খাদি এন্দ ভিলেজ ইন্দস্ত্রীজ কম্মিসন (কে. ভি. আই. সি.)না মখোয়গী এসেতশিংবু শেন ওন্থোক্নবগীদমক অহানবা ওইনা হান্না পায়খৎখিদ্রিবা অমদি শেন্দোং য়াম্না লৈগদবা সেন্দলৱুদ অমদি ৱা থাবগী ভেঞ্চর অমদা চঙশিনবা হৌখ্রে‍। লল্লোন ইতিক্কী ওইনা সেন্দলৱুদ অমদি ৱা থাবা পুক্নীং থৌগৎনবগীদমক কে. ভি. আই. সি.না মখোয়গী লম একর ২৬২ পাক্না লৈরিবা নাশিক ত্রেনিং সেন্তরদা সেন্দলৱুদ অমদি ৱা চারা ৫০০/৫০০ থাবা হৌখ্রে‍।

এম. এস. এম. ই.গী কেন্দ্র মন্ত্রী, শ্রী নিতিন গারকরিনা কে. ভি. আই. সি.গী থৌরাং অসিবু থাগৎলি‍।

কে. ভি. আই. সি.না সেন্দলৱুদ চারা উত্তর প্রদেশতা লৈবা এম. এস. এম. ই. মন্ত্রালয়গী য়ুনিত অমা ওইরিবা ফ্রেগ্রেন্স এন্দ ফ্লেবর দেভেলপমেন্ত সেন্তর (এফ. এফ. দি. সি.) কনৌজতগী লৌবনি অদুগা ৱা চারানা অসামদগী লৌবনি‍। থাবগী থৌরম অদু ঙরাং ভিদিও কন্ফরেন্সকী খুত্থাঙদা কে. ভি. আই. সি. চেয়রমেন, শ্রী ভিনয় কুমার সক্সেনানা হৌদোকখি‍।

সেন্দলৱুদ থারিবা অসি কে. ভি. আই. সি.গী এসেত শেমগৎপদা মীৎয়েং থমদুনা তৌখিবনি অদুগা মসিদগী লাক্কদৌরিবা চহী ১০দগী ১৫ ফাওবসিদা লুপা করোর ৫০ দগী লুপা করোর ৬০ফাওবা ফংলক্কনি হায়না পারি‍। সেন্দলৱুদ পাম্বী অমনা মপুং মরৈ ফাবদা চহী ১০দগী ১৫ ফাওবা চঙই অমদি হৌজিক লৈরিবা মমলদা য়েংবদা পাম্বী অমদা লুপা লাখ ১০দগী লাখ ১২ ফাওবদা য়োল্লি‍।

মতৌ অসুম্না ধুপ মচৈ শাবদা শীজিন্নবা বম্বুসা তুল্দা কৌবা অখন্নবা ৱা মখল অসি অসামদগী লৈদুনা মহারাস্ত্রদা লমদমদুগী ধুপ শাবা ইন্দস্ত্রীদা ঙাক্লৌ পীননবা অমদি ত্রেনিং সেন্তর অসিগীসু শেন চাং নাইনা লাক্ননবগীদমক থাখ্রে‍।

ৱা পাম্বী অমবু অহুমশুবা চহীদা য়ানবা য়ারে‍। কেজি ২৫রোম লূম্বা মপুং মরৈ ফারবা ৱা মকক অমদা কেজিদা লুপা ৫গী চাংদা য়োল্লি‍। মমল অসিদা মপুং মরৈ ফারবা ৱা মকক অমনা লুপা ১২৫গী ময়াদা শিৎলি‍। ৱা পাম্বী অসিগী তোপ তোপ্পা মগুন অমা লৈ‍। পাম্বী অমনা চহী অহুমগী মতুংদা য়ামদ্রবদা মকক ৫ পুথোকই অমদি মদুগী মতুংদগীদি চহী খুদিংগী ৱা মকক পুথোকপগী চাং অসি শরুক অনি-অনি হেনগৎলকই‍। মসিনা তাক্লিবদি ৱা চারা ৫০০না অহুমশুবা চহীদা য়ামদ্রবদা ৱা মকক ২৫০০ পুথোকই অমদি ইনস্তিত্যুসন অসিদা অহেনবা শেনফম লুপা লাখ ৩.২৫ লাকহনগনি অমদি চহী খুদিংগী শরুক অনিরোমগী ময়াদা হেনগৎকনি‍।

