पत्र सूचना कार्यालय

ପ୍ରମୁଖ ବିନ୍ଦୁ

• ଡିସେମ୍ବର ୨୦୨୩ ସୁଦ୍ଧା ଦେଶରେ ୩୦ଟି ଅମୃତ ଭାରତ ଏକ୍ସପ୍ରେସ ଟ୍ରେନ କାର୍ଯ୍ୟକ୍ଷମ ହୋଇଛି, ଯେଉଁଥିରେ ୯ଟି ନୂଆ ସେବା ଯୋଡ଼ାଯାଇ ଦେଶବ୍ୟାପୀ ଏହାର ପରିସରକୁ ବିସ୍ତାର କରାଯାଇଛି।
• ପ୍ରତି ୧,୦୦୦ କିଲୋମିଟର ପିଛା ପ୍ରାୟ ୫୦୦ ଟଙ୍କା ଭଡ଼ା ଏବଂ କୌଣସି ‘ଡାଇନାମିକ ପ୍ରାଇସିଂ’ ବ୍ୟବସ୍ଥା ନଥିବାରୁ, ଏହି ନନ୍-ଏସି ସ୍ଲିପର ଯାତ୍ରା ସାଧାରଣ ଯାତ୍ରୀଙ୍କ ପାଇଁ ବେଶ୍ ସୁଲଭ ହୋଇପାରିଛି।
• ଏହି ନୂତନ ରୁଟ୍ ଗୁଡ଼ିକ ଉତ୍ତର-ପୂର୍ବ, ପୂର୍ବ, କେନ୍ଦ୍ରୀୟ, ପଶ୍ଚିମ ଏବଂ ଦକ୍ଷିଣ ଭାରତକୁ ଯୋଡ଼ିବା ସହ ସୀମାନ୍ତ ଅଞ୍ଚଳ, ପ୍ରମୁଖ ସହର ଏବଂ ତୀର୍ଥସ୍ଥଳୀଗୁଡ଼ିକୁ ସଂଯୋଗ କରୁଛି।

ଦୈନନ୍ଦିନ ଯାତ୍ରାର ସଶକ୍ତିକରଣ

ଭାରତର ସାମାଜିକ ଏବଂ ଅର୍ଥନୈତିକ ବ୍ୟବସ୍ଥାରେ ଭାରତୀୟ ରେଳବାଇ ଏକ ମେରୁଦଣ୍ଡ ଭାବରେ କାର୍ଯ୍ୟ କରିଆସୁଛି। ଏହା ବିଭିନ୍ନ ଭୌଗୋଳିକ ପରିବେଶ ଏବଂ ବିସ୍ତୃତ ଦୂରତା ମଧ୍ୟରେ ପିଢ଼ି ପରେ ପିଢ଼ି ଧରି ଯାତ୍ରୀମାନଙ୍କୁ ସେବା ଯୋଗାଇ ଆସୁଛି। ସୁଲଭ ପରିବହନର ଜୀବନରେଖା ଭାବେ, ଲୋକଙ୍କୁ, ବଜାରକୁ ଏବଂ ସୁଯୋଗକୁ ଯୋଡ଼ିବାରେ ଭାରତୀୟ ରେଳବାଇ ଏକ ପ୍ରମୁଖ ଭୂମିକା ଗ୍ରହଣ କରିଛି। ବିଶେଷ କରି ସେହିମାନଙ୍କ ପାଇଁ ଏହା ଅତ୍ୟନ୍ତ ଗୁରୁତ୍ୱପୂର୍ଣ୍ଣ, ଯେଉଁମାନଙ୍କ ପାଇଁ ରେଳ ଯାତ୍ରା କେବଳ ଏକ ବିକଳ୍ପ ନୁହେଁ ବରଂ ଏକ ଦୈନନ୍ଦିନ ଆବଶ୍ୟକତା। ଭାରତର ପ୍ରଥମ ରେଳ ଯାତ୍ରାର ପ୍ରାୟ ଦୁଇ ଶତାବ୍ଦୀ ପରେ ମଧ୍ୟ ଭାରତୀୟ ରେଳବାଇ କୋଟି କୋଟି ଲୋକଙ୍କ ଗମନାଗମନ କ୍ଷେତ୍ରରେ ପରିବର୍ତ୍ତନ ଜାରି ରଖିଛି। ପୂର୍ବରୁ କେବଳ ପ୍ରିମିୟମ ସେବାରେ ଉପଲବ୍ଧ ଥିବା ଆରାମ, ସୁବିଧା ଏବଂ ବିଶ୍ୱସନୀୟତାକୁ ସାଧାରଣ ଯାତ୍ରୀଙ୍କ ନିକଟରେ ପହଞ୍ଚାଇ ଭାରତୀୟ ରେଳବାଇ ଏକ ସମାବେଶୀ ପରିବହନ ବ୍ୟବସ୍ଥା ଗଠନ କରିଛି। ଏହାର ମୁଖ୍ୟ ଲକ୍ଷ୍ୟ ସର୍ବଦା ସୁରକ୍ଷା ଏବଂ ଯାତ୍ରୀ-କୈନ୍ଦ୍ରିକ ଆଭିମୁଖ୍ୟ ଉପରେ ରହିଆସିଛି।

