কোবিদ-১৯গী চেকশিল থৌরাংগী ওইবা প্রোতোকল পুম্নমক ঙাক্তুনা, চৎনবী ওইরিবা পাসিং আউৎ পরেদকী মহুৎতা জুন ১৩, ২০২০দা ইন্দিয়ন নেভেল ‌একাদমীগী কোর্স কমপ্লিসন সেরোমনী হায়না মীংথোনবা তোপ-তোপ্পা থৌরম অমদা ত্রেনী ২৫৯না মাস্ক অমসুং গ্লোবশিংগা লোয়ননা অঙৌবা শেত্তুনা ইচং থৌনা থোকলকখি। আর্ম ফোর্সেস একাদমী অমগী পি.ও.পি. হায়বা অসি মমা-মপাশিং, মীথুংলেনশিং অমসুং শক্নাইরবশিং য়াওদুনা মহৌশাদগী পাংথোক্তুনা লাক্লিবা অচৌবা অমসুং হরাও তয়াম্বগী থৌরম অমনি। অদুম ওইনমক কোবিদ-১৯গী অৱাবা মায়োক্নরিঙৈ মতাং অসিদা ত্রেনী পুম্নমক্কী হকশেল অমসুং খুদোংথীবা থোক্তবনা মরু ওই হায়না লৌদুনা থৌরম অদু প্রোতোকলশিং চেকশিন্না ঙাকলগা পাঙথোকখি। মরম অসিনা, মী য়াম্না তীন্দনবা মমা-মপাশিং অমসুং মীথুংলেনশিং য়াওহনখিদে।

৯৮শুবা ইন্দিয়ন নেভেল একাদমী কোর্স (বি.তেক), ৯৮শুবা ইন্দিয়ন নেভেল একাদমী কোর্স (এম.এস.সি.), ২৯শুবা নেভেল ওরিএন্তেসন কোর্স (এক্সতেন্দেদ) অমসুং ৩০শুবা নেভেল ওরিএন্তেসন কোর্স (রিগুলর)গী মখাদা লৈবা ইন্দিয়ন নেভীগী, ইন্দিয়ন কোস্ত গার্দকী অমসুং মরূপ ওইনা লোয়নরিবা মপাল লমগী নেভীশিংগী মিদশিপমেনশিং অমসুং কেদেৎশিংগী ত্রেনিং লোইশিনখিবা অদু থৌরম অসিদা উবা ফঙখি। মরূপ ওইনা লোয়নরিবা মপাল লৈবাকশিংগী মাইপাকখ্রবা ত্রেনীশিং অদুদা ত্রেনী তরেৎ য়াওরি; শ্রী লঙ্কা অমসুং ম্যনমারদগী ত্রেনী অনি/অনি, অমসুং মালদিবস, তেঞ্জানিয়া অমসুং সেচেলসতগী অমমম য়াওরি।

সাউথদর্ন নেভেল কম্মান্দগী পি.ভি.এস.এম., এ.ভি.এস.এম., এন.এম., ভি.এস.এম., এ.দি.সি., ফ্লেগ ওফিসর কম্মান্দিং-ইন-চীফ, থৌরম অসিগী রিভ্যুৱিং ওফিসর ওইরিবা ভাইস এদমিরেল অনিল কুমার চৌলানা থোইদোক হেন্দোক্না ফরবা ত্রেনী মাপলদা মেদলশিং খুৎশিন্নখি। ইন্দিয়ননেভেল একাদমীগী এ,ভি.এস.এম., এন.এম., কম্মান্দেন্ত, ভাইস এদমিরেল দিনেশ কে ত্রিপাথিনা কন্দক্তিং ওফিসর ওইখি। রিভ্যুৱিং ওফিসরনা মহাক্কী ৱারোল পীরদুনা কোর্সশিং লোয়শিল্লবা মীওইশিংবু হরাওবা ফোংদোকখি অমসুং মখোয়না ইন্দিয়ন নেভীগী ‘মথৌ, ইকাই খুম্নবা অমসুং থৌনা লিংজেল’গী মনুংগী ওইবা মগুন অদু ঙাকনা চৎনবা পাওতাক পীখি। অকোয়বদা ওইরিবা ফীভম অদু য়েংদনা লান্থেংনবগী থৌনা লিংজেল অদু লেংদনা থম্নবা মহাক্না কেদেৎশিংবু মথৌনা হাপখি।

ইন্দিয়ন নেভেল একাদমীগী বি.তেক কোর্সকী ওইনা ‘প্রসিদেন্তগী গোল্দ মেদল’ মিদশিপমেন সুশিল সিংহদা খুৎশিন্নখি। নেভেল ওরিয়েন্তেসন কোর্স (এক্সতেন্দেদ)কী ওইনা ‘চীফ ওফ দি নেভেল স্তাফ গোল্দ মেদল’ কেদেৎ বাভী গুজরলদা খুৎশিন্নখি। নেভেল ওরিয়েন্তেসন কোর্স (রিগুলর)গী ওইনা ‘চীফ ওফ দি নেভেল স্তাফ গোল্দ মেদল’ কেদেৎ বিপুল বারদ্বাজদা খুৎশিন্নখি। খ্বাইদগী ফবা নু্পী কেদেৎকী ‘জমোরিন ত্রোফী’ অসি কেদেৎ রিয়া শর্মাদা খুৎশিন্নখি।

হৌজিক লৈরিবা নেভেল একাদমী অসি ২০০৯দা এরিমালাদা লীংখৎখিবা অসিদগী হৌদুনা ইন্দিয়ন নেভী, কোস্ত গার্দ অমসুং মরূপ ওইনা লোয়নরিবা মপাল লৈবাকশিংগী নেভেলগী লুচিংবশিং শেম্বদা মথৌ তাবা মতেংশিং চহি ৫০ পাঙলকপগীদমক ২০১৯গী নভেম্বর ২০দা, আই.এন.এ. অসি প্রসিদেন্তগী কলর পীখি। এরিমালাদা ২০০৯দা লীংখৎখিবা হৌজিক লৈরিবা নেভেল একাদমী অসিগী ওইনা হৌজিক ওইরিবা কোবিদ-১৯গী ফীভম অসিনা মরম ওইদুনা ত্রেনিং তৌরিবা বেচ অমা সেরিমোনিএল মার্চ য়াওদনা লোইশিনখিবা অসি অহানবনি। লৈবাক অসিনা লোকদাউন থম্বা অমসুং তাঙ্কক নাইনা কোমথোকপা অসিদা আই.এন.এ.গী ত্রেনিং তৌবগী মওং অসিসু ভারত সরকার, কেরেলা সরকার অমসুং নেভেল হেদক্বাতরশিংগী য়াথংশিংগী মতুং ইন্না মার্চ ২০২০গী ২৪দগী হৌনা শেমদোকখ্রে। ত্রেনিং অসি অআনবদা ওনলাইন এসাইনমেন্তশিং তৌরম্মি অমসুং মতুং তাবদা য়ামদ্রবদা ফুত ৬ অরাপ্পা থম্লগা ক্লাস রুমশিং একজাম হোলশিংদা ফমহন্দুনা লোইশিনখি। একাদমী অসিনা লৌখৎখিবা অকনবা চেকশিল থৌরাংশিংনা কেদেৎ ৯০০ হেনবগী খুদোংচাদবশিংগী মরক্তা ত্রেনিংগী পান্দম ফঙবা অমসুং স্প্রিং তার্ম মাইপাক্না লোইশিনবদা মতেং পাংখি লোয়ননা আই.এন.এ.দা কোবিদ-১৯গী কেস অমত্তা লৈখিদে।

*****