পোষ্ট কৰা হৈছে:
06 NOV 2026 12:43PM by PIB Guwahati
দেশজুৰি প্ৰশাসনিক দক্ষতা, পৰিষ্কাৰ-পৰিচ্ছন্নতা আৰু দায়িত্বশীল ই-আৱৰ্জনা ব্যৱস্থাপনাত গুৰুত্ব আৰোপ কৰি কেন্দ্ৰীয় শিক্ষা মন্ত্ৰালয়ৰ বিদ্যালয় শিক্ষা আৰু সাক্ষৰতা বিভাগৰ দ্বাৰা ২ৰ পৰা ৩১ অক্টোবৰলৈ বিশেষ অভিযান ৬ পালন কৰা হৈছিল। এই অভিযানে বিদ্যালয়, শিক্ষাৰ্থী, শিক্ষক আৰু সম্প্ৰদায়ক বহনক্ষম অনুশীলনৰ প্ৰচাৰ কৰিবলৈ আৰু মিছন লাইফৰ বাবে ইকো ক্লাবৰ পৃষ্ঠপোষকতাত পৰিৱেশ সজাগতা শক্তিশালী কৰিবলৈ একত্ৰিত কৰিছিল।
বিভাগ আৰু ইয়াৰ স্বায়ত্তশাসিত সংস্থাসমূহে আধৰুৱা চৰকাৰী কামৰ পৰিমাণ হ্ৰাস কৰা, বিভিন্ন শ্ৰেণীৰ ফাইলসমূহ পৰ্যালোচনা কৰা, অদৰকাৰী ফাইলসমূহ আঁতৰ কৰা আৰু ৰেকৰ্ড ব্যৱস্থাপনা শক্তিশালী কৰাত গুৰুত্ব আৰোপ কৰিছিল। এই প্ৰচেষ্টাৰ অংশ হিচাপে, ৪১,১৮১টা ফাইলৰ পৰ্যালোচনা কৰা হৈছিল আৰু ৩১,০১০টা অদৰকাৰী ফাইল আঁতৰাই পেলোৱা হৈছিল। এই অভিযানৰ ফলস্বৰূপে ১,৮৪,৮২৮ বৰ্গফুট কাৰ্যালয়ৰ স্থান মুক্ত কৰা হৈছিল আৰু আবৰ্জনা নিষ্পত্তিৰ জৰিয়তে ৬৭.২৭ লাখ টকা ৰাজহ সৃষ্টি হৈছিল। বিভাগৰ অধীনত বিদ্যালয় আৰু কাৰ্যালয়সমূহত সাত লাখৰো অধিক পৰিষ্কাৰ-পৰিচ্ছন্নতা অভিযান চলোৱা হৈছিল। বিশেষ অভিযান ৬ৰ প্ৰস্তুতিমূলক আৰু ৰূপায়ণ পৰ্য্যায়ত সমগ্ৰ দেশৰ ২.৮৫ লাখ বিদ্যালয়ৰ ২.০২ কোটি শিক্ষাৰ্থী আৰু শিক্ষকৰ দ্বাৰা ৫৮.৭৯ লাখ ই-আৱৰ্জনা সামগ্ৰী সংগ্ৰহ কৰা হৈছিল।
বিশেষ অভিযান ৬ৰ অংশ হিচাপে, ৰাজ্য, কেন্দ্ৰীয়শাসিত অঞ্চল আৰু স্বায়ত্তশাসিত সংস্থাসমূহৰ বিদ্যালয়সমূহে ২৮ অক্টোবৰত এক বৃহৎ ই-আৱৰ্জনা ব্যৱস্থাপনা অভিযানত অংশগ্ৰহণ কৰিছিল। এই পদক্ষেপৰ উদ্দেশ্য আছিল ই-আৱৰ্জনা হ্ৰাস কৰা, য'ত সম্ভৱ ইলেক্ট্ৰনিক সামগ্ৰীৰ পুনৰ ব্যৱহাৰ আৰু পুনৰুদ্ধাৰ কৰা তথা সামগ্ৰীসমূহ অনুমোদিত পুনৰ্ব্যৱহাৰকাৰী আৰু পুনৰুদ্ধাৰকৰ্তাসকলক হস্তান্তৰ কৰাটো নিশ্চিত কৰা। ৰাতিপুৱাৰ সভাত প্ৰায় ১.৮৯ লাখ বিদ্যালয়ে ই-আৱৰ্জনাৰ সন্দৰ্ভত কুইজৰ আয়োজন কৰিছিল।
