নেস্নেল ক্রাইসিস মেনেজমেন্ত কম্মিতী(এন.সি.এম.সি.)না কেবিনেৎ সেক্রতরী শ্রী রজিব গৌবামেৎনা অকনবা নোংলৈ-নুংশীৎ অম্ফান্না শোকহনখ্রবা মফমশিংদা অৱা-তেংবাংগী অমসুং হান্নগী ফীভমদা অমুক হঞ্জিল্লক্নবা মখা তানা খুৎশম্ননা হোৎনরকপা থবক ওইনা ঙসি অমুক হন্না মঙারক শুবা ওইনা য়েংশিনখ্রে।

নোংচুপ বেঙ্গলগী সরকারগা লোয়ননা প্রধান মন্ত্রীনা মহাক্কী পাংথোকখিবা এরিয়েল সর্ভে অমসুং য়েংশিনবা অদুগী মতুংদা লাওথোকখিবা শেনফম লুপা ক্রোর ১,০০০ অসি হান্ননা রাজ্য সরকারদা থাদোকখ্রে।

অৱা-তেংবাংগী অমসুং হান্নগী ফীভমদা হঞ্জিল্লক্নবা হোৎনবিরিবশিং অসিগীদমক্তা নোংচুপ বেঙ্গলগী চীফ সেক্রতরীনা কেন্দ্রবু থাগৎপা ফোংদোকখি। রাজ্য অদুদা নোংলৈ-নুংশীৎনা শোকহনখ্রবা মফমশিংদা খ্বাইদ গী হান্না পাৱর অমসুং তেলিকম্ম্যুনিকেসনগী ইনফ্রাস্ত্রকচরশিং হান্নগী ওইবা মওংদা হঞ্জিল্লক্নবা ৱা ফোংদোকখি। অয়াম্বা মফমশিংদা তেলিকোম কন্নেক্তিবিতীগী ফীভমশিং হান্নগী ওইবা মওংদা হঞ্জিন্নখ্রবা মতম অসিদা লমদুগী মফম খরদা পাৱর সপ্লাইশিং য়েন্থোকপগী নেতৱর্কতা অমাং-অতা কয়া থোকহনখ্রে।

থংনবা রাজ্যশিংগা লোয়ননা কেন্দ্রগী এজেন্সীশিং কয়া থবক তৌহনখ্রে। তাঞ্জা অসিদা এন.দি.আর.এফ. অমসুং এস.দি.আর.এফ.কা লোয়ননা লন্বী হাংহন্নবগী থবক্তা মতেং পাংনবা কোলকতাদা আর্মীশিং থবক্তা য়াওশিলহনখ্রে।

হান্নগী ফীভমদা হঞ্জিন্নবসিদা থোইদোকপা খুমাং চংশিনবা লৈত্রি, কেবিনেৎ সেক্রতরীনা পাৱর কন্নেক্তিবিতী, তেলিকোম সর্ভিস অমসুং মথৌ তাবা থক্নবা ঈশিংনা হান্না মরু ওইনা থবক পায়খৎনবা পাওতাক পীখ্রে। রাজ্যনা মথৌ তাবা মখা মতেংশিং পীনবা কেন্দ্রগী এজেন্সীশিং শেম-শাদুনা লৈরি। রাজ্য অসিনা তাল্লক্কদবশিং পীনবা চানবা চেং-হৱাইশিংগী স্তোক মতীক-চানা থমখ্রে।

হোম এফেয়রস মন্ত্রালয়না অমাং-অতাশিং অসি ওন্ননবা য়াম্না থুনা কেন্দ্রগী তীম অমা থাগদৌরি।

কেবিনেৎ সেক্রতরীনা নোংচুপ বেঙ্গলগী সরকারনা মখোয়গী পুশিল্লক্কদবা মথৌ তাবশিং লৈরগদি খংহলক্নবা হায়খ্রে অমসুং রাজ্য সরকারগা লোয়ননা মথৌ তাবা মতেংশিং নকশিন্ননা তেংবাংনদুনা থুনা-য়াঙনা ফংহন্নবা কেন্দ্রগী মন্ত্রীশিং/এজেন্সীশিংদা তাকখ্রে।

নোংচুপ বেঙ্গলগী চীফ সেক্রতরীনা ভিদিও কনফরেন্সকী খুত্থাংদা পাংথোকপা এন.সি.এম.সি.গী মীতিংদা শরুক য়াখি। হোম এফেয়রস, পাৱর, তেলিকম্ম্যুনিকেসন্স, ফুদ অমসুং পব্লিক দিস্ত্রিব্যুসন, হকশেল, দ্রীঙ্কিং ৱাতর অমসুং সেনিতেসন, ময়াই লোয়শং আই.দি.এস., এন.দি.এম.এ. অমসুং এন.দি.আর.এফ.কী মকোক থোংবা ওফিসরশিংশু মাতিং অদুদা য়াওখি।

***