ଏହି ଦୂରଦୃଷ୍ଟିକୁ ସାକାର କରିବା ପାଇଁ ‘ଅମୃତ ଭାରତ ଏକ୍ସପ୍ରେସ’ ସାଧାରଣ ଯାତ୍ରୀଙ୍କ ପାଇଁ ଏକ ଗୁରୁତ୍ୱପୂର୍ଣ୍ଣ ମାଇଲଖୁଣ୍ଟ ଭାବରେ ଉଭା ହୋଇଛି। ଏହାକୁ ‘ଅମୃତ କାଳ’ର ଏକ ପ୍ରମୁଖ ପଦକ୍ଷେପ ଭାବରେ ଆରମ୍ଭ କରାଯାଇଥିଲା। ଡିସେମ୍ବର ୨୦୨୩ରେ ଏହାର ଶୁଭାରମ୍ଭ ପରଠାରୁ ୩୦ଟି ଅମୃତ ଭାରତ ଏକ୍ସପ୍ରେସ ଟ୍ରେନ କାର୍ଯ୍ୟକ୍ଷମ ହୋଇସାରିଛି ଏବଂ ଆଉ ୯ଟି ନୂଆ ସେବା ଆରମ୍ଭ କରାଯିବାକୁ ଯାଉଛି। ଏହି ରୁଟ୍‌ଗୁଡ଼ିକ ପୂର୍ବ ଏବଂ ହିମାଳୟ ଅଞ୍ଚଳକୁ ଦକ୍ଷିଣ, ପଶ୍ଚିମ ଏବଂ କେନ୍ଦ୍ରୀୟ ଭାରତର ପ୍ରମୁଖ ଗନ୍ତବ୍ୟ ସ୍ଥଳଗୁଡ଼ିକ ସହ ଯୋଡ଼ି ଯୋଗାଯୋଗ ବ୍ୟବସ୍ଥାକୁ ସୁଦୃଢ଼ କରିବ। ଏହା ସମସ୍ତଙ୍କ ପାଇଁ ସୁଲଭ, ଆରାମଦାୟକ ଏବଂ ବିଶ୍ୱସନୀୟ ଯାତ୍ରା ପ୍ରତି ଦେଶର ପ୍ରତିବଦ୍ଧତାକୁ ଅଧିକ ମଜବୁତ କରୁଛି।

ଅମୃତ ଭାରତ ଏକ୍ସପ୍ରେସ: ଚିନ୍ତାଧାରା ଏବଂ ଉଦ୍ଦେଶ୍ୟ

ଅମୃତ ଭାରତ ଏକ୍ସପ୍ରେସ ହେଉଛି ଭାରତୀୟ ରେଳବାଇ ଦ୍ୱାରା ଆରମ୍ଭ କରାଯାଇଥିବା ଏକ ଆଧୁନିକ, ନନ୍-ଏସି   ଦୂରଗାମୀ ସ୍ଲିପର ଶ୍ରେଣୀର ରେଳ ସେବା, ଯାହାର ଲକ୍ଷ୍ୟ ହେଉଛି ଯାତ୍ରୀମାନଙ୍କୁ ବିଶ୍ୱସନୀୟ, ସୁଲଭ ଏବଂ ଆରାମଦାୟକ ଯାତ୍ରା ଯୋଗାଇଦେବା। ବିଶେଷ କରି ପର୍ବପର୍ବାଣୀ ଏବଂ ଅଧିକ ପ୍ରବାସୀ ଯାତ୍ରା କରୁଥିବା ସମୟରେ ପ୍ରବଳ ଯାତ୍ରୀ ଭିଡ଼କୁ ନିୟନ୍ତ୍ରଣ କରିବା ପାଇଁ ଏହାକୁ ପରିକଳ୍ପନା କରାଯାଇଛି। ପ୍ରତି ୧,୦୦୦ କିଲୋମିଟର ପାଇଁ ପ୍ରାୟ ୫୦୦ ଟଙ୍କା ଭଡ଼ା ଏବଂ ସ୍ୱଳ୍ପ ତଥା ମଧ୍ୟମ ଦୂରତା ପାଇଁ ଆନୁପାତିକ ଭାବେ କମ୍ ଦର ସହିତ, ଏହି ସେବା ଏକ ସରଳ ଏବଂ ସ୍ୱଚ୍ଛ ଭଡ଼ା ବ୍ୟବସ୍ଥା ଅନୁସରଣ କରେ, ଯେଉଁଥିରେ କୌଣସି ‘ଡାଇନାମିକ ପ୍ରାଇସିଂ’ ବ୍ୟବସ୍ଥା ନାହିଁ। ଦୂରତା ଏବଂ ସୁଯୋଗ ଅଭାବରୁ ପୃଥକ ହୋଇ ରହିଥିବା ଅଞ୍ଚଳଗୁଡ଼ିକୁ ଯୋଡ଼ିବା ପାଇଁ ଅମୃତ ଭାରତ ଏକ୍ସପ୍ରେସ ନିଯୁକ୍ତି, ଶିକ୍ଷା ଏବଂ ପାରିବାରିକ ଆବଶ୍ୟକତା ପାଇଁ ଯାତ୍ରାକୁ ସୁଗମ କରିଥାଏ। ସମଗ୍ର ଦେଶରେ ସୁଲଭ ଦୂରପାଲ୍ଲା ସଂଯୋଗୀକରଣକୁ ବିସ୍ତାର କରିବା ପାଇଁ ଭାରତର ନିରନ୍ତର ପ୍ରୟାସର ଏହା ଏକ ପ୍ରମୁଖ ଅଂଶ।

