‘বিকশিত ভাৰত যুৱ সংবাদ: নো ইয়ৰ ভোট’ অভিযানৰ অধীনত মাই ভাৰতৰ দ্বাৰা এদিনতে ১০০ টা কাৰ্যসূচীৰ আয়োজন

যুৱ পৰিক্ৰমা আৰু ক্ৰীড়া মন্ত্ৰালয়ে মেৰা যুৱ ভাৰত (মাই ভাৰত)ৰ জৰিয়তে নিৰ্বাচনী সজাগতা বৃদ্ধি কৰাৰ লগতে গণতন্ত্ৰত যুৱ প্ৰজন্মৰ সচেতন আৰু দায়িত্বশীল অংশগ্ৰহণক উৎসাহিত কৰাৰ উদ্দেশ্যে গ্ৰহণ কৰা দেশজোৰা ‘বিকশিত ভাৰত যুৱ সংবাদ: নো ইয়ৰ ভোট’ অভিযানৰ অংশ হিচাপে আজি ২৩ খন ৰাজ্য/কেন্দ্ৰীয়শাসিত অঞ্চলত ১০০ টা যুৱ সংবাদৰ আয়োজন কৰে। এই কাৰ্যসূচীসমূহত ১৬,৬০০তকৈ অধিক যুৱক-যুৱতী আৰু ১০০ গৰাকী যুৱ আইকনে অংশগ্ৰহণ কৰে, য’ত জনপ্ৰতিনিধিসকলৰ সৈতে মত বিনিময় আৰু ভোটাধিকাৰ, নাগৰিকৰ দায়িত্ব তথা গণতন্ত্ৰ শক্তিশালী কৰাত যুৱপ্ৰজন্মৰ ভূমিকা সম্পৰ্কে আলোচনা কৰা হয়।

এই অনুষ্ঠানসমূহে উত্তৰ ভাৰতৰ দিল্লী, হাৰিয়ানা, হিমাচল প্ৰদেশ, পঞ্জাব, উত্তৰাখণ্ড আৰু উত্তৰ প্ৰদেশ; দক্ষিণ ভাৰতৰ তামিলনাডু, কেৰালা, কৰ্ণাটক আৰু পুডুচেৰী; উত্তৰ-পূৰ্বাঞ্চলৰ অৰুণাচল প্ৰদেশ, অসম, মণিপুৰ আৰু মিজোৰাম; পূব ভাৰতৰ বিহাৰ, ঝাৰখণ্ড, ওড়িশা আৰু পশ্চিম বংগ; মধ্য ভাৰতৰ ছট্টিশগড় আৰু মধ্য প্ৰদেশ; তথা পশ্চিম ভাৰতৰ গুজৰাট, মহাৰাষ্ট্ৰ আৰু ৰাজস্থানক সামৰি লৈছে। আজিৰ এই কাৰ্যসূচীসমূহৰ জৰিয়তে ২৬.১০.২০২৬ ৰ পৰা ০৫.১১.২০২৬ লৈ অনুষ্ঠিত হৈ থকা এই অভিযানে ৩১ খন ৰাজ্য/কেন্দ্ৰীয়শাসিত অঞ্চলত মুঠ ৪১১ টা যুৱ সংবাদ সম্পূৰ্ণ কৰাৰ লগতে ৭৭,৫০০ গৰাকী যুৱক-যুৱতী আৰু ৪১১ গৰাকী যুৱ আইকনৰ অংশগ্ৰহণ নিশ্চিত কৰিলে।

দিল্লীত কেন্দ্ৰীয় মন্ত্ৰী শ্ৰী অৰ্জুন ৰাম মেঘৱালে মেহৰৌলী এলেকাত অনুষ্ঠিত যুৱ সংবাদত অংশগ্ৰহণ কৰে, য’ত তেওঁ শিক্ষাৰ্থীসকলৰ সৈতে মত বিনিময় কৰাৰ লগতে নিৰ্বাচনী প্ৰক্ৰিয়া সম্পৰ্কে তেওঁলোকৰ প্ৰশ্নসমূহৰ উত্তৰ দিয়ে। হাৰিয়ানাত ভিৱানীৰ সাংসদ শ্ৰী চৌধুৰী ধৰমবীৰ সিঙে যুৱ অংশগ্ৰহণকাৰীসকলৰ সৈতে মত বিনিময় কৰে আৰু ভোটদান তথা নিৰ্বাচনী সজাগতা সম্পৰ্কে নিজৰ মতামত আগবঢ়ায়। পঞ্জাবত মাই ভাৰতে চিটী বিশ্ববিদ্যালয়ৰ সহযোগত লুধিয়ানাত আৰু তাৰ্ণ তাৰণৰ গুৰু অৰ্জন দেৱ মহাবিদ্যালয়ত কাৰ্যসূচীৰ আয়োজন কৰে।

