পরিং নাইনা চত্থরকপা দেখো অপনা দেশকী মখাদা তুরিজম মন্ত্রালয়না ৩২শুবা ৱেবিনার "ত্রেক্কিং ইন দি হিমালয়াস- মেজিকেল এক্সপিরিএন্স" হায়বা মিং অসিদা পাঙথোক্তুনা ভারতকী হিমালয় চীংশাং পরেংদা লৈরিবা তোপ-তোপ্পা অমসুং মিত্রংগী ওইবা ফজবশিংনা তুরিজমদা পীগদবা কান্নবশিং উৎখ্রে। ভারতকী হামালয়শিংদা, নহা অহল খায়দনা, হকচাংগী ফিবম থিদনা মালেমদা লৈরিবা লমকোইবশিংগী পুক্নিংবু হূবা ঙম্বা মহৌশাগী ওইবা অশেংবা ফজবা, উনতনা কুপ্পা অথাবা উচানগী উমংশিং অমসুং লোত্তুনা লৈরিবা মফমশিং কনাগুম্বা অমহেক্তনা উবা ফংগনি। মরুপ শান্নবদা নুংঙাইরবা খুঙ্গংগী মীওইশিংগা লোইননা চৎমিন্নদুনা মখল কয়াগী লম্বীশিং য়েংবা অমসুং অঙকপা পাৎশিংদা, তুরেল, শিংনাংশিংনা কনাগুম্বা অমবু পুন্সি চুপ্পা অমা কাউবা ঙম্লোইদবা অমসুং অমুক হন্না লাকনিংগদবা খোংচৎ অমা ওইহনগনি। দেখো অপনা দেশ ৱেবিনারগী পরিং অসি তুরিজম মন্ত্রালয়না এক ভারত শ্রেস্থা ভারত থৌরমগী মখাদা ভারতকী লৈরিবা ইনাক খুল্লবা ফজবশিং উৎনবা থৌরাং অমনি।

জুন ১৩, ২০২০দা উৎখিবা দেখো অপনা দেশকী ৱেবিনার পরিংগী সেসন অসিদা তুরিজম মন্ত্রালয়গী এদিসনেল দিরেক্তর জেনরেল রুপিন্দর ব্রারনা ৱাতেমখি। সেসন অসিবুনা সেয়র রিচকী কো-ফাউন্দর অমসুং দিরেক্তর অনুপম সিংহ অমসুং দি বক্কেৎ লিস্ত ত্রাবেল কম্পেনীগী কো-ফাউন্দর অমসুং পার্তনর পরাগ গুপ্তনা খুদোল তমখি। মখোয় অনীনা তোঙান-তোঙানবা পুক্নিং হুনিংঙাই অমসুং মিত্রং মাল্লবা অরাইবা, ময়াই ওইবা অমসুং অরুবা ত্রেকশিংবু ভর্চুএল ওইনা খুদোল তমখি।

মমিং লৈরবা লমকোইবা বিল আইতকেন্না হায়রম্বা – "নান্থোকপা ঙমদ্রবা খৌরাংবগী ইথিলনা চীংদা কোইবা লমকোইবশিংদা চপ য়ুংনা লেপচখিবা ৱাখলবু ইরাই লাইনা নাথৈখিবা চীংশাংদুদা কান্ননবা মথংগী থৌরাং তৌবা নত্তনা অতোপ্পা লম্বী অমত্তা উজদে," হায়বসিনা মখোয়না উৎলিবশিং অদুগী নুংগী ওইবা ৱাখল্লোন ফোংদোক্লি।

শ্রী অনুপম সিংহনা নুঙ, চীংদোল, মহৌশাগী ওইবা ফজবা, নুমিৎ তারমদাইগী ফজবা, নাকেন্থা অমসুং য়েন্নিংথাগী ফজবা খুদিংমক উৎখি। মরুওইবা লম্বীশিং অমসুং ত্রেক্কিংগী মরমদা কান্নবা ৱাফমশিং অনুপম্না পুক্নিং খোইদানা উৎখি।

