মাডুৰাই আৰু তামিলনাডুৰ পাৰ্শ্বৱৰ্তী অঞ্চলৰ স্বাস্থ্যসেৱা ব্যৱস্থালৈ বৃহৎ উদগণি কঢ়িয়াই প্ৰধানমন্ত্ৰী নৰেন্দ্ৰ মোদীয়ে আজি মাডুৰাইত এইমছৰ আধাৰশিলা স্থাপন কৰাৰ লগতে আন কেইবাটাও প্ৰকল্প উদ্বোধন কৰে৷

নতুন এইমছখন মাডুৰাইৰ থোপ্পুৰত স্থাপন কৰা হ’ব৷ ইয়ে অঞ্চলটোত উন্নত স্বাস্থ্যসেৱা, চিকিৎসা শিক্ষা আৰু গৱেষণাৰ ক্ষেত্ৰখনক এক নতুন মাত্ৰা প্ৰদান কৰিব৷ এই স্থানত অৱস্থিত হোৱা বাবে এইমছখনে দক্ষিণ তামিলনাডুৰ পিছপৰা জিলাসমূহৰ ৰাইজক বিশেষভাৱে উপকৃত কৰিব পাৰিব৷

মাডুৰাইত গোট খোৱা বৃহৎ পৰিমাণৰ জনসমাগমক সম্বোধন কৰি প্ৰধানমন্ত্ৰীয়ে কয়, ‘মাডুৰাইত আজি এইমছ মুকলিয়ে আমাৰ এক ভাৰত শ্ৰেষ্ঠ ভাৰতৰ সপোনক প্ৰতিফলিত কৰে৷ দিল্লীৰ এইমছ প্ৰতিষ্ঠানে স্বাস্থ্যসেৱা খণ্ডত এক ব্ৰেণ্ড নাম হিচাপে পৰিচিত হৈছে৷ মাডুৰাইত এইমছৰ আধাৰশিলা স্থাপন কৰি আমি ক’ব পাৰো স্বাস্থ্যখণ্ডৰ এই ব্ৰেণ্ড কাশ্মীৰৰ পৰা মাডুৰাই, গুৱাহাটীৰ পৰা গুজৰাটলৈ—দেশৰ প্ৰতিটো প্ৰান্তলৈ লৈ যোৱা হ’ব৷ মাডুৰাইৰ এইমছ প্ৰতিষ্ঠানে সমগ্ৰ তামিলনাডুৰ জনসাধাৰণক উপকৃত কৰিব৷’
 

প্ৰধানমন্ত্ৰীয়ে লগতে মাডুৰাইৰ ৰাজাজী মেডিকেল কলেজ, থানঝাভূৰ মেডিকেল কলেজ আৰু তিৰুনেলভেলি মেডিকেল কলেজৰ ছুপাৰ স্পেচীয়েলিটী ব্ল’ক প্ৰধানমন্ত্ৰী স্বচ্ছ সুৰক্ষা যোজনাৰ অধীনত  উদ্বোধন কৰে৷ এই যোজনাৰ লক্ষ্য হ’ল দেশৰ ৭৩খন মেডিকেল কলেজৰ উন্নীতকৰণ৷

স্বাস্থ্য খণ্ডৰ প্ৰতি চৰকাৰৰ গুৰুত্বৰ কথা উল্লেখ কৰি প্ৰধানমন্ত্ৰীয়ে কয় যে প্ৰতিগৰাকী ব্যক্তিক স্বাস্থ্যৱান কৰি ৰখা আৰু স্বাস্থ্যসেৱা সুলভ কৰা আমাৰ চৰকাৰৰ প্ৰধান লক্ষ্য৷ মিছন ইন্দ্ৰধনুষ, প্ৰধানমন্ত্ৰী মাতৃ বন্দনা যোজনা আৰু প্ৰধানমন্ত্ৰী সুৰক্ষিত মাতৃত্ব অভিযান আদিৰ দৰে আঁচনিয়ে ক্ষিপ্ৰতাৰে স্বাস্থ্যসেৱা উন্নত কৰিছে৷ যোৱা চাৰি বছৰত দেশত মেডিকেল আসনৰ সংখ্যা ৩০%লৈ বৃদ্ধি পাইছে৷

আয়ুস্মান ভাৰত সন্দৰ্ভত প্ৰধানমন্ত্ৰীয়ে কয় যে এই আঁচনিৰ অধীনত তামিলনাডুৰ ১ কোটি ৫৭লাখ লোক জড়িত হৈছে৷ মাত্ৰ তিনি মাহৰ ভিতৰতে তামিলনাডুৰ প্ৰায় ৮৯০০ লোকে আঁচনিখনৰদ্বাৰা উপকৃত হৈছে আৰু চিকিৎসালয়ত ভৰ্তি হোৱা ৰাজ্যখনৰ ৰোগীৰ বাবে ২০০ কোটিৰো অধিক ধন মুকলি কৰি দিয়া হৈছে৷ তামিলনাডুত ইতিমধ্যে ১৩২০ টা স্বাস্থ্য আৰু আৰোগ্য কেন্দ্ৰ মুকলি হোৱাক লৈ তেওঁ সন্তুষ্টি ব্যক্ত কৰে৷
 

প্ৰধানমন্ত্ৰীয়ে আজি ৰাজ্যখনত ১২ টা ডাকঘৰ পাছপ’ৰ্ট সেৱা কেন্দ্ৰও উদ্বোধন কৰে৷ তেওঁ কয় ‘দেশৰ নাগৰিকৰ জীৱন-ধাৰণৰ মান উন্নত কৰাৰ এয়া আন এক উদাহৰণ৷’

মাডুৰাইৰ পৰা তেওঁ কোচি অভিমূখে ৰাওনা হয়৷

*****

AKT/AK/MS