অসমত সাংসদ শ্ৰী প্ৰদান বৰুৱা আৰু শ্ৰী ৰঞ্জিত দত্তই ক্ৰমে ধেমাজি আৰু তেজপুৰত (শোণিতপুৰ) যুৱ অংশগ্ৰহণকাৰীসকলৰ সৈতে মত বিনিময় কৰে। এই আলোচনাসমূহে শিক্ষাৰ্থীসকলক প্ৰশ্ন উত্থাপন কৰিবলৈ, সন্দেহ নিৰসন কৰি ল’বলৈ আৰু ভোটাৰ সজাগতা তথা গণতান্ত্ৰিক অংশগ্ৰহণৰ ক্ষেত্ৰত মাৰ্গদৰ্শন লাভ কৰিবলৈ  সুযোগ প্ৰদান কৰে। ছট্টিশগড়ত মাই ভাৰতে ধামতাৰী আৰু কৱৰ্ধাত যুৱ সংবাদৰ আয়োজন কৰে। ধামতাৰীত সাংসদ শ্ৰীমতী ৰূপকুমাৰী চৌধুৰীয়ে ছাত্ৰ-ছাত্ৰীসকলৰ প্ৰশ্নৰ উত্তৰ দিয়ে, আনহাতে যুৱ আইকন শ্ৰী গুলাব সিং বাৰ্মাই ‘ইয়ৰ ভোট, ইয়ৰ ভইচ’ শীৰ্ষক উপস্থাপনৰ জৰিয়তে ভোটাধিকাৰ আৰু নাগৰিকৰ দায়িত্বৰ বিষয়ে আলোকপাত কৰে। কৱৰ্ধাত সাংসদগৰাকীয়ে যুৱক-যুৱতীসকলৰ সৈতে মত বিনিময় কৰে আৰু যুৱ আইকন শ্ৰীমতী অদিতি মিশ্ৰই সচেতন নাগৰিকত্বৰ বাবে অনুপ্ৰাণিত কৰে। অংশগ্ৰহণকাৰীসকলে নাগৰিক হিচাপে নিজৰ দায়িত্ব পালনৰ সংকল্পও গ্ৰহণ কৰে।

বিহাৰৰ ভাগলপুৰৰ কাৰ্যসূচীত ভোটাৰ পঞ্জীয়ন, নিৰ্বাচনী প্ৰক্ৰিয়া আৰু স্বতন্ত্ৰ তথা নীতিগত ভোটদানৰ গুৰুত্বৰ ওপৰত আলোকপাত কৰা হয়। লগতে আলোচনাসমূহত প্ৰথমবাৰৰ বাবে ভোট দিবলগীয়া ভোটাৰসকলক কোনো প্ৰলোভন বা অযথা প্ৰভাৱৰ বশৱৰ্তী নোহোৱাকৈ গণতান্ত্ৰিক প্ৰক্ৰিয়াত দায়িত্বশীলভাৱে অংশগ্ৰহণ কৰি নিজৰ ভোটাধিকাৰ সাব্যস্ত কৰিবলৈ উৎসাহিত কৰা হয়।

মধ্য প্ৰদেশত অনুপপুৰ, দামোহ, ঝাবুৱা, খাৰগোন (পশ্চিম নিমাৰ) আৰু মাণ্ডলাত যুৱ সংবাদ অনুষ্ঠিত হয়। এই কাৰ্যসূচীসমূহত মাই ভাৰতৰ কাম-কাজৰ পৰিচয়, ‘নো ইয়ৰ ভোট’ শীৰ্ষক উপস্থাপন, যুৱ অংশগ্ৰহণকাৰীসকলৰ সৈতে মত বিনিময় আৰু সামূহিক গণতান্ত্ৰিক সংকল্প গ্ৰহণ অন্তৰ্ভুক্ত আছিল। মাণ্ডলাৰ অধিৱেশনত যুৱপ্ৰজন্মৰ দৃষ্টিভংগী, নিৰ্বাচিত জনপ্ৰতিনিধিসকলৰ সৈতে মত বিনিময় আৰু ক্ৰীড়া অভিজ্ঞতা একেলগ কৰি গণতান্ত্ৰিক মূল্যবোধ তথা ৰাষ্ট্ৰ নিৰ্মাণৰ গুৰুত্বক পুনৰ দৃঢ় কৰা হয়।

এই দেশজোৰা পদক্ষেপে গণতান্ত্ৰিক অংশগ্ৰহণ সম্পৰ্কীয় আলোচনাসমূহক মহাবিদ্যালয় আৰু শিক্ষানুষ্ঠানসমূহলৈ লৈ গৈছে, যাৰ ফলত যুৱ প্ৰজন্মই জনপ্ৰতিনিধিসকলৰ সৈতে পোনপটীয়াকৈ মত বিনিময় কৰাৰ সুবিধা পাইছে আৰু সচেতন নাগৰিক হিচাপে নিজৰ ভূমিকা সম্পৰ্কে আলোচনা কৰিবলৈ এখন মঞ্চ লাভ কৰিছে।

*****

Gaurav Saini/MM