প্ৰধানমন্ত্ৰী নৰেন্দ্ৰ মোদীয়ে অযোধ্যা ৰায়দানক ঐতিহাসিক আখ্যা দিয়ে আৰু আজিৰ দিনটোক ভাৰতীয় ইতিহাস আৰু ভাৰতীয় ন্যায়িক ব্যৱস্থাৰ এক সোণালী দিন বুলি অভিহিত কৰে৷ প্ৰধানমন্ত্ৰীয়ে এক নতুন ভাৰত গঢ়িবলৈ আৰু সকলোৰে উন্নয়নৰ বাবে দেশৰ প্ৰতিগৰাকী নাগৰিকক আগবাঢ়ি আহিবলৈ আহ্বান জনায়৷

প্ৰধানমন্ত্ৰী নৰেন্দ্ৰ মোদীয়ে কয়, ‘আজি ৯ নৱেম্বৰৰ দিনা কাৰ্টাৰপুৰ ক’ৰিডৰ মুকলি কৰা হৈছে৷ এই ক’ৰিডৰ ভাৰত আৰু পাকিস্তানৰ প্ৰচেষ্টাত গঢ় লৈ উঠিছে৷ আৰু আজি অয্যোধ্যা ৰায়দানৰ এই দিনটোৱে আমাক ঐক্যবদ্ধ আৰু একেলগে আগবঢ়াৰ শিক্ষা দিয়ে৷’

প্ৰধানমন্ত্ৰীয়ে কয় যে উচ্চতম ন্যায়ালয়ে সকলো পক্ষৰ যুক্তি-যুক্ততা ধৈৰ্য সহকাৰে শুনে আৰু সৰ্বসন্মত ৰায়দান দি ইয়াৰ অসাধাৰণ দৃঢ়তা প্ৰদৰ্শন কৰে৷

প্ৰধানমন্ত্ৰীয়ে পুনৰ কয়, ‘আজিৰ ৰায়দানেৰে সন্মানীয় উচ্চতম ন্যায়ালয়ে এয়া প্ৰমাণ কৰিলে যে সংবিধান আৰু আইনৰ গণ্ডীৰ ভিতৰত থাকিও জটিল সমস্যা সমাধান কৰিব পাৰি৷ আমি এই ৰায়দানৰ পৰা শিক্ষা ল’ব পাৰো যে কিছু পলম হ’লেও আমি ধৈৰ্য ধৰা উচিত৷’

প্ৰধানমন্ত্ৰীয়ে কয় যে উচ্চতম ন্যায়ালয়ে ৰাম মন্দিৰ নিৰ্মাণ কৰিবলৈ সিদ্ধান্ত দিছে আৰু এই সিদ্ধান্তই দেশৰ প্ৰতিগৰাকী নাগৰিকক ৰাষ্ট্ৰ নিৰ্মাণৰ দায়িত্ব সুচাৰুৰূপে পালন কৰিবলৈ সোঁৱৰাই দিয়ে৷ আমাৰ মাজত শান্তি, সম্প্ৰীতি, ভাতৃত্ববোধ, বন্ধুত্ব আৰু একতা দেশৰ উন্নয়নৰ বাবে অতি গুৰুত্বপূৰ্ণ৷

***

VRRK/NG/MI/MS