ଅମୃତ ଭାରତ ଟ୍ରେନଗୁଡ଼ିକ ସମ୍ପୂର୍ଣ୍ଣ ରୂପେ ନନ୍-ଏସି ଅଟେ। ଏଥିରେ ୧୧ଟି ସାଧାରଣ ଶ୍ରେଣୀ କୋଚ୍, ୮ଟି ସ୍ଲିପର ଶ୍ରେଣୀ କୋଚ୍, ୧ଟି ପ୍ୟାଣ୍ଟ୍ରି କାର୍ ଏବଂ ୨ଟି ଗାର୍ଡ ଭ୍ୟାନ୍ ସହିତ ଦ୍ୱିତୀୟ ଶ୍ରେଣୀ-ତଥା-ଲଗେଜ୍ କୋଚ୍ ରହିଛି, ଯେଉଁଥିରେ ଭିନ୍ନକ୍ଷମଙ୍କ ପାଇଁ ସ୍ୱତନ୍ତ୍ର କମ୍ପାର୍ଟମେଣ୍ଟର ସୁବିଧା ଅଛି। ସାଧାରଣ ଜନତାଙ୍କ ଆବଶ୍ୟକତାକୁ ଦୃଷ୍ଟିରେ ରଖି ଏହାର ନକ୍ସା ପ୍ରସ୍ତୁତ ଓ ନିର୍ମାଣ କରାଯାଇଛି। ଏହି ଟ୍ରେନଗୁଡ଼ିକର ମୁଖ୍ୟ ଉଦ୍ଦେଶ୍ୟ ହେଉଛି ନନ୍-ଏସି ବର୍ଗର ଯାତ୍ରୀମାନଙ୍କୁ ଏକ ଆଧୁନିକ, ଆରାମଦାୟକ ଏବଂ ଉଚ୍ଚମାନର ଯାତ୍ରା ଅନୁଭୂତି ପ୍ରଦାନ କରିବା।

ପରିସରର ବିସ୍ତାର: ନଅଟି ନୂତନ ଅମୃତ ଭାରତ ଏକ୍ସପ୍ରେସ୍ ଟ୍ରେନ

ନଅଟି ନୂତନ ଅମୃତ ଭାରତ ଏକ୍ସପ୍ରେସ ଟ୍ରେନର ଶୁଭାରମ୍ଭ ଏହି ନେଟୱାର୍କର ଏକ ଗୁରୁତ୍ୱପୂର୍ଣ୍ଣ ସମ୍ପ୍ରସାରଣକୁ ସୂଚାଉଛି। ଏହି ନୂତନ ସେବାଗୁଡ଼ିକର ଲକ୍ଷ୍ୟ ହେଉଛି ଦୂରଗାମୀ ସଂଯୋଗୀକରଣକୁ ସୁଦୃଢ଼ କରିବା ଏବଂ ଦେଶର ପ୍ରମୁଖ ଅଞ୍ଚଳଗୁଡ଼ିକରେ ବୃଦ୍ଧି ପାଉଥିବା ଯାତ୍ରୀଙ୍କ ଚାହିଦାକୁ ପୂରଣ କରିବା।

ଭାରତର ଅଷ୍ଟଲକ୍ଷ୍ମୀ ଉତ୍ତର-ପୂର୍ବାଞ୍ଚଳକୁ ଅଧିକ ଶକ୍ତି ଦେଇଛି କାମାକ୍ଷା-ରୋହତକ ଅମୃତ ଭାରତ ଏକ୍ସପ୍ରେସ 

