Ha ka:
19 NOV 2026 7:09PM by PIB Shillong
U Myntri ka tnad ki kam pohïing ka sorkar pdeng uba dei ruh u Myntri ba dei khmih ïa ka Tnad Cooperation, U Amit Shah, mynta ka sngi u la ai jingkren ha ka jingïalang plie paidbah ïa ka jingïalang kaba ar sngi halor ka jingïakhun pyrshah ïa ki kam lehnoh (Counter-Terrorism Conference), ha ka prokram kaba la pynlong ha nongbah New Delhi.

Ha ka jingïalang, na ka liang u Amit Shah u la pyllait paidbah ruh ïa ka kot "Fail-Safe Investigation" kaba la pynmih da ka National Investigation Agency (NIA). U kongsan ula buh maw nongrim na ka bynta ban shna ïa ka ophis treikam jong ka NIA ha Chandigarh bad ula plie paidbah ruh ïa ka jaka sah jong ki nongtrei ka NIA ha Maidangarhi, Delhi.
Nalorkata, u Amit Shah u la plie ruh lyngba ka online ïa ka portal jong ka NIA kaba tip kum ka ‘Pushti’ bad sam ruh ïa ki khusnam sha ki hynñiew ngut ki ophisar bad ki nongtrei jong ka National Investigation Agency.

Ha kane ka jingïalum, u Myntri Khynnah ka Sorkar Pdeng ba peit ïa ki Tnat Kam Poh Ïing u Shri Bandi Sanjay Kumar, u Secretary ka kam Poh Ïing ka Sorkar Pdeng u Shri Govind Mohan, u Director ka Intelligence Bureau (IB) u Dr. Mahesh Dikshit, u Special Secretary (Internal Security) ha ka Tnat Kam Poh Ïing u Shri Anand Swarup, bad u Director General jong ka National Investigation Agency (NIA) u Shri Rakesh Aggarwal, ha ryngkat kiwei ki heh ophisar ki lah ïadon ryngkat lang. Ki heh pulit ophisar na ki Jylla bad ki Union Territories, ki ophisar na ka kynhun ba leh pyrshah ïa ki kam lehnoh ne ki counter-terrorism agencies, bad ki riewshemphang na ki tnat ba ïadei lang ba kynthup ïa ka law, forensics bad ka technology ki la ïashimbynta lang ha kane ka conference.
Haba ai jingkren ha kane ka Conference, u Myntri ka Tnat Kam Poh Ïing ka Sorkar Pdeng, u Shri Amit Shah u la ong ba ka India ka la ju long ka Ri kaba la shah ktah ha ki kam lehnoh, bad ngi la ju ïakhun pyrshah ruh ïa ka jingma jong ki kam lehnoh mynta la slem bha. U la kdew ba ki bor pulit kiba na kylleng ki Jylla ki la leh shitom katba lah, hynrei la ju sakhi barabor ïa ka jingduna ha ka liang ka jingïatreilang. Katba nang ïaid ki por, bad ha ka jingsynshar jong ki sorkar kiba la ïai mih, ki jingpyrshang kiba kham pher ruh la nang pyntreikam ban jop pyrshah ïa kine ki jingduna. Mynta, da ka jinghun mynsiem ngi lah ban ong ba ha kane ka Ri kaba ïar ka jong ngi — kaba naduh ka thaiñ Kashmir shaduh ka Kanyakumari bad kaba naduh ka Dwarka shaduh ka Kamakhya — ngi la buh ïa ka rukom pynïaid ha kaba kawei ka sienjam ba ïaryntih lang ban jop pyrshah ïa ki kam lehnoh yn sa pyntreikam naduh trai kata naduh na man la ki police station.
U Shri Amit Shah u la ong ba katto katne ki jingjop ha ki jingïalehleh pyrshah ïa ki kam lehnoh ba dang shen, ka la nang pynkhlaiñ shuh shuh ïa ka jingskhem jingmut jong ka Ri jong ngi. U la ong ba dang mynnin hi ngi la ïoh sa ïa uwei u mawjam bakongsan ha kane ka jingïaleh pyrshah ïa ki kam thombor. Da ka jingpynrem noh ïa ki lehnoh Lashkar ki Latif Bhat, ka Kashmir baroh kawei mynta ka la lait na ka jingdon jong ki lehnoh kiba la kha ha kane ka Ri jong ngi. U Shah u lah kdew ruh ba kane ka la jia hadien ka jingtyllun noh jong ki 35 tylli ki snem.
