কেমিকেল্স অমসুং ফর্তিলাইজরগী কেন্দ্র মন্ত্রী শ্রী সদানন্দ গৌরানা থৌরম মপু ওইদুনা কেমিকল্স এন্দ পেত্রোকেমিকেল্স এদভাইজরী ফোরমগী ২শুবা মীফম ঙসি ভিদিও কন্ফরেন্সিংগী খুত্থাঙদা পাঙথোকখ্রে‍।

মীফম অদুদা রাজ্য মন্ত্রি অমদি ফোরম অদুগী ভাইস চেয়রমেন শ্রী মনসুখ মন্দাভিয়া, কেমিকেল্স এন্দ পেক্তোকেমিকেল্স সেক্তরেতরী শ্রী আর. কে. চতুর্বেদি, এনভাইরনমেন্ত, ফোরেস্ত এন্দ ক্লাইমেত চেঞ্জ মন্ত্রালয়গী দিপার্তমেন্ত ওফ কেমিকেল্স এন্দ পেত্রোকেমিকেল্সগী মকোক থোংবা ওফিসরশিং, অমদি দিপার্তমেন্ত ওফ কম্মর্সকী মকোক থোংবা ওফিসরশিং, তোঙান তোঙানবা কেমিকেল্স এন্দ পেত্রোকেমিকেল্স ইন্দস্ত্রী এসোসিএসনশিংগী মীহুৎশিংনা শরুক য়াখি‍।

ফোরমগী মীফম অদুগী মরুওইবা এজেন্দাদি কেমিকেল্স অমদি পেত্রোকেমিকেল্স সেক্তরদা “মরোমদোম লেপচবা ভারত” শেমগৎপগী প্রধান মন্ত্রী শ্রী নরেন্দ্র মোদীগী মঙলান অদু মঙফাওনহন্নবগীদমক ওইথোকপা য়াবা লম্বীশিং খন্নবনি‍। ফোরম অসিনা ইন্দস্ত্রীদা লৈঙাক্কা ঈপাউ ফাওদোক্নদুনা খোঙলৌ পল্লৌবশিং লৌথোক্নবা, লল্লোন ইতিক তৌবদা নুংঙাইহন্নবা অমদি সেক্তর অসিদা শেন থাদহন্নবা লেঙদ্রবা ফম্বাক অমা পীরি‍।

মীফম মনুংদুদা তোঙান তোঙানবা লূপশিংনা ইন্দস্ত্রীনা থেংনরিবা শীংনবশিংগী মরমদা পাউদমখি অমদি মপান্দগী পুশিল্লকপা পোৎলমশিংদা তাংবা হন্থহন্দুনা লমদমসিদা পোত্থোক পুথোকপা অমদি মপান্দা থাদোকপগী চাং হেনগৎহন্নবা খুজিল থৌরাংশিংসু পুথোক্নখি‍।

শ্রী গৌরানা কেমিকেল্স অমদি পেত্রোকেমিকেল্স সেক্তরগী মঙম অসি চাউই হায়না হায়খি‍। লৈঙাক অসিনা ইং ২০১৪দগী হৌনা লল্লোন ইতিক তৌবা নুংঙাইহন্নবা খোঙথাং কয়ামরুম লৌখৎখ্রে অমদি ৱর্ল্দ বেঙ্ককী রিপোর্তকী মতুং ইন্না ইং ২০১৭দা ১৩০ শুবদা লৈরম্বদগী ঙসি ভারতনা ৬৩শুবা রেঙ্কতা লৈরে‍। মহাক্না হায়খি কোবিদ-১৯না মালেম পুমবগী শেন্মিৎলোনদা শোকহল্লে‍। ইন্দস্ত্রীনা ভারত লৈঙাক্না লাউথোকখিবা লুপা লাখ করোর ২০গী স্তিমুলস পেকেজকী মখাদা পীরিবা মখল কয়াগী তেংবাংশিং/ইন্সেন্তিবশিংগী খুদোংচাবা লৌবা মথৌ তাই‍।

