نئی دلّی  ،  18  مئی  / مرکزی وزیر ڈاکٹر جتیندر سنگھ نے کہا ہے کہ  کووڈ – 19 عالمی وباء کے پیش نظر وزیر اعظم جناب نریندر مودی کے ذریعے اعلان کردہ  20 لاکھ کروڑ روپئے کا اقتصادی پیکیج ، دیگر چیزوں کے علاوہ ،  میڈیکل  آئسوٹوپ کے ذریعے  کینسر کے علاج  کو فروغ دے گا اور   ایٹمی توانائی کے محکمے  کے زیر سرپرستی   سرکاری – پرائیویٹ – ساجھیداری ( پی پی پی ) طریقۂ کار پر ایک خصوصی ری ایکٹر قائم کیا جا سکے گا ۔

          ڈاکٹر جتیندر سنگھ نے ، جو ایٹمی توانائی  اور خلاء کے محکمے  کے بھی  وزیر مملکت ہیں ،  اقتصادی پیکیج کو  اختراعی  ، مستقبل پر مبنی اور جرأت مند قرار دیتے ہوئے کہا کہ پچھلی  6 دہائیوں سے  بھارت کی خلائی ٹیکنا لوجی   اور ایٹمی توانائی   نے  پوری طرح خفیہ رہ کر کام کیا ہےاور حقیقی طور پر  اِس  میں   کسی نئے اقدام  کی تجویز  ممنوع قرارپائی تھی اور یہ  اسی محدود دائرے میں جاری تھی ، جس میں یہ  موجود ہے ۔ 

          انہوں نے کہا کہ پہلی مرتبہ وزیر اعظم جناب نریندر مودی  کی قیادت میں  ایٹمی توانائی کے محکمے کو   موقع ملا ہے کہ اسے مختلف  شعبوں  میں  اور روز مرہ کی زندگی   میں استعمال  کیا جا سکے ۔  ڈاکٹر جتیندر سنگھ نے کہا کہ بھارت میں میڈیکل آئسوٹوپ کی تیاری  سے   نہ صرف  کینسر اور دیگر بیماریوں  کا سستا علاج  ممکن ہو گا بلکہ  پوری دنیا میں  انسانیت کی  خدمت بھی کی جا سکے گی ۔ انہوں نے مزید کہا کہ ایٹمی توانائی سے متعلق پیکیج میں  دی گئی  دوسری اصلاحات سے خوراک کو تابکاری ٹیکنا لوجی کے استعمال سے زیادہ عرصے تک  محفوظ رکھنے میں مدد ملے گی ۔ انہوں نے کہا کہ ہمارے سائنس دانوں کے پاس اِس کا پورا  علم  موجود ہے لیکن  پی پی پی موڈ میں ریڈیئیشن  ٹیکنا لوجی کو فروغ دینے کا کام پہلی مرتبہ  کیا جا رہا ہے ۔

          ڈاکٹر جتیندر سنگھ نے اس بات کو اجاگر کیا کہ جہاں تک  خلاء کا تعلق ہے  ، اقتصادی پیکیج نے خلاء  / اسرو  کے کام میں  پرائیویٹ سیکٹر کو شامل کرنے کے لئے اصلاحات کی ہیں اور اس طرح  سیٹلائٹ  لانچ کرنے  اور متعلقہ سرگرمیوں میں   پرائیویٹ کمپنیوں  کے لئے  برابر کے مواقع  فراہم کئے ہیں ۔ انہوں نے مزید کہا کہ اس کے علاوہ ، ٹیکنیکل صنعت کاروں کو ریموٹ سینسنگ ڈاٹا فراہم کرنے کے لئے   جیو – اسپیشیل پالیسی میں نرم  روی  ایک اہم فیصلہ ہے  ۔

          ڈاکٹر جتیندر سنگھ نے کہا کہ نئی اقتصادی اصلاحات  بھارت کی خلائی  اور ایٹمی صلاحیتوں کے لئے ایک منفرد  موقع فراہم کرتی ہیں  کہ وہ  پوری طرح سے  اپنی صلاحیتوں کو بروئے کار لا سکیں  ۔

۔۔۔۔۔۔۔۔۔۔۔۔۔۔۔۔۔۔۔۔

( م ن ۔ و ا ۔ ع ا ) (18-05-2020)

U. No.2599