U Shri Amit Shah u la ong ba ka kynhun ïasnoh jong ka Shahzad Bhatti lah dep ban pynbna ba ka dei ka kynhun lehnoh katkum ki kyndon jong ka aiñ Unlawful Activities (Prevention) Act (UAPA). Haduh palat 40 tylli eiei na ki jingtreikam jong ki la ïoh ban pynduhbor ha kylleng jong ka Ri. Ha kane ka jingïakhun pyrshah ïa kane ka kynhun ïasnoh, haduh palat 100 tylli ki mokutduma la dep ban soi bad la ïoh ban kem ïa kumba palat 271 ngut eiei ki briew. U Shah u la pynpaw ba ka dak jong ka jingtreikam kaba seisoh ka long ban kem ïa ki lehnoh bad set ïa ki hapoh phatok hashuwa ba kin lah ban pyntrei ïa kano kano ka kam thombor lehnoh ka jong ki. U la ong ba ki pulit ha man la ki Jylla ki dei ban khmihthuh bha ïa kane ka nuksa, ba kin pdiang ïa ka bad ba kin pyntreikam ïa ka ha man la ki thaiñ ba ki don.
U Myntri ka Tnat Kam Poh Ïing ka Sorkar Pdeng, u Shri Amit Shah u la ong ba naduh u snem 2019 ngi lah dep ban pyllait ïa ka sienjam treikam kaba kyrpang ban wanlam biang ïa kito kiba la phet wir shapoh India, bad haduh kumba 303 ngut eiei ki nongphetwir jong ka Ri, la ïoh ban wanlam biang na ki 36 tylli ki Ri, kaba la nang pynkhlaiñ shuh shuh ïa ka jingshngaiñ jong ka Ri jong ngi. U la pynpaw ba ka Central Bureau of Investigation (CBI) bad ka tnat Kam Poh Ïing ka la ïaleh shitom ha kane ka bynta. Ki kynhun syntiat bad ki stad-pyrkhat ki la leh ïa ka kam kaba radbah shisha ha kaban wanrah biang ïa kine ki riew phetwir kiba la rieh bad sah shabar ka ri, da kaba pyndonkam ïa ki rukom treikam kiba shong nongrim ha ka saïan. U Shah u la ong ba lada ngi thmu shisha ban rat diengkhong ïa kine ki lai tylli ki jingsniew kata — ki kam lehnoh, ki kam thombor bad ki jingsniew u drok, ka long kaba donkam ban wanlam ïa kine ki nongleh kam sniew bad baroh kito ki stad pyrkhat kiba don kti shadien, kiba rieh bad kiba shongshngaiñ ha kiwei pat ki Ri, hakhmat ki ïingbishar jong ka India.
U Amit Shah ula ong ba hapoh ka jingϊalam jong u myntri rangbahduh ka ri, u Narendra Modi, ngi la wanrah ϊa ka mat treikam ‘Zero Tolerance’ pyrshah ϊa ki kam lehnoh, bad ngi la ϊohpdiang ruh ϊa ka jingmih kaba bha na kane ka mat treikam. U la ong ruh, kum shi bynta ka jingϊaibteng ban trei shitom ha kane ka bynta, ha ka sien kaba nyngkong eh la pynkylla ϊa ka NIA Act myn ha ka 2 tarik u Nailar 2019. La wanrah ruh ϊa ki kyndon ba thymmai hapoh u pud u sam jong ka NIA bad la pynheh shuh shuh ϊa u pud u sam jong ka. U Shah ula bynrap ruh da kaba ong ba ϊa ka UAPA la dep ban pynkylla myn ha ka 14 tarik u Nailar 2019, bad hapoh jong kane la pynkupbor ϊa ka NIA ban kurup ϊa ki jingdon jingem jong ki lehnoh bad la wanrah ruh ϊa ka jingtreikam ban pynbna ϊa uno uno ne kano kano ka briew kum u ne ka lehnoh. U myntri ki kam poh ϊing ka sorkar pdeng ula ong ba ha u Nailur 2019 la dep ban pynkhreh ϊa kawei ka mat treikam ban ϊakhun pyrshah ϊa ki kam lehnoh, ϊa kaba la pynbit pynbiang khatduh ha u Nohprah 2019 hadien ka jingϊatai sani bad ki tnat treikam bapher bapher jong ka sorkar. Ha u Nailur 2022, la pynpra noh ϊa ka tnat treikam jong ka PFI. Ula ong ba ka jingpynpra noh ϊa ka tnat treikam jong ka PFI ka long ka nuksa ban pyni ba kumno ka jingleit khynra lehnoh jong ki shipai bad ki pulit jong ka India ka long kaba treikam bha. Tang ha ka shi miet, ϊa kane ka jingϊatreilang jong ki shipai bad ki pulit la pynlong ha kajuh ka por ha ki 11 tylli ki jylla, kaba la punduh pura ϊa ka tnat treikam jong ka PFI bad pynkheiñ syndon ϊa u budlum jong ka. Da kaba punduh ϊa ka tnat treikam jong ka PFI, ngi la lah ban pynduhjait ϊa kiba bun tylli ki jingeh kiba ka ri ka lah ban ϊa kynduh ha ki sngi ban nangwan. Shuh shuh u la ong ruh ba ka jingpynpra ϊa ka tnat treikam jong ka PFI ka long ka sienjam ban khanglad ϊa kiba bun tylli ki jingjia kiba lah ban wan jia ha ki sngi bad ki por ban nangwan.