শিক্ষাৰ্থীসকলে নতুন দিল্লীত পেলনীয়া ই-আৱৰ্জনা সামগ্ৰী ব্যৱহাৰ কৰি তৈয়াৰ কৰা ৱেষ্ট টু ৱাণ্ডাৰ ক্ৰিয়েচনৰ এক প্ৰদৰ্শনীৰ জৰিয়তে তেওঁলোকৰ সৃষ্টিশীলতা প্ৰদৰ্শন কৰিছিল। পেলনীয়া ইলেক্ট্ৰনিক সঁজুলি আৰু সেইবোৰৰ অংশসমূহ সৃষ্টিশীল আৰু উপযোগী বস্তু হিচাপে পুনৰ নিৰ্মাণ কৰা হৈছিল। শিক্ষা বিভাগৰ ৰাজ্যিক মন্ত্ৰী শ্ৰী জয়ন্ত চৌধুৰীয়ে একেটা দিনতে (অক্টোবৰ ২৮, ২০২৬) এই প্ৰদৰ্শনী পৰিদৰ্শন কৰিছিল।
নতুন দিল্লীত আয়োজিত ৰাষ্ট্ৰীয় পৰ্যায়ৰ অনুষ্ঠানত অভিযানৰ সময়ত সংগ্ৰহ কৰা ই-আৱৰ্জনা নিষ্পত্তি আৰু প্ৰক্ৰিয়াকৰণৰ বাবে প্ৰশাসনিক সংস্কাৰ আৰু ৰাজহুৱা অভিযোগ বিভাগৰ (ডি এ আৰ পি জি) সচিব শ্ৰীমতী নিবেদিতা শুক্লা বাৰ্মা আৰু ডি এছ ই এলৰ সচিব শ্ৰী টি কে অনিল কুমাৰে চি পি চি বিৰ প্ৰমাণ-পত্ৰ থকা পুনৰ্ব্যৱহাৰকাৰীক হস্তান্তৰ কৰে।
কৰ্তব্য ভৱনত ই-আৱৰ্জনাৰ পাত্ৰ আৰু ভিত্তিচিত্ৰ স্থাপন ২
চলিত বৰ্ষৰ ১৪ অক্টোবৰত আন্তঃৰাষ্ট্ৰীয় ই-আৱৰ্জনা দিৱস উপলক্ষে ডি এছ ই এল-এ কৰ্তব্য ভৱন ২ত এটা ই-আৱৰ্জনা ভিত্তিচিত্ৰ আৰু ই-আৱৰ্জনা বিন স্থাপন কৰিছিল। বিদ্যালয়ৰ ছাত্ৰ-ছাত্ৰীসকলে সংগ্ৰহ কৰা ৬০ কেজি ই-আৱৰ্জনাৰ পৰা ভিত্তিচিত্ৰখন নিৰ্মাণ কৰা হৈছিল।
বিদ্যালয় শিক্ষাৰ জৰিয়তে পৰিৱেশগত দায়বদ্ধতা শক্তিশালী কৰা
বিশেষ অভিযান ৬-এ শিশু আৰু যুৱক-যুৱতীসকলৰ মাজত পৰিৱেশগতভাৱে দায়বদ্ধ আচৰণৰ বিকাশৰ ক্ষেত্ৰত গুৰুত্বপূৰ্ণ কেন্দ্ৰ হিচাপে বিদ্যালয়সমূহৰ ভূমিকাক শক্তিশালী কৰিছিল। বিশেষ অভিযান ৬ৰ প্ৰস্তুতিমূলক পৰ্যায়ত সমগ্ৰ দেশৰ বিদ্যালয়সমূহত ৬.২৯ লাখতকৈও অধিক ই-আৱৰ্জনা সজাগতা কৰ্মশালাৰ আয়োজন কৰা হৈছিল। ই-আৱৰ্জনা সংগ্ৰহ অভিযান, সজাগতা কাৰ্যকলাপ, সৃষ্টিশীল প্ৰদৰ্শনী আৰু পৰিষ্কাৰ-পৰিচ্ছন্নতা অভিযানৰ জৰিয়তে শিক্ষাৰ্থীসকলক পৰিৱেশ সজাগতাৰ সুযোগ প্ৰদান কৰিছিল।
বহনক্ষম জীৱনশৈলীৰ অনুশীলন, দায়িত্বশীল আৱৰ্জনা ব্যৱস্থাপনা, পৰিষ্কাৰ আৰু স্বাস্থ্যকৰ শিক্ষণ পৰিৱেশৰ প্ৰচাৰৰ বাবে বিদ্যালয় আৰু সম্প্ৰদায়সমূহত মিছন লাইফৰ বাবে ইকো ক্লাবৰ অধীনত বিভাগে দেশজুৰি কাৰ্যসূচীৰ আয়োজন কৰিছিল।
RRTN/BC