• করম্না ত্রেক্কিং চৎকনি- কুমগী মতাংদা খঙজিনবা, ত্রেক, ত্রেক ওপরেতর/গাইদ খনবা
• ত্রেক্কীদমক শেম-শাবা – ফিৎনেস, ফিরোল, খুৎচু খুৎলাই
• তম্বা ঙমদবা থৌদোকশিংগীদমক মাঙজৌননা শেম-শাবা
• লম্বীদা খোঙ্গুলতমক থনমগদবনি
• উ-ৱা, শা-ঙা, লম্বীদা নহাক্না থেংনবা অচৌ-মচাশিং, উনগী ৱারী লীনবগীদমক হল্লক্নবা হোৎনবা
• এক্যুৎ মাউন্তেন সিক্নেস নত্ত্রগা অলতিত্যুদ সিক্নেস
• গাইদনা হায়বা তাবা অমসুং অশম্বা লম্বী থিদবা
• ইমুং মনুং চৎমিন্নবা য়াবা ত্রেকশিংগী নুংঙাইবা

উৎলিবশিংনা "এক্সপিরিএন্স ওব আ লাইফতাইম" হায়না খঙনবা মমিং লৈরবা ত্রেক অসিবুসু উৎখি।

• কুৱারি পাস (উত্তরখন্দ)- (মিতর ৩৮০০/ ফিৎ ১২৫০০) হায়রিবসি অরাইবা- য়াইমরপ ওইনা লুবা ত্রেক অমনি হায়না শকখঙলি। মসিগী ত্রেক অসিদা চৎপগী খ্বাইদগী ফবা মতম অসি এপ্রিলদগীনা জুনগী ময়াই থায়াইদনি অমসুং য়েন্নিংথাগী মতমদনা সেপ্তেম্বরগী থায়াই চল্লকপদগীনা নবেম্বরগী অঙনবা শরুক ফাওবনি। ত্রেক অসি ধাক্তা ফিৎ ৬,৯০০ য়ৌরকপা মতমদগী হৌগনি অমসুং শমুদ্র ইমাইদগী খ্বাইদগী ৱাংবা অলতিত্যুদ ১২,৫১৬ ফিৎ য়ৌরকপা মতমদা নোংমা চৎলগা য়ৌগনি। কুৱারি পাস ত্রেক্তা, নুমিৎ খুদিংগী নহাক্না পুং ৮ শাংবা পাস ক্রোসিং দে নত্তবা নুমিত্তা খক নত্তনা পুং ৪-৫ ফাওবা চৎকনি।

রেল নত্ত্রগা লম্বীনা দিল্লীদগী হরিদ্বার ফাওবা চৎকনি। হরিদ্বারদগী জোসিমথ- গুলিং তোপ- তালি ফোরেস্ত কেম্প- কুৱারি পাস ফাওবা অমসুং খুলারা তোপ ফাওদুনা হল্লক্কনি। তালি ফোরেস্ত কেম্প- জোশিমথতগী গুরসোন বুগ্যাল অমসুং আউলি। জোশিমথ- হরিদ্বার।

হাথি ঘোরি পর্বৎ, দ্রোনাগিরি অমসুং নন্দ দেবী চীংদোলগী ফজবা অমসুং মিত্রংগুম্লবা নীংথীবশিং য়েংবদা পুক্নিং হুনা ফজৈ। লম্বীদা চৎলিঙৈ মতমদা অচৎপশিংনা ফজরবা অল্পাইন লেক, উন্না কুপ্পা চীংদোল, শনা মচু তোপ্লবা নাপীশিং অমসুং শর্গ ফংবগুম নুংঙাইরবা খোংচৎ অমা ফংগনি।

