রক্ষা রাজ্য মন্ত্রী শ্রীপাদ নাইকনা হায়খি মদুদি লৈবাক অসিগী শেন-থুমগী ফিবম ফগৎলকপগা লোয়ননা মতম শাংনা মীওইবা খুন্নাইগী য়াইফনবা অমসুং মালেমগী ৱাথোক কয়াদা শরুক য়াদুনা লাকপদগী ভারত মালেমগী অচৌবা শক্তি অমা ওইরক্লে। দিফেন্স অমসুং এরোস্পেস মেনুফেকচরিং সেক্তরগী মতাংদা ভিদিও কনফরেন্সকী খুৎথাংদা নুমিৎ নিনিগী ‘দিফেন্স কনক্লেব ২০২০ গুজরাত’ ঙসি মন্ত্রীনা হৌদোকখি। থৌরম অদু কনফিদরেসন ওফ ইন্দিয়ান ইন্দস্ত্রী গুজরাত অমসুং সোসাইতী ওফ ইন্দিয়ান দিফেন্স মেনুফেকচরসনা শীনবনি।

শ্রীপাদ নাইকনা হায়খি অকনবা ঙাকশেনগী থবকশিংনা চহি কয়া চংনা শেমগৎলক্লবা লৈবাক অসিগী নুংঙাই-য়াইফবা ঙাকপদা মতেং পাংগনি অমসুং ললোন-ইতিক্কী মরুওইবা মফমশিং অশোই-অঙাম থোকহল্লোই। লৈবাক অসিদা ঙাকশেনগী থবক ফগৎহনবনা শেন-থুমগী ফিবম ফগৎহনবতা নত্তনা মেনুফেকচরিংগী লমদা থবক ফংহনবা ঙমগনি , মসি ভারতনা মরুওইনা লৌরিবা ৱাফম অমনি।

মহাক্না হায়খি ঙসি কেন্দ্র সরকারনা দিফেন্স সেক্তরদা মিৎয়েং চঙবদগী মশিং য়াম্লবা মাইক্রো, স্মোল অমসুং মেদিয়ম ইন্তরপ্রাইজশিং শরুক য়ারকপদগী লৈবাক অসিনা ঙাকশেনগী খুৎলায়শিং পুথোকপগী লম্বীদা মাংজিল থানা মমাংদা ওইখিদ্রিবা মওংদা থবক পায়খৎপা হৌরে। ওর্দিনান্স ফেক্তরিশিং অমসুং দিফেন্স পব্লিক সেক্তর কম্পেনিশিংদা মাইক্রো, স্মোল অমসুং মেদিয়ম ইন্তরপ্রাইজ ৮,০০০ হেনবনা মতেং পাংগনি।

গুজরাতকী মতাংদা মন্ত্রীনা হায়খি গুজরাত অসি দিফেন্স অমসুং এরোস্পেস মেনুফেকচরিং সেক্তরগী মচাক-মথুম কয়া ফজনা লৈরবা রাজ্য অমা ওইরক্লে। গুজরাতনা ফিবম ফগৎলকপদা মতেং পাংলিবশিংগী মনুংদা হিথাংফমশিং ফজনা লৈরবা কিলোমিতর ১,৬০০ শাংবা সমুদ্র মপানশিং, ইঞ্জিনিয়ারিংগী মাইক্রো, স্মোল অমসুং মেদিয়ম ইন্তরপ্রাইজশিং, মেনেজমেন্ত , ইঞ্জিনিয়ারিং, দিজাইন , আর অমসুং দি অমসুং প্লান্নিংগী মমিং লৈরবা মহৈলোয়শঙশিং, মালেমগী থাক্তা লৈরবা জহাজ শাবা অমসুং শেম্বগী থবকশিং য়াওরি।

কনক্লেব অসিনা প্রধান মন্ত্রী নরেন্দ্র মোদীগী ‘মেক ইন ইন্দিয়া’গী পান্দমশিং অদু থবক ওইনা পাংথোক্নবা পান্দম থম্লি। মীফম অদুদা অৱাংবা থাক্কী সরকারগী মীহুৎশিং, মরুওইবা ইন্দস্ত্রিশিং অমসুং ইন্সতিতুৎশিংগী মীহুৎশিংগী মরক্তা ৱা খন্নখি।

*****