ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ 'ସହକାର ସେ ସମୃଦ୍ଧି ’ ଲକ୍ଷ୍ୟକୁ ସାକାର କରିବା ଏବଂ ଦେଶରେ ସମବାୟ ଆନ୍ଦୋଳନକୁ ଆହୁରି ସୁଦୃଢ଼ କରିବା, ଆଧୁନିକୀକରଣ କରିବା ଏବଂ ଅଧିକ ସମାବେଶୀ କରିବା ଦିଗରେ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ସ୍ୱରୂପ କେନ୍ଦ୍ର ସ୍ୱରାଷ୍ଟ୍ର ତଥା ସମବାୟ ମନ୍ତ୍ରୀ ଶ୍ରୀ ଅମିତ ଶାହ ଆଜି ମହାରାଷ୍ଟ୍ରର ପୁଣେ ଜିଲ୍ଲାର ତାଲେଗାଓଁ ଦାଭାଡ଼େଠାରେ ଏନ୍.ଏଚ୍.ଇ.ସି. (ଜାତୀୟ ଭାରୀ ଇଞ୍ଜିନିୟରିଂ ସମବାୟ) ବହୁ-ରାଜ୍ୟ ସମବାୟ ସମିତିର ପୁନରୁଦ୍ଧାର ପାଇଁ ଭୂମି ପୂଜନ କରିଛନ୍ତି। ଏହି ଅବସରରେ ସେ ସମବାୟ ସମିତିର କେନ୍ଦ୍ରୀୟ ରେଜିଷ୍ଟ୍ରାର (ସି.ଆର୍.ସି.ଏସ୍.) ଙ୍କ ପଶ୍ଚିମ ଆଞ୍ଚଳିକ କାର୍ଯ୍ୟାଳୟକୁ ମଧ୍ୟ ଭର୍ଚୁଆଲ ମାଧ୍ୟମରେ ଉଦଘାଟନ କରିଥିଲେ ଏବଂ ପୁଣେରେ ଭାରତ ଟ୍ୟାକ୍ସି ସେବାର ଶୁଭାରମ୍ଭ କରିଥିଲେ। ମହାରାଷ୍ଟ୍ରର ଉପମୁଖ୍ୟମନ୍ତ୍ରୀ ଶ୍ରୀ ଏକନାଥ ସିନ୍ଦେ ଏବଂ ଶ୍ରୀମତୀ ସୁନେତ୍ରା ଅଜିତ ପାୱାର, କେନ୍ଦ୍ର ସମବାୟ ରାଷ୍ଟ୍ରମନ୍ତ୍ରୀ ଶ୍ରୀ କ୍ରିଷନ ପାଲ ଗୁର୍ଜର, କେନ୍ଦ୍ର ସମବାୟ ଏବଂ ବେସାମରିକ ବିମାନ ଚଳାଚଳ ରାଷ୍ଟ୍ରମନ୍ତ୍ରୀ ଶ୍ରୀ ମୁରଲୀଧର ମୋହୋଲ, ମହାରାଷ୍ଟ୍ରର ଉଚ୍ଚ ଏବଂ ବୈଷୟିକ ଶିକ୍ଷା ଏବଂ ସଂସଦୀୟ ବ୍ୟାପାର ମନ୍ତ୍ରୀ ଶ୍ରୀ ଚନ୍ଦ୍ରକାନ୍ତ ପାଟିଲ, ସମବାୟ ମନ୍ତ୍ରଣାଳୟର ସଚିବ ଡ. ଆଶିଷ କୁମାର ଭୁଟାନୀ ଏବଂ ଅନ୍ୟ ଅନେକ ମାନ୍ୟଗଣ୍ୟ ବ୍ୟକ୍ତି ଏହି କାର୍ଯ୍ୟକ୍ରମରେ ଉପସ୍ଥିତ ଥିଲେ।
