ভারত সরকারগী পাৱর মন্ত্রালয়গী মখাদা লৈবা পি.এস.য়ু.শিংগী জোইন্ত ভেঞ্চর অমা ওইরিবা ইনর্জী ইফিসেন্সী সার্বিসেস লিমিতেস (ই.ই.এস.এল.)না ন্যু ওখলা ইন্দস্ত্রিএল দিবেলপমেন্ত ওথোরিতী (নোইদা)গা ইলেক্ত্রিক গারীশিং হেন্না শীজিন্ননহন্নবা অমসুং মীয়াম্না শীজিন্ননবা ই.ভি. চার্জিং স্তেসনশিং অমসুং মসিগা মরী লৈনবা ইনফ্রাস্ত্রকচরশিং শেমগৎ শাগৎনবা য়ানচে অমা খুৎয়েক পীনখ্রে। লৈবাক অসিনা কোবিদ-১৯ লাইচৎকী লোকদাউনগী মতুংদা অমুক হিংগৎলকপা ওইনা ই.মোবিলিতী হেনগৎনবগীদমক ইনফ্রাস্ত্রকচরেল ইকোসিস্তেম অমা শাগৎপদা খোংলোই ওইমিন্নরিবসিনা মতেং ওইরগনি।

য়ানচে অদু শ্রী এ.কে. ত্যাগী, জেনরেল মেনেজর নোইদা ওথোরিতী অমসুং শ্রী অমিৎ কৌশিক, একজিক্যুতিব দিরেক্তর (গ্রোথ), ই.ই.এস.এল.গা নোইদা ওথোরিতীগী সি.ই.ও. শ্রীমতি রিতু মহেস্বরি য়াওনা খুৎয়েক পীনখিবনি।

খুৎয়েক পীনবগী থৌরম অদুদা ৱা ঙাংলদুনা শ্রীমতি রিতু মহেস্বরি, সি.ই.ও. নোইদানা হায়খি, "মপাঙ্গল লৈরবা ই.ভি. ইনফ্রাস্ত্রকচরগী মতম কুইনা চৎকদবা অকোইবা অমা শাগৎপা হায়বসিনা মীয়ামদা ইলাক্ত্রিক গারীশিংদা থাজবা লৈহল্লক্কনি। মসিনা শীজিন্নরিবশিংদা নুংঙাইবসু হেলহনগনি। ই.ভি. মশীং হেনগৎলকপনা, লমদম অসিদা পোলুসন থাদোকপগী চাংসু হন্থহল্লগনি, মসিনা অশেংবা নুংশিৎ ফংবা হেলহনগনি অমসুং মীয়ামগী হকশেল কাংলোন্দসু কান্নবা কয়া অমা পুরক্কনি।"

শ্রী অমিৎ কোশিক, ই.দি. ই.ই.এস.এল.না হায়খি, "ইলেক্ত্রিক গারী (ই.ভি.)শিং অসি তুংকোইনা শাংনা চৎপা য়াবা ওইবনা মালেমদা কন্না খন্নরিবা হীরম অমা ওইরি অমসুং ই.ই.এস.এল.না ভারতকী নেসনেল ই.মোবিলিতী প্রোগ্রামগী মখাদা ই.ভি. শীজিন্নবা হেনগৎনবগীদমক মায় পাক্না মাংজিল থানা থৌরাং পায়খৎলিবসিগীদমক চাউথোকপা পোকচৈ। ঐখোয়না নোইদা ওথোরিতীগা মীয়ামগী ই.ভি. চার্জ তৌনবা ইনফ্রাস্ত্রকচরশিং নোইদাদা শাগৎনবগীদমক পুন্না চৎমিন্নরিবসিদা হরাউবা পোকচৈ।"

