি”, হায়না মন্ত্রীনা মখা তানা ফোংদোকখি।

ভারতকী ইলেক্ত্রোনিক্স হার্দৱেয়র অমসুং কম্প্যুতর সোফৎৱেয়রগী লমদা মপান লমদা থাদোক্লিবা অসিবু হেনগৎহন্নবগীদমক্তা ই.এস.সি.না শেম্বা থৌরাং য়াৎপগী চেরোল অমা মন্ত্রীনা মীয়াম মাংদা লান্থোকখি। চেরোল অসিদা সেক্তর অনিসিগী ওইনা ভারতকী মপান লমদা থাদোক্লিবা অসিগী চাং হেনগৎহন্নবা ৱাফম কয়া য়াওরি।

***