نئی دلّی ،30 مئی / بہار کی ریاست نے جل شکتی کی وزارت کو اپنا جل جیون مشن  سالانہ منصوبہ پیش کیا ہے تاکہ اس  پر غور کرکے  منظور کیا جا سکے ۔ اس منصوبے میں 21-2020 ء تک صد فی صد  گھروں میں  ٹیپ واٹر کنکشن فراہم کرنا شامل ہے ۔ بہار کی ریاستی حکومت نے بقیہ تمام گھروں میں بھی ٹیپ کنکشن فراہم کرنے کا ہدف مقرر کیا ہے ۔ یہ ایک بڑا ہدف ہے لیکن ریاستی حکومت  اس ہدف کو حاصل کرنے کے لئے ایک نقشہ راہ کے ساتھ تیار ہے ۔ 21-2020 ء کے دوران  تمام 38 اضلاع کا 100 فی صد احاطہ کرنے کے لئے ایک مناسب منصوبہ تیار کیا گیا ہے  ۔ بہار سرکار  امنگوں والے اضلاع  میں ‘‘ گھروں میں چلنے والے  ٹیپ کنکشن ’’ ( ایف ایچ ٹی سی ) 100 فی صد فراہم کرنے  پر خصوصی  توجہ دے رہی ہے ۔ بہار میں زیر زمین پانی کی دستیابی کے پیش نظر ریاستی سرکار  اس سلسلے میں تمام کوششیں کر رہی  ہے ۔

          ریاست 21-2020 ء میں باقی 1.50 کروڑ گھروں  میں ٹیپ کنکشن فراہم کرنے کا منصوبہ  بنا رہی ہے ۔ بھارتی حکومت نے اس کے لئے 21-2020 ء کے دوران 1832.66 کروڑ  روپئے مختص کئے ہیں ۔

          سخت گرمی اور کووڈ – 19 عالمی وباء کے دوران صاف پانی کی اہمیت بہت زیادہ  بڑھ گئی ہے ۔ بار بار ہاتھ دھونے اور صفائی ستھرائی کے لئے صاف پانی  کی ضرورت ہے ۔ دیہی آبادی زیادہ تر ہینڈ پمپ یا کنوؤں سے پانی حاصل کرتی ہے ۔ اس لئے سماجی دوری بر قرار رکھنا بہت مشکل ہے ۔ ان مشکلات کو دیکھتے ہوئے گھروں میں پینے کے پانی کی فراہمی واحد حل ہے ۔ کووڈ – 19 وباء کے اس مشکل وقت میں دیہی علاقوں میں تمام گھروں میں ٹیپ کنکشن فراہم کرنے سے دیہی علاقوں میں ، خاص طور پر  لڑکیوں اور خواتین کے لئے آسانی ہو گی اور پانی بھر کر لانے کا کام کم ہو گا ، جس سے وہ ایک محفوظ اور باوقار زندگی گذار سکیں گی ۔

          اگرچہ پچھلے برسوں  کے مقابلے پانی کی صورت حال میں قابل قدر بہتری آئی ہے لیکن ابھی بہت کام کیا جانا باقی ہے ۔ ہر گھر میں ٹیپ کنکشن فراہم کرنے کے علاوہ بہار کو پانی کے تحفظ ، بارش کے پانی کی ہارویسٹنگ  ، گندے پانی کو صاف کرنے اور زیر زمین پانی کے استعمال کے   مسئلے سے نمٹنے پر بھی زور دینا ہے ۔

          جل جیون مشن ، ریاستوں کی ساجھیداری  میں شروع کیا گیا تھا ، جس کا مقصد گاؤں  کے ہر گھر میں 2024 ء تک ایف ایچ ٹی سی فراہم کرنا ہے ۔ اس بات کا خیال رکھا گیا ہے کہ ہر گھر کو طویل مدتی بنیاد پر مسلسل 55 ایل پی ای ڈی پینے کا پانی سپلائی کیا جائے ۔ حکومت کی یہ کوشش رہی ہے کہ لوگوں کو بنیادی خدمات  ان کے گھروں پر ہی فراہم کرکے دیہی عوام کی زندگی  کو بہتر بنایا جاسکے ۔

          مشن کو نافذ کرنے کے لئے مختلف سطحوں پر ادارہ جاتی بندوبست  کئے گئے ہیں اور ریاستی  پی ایچ ای  / پانی کی سپلائی  کے دیہی  محکموں کو مقامی لوگوں کے ساتھ اہم رول ادا کرنا ہو گا ۔ گرام پنچایت  / گاؤں  کی  پانی اور صفائی  ستھرائی کی کمیٹی  / استعمال کرنے والی کمیٹی   کو اس منصوبے کو نافذ کرنے ، بندوبست کرنے اور چلانے کی حوصلہ افزائی کی جانی چاہیئے ۔  گاؤں  کی برادری  میں ملکیت  کے جذبے  کو بیدار کرنا چاہیئے کیونکہ اس  مشن کا اصل  مرکز وہی ہیں ۔ گاؤں  کی براردی سے بھی امید کی جاتی ہے کہ وہ پانی کی کوالٹی کی نگرانی میں اہم رول ادا کرے گی ۔

          دیہی  خواتین اور نا بالغ لڑکیاں روز مرہ کے استعمال کے لئے پانی بھرنے میں اپنا کافی وقت اور توانائی  خرچ کرتی ہیں ۔ اس کی وجہ سے خواتین  آمدنی  بڑھانے والی سرگرمیوں میں شرکت  نہیں کر سکتیں  ، لڑکیوں کا اسکول کی پڑھائی  پر اثر پڑتا ہے اور صحت پر بھی منفی اثر پڑتا ہے ۔ جل جیون مشن دیہی  برادری ، خاص طور پر خواتین کی زندگی  کو آسان بنانے میں اہم رول ادا کرے گا ۔ خواتین کو چاہیئے کہ وہ اپنے  گاؤوں میں جے جے ایم کی قیادت کریں تاکہ ان کی ضرورتوں اور امنگوں کو پورا کیا جا سکے ۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

( م ن ۔ و ا ۔ ع ا ) (30-05-2020)

U. No.  2906