ଆସାମର ଏକ ପ୍ରମୁଖ ଆଧ୍ୟାତ୍ମିକ କେନ୍ଦ୍ର କାମାକ୍ଷାକୁ ହରିୟାଣାର ରୋହତକ ସହିତ ସଂଯୋଗ କରୁଥିବା ଏହି ଅମୃତ ଭାରତ ଏକ୍ସପ୍ରେସ, ଉତ୍ତର-ପୂର୍ବ ଏବଂ ଉତ୍ତର ଭାରତ ମଧ୍ୟରେ ସଂଯୋଗୀକରଣକୁ ଅଧିକ ମଜବୁତ କରୁଛି।

• ଏହା ଆସାମ, ପଶ୍ଚିମବଙ୍ଗ, ବିହାର, ଉତ୍ତର ପ୍ରଦେଶ, ଦିଲ୍ଲୀ ଏବଂ ହରିୟାଣା ମଧ୍ୟରେ ଏକ ସାପ୍ତାହିକ ସେବା ଭାବରେ କାର୍ଯ୍ୟ କରେ, ଯାହା ଯାତ୍ରୀଙ୍କୁ ସୁଲଭ ଏବଂ ଆରାମଦାୟକ ଯାତ୍ରା ପ୍ରଦାନ କରେ।
• ଟ୍ରେନ୍ ସମୟସୂଚୀ:
  • ପ୍ରତି ଶୁକ୍ରବାର ରାତି ୧୦:୦୦ଟାରେ କାମାକ୍ଷାରୁ ଛାଡ଼ି ରବିବାର ଅପରାହ୍ନ ୨:୪୫ଟାରେ ରୋହତକରେ ପହଞ୍ଚେ।
  • ଫେରନ୍ତା ଯାତ୍ରାରେ ରବିବାର ରାତି ୧୦:୧୦ଟାରେ ରୋହତକରୁ ଛାଡ଼ି ମଙ୍ଗଳବାର ମଧ୍ୟାହ୍ନ ୧୨:୧୫ଟାରେ କାମାକ୍ଷାରେ ପହଞ୍ଚେ।
• ଏହା ଛଅଟି ରାଜ୍ୟର ଅନେକ ଜିଲ୍ଲାକୁ ସଂଯୋଗ କରେ ଏବଂ କାମାକ୍ଷା ମନ୍ଦିର ତଥା ବାରାଣସୀର ଗଙ୍ଗାଘାଟ ଭଳି ପର୍ଯ୍ୟଟନ ସ୍ଥଳୀ ଦେଇ ଗତି କରେ, ଯାହା ଗମନାଗମନ, ପର୍ଯ୍ୟଟନ ଏବଂ ଆଞ୍ଚଳିକ ସମ୍ପର୍କକୁ ବୃଦ୍ଧି କରିବାରେ ସହାୟକ ହୁଏ।

ଦିବ୍ରୁଗଡ଼-ଲକ୍ଷ୍ନୌ ଅମୃତ ଭାରତ ଏକ୍ସପ୍ରେସ: ପୂର୍ବୋଦୟରୁ ଭାରତ ଉଦୟ

ଉତ୍ତରପୂର୍ବାଞ୍ଚଳ ଏବଂ ଉତ୍ତର ଭାରତ ଭିତରେ ରେଳ ସମ୍ପର୍କ ସ୍ଥାପନ କରେ ଦିବ୍ରୁଗଡ଼-ଲକ୍ଷ୍ନୌ ଅମୃତ ଭାରତ ଏକ୍ସପ୍ରେସ।

ଏହା ଆସାମର ଡିବ୍ରୁଗଡ଼ରୁ ଯାତ୍ରା ଆରମ୍ଭ କରି ନାଗାଲାଣ୍ଡର ଡିମାପୁର ଦେଇ ଗତି କରେ, ଯାହା ଫଳରେ ସୀମାନ୍ତ ଅଞ୍ଚଳଗୁଡ଼ିକ ଉତ୍ତର ପ୍ରଦେଶ ସହିତ ସିଧାସଳଖ ସଂଯୋଗ ହୋଇପାରୁଛି।

• ଏହି ଟ୍ରେନ୍ କାଜିରଙ୍ଗା ଜାତୀୟ ଉଦ୍ୟାନ (ୟୁନେସ୍କୋ ବିଶ୍ୱ ଐତିହ୍ୟ ସ୍ଥଳ), କାମାକ୍ଷା ମନ୍ଦିର, ବିକ୍ରମଶିଳା ମହାବିହାର, ଅଯୋଧ୍ୟା ଏବଂ ଲକ୍ଷ୍ନୌ ଭଳି ପ୍ରମୁଖ ପର୍ଯ୍ୟଟନ ଓ ଆଧ୍ୟାତ୍ମିକ ସ୍ଥଳଗୁଡ଼ିକ ଦେଇ ଗତି କରେ।
• ତୀର୍ଥସ୍ଥଳୀ ଏବଂ ପ୍ରମୁଖ ସହରଗୁଡ଼ିକୁ ସଂଯୋଗ କରୁଥିବାରୁ ଏହା ପର୍ଯ୍ୟଟନ, ସ୍ଥାନୀୟ ବାଣିଜ୍ୟ, କ୍ଷୁଦ୍ର ବ୍ୟବସାୟ ଏବଂ ନିଯୁକ୍ତି ପାଇଁ ଗମନାଗମନକୁ ବୃଦ୍ଧି କରିବ ବୋଲି ଆଶା କରାଯାଉଛି।