কেমিকেল ১৯ অমদি পেত্রোকেমিকেল ৫গী বি. আই. এস. স্তেন্দর্দ মথৌ তাহনবা, কেমিকেল ৫৫ লৌবা মতমদা লৈঙাক্কী এজেন্সীশিংনা লমদমসিগী পোত্থোক পুথোক্লিবশিংদা খুদোংচাবা পীননবগীদমক পব্লিক প্রোকরিং ওর্দর থোকখিবা, ত্রেদ ভেল্যু ৱাংবা কেমিকেলশিংগীদমক তোখায়বা ঐচ. এস. কোদ থম্নবগীদমক থৌরাং হৌনবা ফিরেপনচিংবা লমশিংদা সেক্তর অসিবু মওং মরিল নাইনা চাওখৎপা পুরক্নবগীদমক্তা হৌখিবা চহী অমসিদা দিপার্তমেন্ত ওফ কেমিকেল্স এন্দ পেত্রোকেমিকেল্সনা লৌখৎখিবা খোঙথাংশিংগী মতাংদসু শ্রী গৌরানা শরুক য়ারিবশিংদা পাউদমখি‍।

দিপার্তমেন্ত অসিনা ইন্দস্ত্রিএল ক্লস্তর অসিদা মরম চাবা ইন্সেন্তিব কয়াগী খুত্থাংদা থুনা চাউখৎপা পুরক্নবগীদমক ঙাক্লৌ পীননবা শেমদোক্লবা পি. সি. পি. আই. আর. পোলিসীদা থবক পায়খৎলি হায়নসু মহাক্না পাউদমখি‍। মায়কৈ অমরোমদা ভারতপু অথুবা মতমদা তেক্নোলোজীগী নেত এক্সপোর্তর ওইবা ঙম্নবগীদমক ইন্দস্ত্রীশিংনসু মখোয়গী আর. এন্দ দি.গী চাদিং অমদি থৌওং হেনগৎহন্নবা ৱাখল থাদগদবনি‍। ইন্দস্ত্রীশিংনা মথি মকুম পুথোকপা হন্থনবগীদমক সস্তেনেবল কেমিস্ত্রী হায়রগসু খঙনবা গ্রীন কেমিস্ত্রী শীজিন্নবা অমদি কেমিকেল্স এন্দ পেত্রোকেমিকেল্স সেক্তরবু অকোয়বগী ফীভমদা শোকহন্দবা সেক্তর অমা ওইহন্নবগীদমক হেন্না শাফবা সোল্ভেন্তশিং অমদি রিনিউএবল ফীদস্তোকশিং শীজিন্নবগী থৌরাং পায়খৎপা মথৌ তাই‍।

ঐখোয়গী মেনুফোকচরিং বেজ মপাঙ্গল কনখৎহন্নবা অমদি নৌনা শেন থাদবশিংগী পুক্নীং চিংশিন্নবগীদমক পি. সি. পি. আই. আর.শিং শেমগৎপা হায়বসি তঙাই ফদনা চঙদ্রবা য়াদ্রবা অমা ওই হায়না শ্রী মনসুখ মন্দাভিয়ানা হায়খি‍।

কেমিকেল্স এন্দ পেত্রোকেমিকেল্স সেক্রেতরীনা হায়খিবদা ইন্দস্ত্রীগী সজেসন অমদি পেন্দবা ৱাফমশিং লৌশিল্লে, অমদি পায়খৎপা য়াবা মফমশিংদা হায়রিবা ৱাফমশিং অসিগী ৱারোয়শিন পুরক্নবগীদমক্তা ভারত লৈঙাক্কী অতোপ্পা দিপার্তমেন্তশিংগা খুৎশম্নদুনা দিপার্তমেন্ত অসিনা থবক পায়খৎকনি‍।

*******