কেন্দ্রগী মন্ত্রী দোক্তর জিতেন্দ্রা সিংহনা কোবিদ থোকখ্রবগী মতুং তারকপদা লৌনগনবা লায়নশিংদা থীজিন্নবা অমসুং য়েংশিন্নবা অনৌবা মীৎয়েং চংলগনি হায়না মহাক্না ঙসি হায়খি অমসুং মেদিকেলগী করিকুলমদসু মসিগী মতুং ইন্না ঙাকনা চৎকদবনি।

ওল ইন্দিয়া ইন্সতিত্যুৎ ওফ মেদিকেল সাইন্সেস (এমস) ন্যু দিল্লী, পি.জি.আই. চন্দিগর, রিজনেল ইন্সতিত্যুৎ ওফ মেদিকেল সাইন্সেস (রিমস) মনিপুর, নোর্থ ইস্তর্ন ইন্দিরা গান্ধী রিজনেল ইন্সতিত্যুৎ ওফ হেলথ অমসুং মেদিকেল সাইন্সেস (নেইগ্রীমস) শীল্লোং অমসুং শের-ই-কাশমির ইন্সতিত্যুৎ ওফ মেদিকেল সাইন্সেস, শ্রীনাগর য়াওনা নেসনল মেদিকেল তীচিং ইন্সতিত্যুৎশিংগী মকোকশিং অমসুং মীহুৎশিংগা লোয়ননা ভর্চ্যুয়ল কনফরেন্স অমদা দোক্তর জিতেন্দ্রা সিংহনা ৱা ঙাংখ্রে। মসিদা প্রজেন্তেসনশিং পীখিবশিং অদুদা পি.জি.আই. চন্দিগরদগী দোক্তর জগৎ রাম, এমসতগী দোক্তর শক্তি গুপ্তা, নেইগ্রীমসতগী দোক্তর পি. ভাত্তাচরিয়া, রিমসতগী দোক্তর এ. শান্তা সিংহ, স্কিমসতগী দোক্তর এ.জি. অহানগর অমসুং জি.এম.সি. জাম্মুদগী দোক্তর নাসিব চান্দ দিগ্রা য়াওখি।

নিংখা তমদ্রিঙৈ মমাংদা অমসুং নিংখা হেক তম্বগী মতুংদা লৌনগনবা লায়নাশিংগী ক্লিনিকেল ত্রেনিং তৌবা অসি ভারতকী মেদিকেল ইদুকেসনগী মরু ওইবা শরুক ওইরি হায়না দোক্তর জিতেন্দ্রা সিংহনা ফোঙদোকখি। মসিগী মথক্তা নোংচুপলোমগী লৈবাক কয়াগী মেদিকোস অসি ভারত্তা ত্রোপিকেল দিজিসশিংদা ইন্তর্নশিপ তৌনবা থারক্লি মরমদি হায়রিবা লায়নাশিং অসি মফম অদুদা নাবা কয়া থেংনদে। নোংচুপলোমগী রিসর্চ তৌরিবশিংনা ভারত্তা লাক্তুনা ত্যুবর্ক্যুলোসিস, লেপ্রোসি অমসুং সেকচ্যুয়েল্লি ত্রান্সমিতেদ দিজিসগুম্বা লায়নাশিং অসিদা মখোয়গী রিসর্চ তৌরি।

অদুম ওইনমক, হৌখিবা দিকেৎ অহুম অসিদা ভারত্তা লায়না নাবগী চাং অসি লৌনগনদবা লায়নাশিংনা হেল্লক্লি অমসুং মরম অসিনা মেদিকেল তীচিংনসু দাইবেতিস মেল্লিতস, কোরোনরী হর্ত দিজিসশিং অসিগুম্বা মেতাবোলিক অমসুং ভাসক্যুলর দিসওর্দরশিংদনা হেন্না মীৎয়েং চংলি অমরোমদা লৌনগনবা লায়নাশিংনা অফবা এন্তি-মাইক্রোবিএল দ্রগশিং থোক্লকপগা লোয়ননা লুনা লৌখিদ্রে হায়না দোক্তর জিতেন্দ্রা সিংহনা ফোঙদোকখি। অদুবু কোবিদনা মালেম পুম্বা, মরু ওইনা মেদিকেলগী লম অসিদা লৌনগনবা লায়না লোয়বনাইদে লৈত্রি হায়বা খঙহৌদনা অমুক হন্না ফাওহনখি হায়না মহাক্না হায়খি।

নোংচুপলোমগী শরুকশিং অসিদগী ভারতকী মেদিকেলগী লমনা হেন্না খুদোংচাবা অমা লৈরি মরমদি হাইজিন অমসুং লৌনবদগী ঙাকথোক্নবা হোৎনবদা য়ুম্ফম ওইরগা হীদাক লাংথককী চাংয়েং তৌবদগী হীদাক ওইনা থাবদা ওনখিবনি হায়না দোক্তর জিতেন্দ্রা সিংহনা হায়খি। মরম অসিনা কোবিদ থোক্লকপা অসিদসু ভারতকী মেদিকেলগী লমনা অনৌবা মেদিকেল মেনেজমেন্তগী কাংলোনশিংদা থুনা য়াংনা ওনশিনখি হায়না মহাক্না হায়খি।

দোক্তর জিতেন্দ্রা সিংহনা হায় মাংজিল থারিবা ভারতকী একাদেমিক ইন্সতিত্যুসনশিংনা তোঙান তোঙানবা মেদিকেল করিকুলমদা নৌহৌনা মীৎয়েং চংবগী থৌদাং লৌফম থোকই মরমদি হায়রিবা ইন্সতিত্যুসনশিং অসিনা লৈবাক অসিগী মেদিকেল কোলেজ ৪০০রোমগী ওজাশিংদা ত্রেসিং পীবগী থবক তৌরি। ঐখোয়না কোরোনা ভাইরসতগী ঙাকথোকখিবা য়াই অদুবু মসিনা লান্থেংনগদবা অরোইবা ভাইরস ওইদবা য়াই হায়না মহাক্না ফোঙদোকখি।

এমস, ন্যু দিল্লী অমসুং পি.জি.আই. চন্দিগরগুম্বা ইন্সতিত্যুদনশিং অসিনা মাংজিল থাদুনা লাক্লি অমসুং হায়রিবা ইন্সতিত্যুৎশিংদগী মেদিকেল তীচিং অমসুং মেদিকেল মেনেজমেন্তকী ওইবা অনৌবা কাংলোনশিংগী অনৌবা প্রোতোকলশিং পুথোরকপা ওইরসনু হায়না দোক্তর জিতেন্দ্রা সিংহনা হায়খি।

*****