• ব্রহ্মা তাল (মিতর ৩,৮৫৫/ ফিৎ ১২,৬৫০) মসিনা কনাগুম্বা অমবু উন্না ফমজিল্লবা অল্পাইন পাত্তা লাইগী ৱারী কয়াগা লোইননা পুগনি, হায়রিবসি অরাইবা লম্বীদগীনা য়াইমরপ ওইনা ৱাই। ত্রেক অসি য়ৌনা চৎনবা হোৎনবদা কাথগোদমদগী নুমিৎ ৬-৭নি চঙগনি। হায়রিবা ত্রেক অসি চৎপগী খ্বাইদগী ফবা মতমদি দিসেম্বরদগীনা ফেব্রুৱারী ফাওবগী মনুংনি। মফম অসি দিল্লীদগী য়াম্না লাইনা কাথগোদম য়ৌগনি অমসুং কাথগোদমদগী লোহাজুং ফাওবা গারীনা চৎকনি। কাবনা হৌবনা উন্না ফমজিল্লবা অল্পাইন পাৎ অমা ওইরিবা বেকাল তালদগী হৌগনি অমসুং উন্দা কেম্প তৌগনি। ত্রেল অসি উমংগী লম্বী ফাওদুনা চৎকনি, নহাক্না তেলিন্দি মতোল য়ৌবা মতমদা হিমালয়দগী উবা ফজরবা মফমশিং য়েংগনি। মথংগী নুমিত্তা, ব্রহ্মা তাল হায়বা ভগবান ব্রহ্মনা হীরি কোনখিবা লাইগী ৱারীগা শাগোন্নরবা চীং অসি কাগনি। উন্দা অহীং অমা লেল্লবা মতুংদা, ব্রহ্মা তাল মতোন্দা কাগনি, মফম অসিদা পুক্নিং হুনিংঙাই ওইরবশিং য়েংনবগীদমক কাগনি। মথংগী নুমিত্তনা লোহাজুংদা হকথেংননা কাগনি অমসুং ত্রেক অদু লোইশিনগনি অমসুং কাথগোদম তম্না থাদোক্কনি।
• হার্কিদুম তম্পাক (মিতর ৩,৫৬৬/ফিৎ ১১,৭০০) হায়রিবা মফম অসি উত্তরখন্দদা লৈবা গার্হৱালগী লাইগী তম্পাক হায়রিবা মফম অসিদা লৈ। মসি য়াইমরপ ওইনা ৱাবা ত্রেক মখল অমনি অমসুং দেহরাদুন্দগী নুমিৎ ৬নি চৎকনি। মফম অসি চৎপগী খ্বাইদগী ফবা মতমদি এপ্রিলদগী জুন, অমসুং সেপ্তেম্বরদগী দিসেম্বর ফাওবনি। দেহরাদুন্দগী সঙ্ক্রি তম্না গারীদা চৎকনি, মসিগী মতুংদা তালুকাদগী মুশুরি তম্না অমুক চৎকনি। তালুকাদগী সীমা খুঙ্গং তম্না ত্রেক কাবা হৌগনি অমসুং সীমাদগী কাখৎলকপনা হার্কিদুন তম্না অহীং অমা য়ারেক্তুনা হার্কিদুন্দা লৈগনি। লম্বী ময়াইদা চৎলিবা মীওইশিংনা লাইরৈপাক্কী থোঙনি হায়না খঙনরিবা স্বরগ্রোহিনি-১ (মিতর ৬,৫২৫/ ফিৎ ২০,৫১২) উবা ফংগনি অমসুং হায়রিবা মফম অসি মহাভারৎকা মরী লৈনৈ হায়না লৌনৈ। মথংগী নুমিত্তা, কনাগুম্বা অমনা সীমা তম্না ওস্লাগী হেঙ্গিং ভিলেজ ফাওদুনা লেপতনা চৎকনি। খুঙ্গং অসি দুর্জধোনবু লাৎলিবা পুৱারীগা শাগোন্নরবা লাইশঙ অমা লৈ।

