স্বাস্থ্য আৰু পৰিয়াল কল্যাণ মন্ত্ৰণালয়ে ১০ মে’, ২০২০ ত হ’ম আইছ’লেশ্যন সন্দৰ্ভত সংশোধিত গাইডলাইন জাৰি কৰিছে যাক https://www.mohfw.gov.in/pdf/RevisedguidelinesforHomeIsolationofverymildpresymptomaticCOVID19cases10May2020.pdf ত প্ৰত্যক্ষ কৰিবপৰা যাব।

এই গাইডলাইন আজি পৰ্যন্ত প্ৰযোজ্য হৈ আছে।

গাইডলাইনখন অনুসৰি, ক’ভিড-১৯ৰ অতি ধীৰ আৰু প্ৰাক-লক্ষণমূলক ৰোগীসকলক হ’ম আইছ’লেশ্যনত ৰাখিব পৰা যায়, য’ত ৰোগীগৰাকীক এটা কোঠাত অকলে থাকিবলৈ দিব লাগিব, লগতে তেওঁৰ বাবে পৃথক টয়লেটৰো ব্যৱস্থা কৰিব লাগে তথা তেওঁক চোৱাচিতা কৰিবলৈ এজন প্ৰাপ্তবয়স্ক পৰিচাৰক/পৰিচৰ্যাকাৰী থকাটো বাঞ্চনীয়। তদুপৰি, সংশ্লিষ্ট ৰোগীগৰাকীয়ে তেওঁৰ স্বাস্থ্যৰ নজৰ ৰাখিবলৈ সন্মত হ’ব লাগিব আৰু নিৰীক্ষণকাৰী গোটৰ পৰৱৰ্তী ফ’ল’ আপৰ কাৰণে জিলা নিৰীক্ষণকাৰী বিষয়াক তেওঁৰ স্বাস্থ্যৰ অৱস্থা নিয়মিতভাৱে জনাই থাকিব লাগিব।

এই সংশোধিত গাইডলাইনৰ এটা গুৰুত্বপূৰ্ণ দফা হৈছে যে নিৰ্দিষ্ট ৰোগীজনৰ চিকিৎসা সম্পৰ্কীয় মূল্যায়ন আৰু তেওঁৰ ঘৰত থাকিবলগীয়া ব্যৱস্থাৰ মূল্যায়নৰ ভিত্তিত পৰামৰ্শপ্ৰদানকাৰী চিকিৎসকজন সন্তুষ্ট হ’লেহে তেওঁক হ’ম আইছ’লেশ্যনৰ অনুমতি দিয়া হ’ব। তদুপৰি, সংশ্লিষ্ট ৰোগীজনেও ছেল্ফ-আইছ’লেশ্যনৰ অংগীকাৰ কৰিব লাগিব আৰু হ’ম কোৱাৰেন্টাইনৰ নীতি-নিৰ্দেশনাসমূহ মানি চলিব লাগিব। ইয়াৰোপৰি, এনে সকলোবোৰ হ’ম আইছ’লেশ্যনত থাকোতাক পৰৱৰ্তী সময়ত নিয়মীয়াকৈ সু-সংগঠিত চিকিৎসকৰ গোটৰদ্বাৰা নিৰীক্ষণ কৰি থকা হ’ব, তেওঁলোকৰ মুক্তকৰণতো (discharge) প্ৰয়োজনীয় নীতি-নিৰ্দেশনা পালন কৰিব লাগিব আৰু নিয়ম অনুসৰি উৰ্ধতন কৰ্তৃপক্ষক অৱগত কৰিব লাগিব।

ইয়াৰ পৰিপ্ৰেক্ষিতত, কেতবোৰ ৰাজ্যত নিয়ম-মাফিকভাৱে অনুমোদন জনোৱা হ’ম আইছ’লেশ্যনত কেতবোৰ উদাহৰণ দেখা পোৱা যায়, য’ত নেকি এই সংশোধিত গাইডলাইনৰ দফাসমূহ কাৰ্যতঃ পালন কৰা নহয়। যাৰ পৰিণতিত পৰিয়ালৰ লোক আৰু ওচৰ-চুবুৰীয়াৰ মাজত এই ব্যাধিটো বিয়পিব পাৰে, নগৰীয়া ঘন বসতিপূৰ্ণ অঞ্চলৰ দৰে চহৰাঞ্চলত ইয়াৰ সম্ভাৱনা অধিক।

ইয়াৰ বাবে, পৰিয়াল আৰু স্বাস্থ্য কল্যাণ মন্ত্ৰণালয়ে ৰাজ্যসমূহক ক’ভিড-১৯ মহামাৰীৰ ফলপ্ৰসূ সংক্ৰমণ ৰোধৰ অৰ্থে ক্ষেত্ৰ পৰ্যায়ত হ’ম আইছ’লেশ্যনৰ গাইডলাইন যাতে কটকটীয়াভাৱে ৰূপায়ণ হয় তাক নিশ্চিত কৰিবলৈ আহ্বান জনাইছে।

*****

MV/SB