কেন্দ্রগী রোদ ত্রান্সপোর্ত অমসুং হায়ৱে অমসুং এম.এস.এম.ই.শিংগী মন্ত্রী শ্রী নিতিন গদকারীনা ৱেবকাস্তকী খুথাংদা ঙসি নই দিল্লীদা ফমখিবা ইনফ্রাস্ত্রকচরগী কাংবুগী মীফমদা ময়াই তাংবল লৌখ্রে। রেলৱে অমসুং কম্মর্সকী কেন্দ্রগী মন্ত্রী শ্রী পিয়ুশ গোয়াল, ইনভাইরোন্মেন্ত, ফোরেস্ত অমসুং ক্লাইমেৎ চেঞ্জ, ইনফোর্মেসন অমসুং ব্রোদকাস্তিং অমসুং হেবী ইন্দস্ত্রীজ অমসুং পব্লিক ইন্তর্প্রাইজকী কেন্দ্রগী মন্ত্রী শ্রী প্রকাশ জাবেদকর, অমসুং রোদ ত্রান্সপোর্ত অমসুং হায়ৱেগী রাজ্যগী থৌ পুরিবা কেন্দ্রগী মন্ত্রী জেনরেল (রিতায়র্দ) ভি.কে. সিংহসু মীফম অদুদা শরুক য়াখি। রোদ, ত্রান্সপোর্ত অমসুং হায়ৱে, রেলৱে, পাৱর, ইনভাইরোন্মেন্ত অমসুং ফোরেস্ত, রেলৱে বোর্দ, এন.ঐচ.এ.আই.গী মন্ত্রালয়গী মকোক থোংবা ওফিসরশিং, অমসুং মহারাস্ত্রা, গুজরাৎ, তমিল নাদু, কেরলা অমসুং করনাতাকাগী মীহুৎশিংসু মীফম অদুদা শরুক য়াখি।

মীফম অদুদা ইনফ্রাস্ত্রকচর প্রোজেক্তশিংদা লোইশিন্দনা লৈরিবা থবকশিংগী খুদোংচাদবশিং অমসুং লোইশিন্নবগী মতাংদা খন্ন-নৈনখি। মীফম অদুদা পুখৎলকখিবা মরুওইবা খুদোংচাদবশিংগী মনুংদা হায়ৱে প্রোজেক্ত ১৮৭কীদমক ফোরেস্ত ক্লিয়রেন্স লৌবগী মতাং য়াওখি। প্রোজেক্ত কয়া মরোম্না ফোরেস্ত ক্লিয়রেন্সকী স্তেজ ২ লৌদবগী মতাংদসু পন্নখি। হায়রিবশিং অসি থবক ওইনা পায়খৎপা হৌনবা মরী লৈনবা ওফিসরশিংনা খুদক্তগী থবক লৌখৎনবা য়াথং পীখি।

মীফম অদুদা নেসনেল হায়ৱেশিংগী ময়াই ফাওরিবা লেবেলশিংনা মরম ওইদুনা খুদোংথীবা থোকপগী চাং ৱাংবনা হায়রিবশিং অসিবুসু লৌথোক্নবগী ৱাফম খন্নখি। মফম ১৬৭তা মখোয়গী দিজাইনশিং অসি অয়াবা পীখ্রবসু থবক ওইনদি হৌজিক ফাওবা পায়খত্ত্রি। মসিগী হীরম অসিদা এম.ও.য়ু.শিং চহী ৫গী মমাঙদা খুৎয়েক পীনখ্রবনি, অমসুং মখোয়গী পারফোর্মেন্সশিং ফগৎহনবা মথৌ তারি। হীরম অসিগী মতাংদা, প্রোজেক্তশিং অসি থা খুদিংগী ওইনা সেতুভারতমগী মখাদা য়েংশিন্নবা য়ানখি। রেলৱেগা মরী লৈনবা লম্বীগী প্রোজেক্ত ৩০সু লোইশিন্দনা লৈরিবনি হায়না পন্নখি। অদুমওইনমক, রেলৱে মন্ত্রীনা হায়রিবা খুদোংচাদবসি নুমিৎ নিনিগী মনুংদা লোইশিনগনি হায়না থাজবা পীখি।

ইনফ্রাস্ত্রকচরগী প্রোজেক্তশিংগী মমাংদা তাদুনা লৈরিবা মরুওইবা খুদোংচাদবসি উ ককপসিনি, উমংগী শরুক্তা লমদমসিগী ওইবা পাম্বীশিং য়াওহনবগী মতাংদা খেন্নবা মোৎ ফোংদোক্নরি। খুদম ওইনা হায়রবদা, বাবুল নত্ত্রগা কিকার হায়বা পাম্বী অসি মীফম অদুদা পুখৎনখি। হায়রিবা পাম্বী অসি অরাবিয়াগী এক্সোতিক পাম্বী অমা ওইবনা প্রোজেক্ত কয়াগীদমক ফোরেস্ত কিয়রেন্স লৌনবা হোৎনবদা হায়রিবা পাম্বী অসি উগী কাংলুপতা চনবদা অয়েৎপা ওইরি। দিল্লীদা, পি.এম.ও.না য়েংশিল্লিবা, দ্বার্কা এক্সপ্রেসৱে হায়বা য়াম্না চাউবা প্রোজেক্ত অসিনা অপুনবা উ ৬৩৬৪গী মনুংদা বাবুল পাম্বী ১৯৩৯ মাইয়োক্নরি। মহারাস্ত্রা অমসুং মধ্য প্রদেশকুম্বা রাজ্যশিংদদি লেন্দ রেবিন্যু কোদতা হায়রিবা মখলগী পাম্বীশিং অসিবু উ অমনি হায়না কোদ তৌদে।