(ঘ) ফোতোকসার (মিতর ৪,১০০/ফিৎ ১৬,০০০) হায়রিবসি লদাখতা লৈবা নীংথীজরবা খুঙ্গং অমনি। হায়রিবা মফম অসি লিংশেদ-পদুম ত্রেক (গ্রেৎ জন্সকার ত্রেক হায়রগসু খঙনবা)কী শরুক অমনি- উন থানা তাবনা মরম ওইদুনা অমসুং উন নীংখাইবনা থা ৬ চৎপা য়াদে। মসি য়াইমরপ ওইনা ৱাবা ত্রেক অমনি অমসুং দিল্লীদগী নুমিৎ ৯-১০ ফাওবা চঙই। মসিদা চৎপগী খ্বাইদগী ফম্বা মতমদি জুন্দগীনা ওক্তোবর ফাওবনি। মফম অসিদা লৈরিবা মীওইশিংগা শক-খঙ মাইখংনবা ফংনবগীদমক হোমস্তেশিংদা লৈবগী খুদোংচাবসু ফংগনি অমসুং মসিনা খুল অসিগী শেন্মিৎলোন্দা মতেং পাংগনি। দিল্লিদগী কনাগুম্বা অমনা লে (মিতর ৩,৫০০/ ফিৎ ১১,৫০০)তম্না পাইদুনা চৎপা য়াই। লেহ য়ৌবা মতমদা এক্যুৎ মাউন্তেন সিক্নেস (এ.এম.এস.) নাদনবগীদমক এক্লেমেতাইজ তৌবা কান্নগনি। লেহদগী লামায়ুরু-কার্গিল রোদতা গারীনা চৎকনি অমসুং ৱানলা খুঙ্গং য়ৌগনি। খুঙ্গং অসিদা অহীং অমা য়ারেক্লবা মতুং, মথংগী নুমিত্তা মিতর ৪,৮৯০/ফিৎ ১৬,০০০ ৱাংবা সিসির লা পাস কানবগীদমক য়াপোলা তুরেল তম্না চত্তুনা হনুপত্তা খুঙ্গংদা লৈগনি। মথংগী নুমিত্তা চীংমাই অসিদা য়ান্থদুনা লৈরিবা ফোতোক্সার খুঙ্গংদা কুম্থগনি।

• রুপখুন্দ (মিতর ৪,৭৮৫/ ফিৎ ১৫,৭০০) হায়রিবা অসিসু উত্তরখন্দগী গরৱাল লমদমগী মমিং লৈরবা ত্রেক অমনি। মফম অসিদা কাবগী ৱাগী চাংদি য়াইমরপ ওইবদগীনা অরুবা তাংকক ফাওবনি অমসুং কাথগোদমদগী রুপখুন্দ ত্রেক ফাওবা নুমিৎ ৬ রোম চৎকনি। মফম অসিদা ত্রেক তৌবগী চপ চাবা মতমদি দিসেম্বরদগীনা ফেব্রুৱারী ফাওবনি। কাথগোদমদগী লোহাজুং ফাওবা গারীনা চৎকনি। বেদনিরিবির লান্দুনা অমসুং দিদানা খুঙ্গংদা অহীং অমা য়ারেক্তুনা লোহাজুং পাস ফাওবা ত্রেক তৌদুনা চৎকনি। মথংগী নুমিত্তা এসিয়াদা লৈবা খ্বাইদগী চাউবা মিদো অমা ওইরুবা অলি বুগ্যাল (ফিৎ ১২,৫০০)দা য়াম্না ঙম্না কাগনি। দেদনি বুগ্যালদা অহীং অমা য়ারেক্লবা মতুংদা, মথংগী নুমিত্তা ভাগুৱাসা উনপাক (ফিৎ ১৪,১০০)তা নুংঙাইনা কেম্প তৌগনি। পাৎ মপান্দা কোইরবা মতুংদা অয়ুক্কী চাকচামাংদা কেম্প তৌফমদা হল্লক্কনি। মথংগী নুমিত্তা লোহাজুং তম্না কুম্থরক্কনি। রুপকুন্দ ত্রেক্তা তাদুনা লৈরিবা অঙকপা শরু-পোলাংশিং অসি এ.দি. ৮২০গী মতমদা রুপকুন্দ ফাওদুনা লাকখিবা মীওই ৫০০ মুক্না অকনবা উনগী নোংলৈ অমা থেংনবদগী লৈখিবনি। হায়রিবা থৌদোক অসি সাইন্তিস্তশিংনা শরুশিং অসিবু থিজিল্লবা মতুং মখোয়দা য়াওরিবা কার্বোনশিং অসি মতম পারবা মতুংদা অশেংবনি হায়না লাউথোকখ্রে।

