سائنس پر مبنی آبی گزرگاہوں کے انتظام وانصرام کو مضبوط بنانے کے لیے این آر اے اے، آئی سی اے آر-این بی ایس ایس اینڈ ایل یو پی اور محکمۂ اراضی وسائل کی جانب سے قومی سطح پر مشاورتی اجلاس کا انعقاد

دیہی ترقی کی وزارت کے محکمۂ اراضی وسائل (ڈی او ایل آر) نے زراعت اور کسانوں کی فلاح و بہبود کی وزارت کی قومی بارانی علاقوں کی اتھارٹی (این آر اے اے) اور ناگپور کے آئی سی اے آر – نیشنل بیورو آف سوائل سروے اینڈ لینڈ یوز پلاننگ (آئی سی اے آر-این بی ایس ایس اینڈ ایل یو پی) کے اشتراک کے ساتھ  عالمی بینک کی معاونت سے چلائے جانے والے پروگرام ’’جدید ترقی کے ذریعے زرعی لچک کے لیے آبی گزرگاہوں کی بحالی (ریوارڈ)‘‘ کے تحت بہتر آبی گزرگاہوں کے انتظام سے متعلق قومی تکنیکی رہنما خطوط کے مسودے پر دو روزہ تیسری قومی سطح کی مشاورتی میٹنگ کا انعقاد کیا ہے۔ یہ اجلاس 4 اور 5 نومبر 2026 کو آئی سی اے آر-این بی ایس ایس اینڈ ایل یو پی، ناگپور میں منعقد ہو رہا ہے۔ اس مشاورتی اجلاس میں اعلیٰ پالیسی سازوں، تکنیکی ماہرین، ترقیاتی شراکت داروں، محققین اور مختلف ریاستوں کے نمائندوں کو ایک پلیٹ فارم پر جمع کیا گیا ہے، تاکہ سائنسی، ٹیکنالوجی پر مبنی، کم لاگت اور عوامی شمولیت پر مبنی طریقوں کے ذریعے آبی گزرگاہوں کی ترقی کو مزید مستحکم بنانے پر تبادلۂ خیال کیا جا سکے۔

افتتاحی اجلاس میں محکمۂ اراضی وسائل کے سکریٹری جناب دلیپ کمار، آئی اے ایس؛ قومی بارانی علاقوں کی اتھارٹی (این آر اے اے) کے چیف ایگزیکٹیو افسر ڈاکٹر چندر شیکھر کمار، آئی اے ایس؛ محکمۂ اراضی وسائل کے جوائنٹ سکریٹری جناب نتن کھڈے، آئی اے ایس؛ عالمی بینک کی سینئر زرعی ماہر اور ٹاسک ٹیم لیڈر محترمہ پریتی کمار؛ این آر اے اے کی تکنیکی ماہر (آبی گزرگاہوں کی ترقی) ڈاکٹر سوساما سدھیشری اور آئی سی اے آر-این بی ایس ایس اینڈ ایل یو پی کے ڈائریکٹر ڈاکٹر این جی پاٹل کے علاوہ دیگر ممتاز مندوبین نے شرکت کی۔

افتتاحی اجلاس سے خطاب کرتے ہوئے محکمۂ اراضی وسائل کے سکریٹری جناب دلیپ کمار نے آبی گزرگاہوں کی ترقی کے پروگراموں میں سائنسی اصولوں کی پابندی اور ان پر عملی طور پر عمل درآمد کے درمیان توازن برقرار رکھنے کی ضرورت پر زور دیا۔ انہوں نے کہا کہ تکنیکی رہنما خطوط اتنے سخت نہیں ہونے چاہئیں کہ ان پر زمینی سطح پر عمل درآمد میں مشکلات پیدا ہوں۔ ریاستوں کی ادارہ جاتی صلاحیتوں، تکنیکی استعداد اور مختلف انتظامی طریقۂ کار کو مدنظر رکھتے ہوئے انہیں لچک فراہم کی جانی چاہیے۔

موثر مالیاتی انتظام کی اہمیت کو اجاگر کرتے ہوئے انہوں نے زور دیا کہ محکمہ کو مختص کیے گئے فنڈز ریاستوں کے ذریعے مؤثر اور تیز رفتار انداز میں استعمال کیے جانے چاہئیں۔

جناب دلیپ کمار نے تمام ریاستوں کے لیے یکساں طور پر قابل عمل ضروری معیارات کا ایک مجموعہ متعین کرنے کی اہمیت پر زور دیا، ساتھ ہی مقامی ضروریات کے مطابق دیگر مطلوبہ معیارات اختیار کرنے میں لچک فراہم کرنے کی بھی حمایت کی۔ انہوں نے ڈبلیو ڈی سی-پی ایم کے ایس وائی 2.0 کے نتائج کا جائزہ لینے، نفاذ میں موجود خامیوں کی نشاندہی کرنے اور ڈبلیو ڈی سی-پی ایم کے ایس وائی 3.0 کی مؤثر منصوبہ بندی اور عمل درآمد کے لیے تجربات سے سبق حاصل کرنے کی غرض سے مضبوط بنیادی اعداد و شمار اور جامع اثرات کے جائزوں کی ضرورت پر زور دیا۔