କେନ୍ଦ୍ର ସ୍ୱରାଷ୍ଟ୍ରମନ୍ତ୍ରୀ ତାଙ୍କ ଅଭିଭାଷଣରେ ଛତ୍ରପତି ଶିବାଜୀ ମହାରାଜଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରି କହିଥିଲେ ଯେ ମହାରାଷ୍ଟ୍ରର ଭୂମି ଦେଶରେ ସମବାୟ ଆନ୍ଦୋଳନକୁ ଏକ ନୂତନ ଦିଗ ମଧ୍ୟ ଦେଇଛି। ପଦ୍ମଶ୍ରୀ ବିଠଲରାଓ ପାଟିଲ ଏବଂ ବୈକୁଣ୍ଠଭାଇ ମେହେଟ୍ଟାଙ୍କ ସମେତ ସମବାୟ ଆନ୍ଦୋଳନର ଅଗ୍ରଦୂତମାନେ ସ୍ୱାଧୀନତା ପୂର୍ବରୁ ମଧ୍ୟ ଏପରି ଏକ ବ୍ୟବସ୍ଥା ବିକଶିତ କରିବାକୁ ପ୍ରୟାସ କରିଥିଲେ ଯେଉଁଥିରେ କୃଷି ଏବଂ ବାଣିଜ୍ୟରୁ ଉତ୍ପନ୍ନ ସର୍ବାଧିକ ଲାଭ କୃଷକମାନଙ୍କ ନିକଟରେ ପହଞ୍ଚିବ।
ଶ୍ରୀ ଅମିତ ଶାହ କହିଥିଲେ ଯେ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ କେନ୍ଦ୍ର ସରକାର ଏକ ସମର୍ପିତ ସମବାୟ ମନ୍ତ୍ରଣାଳୟ ପ୍ରତିଷ୍ଠା କରିଥିଲେ, ଯାହାଦ୍ବାରା ପ୍ରାଥମିକ କୃଷି ଋଣ ସମିତି (ପାକସ୍), ଜିଲ୍ଲା ସ୍ତରୀୟ ସମବାୟ ସଂସ୍ଥା ଏବଂ ଦୁଗ୍ଧ କ୍ଷେତ୍ର କ୍ରମାଗତ ଭାବେ ସୁଦୃଢ଼ ହେବାରେ ଲାଗିଛି। କେନ୍ଦ୍ର ସରକାର ଅନେକ ଗୁରୁତ୍ୱପୂର୍ଣ୍ଣ ପଦକ୍ଷେପ ନେଇଛନ୍ତି, ଯେଉଁଥିରେ ସମବାୟ ଚିନି କାରଖାନାଗୁଡ଼ିକୁ ପାଖାପାଖି ୧୫,୦୦୦ କୋଟି ଟଙ୍କାର ରିହାତି ପ୍ରଦାନ କରିବା ଏବଂ ବାର୍ଷିକ ପାଖାପାଖି ୩,୦୦୦ କୋଟି ଟଙ୍କାର ଆୟକର ରିହାତି ପ୍ରଦାନ କରିବା ସାମିଲ ରହିଛି।
