“নেস্নেল কমিসন ফোর ৱুমেন” (এন.সি.দবল্যু.)গী সেনিয়র মেম্বর, শ্রীমতী সোসো শৈজানা ঙসি দিবেলপমেন্ত ওফ নোর্থ এস্তর্ন রিজন (দি.ও.এন.ই.আর.), এম.ও.এস. পি.এম.ও., পর্সোনেল, পব্লিক গ্রীভেন্সেস, পেন্সন, এতোমিক ইনর্জী অমসুং স্পেসকী কেন্দ্রগী রাজ্য মন্ত্রী (ইন্দিপেন্দেন্ত চার্জ ), দা. জিতেন্দ্র সিংহগা উনখ্রে অমসুং কোবিদকা মরী লৈনবা ৱাফমশিং মরু ওইনা অৱাং-নোংপোক লমদমশিংগী মতাংদা খন্নখ্রে।

শ্রীমতী শৈজানা কোবিদকী লাইচৎ অসিনা শন্দোরকপদগী লাকশিন্ননবা মতম চানা চেকশিন-থৌরাংগী পাম্বৈশিং লৌখৎপগীদমক্তা প্রধান মন্ত্রী, শ্রী নরেন্দ্র মোদিগীদমক্তা মহাক্না থাগৎপা ফোংদোকখি। মহাক্না শিংনবা অসিবু ভারতনা মাইপাক্না লান্থোকপা ঙমগনি হায়বগী থাজবসু ফোংদোকখি।

হৌজিক্কী লাইচৎ অসিগী মনুংদা পাইখৎলিবা থবক-থৌরমশিংগী মতাংদা শমলপ্না হায়রদুনা, শ্রীমতী শৈজানা দা. জিতেন্দ্র সিংদা লৈবাক পুম্বগী ওইনা লোকদাউন তৌরিবা অসিদা পীরিবা সর্বিসশিং, মরু ওইনা লৈবাক অসিগী তোঙান তোঙানবা শরুকশিংদা লৈরিবা অৱাং-নোংপোক লমদমদগী মীশিংদা মতেং পাংনবগী মতাংদা খঙহনখ্রে। মহাক্না মন্ত্রীদা অৱাং-নোংপোক্তা হল্লক্লিবা মরু ওইনা অখন্নবা থবকশিংদা হৈ-শিংলবা নহা ওইরবা নুপামচাশিং অমসুং নুপিমচাশিং অসিবু খরম্না মখোয়গী শিনফম অসিগা চানবা মওংদা শিজিন্নগদগে হায়বগী মতাংদা চাঊরাকপা লম্বি অমসু উৎখি।

দা. জিতেন্দ্রনা মমাংগী চয়োল খরসিগী মনুংদা, মরু ওইনা নুপিগী সেল্ফ হেল্প গ্রুপশিংনা লৌরিবা থৌদাং অদুগী থাগৎপা ফোংদোকখি। মহাক্ন হায়, অৱাং-নোংপোক্কী লমদমশিংদা লৈরিবা নুপিশিংনা লোকদাউন অসিগী মনুংদা পোৎশক কয়া অমা শাবদা মাংজিল থারি।লৈবাক শিনবা থুংনা য়াম্না য়াংনা মমিং চৎখৎক্লিবা সেল্ফ-হেল্প গ্রুপশিংনা শাবা মখল-মখা কয়াগী অমসুং ফজরবা দিজাইনশিংগী ফেস কোভরশিং অদুগী মতাংদা মহাক্না অখন্ননা পনখি।

দা. জিতেন্দ্র সিংনা কোবিদকী লাইচৎ অসিগী মরম্না দিবেলপমেন্ত ওফ নোর্থ ইস্তর্ন রিজন (দি.ও.এন.ই.আর.)গী মন্ত্রলয়না লৌখৎখিবা খোংথাং কয়া অমগী মতাংদা নুপিগী ওইবা নেস্নেল কমিসনগী মেম্বরদা খঙহনখি। মহাক্না হায়খিমদুদি কোবিদ অমসুং অতোপ্পা লৌনগনবা লাইনাশিংগী লাকশিন্নবগীদমক্তা অখন্ননা অৱাং-নোংপোক্কী রাজ্যশিংদগী হেল্থ সেক্তরগা মরী লৈননা হৌদোরকপা ৱাফমশিং অদুবু সেল-ধূমগী মতেং অমসুং য়াম্না য়াংনা থবক-থৌওংশিং পাংথোক্কনি হায়না দি.ও.এন.ই.আর.গী মন্ত্রালয়না হায়রকখ্রে।অৱাং-নোংপোক লমদমশিংগী রাজ্য সরকারশিংনা লৌরিবা থৌদাং কয়া অদুগি থাগৎপা ফোংদোক্লদুনা দা.জিতেন্দ্র সিংনা লৈবাক অসিগী তোঙান-তোঙানবা মফমশিংদগী হল্লক্লিবা মীশিংদা নুংঙাইনা হল্লক্নবা অমসুং চান-থক্নবগীদমক্তা য়েংশিনগদবশিং অদু য়েংশিল্লি হায়না শ্রীমতী সোসো শৈজাদা থাজবা পীরকখ্রে।

*****