U myntri ki kam pohϊing ka ri, u Amit Shah ula ϊathuh ba ka rukom treikam jong ka Multi-Agency Centre (MAC) la dep ban thaw thymmai biang sa shi sien. Ϊa ka Cyber security, ki kam khaϊi drok, ki kam sinew lyngba ka cyber bad ϊa ki jak aba don jingma na ki kam pyntriem la dep ban wanrah hapoh ka jingkitkhlieh jong ka MAC. Ha ka snem 2023, ϊa ka rukom treikam jong ka MAC, la pynthymmai da kaba pyndonkam ϊa ka jingstad teknoloji jong ka ri. La wanrah ruh ϊa ka National Memory Bank bad la pyrshang ruh ban wanrah ϊa ka rukom treikam ha ka ban buh ϊa ki jingthoh tang ha kawei ka tnat treikam. Shuh shuh ula ong ruh ba ha kane ka por, ym tang ba ϊa ki aiñ jong ka NIA la pynϊar, hynrei la pynϊar ruh ϊa ka jinglong jong ka ruh hapoh ka ri. Ha kajuh ka por, la dep ruh ban mynjur ϊa ki 16 tylli ki tnat treikam bad artylli ki zonal office jong ka. La pynkupbor ruh ϊa ka NIA ba kan pynlong ϊa ki jingtohkit bñiah na ka bynta ka jingϊada ϊa ka jingsngew jong ki nong India kiba sah Shabar ri. La khang pyrshah ruh ban ϊaroh ϊa ki kam thombor ne ki kam lehnoh. La wanrah ruh ϊa ka mat treikam kaba don 25 tylli ki mat ban ϊada ϊa ka jingbei tyngka ϊa ki kynhun kieng atiar, bad ϊa kane la dep ban khmih bñiah bha.
U Amit Shah ula ong, ba la dep ruh ban hikai pyntbit ϊa ki ophisar jong ka NIA ba kin sngewthuh ϊa ka jinglong jingman ha ka pyrthei, bad la dep ruh ban wanrah ϊa ki 70 tylli ki ϊingbishar bakyrpang jong ka NIA kiba thymmai ha kylleng ka ri. U la ong ruh ba ϊa ka jingsuk jingsaiñ la lah ban wanrah ha ki lai tylli ki jaka ba kham kynrei ki kam lehnoh, la dep ruh ban pynjulor ϊa ki tnat treikam jong ka PFI bad jong ka Shahzad Bhatti, ban la wanrah ruh ϊa ka rukom treikam katkum ka jingstad saian ban wanlam biang ϊa ki nongshah set phatok na Shabar ri. Ula pynpaw ruh ba ka jingpyntreikam ϊa ka rukom treikam bathymmai na ka bynta ka jingshngaiñ jong ki thaiñ khappud, ka jingpynduh jait ϊa ki jingtei beaiñ jong ki ñiam ha shi lynter ki jaka khappud, bad ka jingkyntiew ϊa ka jingϊatreilang hapdeng ki tnat treikam bapher bapher ban pynkhlaiñ shuh shuh ϊa ka jingshngaiñ ha ka ϊoh ka kot jong ka ri. U Shah ula ong ruh ba ka sorkar kala ϊatreilang bad shitrhem ha baroh kine ki bynta.