କେନ୍ଦ୍ର ସ୍ୱରାଷ୍ଟ୍ରମନ୍ତ୍ରୀ କହିଛନ୍ତି ଯେ ଚିନି କାରଖାନାଗୁଡ଼ିକ ପାଇଁ ଯନ୍ତ୍ରପାତି ଏବଂ ଉପକରଣ ଉତ୍ପାଦନ କରୁଥିବା ଏକ ପ୍ରମୁଖ ଉତ୍ପାଦନ ସୁବିଧା ଏକଦା ସେହି ଜମିରେ କାର୍ଯ୍ୟ କରୁଥିଲା ଯେଉଁଠାରେ ଆଜିର କାର୍ଯ୍ୟକ୍ରମ ଅନୁଷ୍ଠିତ ହେଉଥିଲା। ପୂର୍ବ ସରକାରଙ୍କ କାର୍ଯ୍ୟକାଳରେ ଏହି କାରଖାନାର କାର୍ଯ୍ୟ ବନ୍ଦ ହୋଇଯାଇଥିଲା। ସମବାୟ କ୍ଷେତ୍ର ପାଇଁ ଗର୍ବ ଏବଂ ସନ୍ତୋଷର ଅବସର ସ୍ୱରୂପ ସେହି ଶିଳ୍ପ ପରିସରର ପୁନଃନିର୍ମାଣ କାର୍ଯ୍ୟ ଏବେ ଆରମ୍ଭ କରାଯାଉଛି।
ଶ୍ରୀ ଅମିତ ଶାହ ଛଟ୍ ମହାପର୍ବ ଅବସରରେ ଦେଶର ଜନସାଧାରଣ, ବିଶେଷ କରି ମାଆ ଓ ଭଉଣୀମାନଙ୍କୁ ଶୁଭେଚ୍ଛା ଜଣାଇଥିଲେ। ଭଗବାନ ବିର୍ସା ମୁଣ୍ଡାଙ୍କୁ ତାଙ୍କ ୧୫୧ତମ ଜୟନ୍ତୀ ଅବସରରେ ଶ୍ରଦ୍ଧାଞ୍ଜଳି ଅର୍ପଣ କରି ସେ କହିଥିଲେ ଯେ ବ୍ୟାପକ ସ୍ୱାଧୀନତା ଆନ୍ଦୋଳନ ଗତିଶୀଳ ହେବା ପୂର୍ବରୁ ଭଗବାନ ବିର୍ସା ମୁଣ୍ଡା ଝାଡ଼ଖଣ୍ଡ ଭୂମିରୁ ଉପନିବେଶବାଦୀ ଶାସନ ବିରୁଦ୍ଧରେ ପ୍ରତିରୋଧର ଭାବନାକୁ ପ୍ରଜ୍ୱଳିତ କରିଥିଲେ। ସେ ଆଚାର୍ଯ୍ୟ ବିନୋବା ଭାବେଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରିଥିଲେ । ସେ ସ୍ମରଣ କରିଥିଲେ ଯେ ମହାତ୍ମା ଗାନ୍ଧୀଙ୍କ ଜଣେ ନିଷ୍ଠାବାନ ଅନୁଗାମୀ ବିନୋବା ଭାବେ ତାଙ୍କ ଜୀବନର ଏକ ଗୁରୁତ୍ୱପୂର୍ଣ୍ଣ ଅଂଶ ମହାରାଷ୍ଟ୍ରର ୱାର୍ଧରେ ବିତାଇଥିଲେ।
ସମବାୟ ସମିତିର କେନ୍ଦ୍ରୀୟ ରେଜିଷ୍ଟ୍ରାର (ସି.ଆର୍.ସି.ଏସ୍.) ଙ୍କ ପଶ୍ଚିମ ଆଞ୍ଚଳିକ କାର୍ଯ୍ୟାଳୟର ଉଦଘାଟନ ବିଷୟରେ ଉଲ୍ଲେଖ କରି କେନ୍ଦ୍ର ସ୍ୱରାଷ୍ଟ୍ର ଏବଂ ସମବାୟ ମନ୍ତ୍ରୀ କହିଥିଲେ ଯେ ଏହି କାର୍ଯ୍ୟାଳୟ ପ୍ରତିଷ୍ଠା ପାଇଁ ବିଭିନ୍ନ ଅଞ୍ଚଳରୁ ଦାବି କରାଯାଇଥିଲା, ଯାହା ବର୍ତ୍ତମାନ ପୁଣେରେ ସ୍ଥାପିତ ହୋଇଛି। ଏହି କାର୍ଯ୍ୟାଳୟ ମହାରାଷ୍ଟ୍ର, ଗୁଜରାଟ, ଗୋଆ, ଦାଦ୍ରା ଏବଂ ନଗର ହାଭେଲି ଏବଂ ଡାମନ ଏବଂ ଡିଉରେ ବହୁ-ରାଜ୍ୟ ସମବାୟ ସମିତି ସମ୍ବନ୍ଧୀୟ ନିୟାମକ କାର୍ଯ୍ୟ ହାତକୁ ନେବ।