انہوں نے مزید کہا کہ آبی گزرگاہوں کی ترقی کا محور کسانوں اور مقامی برادریوں کے لیے ٹھوس نتائج کا حصول ہونا چاہیے۔ سائنسی اقدامات کو ایسے عملی اور مقامی ضروریات کے مطابق حل کی شکل اختیار کرنی چاہیے، جنہیں بنیادی سطح پر مؤثر انداز میں نافذ کیا جا سکے۔ انہوں نے ادارہ جاتی عزم کو مضبوط بنانے اور عمل درآمد کے معیار کو بہتر بنانے کے لیے بہتر کارکردگی کا مظاہرہ کرنے والی ریاستوں اور زمینی سطح پر کام کرنے والے افسران کی حوصلہ افزائی کرنے اور ان کی خدمات کے اعتراف کرنے پر بھی زور دیا۔

جناب دلیپ کمار نے کہا کہ مجوزہ قومی تکنیکی رہنما خطوط کو عملی اور قابل نفاذ نقطۂ نظر کے ساتھ حتمی شکل دی جانی چاہیے۔ انہوں نے اعتماد ظاہر کیا کہ ایک لچکدار اور حقیقت پسندانہ نفاذ کے نظام کے ذریعے مقررہ مقاصد کا 80 سے 90 فیصد حاصل کرنا، حد سے زیادہ سخت معیارات اپنانے کے مقابلے میں زیادہ بامعنی ہوگا۔

این آر اے اے کے چیف ایگزیکٹو آفیسر ڈاکٹر سی ایس کمار نے آبی ترقیاتی پروگراموں کی مؤثر منصوبہ بندی اور عمل درآمد کے لیے اعداد و شمار تک رسائی اور ان کی دستیابی کی اہمیت کو اجاگر کیا۔ انہوں نے مختلف سطحوں پر متعلقہ فریقوں کی جامع صلاحیت سازی کی ضرورت پر زور دیا اور پہلے سے موجود اعداد و شمار کے مجموعوں اور دستیاب سائنسی معلومات کے مؤثر استعمال کی وکالت کی۔ انہوں نے ایک ہم آہنگ قومی سطح کا فیصلہ سازی سے متعلق معاون نظام تیار کرنے پر بھی زور دیا، جس میں اوڈیشہ اور کرناٹک کے تیار کردہ نظاموں کی بہترین خصوصیات شامل ہوں، تاکہ آبی ترقیاتی منصوبہ بندی کو مؤثر اور مربوط بنایا جا سکے۔

اس موقع پر اظہارِ خیال کرتے ہوئے جناب نتن کھڈے نے قومی تکنیکی رہنما خطوط (این ٹی جیز) کو مقررہ مدت کے اندر حتمی شکل دینے کی اہمیت اجاگر کی۔ انہوں نے کہا کہ یہ مشاورتی اجلاس رہنما خطوط کے مسودے کو مکمل کرنے کی جانب ایک اہم قدم ہے۔ انہوں نے زور دیا کہ یہ رہنما خطوط مستقبل کے آبی ترقیاتی پروگراموں کے لیے ایک بنیادی لائحۂ عمل فراہم کریں گے۔

2047 تک ہندوستان کو ایک ترقی یافتہ ملک بنانے کے وژن کا حوالہ دیتے ہوئے جناب کھڈے نے بارانی علاقوں میں سائنسی بنیادوں پر ترقیاتی اقدامات کے ذریعے خشک سالی کے اثرات سے محفوظ ہندوستان کی تعمیر میں اپنا کردار ادا کرنے کے عزم کو اجاگر کیا۔

اراضی وسائل کی فہرست (ایل آر آئی) کی اہمیت پر زور دیتے ہوئے انہوں نے کہا کہ اس پر مبنی سائنسی اعداد و شمار، ڈیجیٹل سوائل لائبریری اور فیصلہ سازی سے متعلق معاون نظام (ڈی ایس ایس) آبی ترقیاتی منصوبہ بندی اور اس پر عمل درآمد کے عمل میں انقلابی تبدیلی لا سکتے ہیں۔ ان ذرائع کے ذریعے دیہی برادریوں اور انفرادی کسانوں کو قابلِ رسائی ڈیجیٹل پلیٹ فارم کی مدد سے مٹی اور پانی کے تحفظ کے منصوبوں، فصلوں کی ترتیب اور غذائی اجزا کے انتظام سے متعلق باخبر فیصلے کرنے میں مدد مل سکتی ہے۔

انہوں نے بڑے علاقوں پر محیط مٹی کے ڈیجیٹل نقشہ جاتی اعداد و شمار کے ذخائر تیار کرنے میں آئی سی اے آر-این بی ایس ایس اینڈ ایل یو پی اور بھارتی اراضی و مٹی کے استعمال کے سروے (ایس ایل یو ایس آئی) کی خدمات کو سراہا۔ انہوں نے اس بات پر زور دیا کہ مستقبل کے آبی ترقیاتی پروگراموں کے تحت اراضی وسائل کی فہرست (ایل آر آئی) کے دائرۂ کار کا تعین کرتے وقت پہلے سے موجود اعداد و شمار کی دستیابی، عمل درآمد کی مدت، لاگت کے اعتبار سے افادیت اور زمینی سطح پر قابلِ عمل ہونے جیسے عوامل کو مدنظر رکھا جانا چاہیے۔