রুপিন্দর ব্রার, এ.দি.জি. তুরিজম্না হিমালয়দা ত্রেক তৌবা অমসুং চৎপা হায়বসি চহী খাইদনা অমসুং হকচাংগী ফিবম নাকোইনরগা মীওই কয়ানা চৎকে হায়না খন্দুনা লৈনরিবনি অমসুং কোবিদ-১৯ অসি হেক লোইখিবগা মফমশিং অসিবু কনাগুম্বা অমনা চৎনবা শেম শাবা য়ারগনি অমসুং মফম অসিদা লৈরিবা ফজরবা শা-ঙা, উপাল- ৱাপাল অমসুং "অবোদ ওব স্নো"না লোত্তুনা লৈরিবা মফম অসিদা চত্তুনা নুংঙাইনা লেল্লুবা য়ারগনি।

মোদরেতরনা ত্রেক্করশিংদা মখোয়না পাম্বা ত্রেকশিং খন্নবা ৱাফম ফোংদোকখি। হায়রিবা মফমশিং অসিদা অয়াম্বনা লোকেল গাইদ লৈ অমসুং কনাগুম্বা অমনা এদবেঞ্চর তুর ওপরেতর এসোসিএসন ওব ইন্দিয়া, এ.তি.ও.আই.গী মেম্বর ওইবা তুর ওপরেতর অমহেক্তা পাউ ফাওনবা য়াই।

ইশাগী ইথৌদাং মশক খঙজবা ত্রেক্কর অমা ওইনা, ঐখোয়না অকক্নবা চৎন-কাংলোন খরদি তঙাই ফদনা ইনগদবনি।

• অমোৎপা লংথোক্লোইদবনি। অদোমগী খোঙ্গুল নত্তনা করিগুম্বা অমত্তা থনম্লোইদবনি।
• ত্রেকশিংবু লুন-নান্না থম্লমগদবনি
• শা-উচেকশিংদা অকাইবা পীবীরোইদবনি
• লাউ-খোংলোইদবনি
• মফম অদুদা লৈজরম্লিবা খুঞ্জাশিংগী প্রাইবেসি ঙাকপীগদবনি।
• মফম অদুগী চৎনবীবু ইকাই খুম্নগদবনি

দেখো অপনা দেশকী ৱেবিনারশিং অসি ইলেক্ত্রোনিক্স অমসুং ইনফোর্মেসন ত্রেক্নোলোজী মন্ত্রালয়না শেম্বা নেসনেল ই-গবর্নান্স দিবিজন (এন.ই.জি.দি.)গা খুৎশম্নদুনা পাঙথোকপনি।

ৱেবিনার অসিগী পরিংশিং অসি https://www.youtube.com/channel/UCbzIbBmMvtvH7d6Zo_ZEHDA/featured দা অমসুং তুরিজম মন্ত্রালয়, ভারত সরকারগী সোসিএল মীদিয়া হেন্দলশিংদা ফংগনি।

ৱেবিনার অসিগী মথংগী তাংকক অসি জুন ১৯, ২০২০গী অয়ুক পুং ১১ তাবা মতমদা উৎকনি, অমসুং মসিগী হীরম্না যোগ অমসুং ৱেলনেস- এন ওফরিং ফোর চেলেঞ্জিং তাইমসনি!

*****