ନ୍ୟୁ ଜଲପାଇଗୁଡ଼ି-ନାଗରକୋଇଲ୍ ଅମୃତ ଭାରତ ଏକ୍ସପ୍ରେସ: ଡୁଆର୍ସରୁ ନୀଳଗିରି

ଭାରତର ପୂର୍ବ ହିମାଳୟ ପାଦଦେଶକୁ ଦେଶର ଦକ୍ଷିଣ ସୀମା ସହିତ ଯୋଡ଼ୁଥିବା ଏହି ରେଳ ସେବା ଜାତୀୟ ସଂହତି ଏବଂ ଦୂରଗାମୀ ସଂଯୋଗୀକରଣକୁ ସୁଦୃଢ଼ କରୁଛି।

• ଭୂଟାନ ଏବଂ ବାଂଲାଦେଶ ନିକଟବର୍ତ୍ତୀ ଏକ ପ୍ରମୁଖ ସୀମାନ୍ତ କେନ୍ଦ୍ର ନ୍ୟୁ ଜଲପାଇଗୁଡ଼ିକୁ କନ୍ୟାକୁମାରୀ ଜିଲ୍ଲାର ନାଗରକୋଇଲ୍ ସହିତ ସଂଯୋଗ କରେ।
• ସୀମାନ୍ତ ଅଞ୍ଚଳ, ବନ୍ଦର, ଶିଳ୍ପାଞ୍ଚଳ ଏବଂ ଆଭ୍ୟନ୍ତରୀଣ ଅଞ୍ଚଳଗୁଡ଼ିକୁ ଯୋଡ଼ୁଥିବା ଏହି ଗୁରୁତ୍ୱପୂର୍ଣ୍ଣ କରିଡରରେ ଏକ ସାପ୍ତାହିକ ସେବା ଭାବରେ ଏହା କାର୍ଯ୍ୟ କରେ।
• ଏହା ଦାର୍ଜିଲିଂ-ଡୁଆର୍ସ, ବିଶାଖାପାଟଣା ବେଳାଭୂମି, ମଦୁରାଇ (ମୀନାକ୍ଷୀ ମନ୍ଦିର) ଏବଂ କୋଏମ୍ବାଟୁର ଭଳି ପର୍ଯ୍ୟଟନ ସ୍ଥଳୀ ଦେଇ ଗତି କରି ପର୍ଯ୍ୟଟନ ଓ ଆଞ୍ଚଳିକ ବିକାଶରେ ସହାୟକ ହୁଏ।

ନ୍ୟୁ ଜଲପାଇଗୁଡ଼ି-ତିରୁଚିରାପଲ୍ଲୀ ଅମୃତ ଭାରତ ଏକ୍ସପ୍ରେସ: ଦାର୍ଜିଲିଂ ପାଦଦେଶରୁ ଶିକ୍ଷା କେନ୍ଦ୍ର ପର୍ଯ୍ୟନ୍ତ

ଏହି ସେବା ଉତ୍ତର-ପୂର୍ବ ଭାରତର ପ୍ରବେଶ ଦ୍ୱାରରୁ ତାମିଲନାଡୁର ଶିକ୍ଷା ଏବଂ ମନ୍ଦିର କେନ୍ଦ୍ର ପର୍ଯ୍ୟନ୍ତ ଏକ ଦୂରପାଲ୍ଲା ରେଳ କରିଡର ସୃଷ୍ଟି କରେ।

• ଏହା ଏକ ରଣନୈତିକ ଗୁରୁତ୍ୱପୂର୍ଣ୍ଣ ସୀମାନ୍ତ ଷ୍ଟେସନ ନ୍ୟୁ ଜଲପାଇଗୁଡ଼ିରୁ ଆରମ୍ଭ ହୋଇ ତିରୁଚିରାପଲ୍ଲୀ ସହିତ ସଂଯୋଗ କରେ।
• ଏହି ଟ୍ରେନ୍ ଆଗ୍ରା, ପ୍ରୟାଗରାଜ, ଭୁବନେଶ୍ୱର, କାବେରୀ ଡେଲ୍ଟା, ତଞ୍ଜାଭୁର ଏବଂ ଚେନ୍ନାଇ ଭଳି ସ୍ଥାନ ଦେଇ ଗତି କରେ।
• ଏହା ବଜାର, ପର୍ଯ୍ୟଟନ କେନ୍ଦ୍ର, ଶିକ୍ଷାନୁଷ୍ଠାନ ଏବଂ ନିଯୁକ୍ତି କେନ୍ଦ୍ରଗୁଡ଼ିକୁ ସଂଯୋଗ କରି ସ୍ଥାନୀୟ ଅର୍ଥନୀତିକୁ ସମୃଦ୍ଧ କରେ।