ପୁଣେରେ ଭାରତ ଟ୍ୟାକ୍ସି ସେବାର ଶୁଭାରମ୍ଭ ବିଷୟରେ ଉଲ୍ଲେଖ କରି ଶ୍ରୀ ଅମିତ ଶାହ କହିଥିଲେ ଯେ ସମବାୟ ଭିତ୍ତିକ ଭାରତ ଟ୍ୟାକ୍ସି ସେବାକୁ ସାରା ଦେଶରେ ସମ୍ପ୍ରସାରିତ କରାଯିବ। ସେ କହିଥିଲେ ଯେ ଅନେକ ବର୍ଷ ଧରି, ଅନେକ ଟ୍ୟାକ୍ସି କମ୍ପାନୀ ସହିତ ଜଡ଼ିତ ଡ୍ରାଇଭରମାନଙ୍କୁ ସେମାନଙ୍କ ରୋଜଗାରର ଏକ ଅଂଶ କମିଶନ ଭାବେ ସମର୍ପଣ କରିବାକୁ ପଡ଼ୁଥିଲା ଏବଂ ଅନେକ କ୍ଷେତ୍ରରେ ଶୋଷଣର ସମ୍ମୁଖୀନ ହେବାକୁ ପଡ଼ୁଥିଲା। ସେ କହିଥିଲେ ଯେ ପୁଣେ ପରେ ନାଗପୁର, ନାସିକ, କୋହ୍ଲାପୁର ଏବଂ ସୋଲାପୁରରେ ମଧ୍ୟ ଭାରତ ଟ୍ୟାକ୍ସି ସେବା ଆରମ୍ଭ କରାଯିବା ଉଚିତ।
କେନ୍ଦ୍ର ସ୍ୱରାଷ୍ଟ୍ର ଏବଂ ସମବାୟ ମନ୍ତ୍ରୀ ଏନ୍.ଏଚ୍.ଇ.ସି. (ନ୍ୟାସନାଲ୍ ହେଭି ଇଞ୍ଜିନିୟରିଂ କୋଅପରେଟିଭ୍) ର ଭୂମି ପୂଜନ ବିଷୟରେ ଉଲ୍ଲେଖ କରି କହିଛନ୍ତି ଯେ ଏହି ଅନୁଷ୍ଠାନ ପୂର୍ବରୁ ସମାନ ସ୍ଥାନରୁ କାର୍ଯ୍ୟ କରୁଥିଲା ଏବଂ ସାରା ବିଶ୍ୱରେ ଚିନି ମିଲ୍ ଏବଂ କେନ୍ଦ୍ରୀୟ ଯନ୍ତ୍ରପାତି ଯୋଗାଇ ଦେଇଥିଲା। ସମୟକ୍ରମେ, ଶିଳ୍ପ ୟୁନିଟ୍ କାର୍ଯ୍ୟ ବନ୍ଦ କରିଦେଇଥିଲା ଏବଂ ଏହାର ପ୍ରାୟ ୧୧୦ଏକର ଜମି ବେଆଇନ ଜବରଦଖଲର ବିପଦକୁ ଅଧିକରୁ ଅଧିକ ସାମ୍ନା କରୁଥିଲା। ସମବାୟ ମନ୍ତ୍ରଣାଳୟ ଏହି ଗୁରୁତ୍ୱପୂର୍ଣ୍ଣ ସମବାୟ ଶିଳ୍ପ ସମ୍ପତ୍ତିର ପୁନରୁଦ୍ଧାର ପାଇଁ ପ୍ରୟାସ ଆରମ୍ଭ କରିଥିଲା ଏବଂ ଜାତୀୟ ଦୁଗ୍ଧ ବିକାଶ ବୋର୍ଡ (ଏନ.