মখাতানা, মশীংগী মতাংদদি ৱা মকক ২৫০০না চাউরাক্না এম. তি. ৬৫ রোম থোক্তুনা ধুপ মচৈ শাবদা শীজিন্নদুনা লমদমদুগী ওইনা মশীং য়াম্না থবক পীবা ঙমগনি‍।

হৌখিবা থা খরসিদা কে. ভি. আই. সি.না ভারতকী তোঙান তোঙানবা মফমশিংদা বম্বুসা তুল্দা পাম্বী ২৫০০গী ময়াদা থাখ্রে‍। ধুপ শাবশিংদা চৎনবা য়াবা মমলদা মচাক মথুমশিং মরমদমদা ফংহন্নবগীদমক্তা ইকোন কোন্না নাশিক্তা থাখিবদু নত্তবদা দিল্লী, ভরানসি অমদি কন্নৌজকী সহরশিংদা পাম্বী ৫০০-৫০০ থাখ্রে‍।

“অহাংবা মফমশিংদা সেন্দলৱুদ অমদি ৱা পাম্বী থারিবা অসি মফমদুগী শেন ওন্থোক্নবগীদমক্তনি‍। অদুগা অমুকসু মসিনা মালেমগী ওইনা সেন্দলৱুদকী দিমান্দ চাউনা লৈরিবা অসি পীবা ঙমহনগনি অদুগা ৱা থাবনা ধুপ শারিবশিংদা ঙাক্লৌ পীদুনা কেন্দ্র লৈঙাক্না ভারতপু ‘মরোমদোম লেপচবা’ ঙম্বা ওইহন্নবা লৌখিবা ফিরেপকী মতুং ইন্না ধুপ শাবগী লমদা মরোমদোম লেপচবা ঙমহল্লগনি‍,” হায়না কে. ভি. আই. সি. চেয়রমেন, শ্রী ভিনয় কুমার সক্সেনানা ফোঙদোকখ্রে‍। “ঐখোয়না কে. ভি. আই. সি. অসিগুম্লবা থাবা য়াবা মফমশিং লৈবাক শিনবা থুংনা শক খঙদোকপগী থৌওং চত্থরি,” হায়নসু সক্সেনানা ফোঙদোক্লদুনা মখা তাখিবদা লৌমীশিংনা মখোয় মখোয়গী লৌবুকশিংদা সেন্দলৱুদ পাম্বী অনি-অনিখক্তং থাবা হৌরবদি মতমগী মতুং ইন্না লাকপা শেনথুমগী ফীভমশিং মখোয় মশানা থেংনজবা ঙমগনি‍।

সেন্দলৱুদ থাবা অসি এক্সপোর্ত মার্কেত্তা মফম য়াম্না লৈ‍। সেন্দলৱুদ অমদি মসিদগী শুংবা থাউ অসি চাইনা, জপান, তাইৱান, ওস্ত্রেলিয়া অমদি য়ু. এস. এ.গুম্বা লৈবাকশিংদা দিমান্দ য়াম্না লৈ‍। অদুম ওইনমক সেন্দলৱুদ মরাং কায়না লৈতবগী ফীভম অমা লৈরি অমদি ভারতনা সেন্দলৱুদ থাবগী চাং হেনগৎহন্দুনা মালেমগী ওইনা সেন্দলৱুদ পুথোকপদা মাঙজিল থাবা লৈবাক অমা ওইবা ঙমহৌনবা অচৌবা খুদোংচাবা অমনি‍।

*****