ଆଲିପୁରଦ୍ୱାର-ବେଙ୍ଗାଲୁରୁ ଅମୃତ ଭାରତ ଏକ୍ସପ୍ରେସ: ସୀମାନ୍ତରୁ ଟେକ୍ନୋଲୋଜି କେନ୍ଦ୍ର ପର୍ଯ୍ୟନ୍ତ ସଂଯୋଗୀକରଣ

ଏକ ରଣନୈତିକ ସୀମାନ୍ତ ଜିଲ୍ଲା ଏବଂ ଭାରତର ପ୍ରଯୁକ୍ତିବିଦ୍ୟା ରାଜଧାନୀ ମଧ୍ୟରେ ସିଧାସଳଖ ରେଳ ସଂଯୋଗ ପ୍ରଦାନ କରି ଏହି ସେବା ପୂର୍ବ-ଦକ୍ଷିଣ ସଂଯୋଗୀକରଣକୁ ସୁଦୃଢ଼ କରୁଛି।

• ଏହି ସାପ୍ତାହିକ ସେବା, ଭୂଟାନ ନିକଟବର୍ତ୍ତୀ ଆଲିପୁରଦ୍ୱାରକୁ ଏସ୍‍ଏମ୍‍ଭିଟି ବେଙ୍ଗାଲୁରୁ ସହିତ ସଂଯୋଗ କରେ।
• ଟ୍ରେନ୍ ସମୟସୂଚୀ:
  • ପ୍ରତି ସୋମବାର ରାତି ୧୦:୨୫ଟାରେ ଆଲିପୁରଦ୍ୱାରରୁ ଛାଡ଼େ।
  • ପ୍ରତି ଶନିବାର ସକାଳ ୮:୫୦ଟାରେ ବେଙ୍ଗାଲୁରୁରୁ ଫେରିବା ଯାତ୍ରା ଆରମ୍ଭ କରେ।
• ଏହା ପଶ୍ଚିମବଙ୍ଗ, ବିହାର, ଓଡ଼ିଶା, ଆନ୍ଧ୍ରପ୍ରଦେଶ, ତାମିଲନାଡୁ ଏବଂ କର୍ଣ୍ଣାଟକର ଅନେକ ଜିଲ୍ଲାକୁ ସଂଯୋଗ କରି ପର୍ଯ୍ୟଟନ ଏବଂ ଅର୍ଥନୈତିକ ସଂହତିକୁ ପ୍ରୋତ୍ସାହିତ କରେ।

ଆଲିପୁରଦ୍ୱାର-ମୁମ୍ବାଇ (ପାନଭେଲ) ଅମୃତ ଭାରତ ଏକ୍ସପ୍ରେସ: ମୁମ୍ବାଇ ମହାନଗରକୁ ଉତ୍ତର-ପୂର୍ବର ପ୍ରବେଶ ଦ୍ୱାର

ଏହା ଉତ୍ତର ବଙ୍ଗଳାର ସୀମାନ୍ତ ଅଞ୍ଚଳକୁ ମୁମ୍ବାଇ ଉପକଣ୍ଠ ସହିତ ସଂଯୋଗ କରୁଥିବା ଏକ ଗୁରୁତ୍ୱପୂର୍ଣ୍ଣ ପୂର୍ବ-ପଶ୍ଚିମ ରେଳ କରିଡର।

• ସାପ୍ତାହିକ ସେବା: ଆଲିପୁରଦ୍ୱାରକୁ ପାନଭେଲ ସହିତ ସଂଯୋଗ କରେ ଏବଂ ଏହା ପଶ୍ଚିମବଙ୍ଗ, ବିହାର, ଉତ୍ତର ପ୍ରଦେଶ, ମଧ୍ୟପ୍ରଦେଶ ଏବଂ ମହାରାଷ୍ଟ୍ର ଦେଇ ଗତି କରେ।
• ଟ୍ରେନ୍ ସମୟସୂଚୀ:
  • ପ୍ରତି ଗୁରୁବାର ପ୍ରତ୍ୟୁଷରୁ ଆଲିପୁରଦ୍ୱାରରୁ ଛାଡ଼ି ଶନିବାର ସନ୍ଧ୍ୟାରେ ପାନଭେଲରେ ପହଞ୍ଚେ।
  • ଫେରନ୍ତା ଯାତ୍ରା ସୋମବାର ପାନଭେଲରୁ ଆରମ୍ଭ ହୋଇ ବୁଧବାର ଆଲିପୁରଦ୍ୱାରରେ ଶେଷ ହୁଏ।
• ଏହା ଦାର୍ଜିଲିଂ, ତ୍ରିବେଣୀ ସଙ୍ଗମ, ଚିତ୍ରକୂଟ ଧାମ ଏବଂ ତ୍ର୍ୟମ୍ବକେଶ୍ୱର ଜ୍ୟୋତିର୍ଲିଙ୍ଗ ଭଳି ପ୍ରମୁଖ ଗନ୍ତବ୍ୟ ସ୍ଥଳଗୁଡ଼ିକୁ ସଂଯୋଗ କରି ପର୍ଯ୍ୟଟନ ଏବଂ ବାଣିଜ୍ୟରେ ସହାୟକ ହୋଇଥାଏ।