ই.ই.এস.এল.না য়ানচে অসিগা মরী লৈননা খঙ হৈরবা মেন পাৱর শীজিন্নদুনা মীয়াম্না চার্জ তৌনবগী ইনফ্রাস্ত্রকচরগী ওপরেসন অমসুং মেন্তেনেন্সকী থবকশিংদা মাংজিল থানা ইনভেস্ত তৌগনি। নোইদা ওথোরিতীনা চার্জিং ইনফ্রাস্ত্রকচরশিং অসিগী মফম পীগনি। মসিগী থৌরাং অসিনা চহী অমদা ই কার অমনা কারবোন দাইওক্সাইদ তন ৩.৭ থাদোকপসু হন্থহনগনি হায়রি।

নোইদা ওথোরিতীদা ভারত দি.সি.০০১ (কিলোৱাৎ ১৫) ৫৪ অমসুং কিলোৱাৎ ১২২ (কিলোৱাৎ ৫০ সি.সি.এস.২+কিলোৱাৎ৫০ চেদ্মো+কিলোৱাৎ২২ তাইপ২)গী ফাস্ত চার্জরশিং য়াওনা মীয়াম্না চার্জ তৌনবা স্তেসন (পি.সি.এস.) ১৬২গীদমক হেভী ইন্দস্ত্রী বিভাগকী ফেম ইন্দিয়া স্কিম ফেজ-২গী মখাদা শেল কাইথখ্রে। ই.ই.এস.এল. অসি নোইদা শহরদা মীয়াম্না চার্জ তৌনবা স্তেসন শানবগীদমক খনগৎলবা ওর্গনাইজেসন অমনি।

হৌজিক ফাওবদা, ই.ই.এস.এল.না ই.ভি. চার্জর ২০ লিংখৎখ্রে, ১৩না অয়াবা পীখ্রে অমসুং ৭ অমসু অয়াবা ঙাইরি। মসিগী ই.ভি. চার্জরশিং অসি নোইদাগী গঙ্গা সোপ্পিং কমপ্লেক্স (সেক্তর ২৯), ইলেক্ত্রোনিক সিতী মেত্রো স্তেসনগী ময়া (সেক্তর ৬৩), সোপ্রিক্স মোল (সেক্তর ৬১)গী মায়োক্নবদা, আর.তি.ও. ওফিসকী ময়াদা (সেক্তর ৩৩), এদ্ভেন্ত চৌক (সেক্তর ১৪২) অমসুং সেক্তর ৫০গী মরুওইবা কৈথেলগুম্বা মশক থোকপা মফমশিংদা খিনখ্রে।

মসিগী অনৌবা দিমান্দ এগ্রেসন অমসুং বল্ক প্রোক্যুরমেন্তকী মোদেলশিং অসিগা লোইননা, ই.ই.এস.এল.না ইলেক্ত্রিক গারী অমসুং চার্জরশিং একচুএল মার্কেৎ ভেল্যুগা চাংদম্নবদা য়াম্না তাবা মমলদা ফংলি। মখা তানা, মমল নেম্বা ফন্দ ফংবনা মরম ওইদুনা প্রোজেক্ত অসিগী মপুং ওইবা অচঙবা শেল অসি চাংদম্ননিংঙাই ওই। মসিগা লোইননা, ই.ই.এস.এল.না তুং কোইনা চৎনবা য়াবা, শীজিন্নগদৌরিবা মীয়ামদা অহোংবা মমলদা ফংবা  লল্লোন ইতিক্কী শক্তম অমা শাগৎখ্রে।

নোইদা ওথোরিতীনা শহর অসিবু লু-নান্ননবা, হেন্না শংহন্নবা, অমসুং তুং কোইনা চৎপা য়ানবগীদমক কন্না হোৎনরি। শহর অসিদা মীয়াম্না চার্জ তৌনবগী ইনফ্রাস্ত্রকচর শাগৎনবা অমসুং ই. গারীশিং শীজিন্নবগী চাং হেনগৎনবগীদমক মাংজিল থানা হোৎনরি।

***