جناب کھڈے نے ڈبلیو ڈی سی پی ایم کے ایس وائی 2.0 کے تحت پروجیکٹ پر عمل درآمد کی رفتار تیز کرنے کی ضرورت کو بھی اجاگر کیا۔ انہوں نے بتایا کہ پروجیکٹ کی مدت میں بتدریج کمی کی گئی ہے؛ ڈبلیو ڈی سی-پی ایم کے ایس وائی 1.0 کے تحت یہ مدت سات سال تھی، جو ڈبلیو ڈی سی-پی ایم کے ایس وائی 2.0 کے تحت گھٹا کر پانچ سال کر دی گئی ہے۔

انہوں نے مقامی ضروریات کو مدنظر رکھتے ہوئے جغرافیائی معلوماتی نظام (جی آئی ایس)، ریموٹ سینسنگ، اعلیٰ وضاحت والی سیارچہ جاتی تصاویر اور ڈرون ٹیکنالوجی کے مناسب استعمال کی ضرورت پر بھی زور دیا۔

کمیونیٹی کی شمولیت کی اہمیت اجاگر کرتے ہوئے انہوں نے کہا کہ روزگار کے مواقع بڑھانے، مصنوعات کی قدر میں اضافہ کرنے اور منڈیوں تک بہتر رسائی فراہم کرنے کے لیے کسانوں کی پیداواری تنظیموں (ایف پی اوز)، صارفین کے گروپوں (یو جیز)، خود امدادی گروپوں (ایس ایچ جیز) اور دیگر برادری پر مبنی اداروں کو مضبوط بنانے کی ضرورت ہے۔ انہوں نے پروجیکٹ کی مدت ختم ہونے کے بعد بھی پانی جمع کرنے کے ڈھانچوں کی دیکھ بھال میں مقامی برادریوں کی ملکیت کے احساس اور شمولیت کو مستحکم کرنے کی ضرورت پر بھی زور دیا۔

آئی سی اے آر-این بی ایس ایس اینڈ ایل یو پی کے ڈائریکٹر ڈاکٹر این جی پاٹل نے مربوط آبی منصوبہ بندی اور زمینی منظرنامے کی ترقی کے لیے ایک جامع اور سائنسی نقطۂ نظر کے طور پر اراضی وسائل کی فہرست کی اہمیت کو اجاگر کیا۔

اس مشاورتی اجلاس میں محکمۂ اراضی وسائل، این آر اے اے، عالمی بینک، ریوارڈ پروجیکٹ کی ریاستوں اوڈیشہ اور کرناٹک، غیر سرکاری تنظیموں، آئی سی آر آئی ایس اے ٹی، واسن، این آر ایس سی اور مینیج سمیت اشتراکی اداروں، نابارڈ اور آئی سی اے آر کے مختلف اداروں کے نمائندے شرکت کر رہے ہیں۔

دو روزہ یہ مشاورتی اجلاس اراضی وسائل کی فہرست، آبیاتی جائزوں، جغرافیائی معلوماتی نظام اور ریموٹ سینسنگ کے استعمال، فیصلہ سازی سے متعلق معاون نظام، مقامی برادریوں کی شمولیت، ذرائع معاش سے متعلق اقدامات اور نگرانی و جائزے کے طریقۂ کار پر تفصیلی تکنیکی تبادلۂ خیال اور معلومات کے اشتراک کے لیے ایک پلیٹ فارم فراہم کرتا ہے۔

توقع ہے کہ اس اجلاس میں ہونے والی بات چیت سے عالمی بینک کے تعاون سے چلائے جانے والے ریوارڈ پروگرام کے تحت قومی تکنیکی رہنما خطوط کو حتمی شکل دینے میں مدد ملے گی۔ یہ رہنما خطوط ڈبلیو ڈی سی-پی ایم کے ایس وائی 3.0 کے لیے بھی ایک اہم تکنیکی بنیاد فراہم کریں گے، جس سے ریاستوں میں سائنسی بنیادوں پر، کم لاگت، قابل توسیع اور شراکتی انداز میں آبی ترقیاتی منصوبہ بندی، عمل درآمد اور نگرانی کو فروغ ملے گا۔

یہ مشاورتی اجلاس سائنسی اور پائیدار آبی انتظام کے ذریعے موسمیاتی تبدیلیوں کے اثرات کا مقابلہ کرنے کی صلاحیت رکھنے والے زمینی خطوں کی تعمیر، آبی تحفظ کو مستحکم بنانے اور کسان برادریوں کے ذرائع معاش کو بہتر بنانے کے لیے قومی اور ریاستی سطح کے اداروں کے اجتماعی عزم کا اعادہ کرتا ہے۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

 (ش ح ۔  م م ع۔ع ن)

U. No. 7260