কমর্স অমসুং ইন্দস্ত্রী মন্ত্রালয়

লৈবাক অসিনা য়াম্না য়াংনা এক্সপোর্তকী থবক অমুক হৌরকপদা পিয়ুস গোয়লনা এক্সপোর্তরশিংগী থবকশিং থাগৎলি


মখোয়গী খুদোংচাদবশিং খন্ননবা এক্সপোর্তরশিংগা মীফম পাংথোকখি

Posted On: 03 JUL 2020 8:15PM by PIB Imphal

কোবিদ-১৯না মরম ওইদুনা এক্সপোর্তরশিংনা থেংনবা খুদোংচাদবশিং খন্ননবা ভিদিও কনফরেন্সকী খুৎথাংদা এক্সপোর্ত প্রোমোসন কাউন্সিলগী থৌ পুবশিংগা লোয়ননা ঙসি কমর্স অমসুং ইন্দস্ত্রি মিনিস্তর পিয়ুস গোয়ালনা মীফম পাংথোকখ্রে ।

মীফম অদুদা মিনিস্তরনা হায়খি কোবিদ-১৯না মরম ওইদুনা শেনবা চহি অসিগী অহানবা থা অনি খুদোংচাদবা কয়া থেংনরবা মতুংদা, অনলোক লাকপদগী শেন-থুমগী থবকশিং অমুক পাংথোকপা হৌরে । জুন ২০২০গী দেতা মতুংইন্না মপান্দা থাদোকপগী থবক হেনগৎতুনা মমাং চহিগা চাংদম্নবদা চাদা ৮৮ য়ৌরে । তেল্লবা মতম অসিদা অসিগুম্বা মাইপাকপা অসি পুরকপগীদমক এক্সপোর্তরশিং থাগৎলি । হৌজিক লৈবাক অসিগী মফম কয়া লাইচৎ শন্দোকলিবা অমসুং অথিংবশিং লৈরিঙৈদা মাইপাকপা পুরকপা ওইবনা হেন্না থাগৎনিংঙাই ওইরিবনি । মপান লৈবাকশিংগী কৈথেল অয়াম্বা অসিগুম্না অমুক হন্না ললোন-ইতিক পাংথোকপা ঙমদ্রি । মপান্দগী পোৎ পুশিল্লকপদা য়াম্না থিন্থরিবা অসি অফবা খুদম অমনি ।

মিনিস্তরনা হায়খি অনলোক ২.০ লাকপদগী তুংদা ফিবম কয়া মখা তানা ফগৎলক্লগনি । অত্মানির্ভর ভারতনা মশা মরোমদোম লেপচবা ঙম্বা ভারত অমা শেমগৎনবা , মী খুদিংমক থৌনা লৈবা, মপাঙ্গল কনবা ভারত অমা শেমগৎনবা পান্দম থম্লি । ইন্দস্ত্রিশিংনা মপান্দগী পুশিল্লকপগী মখা পোনবা অদু থাদোক্নবা হোৎনগদবনি । মসিনা তুংকোইনা কান্নবা কয়া পুরকপা ঙমগনি ।

মহাক্না হায়খি অফবা অমসুং মমল হোংবা পোৎথোকশিং পুথোক্নবা মেক ইন ইন্দিয়াগী মখাদা লৈবাক অসিগী মশাগী ওইবা মচাক-মথুমশিং অমসুং হৈশিংলবা শিন্মীশিং শীজিন্নগদবনি । এক্সপোর্তরশিংনা কন্না থবক তৌগদবনি অমসুং মখোয়গী থৌনা উৎকদবনি । সরকারনা এক্সপোর্তরশিং অমসুং ইন্দস্ত্রি অনিমক মতেং পাংগনি । বাবা কলয়ানি কম্মিতিগী পাউতাকশিং মতুংইন্না স্পিসিএল ইকোনোমিক জোনশিং লিংখৎনবা থবক পায়খৎলে ।

লাইচৎ মনুংদা মতেং পাংবগীদমক মীফম অদুদা শরুক য়াখিবশিংনা মিনিস্তর অমসুং ওফিসগী থৌমীশিং থাগৎখি । অদুবু সরকারগী মাইকৈদগী থবক ওইনা পাংথোক্কদবা কয়া লৈরি হায়না মখোয় অয়াম্বনা ফোংদোকখি । সরকারগী অত্মানির্ভর ভারত মপুংফানা শৌগৎকনি হায়না মখোয়না থাজবা পীখি ।

*****



(Release ID: 1636315) Visitor Counter : 186