হোস্পিতালশিংদা হকশেলগী থৌমীশিংনা কোবিদ-১৯না নারবা মীওইশিংগী পুং ২৪ চুপ্না চেকশিন্না শেন্নবদা লায়নাসি নারকপা য়াবগী খুদোংথিবা কয়া মায়োক্নরি‍। অদুবু হৌজিক্তি ঐচকার্দ কৌবা অনৌবা মরূপ অমগী মতেংনা খুদোংথিবসি খরদি হন্থহনবা ঙম্বা য়ারে‍। হোস্পিতাল ক্যের এসিস্তিব রোবোতিক দিভাইস শমজিল্লগা ঐচকার্দ হায়না কৌবা খুৎলায় অসিনা কোরোনাভাইরস নারবা মীওইশিংদগী মশা লাপথোক্না লৈবদা মাংজিল থানা লান্থেংনরিবা হকশেলগী থৌমীশিংদা মতেং পাংবা ঙমগনি‍।

ঐচকার্দ অসি দুর্গাপুরদা লৈবা সি.এস.আই.আর.গী লেব সেন্ত্রেল মেকানিকেল ইঞ্জিনীয়রিং রিসর্চ ইন্সতিত্যুৎনা শেমবনি‍। খুৎলায় অসিদা মতমগা চুনরবা অফবা মখলগী তেক্নোলোজী কয়ামরুম য়াওরি অমদি মশা মথন্তনা নৎত্রগা মীনা শেন্নরগা মমায় চুম্দুনা চৎপা ঙম্মি‍‍।

রোবোৎ অসি মমায় চুম্বা, অনাবা মীদা হিদাক লাংথক অমসুং চীঞ্জাক পীজনবগীদমক দ্রোৱর মথৌ তৌহনবা, সেম্পল লৌবা অমদি শক্তম অমসুং খোঞ্জেল ওইনা পাও ফাওদোক্নবা য়াবা কন্ত্রোল স্তেসন লৈবা নর্সিং বুথ অমদগী শেন্নবা অমদি য়েংশিনবা য়াই‍।

সি.এস.আই.আর.-সি.এম.ই.আর.আই. দিরেক্তর প্রোঃ (দাঃ) হরিস হিরানীনা হায় মদুদি “হোস্পিতাল ক্যের এসিস্তিব রোবোতিক দিভাইস অসিনা মাংজিল থানা লান্থেংনরিবা হকশেলগী থৌমীশিংদা কোবিদ-১৯ অনাবা মীওইশিংদা সর্ভিস পীবদা হকচাং নকশিন্নহন্দনা তৌবা য়াহনগনি‍”‍। খুৎলায় অসিগী মমলদি লুপা লাখ ৫ ফাদে অদুগা কিলোগ্রাম ৮০দগী হন্থনা লুম্মি‍, হায়না প্রোঃ হিরানীনা হায়‍।

সি.এস.আই.আর.-সি.এম.ই.আর.আই.না কোবিদ-১৯গী শাফু তেক্নোলোজীগী মতেংনা হন্থহন্নবা য়াম্না কন্না হোৎনরি‍। দবল্যু.ঐচ.ও.না হায়খিবগী মতুং ইন্না, খুন্নাইসিদা কোরোনাভাইরস শন্দোরকপা থিংনবগীদমক পর্সোনেল প্রোতেক্তিব ইকুইপমেন্ত (পি.পি.ই.) য়াম্না মরু ওই, অদুনা ইন্সতিত্যুৎ অসিনা মীয়াম অমদি হকশেলগী ইন্সতিত্যুৎশিংদা মতেং ওইনবা পি.পি.ই. অমদি কম্যুনিতী-লেবেল সেফতী ইক্বুইপমেন্তশিং শেম্বদা লৈজবা মচাক অয়াম্বা শিজিন্নরি‍।

সি.এম.ই.আর.আই.গী সাইন্তিস্তশিংনা দিসইনফেক্সন ৱাল্কৱে, রোদ সেনিতাইজর য়ুনিৎ, মায়খুম, মেকানিকেল ভেন্তিলেতর অমসুং হোস্পিতাল ৱেস্ত মেনেজমেন্ত ফেসিলিতী য়াওনা শেমদোক্লবা তেক্নোলোজী অতোপ্পা খরসু শেমগৎলে‍।‍

****