এনুলর শুর্য় গ্রহন অমা জুন ২১, ২০২০দা অয়ুক্কী পুং ১০.২৫দগী হৌদুনা ভারতকী অৱাং থংবা মফমশিংদগী উবা ফংগনি। মসিগী মতাংদা সাইন্স অমসুং তেক্নোলোজী বিভাগকী ওতোনোমস ইন্সতিত্যুৎ অমা ওইরিবা নাইনিতালদা লৈবা আর্য়ভত্তা রিসর্চ ইন্সতিত্যুৎ ওফ ওবজর্বেস্নেল সাইন্সেস (এ.আর.আই.ই.এস.)কী দাইরেক্তর প্রোফেসর দিপাঙ্কর বেনর্জীনা জুন ১৯, ২০২০গী নুংথিলগী পুং ৩.৩০দা ৱা ঙাংগনি অমসুং শুর্য় গ্রহন অসি জুম, য়ু ত্যুব অমসুং ফেসবুক্কী খুত্থাংদা লাইব তেলিকাস্ত তৌনবা শেম শাবসু লোয়খ্রে।  

শুর্য় গ্রহন অসি অফ্রিকা, এসিয়াগী মফমশিং অমসুং য়ুরোপকী মফম খরদগী উবা ফংগনি অমসুং য়াম্না নুংঙাইবা অমনা গ্রহন অসিগী মপুং ফাবা শক্তমদি অৱাংথংবা ভারতকী মফমশিংদা অয়ুক্কী পুং ১০.২৫দগী হৌদুনা মপুং ফাবা গ্রহন অসি পুং ১২.০৮ তাবা মতমদা উগনি অমসুং নুংথিলগী পুং ১.৫৪দা লোয়গনি। অতোপ্পা এনুলর গ্রহন অমা দিসেম্বর ২৬, ২০১৯দা খা থংবা ভারতকী মফমশিংদা উবা ফংখি অমসুং গ্রহন মচেৎ অমনা লৈবাক অসিগী তোঙান তোঙানবা মফমশিংদা উবা ফংখি। দিকেদ অমগী তুংদা মে ২১, ২০৩১দা মথংগী এনুলর গ্রহন অসি ভারত্তা উবা ফংবা য়াই অমসুং মপুং ফাবা শুর্য় গ্রহন অমনা মার্চ ২০, ২০৩৪দা উবা ফংগনি।

শুর্য় গ্রহন অসি থানা (থা পানখৎলকপা মতমদা) নুমিৎকী অকোয়ববু খরা নত্ত্রগা মপুং ওইনা খঞ্জিন্দুনা মথংশিৎনা পারসিএল, এনুলর অমসুং মপুং ওইবা শুর্য় গ্রহন থোকই। গ্রহন থোক্লিঙৈ মনুংদা থাগী মমিনা পৃথিবীদা তাই অমসুং উম্ব্রা কৌবা য়াম্না মম্বা মফম অমা থোকই অমসুং খরা মম্বা পেনুম্ব্রা কৌবা অমা থোকই। মপুং ফাবা শুর্য় গ্রহন অসি খ্বাইদগী তাংনা থোকপা গ্রহন্নি। থা খুদিংগী থা পানখৎলক্লবসু ঐখোয়না গ্রহন তোয়না থোকপা উবা ফংদে। মসিগী মরমদি থানা উংলিবা ওর্বিৎ অসি পৃথিবী-নুমিৎকী লৈফমগা য়েংনবদা চাউরাক্না ৫^০মুক চেপ্না উংই। মসিনা অমুক নুমিৎ, পৃথিবী অমসুং থানা পরিং অমত্তদা লৈরকপা অসি য়াম্না তাংনা থোকপা এস্ত্রোনোমিকেলগী থৌওং অমা ওইহল্লি।

“গ্রহনগুম্বা এস্ত্রোনোমিকেল ইবেন্ত অসি নহাশিংগী ৱাখলগী ইথিল পীনবা অমসুং তাকপি তম্বিনবা অফবা খুদোংচাবা অমনি অমসুং য়াম্লবা মীয়ামদা সাইন্সকী ৱাখল খলহনবগী খুদোংচাবা অমসু পীরি”- প্রোফেসর আশুতোস শর্মা, সেক্রেতরী, দি.এস.তি.না হায়খি।

আর্য়ভত্তা রিসর্চ ইন্সতিত্যুৎ ওফ ওবজর্বেস্নেল সাইন্সেস (এ.আর.আই.ই.এস.)না গ্রহন থোক্লিঙৈ মনুংদা ইনগদবা অমসুং ইল্লোইদবা থবক খরগী পরিং অমা পীরিঃ

ইনগদবশিং-

১. গ্রহনগী গ্লাস (আই.এস.ও. সর্তিফাইদ ওইরবা) নত্ত্রগা ফিলতর অফবা য়াওবা কেমেরা শিজিন্নদুনা মিত্তা অশোয় অঙাম থোক্তনবা য়েংউ।

২. পিন-হোল কেমেরা শিজিন্নরগা স্ক্রীন্দা প্রোজেক্সন তৌদুনা নত্ত্রগা তেলেস্কোপ শিজিন্নরগা এনুলর গ্রহন য়েংবা অসিনা খ্বাইদগী শাফবা মওংনি।

৩. গ্রহন থোক্লিঙৈ মনুংদা চাবা, থকপা, ইরুজবা অমসুং চত্থোকপা য়াই। গ্রহন অসি য়েংবা য়াম্না নুংঙাইবা থৌওং অমনি।  

ইল্লোইদবশিং-

১. নুমিত্তা মিৎনা হকথেংননা য়েংগনু।

২. এক্স-রে ফিলম নত্ত্রগা চুম্নগী গ্লাস (য়ু.ভি. প্রোতেক্সন য়াওবা ওইরগসু)না গ্রহন য়েংগনু।

৩. মচু তৈবা গ্লাস শিজিন্নরগা গ্রহন য়েংগনু।

৪. গ্রহন অসি য়েংহৌদবা তৌগনু।

*****