ସାନ୍ତ୍ରାଗାଛି-ତାମ୍ବରାମ ଅମୃତ ଭାରତ ଏକ୍ସପ୍ରେସ: ପୂର୍ବ-ଦକ୍ଷିଣ ରେଳ ସଂଯୋଗର ସୁଦୃଢ଼ୀକରଣ

ପୂର୍ବ-ଦକ୍ଷିଣ ରେଳ ସଂଯୋଗୀକରଣକୁ ସୁଦୃଢ଼ କରି, ଏହି ସେବା ପୂର୍ବ ଭାରତକୁ ଦକ୍ଷିଣର ମହାନଗର ଏବଂ ଉପକଣ୍ଠ ଅଞ୍ଚଳ ସହିତ ଯୋଡ଼ିଥାଏ।

• କୋଲକାତା ନିକଟସ୍ଥ ସାନ୍ତ୍ରାଗାଛିକୁ ଚେନ୍ନାଇର ଉପକଣ୍ଠ କେନ୍ଦ୍ର ତାମ୍ବରମ୍ ସହିତ ସଂଯୋଗ କରେ।
• ଶିକ୍ଷା, ସ୍ୱାସ୍ଥ୍ୟସେବା ଏବଂ ବଜାରକୁ ଗମନାଗମନର ସୁବିଧା କରି ଏହା ପଶ୍ଚିମବଙ୍ଗ, ଓଡ଼ିଶା, ଆନ୍ଧ୍ରପ୍ରଦେଶ ଏବଂ ତାମିଲନାଡୁର ବିଭିନ୍ନ ଜିଲ୍ଲାକୁ ଉପକୃତ କରେ।
• ଏହା ଜଗନ୍ନାଥ ମନ୍ଦିର, କୋଣାର୍କ ସୂର୍ଯ୍ୟ ମନ୍ଦିର (ୟୁନେସ୍କୋ ସ୍ଥଳ) ଏବଂ ଶୋର୍ ଟେମ୍ପୁଲ (ୟୁନେସ୍କୋ ସ୍ଥଳ) ଭଳି ପ୍ରମୁଖ ସ୍ଥାନ ଦେଇ ଗତି କରି ପର୍ଯ୍ୟଟନ ଏବଂ ଆଞ୍ଚଳିକ ବାଣିଜ୍ୟକୁ ବୃଦ୍ଧି କରିଥାଏ।

ପୂର୍ବ ଭାରତକୁ ଜାତୀୟ ରାଜଧାନୀ ସହ ସଂଯୋଗ: ହାୱଡ଼ା-ଆନନ୍ଦ ବିହାର ଅମୃତ ଭାରତ ଏକ୍ସପ୍ରେସ

ଏହି ସେବା ପୂର୍ବ ଭାରତ ଏବଂ ଜାତୀୟ ରାଜଧାନୀ କ୍ଷେତ୍ର (NCR) ମଧ୍ୟରେ ଏକ ଦ୍ରୁତ ଏବଂ ନିର୍ଭରଯୋଗ୍ୟ ରେଳ ସଂଯୋଗ ପ୍ରଦାନ କରେ।

• ସାପ୍ତାହିକ ସେବା: ହାୱଡ଼ାକୁ ଦିଲ୍ଲୀର ଆନନ୍ଦ ବିହାର ଟର୍ମିନାଲ୍ ସହିତ ସଂଯୋଗ କରେ।
• ଟ୍ରେନ୍ ସମୟସୂଚୀ:
  • ପ୍ରତି ଗୁରୁବାର ରାତି ୧୧:୧୦ଟାରେ ହାୱଡ଼ାରୁ ଛାଡ଼ି ଶନିବାର ଭୋର ୨:୫୦ଟାରେ ଆନନ୍ଦ ବିହାରରେ ପହଞ୍ଚେ।
  • ଫେରନ୍ତା ଯାତ୍ରା ଶନିବାର ସକାଳ ୫:୧୫ଟାରେ ଆନନ୍ଦ ବିହାରରୁ ଆରମ୍ଭ ହୋଇ ରବିବାର ପୂର୍ବାହ୍ନ ୧୦:୫୦ଟାରେ ହାୱଡ଼ାରେ ପହଞ୍ଚେ।
• ଏହା ପଶ୍ଚିମବଙ୍ଗ, ବିହାର, ଝାଡ଼ଖଣ୍ଡ ଏବଂ ଉତ୍ତର ପ୍ରଦେଶର ପ୍ରମୁଖ ଜିଲ୍ଲାଗୁଡ଼ିକୁ ସେବା ପ୍ରଦାନ କରି ନିଯୁକ୍ତି ଏବଂ ପ୍ରଶାସନିକ କେନ୍ଦ୍ରଗୁଡ଼ିକୁ ଗମନାଗମନରେ ସହାୟକ ହୋଇଥାଏ।