U Myntri ka Tnad ki Kam Pohiing jong ka Sorkar Pdeng, u Amit Shah, u la pynpaw ba ngi dang ïaid shaphrang ban ïakhun pyrshah ïa ka ki kam lehnoh lyngba ka rukom treikam kaba kynthup ïa baroh ki bynta jong ka imlang sahlang, da kaba pynkhlaiñ ïa ka jingïatreilang hapdeng ka Sorkar Pdeng bad ki Sorkar Jylla. U la ong ba kane ka jingïatreilang ka donkam ban nang pynkhlaiñ shuh shuh. U la ong ruh ba ngi la pynkhlaiñ ïa ki kyndon jong ka aiñ Unlawful Activities (Prevention) Act (UAPA) ha ka liang ka aiñ, hynrei na ka bynta ka jingiaidbeit iaid ryntih ha ka jingpynpoi ïa ki jingtip, ka donkam ban long kaba suk, kaba sted bad kaba kham skhem dei ban long lyngba ki rukom treikam kiba la seng da ki tnat sorkar. U la ban jur ba ngi dei ruh ban pynkylla ïa ka rukom trei kam jong ngi khnang ba ngin lah ban jop ha kane ka jingïakhun. Ha ka liang jong ka jingpyntreikam, ki tnat treikam ki dei ban kyntiew ïa la ki jong ki bor bad ban pynbha ïa ki tiar bad ki rukom treikam katkum ka juk mynta. Ngi dei ban buh ia ka thong ban pynkut ïa baroh ki lynti bad ki rukom ba la pyndonkam ban pynbiang pisa ïa ki kam lehnoh, kaba donkam ïa ka jingïatreilang kaba kham jan bad ki tnat wad bniah ïa ki kam pisa. U Shah u la ong ba ngin ym lah ban jop lada ngim shimkhia ban pyrshah ïa baroh ki bynta jong ka kynhun lehnoh lyngba ka jingïatreilang kaba jan, kaba ïatylli bad kaba kynthup lut ïa baroh ki bynta.
U Amit Shah u la pynpaw ba ha ka jingïakhun pyrshah ïa ki kam lehnoh, ka rukom treikam kadei ban long ba baroh ki dei ban don ïa ka juh ka thong ryngkat bad ka jingkitkhlieh kaba shai ban pynurlong ïa ki. U la ban jur ba lada ngim don ïa kajuh ka thong bad lada ym don ka jingpynshai kaba thikna halor ka jingbahkhlieh ban pynurlong ïa ki, ngin ym lah ban poi sha ka jingjop. Shuh shuh u la ong ba kane ka jingïalang ka dei ban pynmih ïa ki rai kiba shai bad kiba lah ban pyntreikam. Kaba lah ban urlong tang lada baroh kiba don bynta kin shim khia ban ïatreilang ha kane ka bynta.
U Myntri ka Tnad Kam Pohiing jong ka Sorkar Pdeng u la ong ba ka India ka donkam ban pynkhlaiñ ïa ka rukom treikam kaba shimkhia ban khanglad lypa ïa ki kam lehnoh, da kaba pynkhlaiñ ïa ki bor bad ka jinglah treikam jong ki tnat bapher bapher. U Amit Shah u la pynpaw ba dei ban pynlong ïa ka jingtohkit kaba bniah ïa baroh ki bynta jong ka kynhun lehnoh bad ban pynduh ïa ki lad bad ki bor treikam jong ka. U la ong ba lyngba ka jingtohkit kaba bniah ïa ka kynhun baroh kawei, lah ban ïada na kiba bun ki kam pyntriem shwa ba kin jia. U la ban jur ïa ka jingdonkam ban pynpoi ïa ki jingtip syntiat na ki thanat pulit sha u Director General of Police (DGP) lyngba ki kyrdan treikam bapher bapher, khnang ban lah ban shim ïa ki sienjam kiba donkam. Shuh shuh u la ong ruh ba ki Anti-Terrorism Squad (ATS) jong man la ki jylla ki donkam ban pynkhlain ia ki kynhun cyber expert jong ki, Namar ba ka jingpyndonkam ïa ka teknoloji ha ki kam lehnoh ka nang jur. U Myntri u la ban jur ruh ba ka jingtei ïa ka Quadrangular Regional Security Grid ha ki jylla kiba don ha khappud ka dei ban long kawei na ki kam ba kongsan. U la pynpaw biang ïa ka jingdonkam ban pynkhlaiñ ïa ka jinglah treikam jong ki kynhun ATS ha baroh ki jylla.
*****