সেফ্রোন অমসুং হীং (এসাফোতিদা) অসি মালেমগী খ্বাইদগী মমল য়াম্বা মরু-মরাংনি অমসুং থায়নগী মতমদগী ভারতকী চাক-এন্সাং থোংবদা শিজিন্নদুনা লাক্লি। ভারত্তা চহীগী ওইবা সেফ্রোনগী মরু-মরাং পাম্নরিবা অসি তোন ১০০নি অদুগা চহীদা চাংচত্তা পুথোক্লিবা অসিনা তোন ৬-৭ মুক্তনি। মরম অদুনা য়াম্লবা সেফ্রোনগী মরু-মরাং অসি মপান লমদগী পুশিল্লকই। মসিগা মান্ননা ভারত্তা হীংসু পুথোক্তে অমসুং চাউরাক্না লুপা কোতি ৬০০কী অহিংবা হীং তোন ১২০০ অসি আফগানিস্তান, ইরান অমসুং উজবেকিস্তান্দগী পুশিল্লকই।

হায়রিবা মরু-মরাং অসি ভারত্তা পুথোকপা হেনগৎহন্নবা হায়দুনা ইন্সতিত্যুত ওফ হিমালয়ান বাইওরিসোর্স তেক্নোলোজী (সি.এস.আই.আর.-আই.ঐচ.বি.তি.) অমসুং হিমাচল প্রদেশ সরকারগী লৌউ-শিংউগী বিভাগনা মখোয়গী লৈজবা মতিক্তা য়ুম্ফম ওইরগা থবক থৌরম কয়া পায়খৎনবা য়ানখ্রে। মসিগী য়ান্নবা অসিনা হিমাচল প্রদেশকী ওইনা লবুক্তগী লাকপা শেন্থোক, পুন্সি মহিং ফগৎহনবা অমসুং খুঙ্গং চাউখৎপগী হীরমদা কান্নবা কয়া অমা পুরক্লগনি। ওইরক্লিবা ফিভম অসিবু খুমাং চাউশিলহন্নবা হায়দুনা কেপাসিতী বিলদিং শিজিন্নদুনা অনৌবা ৱাখল্লোন কয়া তাক্নবা, হৈ-শিংবা হেনগৎহনবা অমসুং থবক শুবা ঙমগদবা লৌউবশিং অমসুং লৌউ-শিংউ বিভাগকী ওফিসারশিংদা থবক শিন্নবগী থৌওং কয়া অমা পায়খৎকনি।

মসিগী মহৈ-মরোংশিং থাজবনা মপান লমদগী পুশিল্লকপা হন্থহনগনি। সি.এস.আই.আর.-আই.ঐচ.বি.তি.না রাজ্যসিগী লৌউবশিংদা মসিগী মতাংদা তাকপিগনি, রাজ্যগী লৌউ-শিংউ বিভাগকী ওফিসারশিং অমসুং লৌউবশিংদা ত্রেনিং পীগনি অমসুং সেফ্রোন অমসুং হীংগী কোর্ম অমসুং মরু লোক্নবা মফমশিং শেম শাগনি হায়না আই.ঐচ.বি.তি.গী দাইরেক্তর দাক্তর সঞ্জয় কুমারনা হায়খি।

হৌজিকফাওবদা জম্মু কস্মিরদা হেক্ত্যার ২৮২৫গী লমদা সেফ্রোন থারি। আই.ঐচ.বি.তি.না সেফ্রোন থাবগী তেক্নোলোজী পুথোক্তুনা হিমাচল প্রদেশ অমসুং উত্তরাখন্দগী নন-ত্রেদিস্নেল মফমশিংদা সেফ্রোন থাবা হৌদোকখ্রে। ইন্সতিত্যুসন অসিনা লায়না পক্তবা কোর্ম পুথোক্নবগীদমক তিস্যু-কলচরগী কাংলোন অমসু পুথোকখ্রে।

পলম্পুরদা লৈবা ইন্সতিত্যুত অসিনা নই-দিল্লীগী নেস্নেল ব্যুরিও ওফ প্লান্ত জেনেতিক রিসোর্স (এন.বি.পি.জি.আর.)কী খুত্থাংদা ইরান্দগী পুশিল্লকপা হীং মখল তরুক শক তাকখ্রে অমসুং ভারতকী ঈশিং নুংশিৎকী ফিভমগা চান্ননা থাবগী কাংলোনশিংশু শেমখ্রে। হীং অসি মতম শাংনা হৌবা পাম্বী অমনি অমসুং থাবা হৌবদগী চহী মঙা শুরবা মতুংদা মসিগী মরাদগী মপঙ ওইবা ওলিও-গম পুথোকই। মসি অঈংবা মরুভুমিগী মফমগী অচেপ্পা মফমদা থাবা য়াই।

থবক অসিগী পান্দম ফংনবা তেক্নিকেল ওইবা মতেং পাংবতা নত্তনা ঐখোয়না সেফ্রোন পুথোকপা মফমশিংসু য়েংশিনগনি। মফমশিংসিদা লৌউবশিংসু পুদুনা য়েংহনগনি। মথংগী চহী মঙাদা রাজ্য অসিদা অপুনবা লম একর ৭৫০দদি মহৈ-মরোং অসি থাবদা শিজিন্নরগনি হায়না দাক্তর কুমারনা হায়খি।

হিমাচল প্রদেশকী লৌউ-শিংউ বিভাগকী দাইরেক্তর দাক্তর আর.কে. কৌন্দালনা হায়খিবদা মসিগী খোংথাং অসিনা লৌউবশিংগী পুন্সি মহিংদা কান্নবা পীগনি অমসুং রাজ্য অমসুং লৈবাক অসিদসু কান্নবা য়াম্না পীগনি হায়খি। মহাক্না হায়খি, “মসিগী প্রোগ্রাম অসিনা শেন্থোক হেন্না ফংবগী খুদোংচাবা কয়া পীদুনা লৌউবশিংগী য়াইফবদা মতেং পাংগনি অমসুং মমল য়াম্না লৈবা অসিগুম্বা মহৈ-মরোং থাবা অসিনা রাজ্য অসিদসু কান্নবা য়াম্না পীগনি”।

মসিগী মহৈ-মরোংশিং অসি মতিক মগুন লৈনা পাক-শন্না থাবদা চংবা পোৎ-চৈশিং পুথোক্নবগীদমক খ্বাইদগী নৌনা শেমগৎ শাগৎলবা লেব অমা শেম্লগনি।

*****