শ্রী নিতিন গদকারীনা অচৌবা খুদোংচাদবা কয়াদা মকোক থোংবা থাক্কী ওফিসরশিং অমসুং মন্ত্রালয় কয়াগা লোইননা ফম্মিন্নদুনা মীফম পাঙথোকপদা ৱারোইশিন পুরকখিবশিং উবদা অপেনবা ফোংদোকখি। মহাক্না হায়খি, ইদুনা থানরগা মতম অমসুং ইনর্জী মাঙহনবগী মহুত্তা ফম্মিন্নদুনা খুদোংচাদবশিংবু লোইশিন্দুনা হোৎনবনা হেন্না ফৈ হায়বসি মতম চুপ্পদা খল্লি। মহাক্না মখা তানা হায়খি মদুদি রেলৱে বোর্দকী চীয়রমেন, ফোরেস্তকী দাইরেক্তর জেনরেল অমসুং রোদকী দাইরেক্তর জেনরেলগগী ওইবা মীফম অমা পাঙথোক্লগনি। মহাক্না থা খুদিংগী মীফম পাঙথোকপনা খুদোংচাদবা কয়া লোইশিনবা ঙমগনি হায়না থমখি।

ইনভাইরোন্মেন্তেল মন্ত্রী শ্রী জাবেদকরদা রাজ্যশিংগী থারিবা ফোরেস্ত ওফিসরশিংনা এম.ও.ই. এন্দ এফ. অমসুং সি.সি.না থোকপা সার্কুলার অমসুং ওর্দরশিংবু ইলহনবীনবা হায়বীনবা হায়জখি। ঝারখন্দ, মহারাস্ত্রা অমসুং অরুনাচল প্রদেশতা পাঙথোকপগুম্না ফোরেস্তকী ওইবা খুদোংচাদবশিংগী মতাংদা স্পিসিএল হায় পাৱর কম্মিতী অমা শেম্লবা য়াই। মসিগী খোংথাং অসিনা ইনফ্রাস্ত্রকচর প্রোজেক্তশিংগী ওইবা চয়েৎনবা কয়া অমা কোকহন্দুনা মতম অমা শেল মাঙবা হন্থহনগনি হায়খি।

শ্রী পিয়ুশ গোয়ালনা মীফম অসিগী ৱাখল্লোনশিংবু থাগৎপা ফোংদোকখি অমসুং মসিমক শ্রী গদকারীগী য়াম্না ফরবা থৌরাং অমনি হায়খি। মহাক্না হায়খি, স্তেকহোল্দরশিংগা লোইননা পুন্না ফম্মিন্নদুনা মখোয়গী মমাংদা তাদুনা লৈরিবা খুদোংচাদবশিং লোইশিন্নবা পুন্না ফমিন্নবসিদগী তমজগদবা কয়া লৈরি। মহাক্না নিতিন গদকারীদা ইনফ্রাস্ত্রকচরগী কাংবুবু মীয়ামগী য়াইফগদবা খোংথাংশিংদা লমজিংবীনবা হায়জখি। মহাক্না হায়খি, রেলৱে অমসুং হায়ৱে প্রোজেক্তশিং অসি খম্ব্রাংননা চৎমিন্নৈ, অদুমওইনমক, মচু খরা খেন্নবনা মরক মরক্তা লাপথোক্নবা য়াওই। অদুমওইনমক, হায়রিবা বোদী অনীসিনা অপুনবা ওইনা প্রোজেক্ত কয়া শাগৎপা য়াগনি।

জেনরেল (রিতায়র্দ) ভি.কে. সিংহনা মীফম অদু মহৈ য়ানবা মীফম অমনি হায়খি। মহাক্না হায়খি, ইনফ্রা সেক্তর অসি শেন্মিৎলোনগী য়াংলেন শরূনি অমসুং মসিনা খোঙজেল য়াংবগী চাংনা অতোপ্পা সেক্তরশিংগী খোংজেল য়াংহনগনি। মহাক্না ইনফ্রা প্রোফেসনেলশিংগী পুক্নিং চিংশিল্লদুনা মখোয়গী থৌরাংশিং হেন্না ফগৎহন্দুনা প্রোজেক্তকী খোংজেল য়াঙখৎহন্নবা হায়খি। রেলৱে অমসুং হায়ৱেগী সেক্তরনা অপুনবা ওইনা থবক পায়খৎমিন্নদুনা শেল চংহন্দনবা অমসুং শীজিন্নবা য়াবগী চাং হেনগৎনবা হোৎনহন্নিংবগী অপাম্বা ফোংদোকখি।

***