ଡି.ଡି.ବି.), ଅମୁଲ, ଆଇ.ପି.ଏଲ., ଆଇ.ଏଫ.ଏଫ.ସି.ଓ. ଏବଂ ଜାତୀୟ ସମବାୟ ବିକାଶ ନିଗମ (ଏନ.ସି.ଡି.ସି.) ଭଳି ଅନୁଷ୍ଠାନଗୁଡ଼ିକର ସହାୟତାରେ ଏହାର ପୁନରୁଦ୍ଧାର ପ୍ରକ୍ରିୟା ଆରମ୍ଭ କରିଥିଲା।
ଶ୍ରୀ ଅମିତ ଶାହ କହିଥିଲେ ଯେ ଏହି ସୁବିଧା ବିଦେଶୀ ବଜାରକୁ ରପ୍ତାନି ପାଇଁ କଣ୍ଟେନର ଉତ୍ପାଦନ କରିବ। ସେ କହିଥିଲେ ଯେ ଏହି ଶିଳ୍ପ କାର୍ଯ୍ୟକଳାପରୁ ମିଳୁଥିବା ଆୟ ସମବାୟ ସଂସ୍ଥାଗୁଡ଼ିକୁ ଆସିବ, ଯାହାଦ୍ୱାରା ସମବାୟ ଆଧାରିତ ଆର୍ଥିକ ବ୍ୟବସ୍ଥା ଆହୁରି ସୁଦୃଢ଼ ହେବ।
କେନ୍ଦ୍ର ସ୍ୱରାଷ୍ଟ୍ର ଏବଂ ସମବାୟ ମନ୍ତ୍ରୀ କହିଥିଲେ ଯେ ଏକ ସମୟ ଥିଲା ଯେତେବେଳେ ଏନ୍.ଏଚ୍.ଇ.ସି. ଦ୍ୱାରା ନିର୍ମିତ ଚିନି କାରଖାନାଗୁଡ଼ିକ ଜାମ୍ବିଆ, ଇଥିଓପିଆ ଏବଂ ଭିଏତନାମ ସମେତ ୧୧ଟି ଦେଶକୁ ରପ୍ତାନୀ କରାଯାଉଥିଲା। ଉତ୍ପାଦନ ସୁବିଧାରେ ଏତେ ଶକ୍ତିଶାଳୀ ଅର୍ଡର ବୁକ୍ ଥିଲା ଏବଂ ଚାହିଦା ଥିଲା ଯେ ନୂତନ ଅର୍ଡର ବିତରଣ ପାଇଁ ପ୍ରାୟ ଚାରି ବର୍ଷ ଲାଗିପାରେ ।
ଶ୍ରୀ ଅମିତ ଶାହ ସୂଚନା ଦେଇଥିଲେ ଯେ, ଏନ୍.ଏଚ୍.ଇ.ସି. ର ପୁନରୁଦ୍ଧାର ପ୍ରକ୍ରିୟାର ଅଂଶବିଶେଷ ସ୍ୱରୂପ, ଜାତୀୟ ଦୁଗ୍ଧ ବିକାଶ ବୋର୍ଡ (ଏନ୍.ଡି.ଡି.ବି.) ପ୍ରାରମ୍ଭରେ ଏହାର ପ୍ରଶାସକ ଭାବେ ଅନୁଷ୍ଠାନର ପରିଚାଳନା ଦାୟିତ୍ୱ ଗ୍ରହଣ କରିଥିଲା। ଏହାର ନିର୍ଦ୍ଦେଶକ ମଣ୍ଡଳୀର ପୁନର୍ଗଠନ କରାଯାଇଥିଲା ଏବଂ ୯ ଅକ୍ଟୋବର ୨୦୨୬ ରେ ଅନୁଷ୍ଠିତ ଏହାର ପ୍ରଥମ ବୈଠକରେ ଅନୁଷ୍ଠାନର ପୁନଃନିର୍ମାଣ ପାଇଁ ଏକ ସଂକଳ୍ପ ନିଆଯାଇଥିଲା। ଏହି ପ୍ରକ୍ରିୟାର ଅଂଶବିଶେଷ ସ୍ୱରୂପ ଆଜି ଏହି ପ୍ରକଳ୍ପର ଭୂମି ପୂଜନ କରାଯାଇଥିଲା।
