নেস্নেল সেন্তর ওব পোলর এন্দ ওসিন রিসর্স (এন.সি.পি.ও.আর.)না গ্লোবেল ৱার্মিংনা মরম ওইদুনা আর্ক্তিক সমুদ্রদা লৈবা উনগী চাং খম থেংনা হন্থরকপা থেংনখ্রে। সমুদ্রগী উনগী চাং হন্থরকপনা মরম ওইদুনা মফম কয়াদা ইভাপোরেসনগী চাং হেনগৎপা, নুংশিত্তা য়াওবা ঈশিং মনিলগী চাং হেনগৎপা, লৈচিলনা কুপ্পা, অমসুং নোংগী চাং হেনগৎলে। আর্ক্তিক সমুদ্রগী উন অসি ক্লাইমেৎ চেঞ্জগী খুদম অমনি অমসুং মসিদা ক্লাইমেৎকী সিস্তেম অসিদা য়াওরিবা অতোপ্পা পোৎশিংদা অকাইবা পীবগী শাফু য়াওরি।

মখোয়না য়েংশিনবা মতমদা, এন.সি.পি.ও.আর.না হৌখিবা চহী ৪১ রোমসিদা খ্বাইদগী চাউনা আর্ক্তিক সমুদ্রগী উনগী চাং হন্থরকপসি জুলাই ২০১৯দা থোকখি। হৌখিবা চহী ৪০ রোমসিদা (১৯৭৯-২০১৮), সমুদ্রগী উন অসি চহী তরা-তরা খুদিংগী '-৪.৭%'দা হন্থরক্লি, অমরোমদনা মসিগী চাং অসি জুলাই ২০১৯দা '-১৩' ওইখি। মসিগী হথরকপগী চাং অসিদা চত্তুনা লৈরবদি, ২০৫০ ফাওবদদি আর্ক্তিক্তা উন অমত্তা লৈতবা য়াই, হায়রিবসি মীওইবশিংদা অমসুং অকোইবসিদা শাথীবা খুদোংথীবা থোক্নিংঙাই ওই।

১৯৭৯দগী ২০১৯ ফাওবদা খোমজিল্লকপা সেতিলাইৎ দেতাগী মতেংনা, এন.সি.পি.ও.আর.না লৈমাইদা শাগৎলকপগী চাং খঙদোক্নবা হোৎনখ্রে অমসুং মালেমগী ওইনা এৎমোস্ফরিক সার্কুলেসন্দা লৈবা অহোংবা খঙদোক্নবা হোৎনখ্রে। নৈনবা অসিনা তাক্লি মদুদি, আর্ক্তিক সমুদ্রগী উনগী শরুক্কী পাক চাউবা হন্থরকপা অমসুং কালেন অমসুং নাকেন্থাগী মতম শাংদোরকপনা লোকেল ৱেদরদা অমসুং আর্ক্তিক ওসিন্দা লৈবা ক্লাইমেত্তা অমসুং মসিগী মার্জিনেল সীদা অকাইবা পীরি। ক্লাইমেৎ চেঞ্জ থোকপগী খুদম পীবা ঙম্বা য়াম্না ফবা ওইবনা, আর্ক্তিক সমুদ্রদা কুপ্পা উনগী শরুক মাঙথরকপা হায়বসি হীৎ অমসুং মোমেন্তম থিংবা নত্ত্রগা হন্থহনবদা, ঈশিংগী মনিল অমসুং অতোপ্পা এত্মোস্ফিয়র অমসুং সমুদ্রগী মরক্তা লান্থোক-লানশিন তৌনবা ক্লাইমেৎ সিস্তেমগী মচাকশিংদা অকাইবা পীরি। থৱাই ৱানিংঙাই ওইবা ঐখোয়না খঙজিলহৌগদবা পোৎশক্তি নিংথমথাগী মতমদা উন শেম্বগী চাং অসিনা কালেনথাগী মতমদা মাঙখিবা উনগী শরুক অদু হঞ্জিলহনবা ঙমদবা অসিনি।

"মালেম পুম্বগী অশাবা হেনগৎলকপগী ফিবম অসিদা, নৈনবা অসিনা মালেমগী ওইনা ওসিন-এত্মোস্ফরি ৱার্মিংনা আর্ক্তিক সমুদ্রগী উন মাঙহনবদা মতেং পাংলি। নৈনবা অসিনা সেতিলাইৎকী ওবজর্বেসনশিং অমসুং খঙদোকপা অমসুং অচুম চুমদা তাক্নবা হোৎনবদা মোদেল এনালাইসিস দেতা শীজিন্নবগী মওং মতৌ উত্তুনা তাক্লি; ২০১৯গী সমুদ্রদা লৈবা উন হন্থবগী অনীশুবা- খ্বাইদগী নেম্বা সমুদ্রগী উন্দা খ্বাইদগী নেম্বা রেকোর্দ। হন্দক্কী চহী অসিদা অইং অশাগী ওইবা শাথীবা মওং অমতা উৎখিদ্রবসু, ২০১৯দা খোংজেল য়াঙনা সমুদ্রগী উনগী পাক-চাউবা হন্থরকপগী অমসুং সমুদ্রগী উনগী অথাবা হন্থরকপদি কা হেন্না ৱাংখি, অমসুং অৱাং থংবা হেমিস্ফিয়রদা য়েনিংথা অমসুং কালেন্থাগী মতমদা শাবগী চাং খ্বাইদগী ৱাংখি।" হায়না থিজিনবা অসিদা শরুক য়ারিবা এন.সি.পি.ও.আর.গী সেনিয়র সাইন্তিস্ত দা. অবিনাশ কুমারনা হায়রি।

মহাক্না মখা তানা হায়খি, "মসিগী চাং অসিদা সমুদ্রগী উন্না মাঙথরকপা হায়বসি পৃথিবী অসিদা লৈরিবা জিব পানবা কয়াগী ওইনদি মালেমগী ওইনা শাবগী চাং হেনগৎলকপনা অমসুং মালেমগী ওইনা ওসিন ৱাতর সার্কুলেসন্দা কায়বনা মাঙ তাক্নিংঙাই ওইরি।" দা. অবিনাশ কুমারনা লুচিংলদুনা থিজিনবগী কাংবু অদুদা, আর্থ সাইন্স মন্ত্রালয়গী এন.সি.পি.ও.আর. গোৱাগী জুহি য়াদব অমসুং রাহুল মোহনসু য়াওরি। রিসর্চ পেপর অসু জর্নেল ওব নেচরেল হাজার্দস দা ফোঙখি।

*****