নৌনা খনখিবা জম্মু অমসুং কশ্মীর পি.এস.সি. (পব্লিক সর্বিস কমিশন)গী চেয়রমেন, বি. আর. শর্মনা ঙসি কেন্দ্রগী থবক শুবা, মীয়ামগী ৱাকৎ অমসুং পেন্সনগী রাজ্য মন্ত্রী, দা.জিতেন্দ্র সিংহগা ৱারী শাখ্রে।

১৯৮৪ বেচকী আই.এ.এস. ওফিসর, শ্রী বি.আর.শর্ম অসি জে.& কে.গী কেদরগী মনুং চল্লি অমসুং মহাক অসি কেন্দ্র সরকারদা দিপুতেসন তৌদ্রিঙৈগী মমাংদা হান্নগী জম্মু অমসুং কশ্মীর রাজ্যগী চীফ সেক্রেতরী ওইরম্মি। মহাক অসি কোন্নথংদা এস.এস.সি.গী চেয়রমেন ওইনা খনখিবনি অমসুং মহাক সুপরএনুৱেসন তৌরবা মতুংদা চহি অনিগী অমুক থবক তৌহনখি। হন্দক্তা, শর্মনা দি.ও.পি.তি. (দিপার্ৎমেন্ত ওফ পর্সোনেল & ত্রেনিং)দা এস.এস.সি.গী চেয়রমেনগী ফমদগী পোথানবগীদমক্তা হায়জখি। 

বি.আর.শর্মদা অফবা য়াইফবা ওইরসনু হায়রদুনা, দা. জিতেন্দ্র সিংনা জম্মু অমসুং কশ্মীরগী নৌবা য়ুনিয়ন তেরিতোরীদা ফম কয়া অমা খনবগী থৌওং অদুবু অথুবা মতমদা, মতম চানা পাংথোকপগী মথৌ তাবা অদু ফোংদোকখি। মহাক্না হায়, জম্মু অমসুং কশ্মীরগী অনৌবা য়ুনিয়ন তেরিতোরী অসিগী পি.এস.সি.গী চেয়রমেন অমা ওইনা, শর্মগী মমাংদা মরু ওইবা থৌদাং কয়া লৈরি, মসিগীদমক্তা মহাক্কী শাংলবা মতমগী দেমিনিস্ত্রেতিব এক্সপরিয়েন্স অমসুং জম্মু অমসুং কশ্মীরগী মতাংদা খঙলিবা পুম্নমক অদুনা মতেং ওইগনি। 

শ্রী শর্মনা দা. জিতেন্দ্রদা মহাক্কী লেপ্তনা মতেং পাংবা অমসুং লমজিং-লমতাক্কীদমক্তা থাগৎপা ফোংদোকখি। মআক্না মন্ত্রীবুসু খনবগী থৌওং অমসুং অতোপ্পা মরী লৈনবা থবকশিংগী মতাংদা মহাক্না এস.এস.সি.গী চেয়রমেন ওইরিঙৈ মতমদা মরু ওইবা ৱারেপ লৌবদা মাবু পাউতাক কয়া অমা পীবীবগীদমক্তা থাগৎপা ফোংদোকখি।

শ্রী শর্মনা দা. জিতেনদ্র সিংহদা কোবিদ-১৯গী লাইচৎ অসিনা মরম ওইরগা অকাইবা থোকখিবা এস.এস.সি.গী মখাদা খনবগী থৌওং কয়া অমগী হৌজিক ওইরিবা ফিভমগী অপদেৎসু পীখি। মহাক্না হায়, মরু ওইনা ভারতকী  সরকারনা, সরকারগী ফম কয়া অমা খনবদা ময়েক য়াম্না শেংনা অমসুং অচান-মীরাই খায়দনবা থবক তৌনবা হোৎনরিবা অসিগী মতম অসিদা এস.এস.সি.গী চেয়রমেনগী য়াম্না মরু ওইবা ফম অসিদা থবক তৌরম্বা হায়বসি মহাক্কী ওইনদি য়াম্না ফিদম্নীংঙাইনি।

*****