କୋଲକାତା (ଶିଆଲଦା) - ବନାରସ ଅମୃତ ଭାରତ ଏକ୍ସପ୍ରେସ: ଆଧ୍ୟାତ୍ମିକ ସଙ୍ଗମ - ଜ୍ୟୋତିର୍ଲିଙ୍ଗରୁ ଗୁରୁଦ୍ୱାର ଘାଟ

ପୂର୍ବ ଭାରତ ଏବଂ ଦେଶର ଅନ୍ୟତମ ପ୍ରମୁଖ ଆଧ୍ୟାତ୍ମିକ କେନ୍ଦ୍ର ମଧ୍ୟରେ ଏହା ସଂଯୋଗୀକରଣକୁ ବୃଦ୍ଧି କରୁଛି।

• ଦୈନିକ ସେବା: କୋଲକାତାର ଶିଆଲଦାକୁ ବନାରସ ସହିତ ସଂଯୋଗ କରେ।
• ଟ୍ରେନ୍ ସମୟସୂଚୀ:
  • ପ୍ରତିଦିନ ସନ୍ଧ୍ୟା ୭:୩୦ଟାରେ ଶିଆଲଦାରୁ ଛାଡ଼ି ପରଦିନ ସକାଳ ୭:୨୦ଟାରେ ବନାରସରେ ପହଞ୍ଚେ।
  • ଫେରନ୍ତା ଯାତ୍ରାରେ ରାତି ୧୦:୧୦ଟାରେ ବନାରସରୁ ଛାଡ଼ି ପରଦିନ ସକାଳ ୯:୫୫ଟାରେ ଶିଆଲଦାରେ ପହଞ୍ଚେ।
• ଏହା ବୈଦ୍ୟନାଥ ଧାମ ଜ୍ୟୋତିର୍ଲିଙ୍ଗ, ତଖ୍‌ତ ଶ୍ରୀ ପାଟନା ସାହିବ, କାଶୀ ବିଶ୍ୱନାଥ ମନ୍ଦିର ଏବଂ ସାରନାଥ ଭଳି ତୀର୍ଥସ୍ଥଳୀ ଦେଇ ଗତି କରେ, ଯାହା ଧାର୍ମିକ ପର୍ଯ୍ୟଟନ ଏବଂ ଆଞ୍ଚଳିକ ବିକାଶକୁ ତ୍ୱରାନ୍ୱିତ କରେ।

ଅମୃତ ଭାରତ ଏକ୍ସପ୍ରେସ ସମାବେଶୀ ଅଭିବୃଦ୍ଧି ଏବଂ ବ୍ୟାପକ ସମ୍ପ୍ରସାରଣ ଉପରେ ଗୁରୁତ୍ୱ ଦେଇ ଭାରତର ଦୂରଗାମୀ ରେଳ ନେଟୱାର୍କକୁ ସୁଦୃଢ଼ କରିବା ଦିଗରେ ଏକ ନିର୍ଣ୍ଣାୟକ ପଦକ୍ଷେପ। ସୁଲଭ ମୂଲ୍ୟ, ବ୍ୟାପକ ଭୌଗୋଳିକ ପରିସର ଏବଂ ଯାତ୍ରୀ-କୈନ୍ଦ୍ରିକ ନକ୍ସାର ସମନ୍ୱୟ ମାଧ୍ୟମରେ ଏହା ଦେଶର ଅର୍ଥନୈତିକ ଏବଂ ସାମାଜିକ ସଂହତି ପାଇଁ ଗୁରୁତ୍ୱପୂର୍ଣ୍ଣ ଅଞ୍ଚଳଗୁଡ଼ିକର ଗମନାଗମନ ଆବଶ୍ୟକତାକୁ ପୂରଣ କରୁଛି। ଯେହେତୁ ଏହି ନେଟୱାର୍କର କ୍ରମାଗତ ବିସ୍ତାର ହେଉଛି, ଅମୃତ ଭାରତ ଏକ୍ସପ୍ରେସ ସମଗ୍ର ଦେଶରେ ଲୋକଙ୍କୁ, ଅଞ୍ଚଳକୁ ଏବଂ ସୁଯୋଗକୁ ଯୋଡ଼ିବାରେ ଏକ ସ୍ଥାୟୀ ଭୂମିକା ଗ୍ରହଣ କରିବାକୁ ପ୍ରସ୍ତୁତ।