Ha ka:
16 NOV 2026 7:53AM by PIB Shillong
Mynta ka sngi ngan sdang ïa ka jingleit jong nga sha Manila ban shimbynta ha ka jingïalang ki nongïalam Ri kaba 23 jong ka ASEAN-India Summit bad ba 21 jong ka East Asia Summit ha ka 17 tarik u Naiwieng 2026, halor ka jingshahkhot sngewbha jong u President ka Ri u Ferdinand R. Marcos Jr.
Ka jingïadei jong ngi bad ki Ri ASEAN ka don ha u klongsnam jong ka aiñ East Policy jong ka India bad ka ïoh ïa ka jaka ba ha pdeng duh ha ka thong MAHASAGAR jong ngi. Ki jingïateh, kiba la suhthied da ki spahsnem jong ka jingïasam ïa ki jingtip, ki dustur bad ki jinglong tynrai hapdeng ki jaitbynriew bapher bapher ki la nangsan sha ka jingïadei kaba nang kylla sha ka jingïatreilang kaba kynthup ïa ka khaiï pateng, ka jingïasnoh lyngba ka ïaid ka ïeng bad ka kren ka khana, ka jingshngaiñ ha ki jaka duriaw, ka teknoloji bad ka jingïadei ba markylliang hi hapdeng jong ki briew jong kine ki ri.
Ha ka jingïalang ASEAN-India Summit, nga khmihlynti ban ïoh ïatreilang bad ki para nongïalam ban tei halor ka jingïaid shakhmat jong ka Comprehensive Strategic Partnership jong ngi bad ban nang pynkhlaiñ bad pynsted shuh shuh ïa ki jingangnud ba ngi ïasam lang na ka bynta ka roi ka par, ka jingïasnoh lang bad ka jingkiew shaphrang ha ka jingim.
Ka jingïalang East Asia Summit pat ka plie ïa ka rynsan badonkam na ka bynta ki jingïakren ba ïadei bad ki jingeh ka thaiñ bad ka pyrthei hi baroh kawei. Nga khmihlynti ban ïasam bad ban ïa kylliang jingmut lang bad ki nongïalam kiban wan ban ïashimbynta halor kumno ban pynkhlaiñ ïa ka jingsuk, ka jingïaineh, bad ka jingïatreilang ha ka thaiñ Indo-Pacific.
Nga khmihlynti ruh ban ïoh ïakren bad ki kynhun na India kiba sah ha Philippines, kiba ka jingnohsynñiang jong ki ka la nang pynkhlaiñ shuh shuh ïa ka jingïadei lok hapdeng kine ki artylli ki ri ki jong ngi.
Nga sngewskhem ba kane ka jingleit jong nga kan sa wanrah ïa ka bor bad ka jingshitrhem ba thymmai ha ka jingïatreilang jong ka India bad ki Ri ASEAN bad ban nang pynkhlaiñ shuh shuh ïa ka jingkut jingmut bakyllum lang jong ngi ha kaban pynlong ïa ka thaiñ Indo-Pacific baroh kawei kaba dap da ka jingsuk, kaba nang kiew shaphrang bad kaba lah ban ïakhun pyrshah ïa kino kino ki jingeh.
****