କେନ୍ଦ୍ର ସ୍ୱରାଷ୍ଟ୍ର ଏବଂ ସମବାୟ ମନ୍ତ୍ରୀ କହିଛନ୍ତି ଯେ ଏନ୍.ଏଚ୍.ଇ.ସି. ର ସମସ୍ତ ଦାୟିତ୍ୱ ଏବଂ ଋଣର ପୁନଃନିର୍ଦ୍ଧାରଣ ଏବଂ ସେଗୁଡ଼ିକର ସ୍ୱଚ୍ଛ ସମାଧାନ ପାଇଁ ଏକ ଯୋଜନା ପ୍ରସ୍ତୁତ କରାଯାଇଛି। ଡିସେମ୍ବର ୨୦୨୭ ପୂର୍ବରୁ ଏହି କାରଖାନାରେ ଉତ୍ପାଦନ ଆରମ୍ଭ ହେବ ଏବଂ ଚିନି କାରଖାନାଗୁଡ଼ିକର ଉତ୍ପାଦନ ପୁଣି ଆରମ୍ଭ ହେବ ବୋଲି ସେ ଆତ୍ମବିଶ୍ୱାସ ବ୍ୟକ୍ତ କରିଥିଲେ।
କେନ୍ଦ୍ର ସ୍ୱରାଷ୍ଟ୍ରମନ୍ତ୍ରୀ ତାଙ୍କ ଅଭିଭାଷଣରେ ଦେଶର ଗଣତାନ୍ତ୍ରିକ ବ୍ୟବସ୍ଥା ଏବଂ ରାଜନୈତିକ ଦଳଗୁଡ଼ିକର ଭୂମିକା ବିଷୟରେ ମଧ୍ୟ ଉଲ୍ଲେଖ କରିଥିଲେ ଏବଂ କହିଥିଲେ ଯେ ଗତ କିଛି ବର୍ଷ ମଧ୍ୟରେ ପ୍ରମୁଖ ବିରୋଧୀ ଦଳ କ୍ରମାଗତ ଭାବେ ନିର୍ବାଚନରେ ପରାଜୟର ସମ୍ମୁଖୀନ ହୋଇଛି । ରାଜନୈତିକ ଦଳଗୁଡ଼ିକର ନିର୍ବାଚନୀ ସଫଳତା କିମ୍ବା ବିଫଳତା ସେମାନଙ୍କ ନେତୃତ୍ୱ, ପ୍ରଦର୍ଶନ ଏବଂ ଲୋକମାନଙ୍କ ଦ୍ୱାରା ସେମାନଙ୍କ ଉପରେ ପ୍ରଦର୍ଶିତ ବିଶ୍ୱାସ ଉପରେ ନିର୍ଭର କରିଥାଏ।
ଶ୍ରୀ ଅମିତ ଶାହ ପୂର୍ବ ସରକାରଙ୍କ କାର୍ଯ୍ୟକାଳ ବିଷୟରେ ଉଲ୍ଲେଖ କରି କହିଥିଲେ ଯେ ସେହି ସମୟ ମଧ୍ୟରେ ଦୁର୍ନୀତି ସମ୍ବନ୍ଧୀୟ ଅନେକ ଅଭିଯୋଗ ଏବଂ ବିବାଦ ସାମ୍ନାକୁ ଆସିଥିଲା, ଯେତେବେଳେ କି ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ ଗତ ୧୨ ବର୍ଷ ମଧ୍ୟରେ ବିଭିନ୍ନ କ୍ଷେତ୍ରରେ ବିକାଶ ଗତିଶୀଳ ହୋଇଛି। ସେ କୃଷି, ଶିଳ୍ପ ବିକାଶ, ଚନ୍ଦ୍ରର ଦକ୍ଷିଣ ମେରୁ ଅଞ୍ଚଳରେ ପହଞ୍ଚିବାରେ ଭାରତର ଐତିହାସିକ ସଫଳତା, ଷ୍ଟାର୍ଟଅପ୍ ଇକୋସିଷ୍ଟମର ସମ୍ପ୍ରସାରଣ, ରେଳବାଇର ଆଧୁନିକୀକରଣ, ବିମାନବନ୍ଦର ସଂଖ୍ୟା ପ୍ରାୟ ୧୫୦ କୁ ବୃଦ୍ଧି, ମେଟ୍ରୋ ନେଟୱାର୍କର ସମ୍ପ୍ରସାରଣ, ଜାତୀୟ ଶିକ୍ଷା ନୀତି ପ୍ରବର୍ତ୍ତନ ଏବଂ ଏକ ପୃଥକ ସମବାୟ ମନ୍ତ୍ରଣାଳୟ ପ୍ରତିଷ୍ଠା ଉପରେ ଆଲୋକପାତ କରିଥିଲେ।
କେନ୍ଦ୍ର ସ୍ୱରାଷ୍ଟ୍ରମନ୍ତ୍ରୀ ବିରୋଧୀ ଦଳ ନେତାଙ୍କୁ ପରାମର୍ଶ ଦେଇଥିଲେ ଯେ ଅନ୍ତର୍ଜାତୀୟ ମଞ୍ଚରେ ଦେଶକୁ ସମାଲୋଚନା କରିବା ଅପେକ୍ଷା ଭାରତର ଗ୍ରାମାଞ୍ଚଳର ଲୋକଙ୍କ ସହ କଥାବାର୍ତ୍ତା କରିବା ଏବଂ ସେମାନଙ୍କ ଚିନ୍ତାଧାରାକୁ ବୁଝିବା ଅଧିକ ଗୁରୁତ୍ୱପୂର୍ଣ୍ଣ। ସରକାର ହେଉ କିମ୍ବା ବିରୋଧୀ ଦଳ, ସମସ୍ତ ରାଜନୈତିକ ଦଳର ଅନ୍ତର୍ଜାତୀୟ ମଞ୍ଚରେ ଦେଶର ପ୍ରତିଷ୍ଠା, ଗଣତାନ୍ତ୍ରିକ ଅନୁଷ୍ଠାନ ଏବଂ ଜାତୀୟ ସ୍ୱାର୍ଥର ସୁରକ୍ଷା କରିବାର ଦାୟିତ୍ୱ ରହିଛି।
ନିଜର ଅଭିଭାଷଣ ଶେଷ କରି ଶ୍ରୀ ଅମିତ ଶାହ କହିଥିଲେ ଯେ ସମବାୟ କ୍ଷେତ୍ରରେ ଆଜି ଏକ ନୂତନ ଆରମ୍ଭ ହୋଇଛି। ବର୍ଷ ବର୍ଷ ଧରି ବନ୍ଦ ରହିଥିବା ପ୍ରାୟ ୧୧୦ ଏକର ପରିସରରେ ଶିଳ୍ପ ଉତ୍ପାଦନ କାର୍ଯ୍ୟକଳାପ ପୁଣି ଆରମ୍ଭ ହେବ। କାର୍ଯ୍ୟକ୍ରମ ସମୟରେ, ଏନ୍.ଏଚ୍.ଇ.ସି. ଏବଂ ଆଇ.ଡି.ଏମ୍.ସି. ଲିମିଟେଡ ମଧ୍ୟରେ ଏକ ଲେଟର ଅଫ୍ ଇଣ୍ଟେଟ (ଏଲ୍.ଓ.ଆଇ.) ବିନିମୟ କରାଯାଇଥିଲା ଏବଂ ଭାରତ ଟ୍ୟାକ୍ସି ସାରଥୀମାନଙ୍କୁ ଅଂଶୀଦାର ପ୍ରମାଣପତ୍ର ପ୍ରଦାନ କରାଯାଇଥିଲା।
HS